Maatiu

10 Okoŋ kɔɔli, mi Chiisu veelu kiilaa nduaa 12 nda naapilɛ, mbo ke nda kpaayaa le nyinaa wɔɔŋnda touwɔɔ+ a le naala suu o suu siŋgioo.

2 Diola kiilaa 12 nda la cho laŋ ni:+ Saimɔŋ, o nda veelu vɛlɛ aa Pitɛ wo,+ nda Andulu+ pɔmbɔ ndɔ, a puaa Sɛbidi wa, Chemisi nda Chɔŋ+ pɔmbɔ ndɔ. 3 Filipi nda Batolomi,+ Tɔmɔsi+ nda Maatiu+ wana biyaa paawaa,* Chemisi po Afiɔɔsi wo, Tadiɔɔsi, 4 Saimɔŋ Wana Dialuŋ Fulaa, a Chuda Isikaliɔɔ, o pisi ndu o mɛɛlulaŋ ndo.+

5 Mɛɛ Chiisu wa kiilaa 12 nda haa viomɔɔ, mbo sila nda aa:+ “La kua o wanaa cho ŋChuu le wa lo le. Nduyɛ la kua o chieeŋ Sameeliaŋnda niŋ te.+ 6 Kɛ, la wa kɔlaŋ o wanaa cho maa saa luusiaŋnda lo o Isɔluɛi niŋ.+ 7 Te la kuɛ pɛ, la dimul nda aa: ‘Masale Mɛlɛkaleŋ o choo choo niŋ le cho niŋ kpɛɛluŋ.’+ 8 La siŋgi wanaa cho a naalaŋ nda,+ mi la miŋgi wanaa vi wa yoomu. La siŋgi wanaa nɔ lɛlɔŋ nda, nduyɛ mi la tou nyinaa wɔɔŋnda waŋnda kɔɔli. Fondo nya sɔla ni, nya bɛɛ la yɔŋgu fondo. 9 La kua a ŋkoolii, kanii humbu, ɔɔ kapaa le nyapila le.+ 10 La chua bɔlɔ kelaa le, la chua domala tiɔɔŋ te, la chua kɔwɛila* cheleŋ te,+ nduyɛ la chua tinda le, kanifuule wana wallo nɔ mbo sɔla nyɛdiaa ndɔɔ.+

11 “Chiee o chiee ɔɔ sɔndɔkɔlɔ o sɔndɔkɔlɔ nya fuuluu pɛ, la nuuviaa wana nɔ yeemɛi yo, nduyɛ mi la lo ndu o bɛŋgu choo haaa mi la faŋaŋ loŋ.+ 12 Te la luɛi pɛ chiɛiniŋ, la yil* wanaa nya komal loŋ nda. 13 Te a chɛl nya pɛ, kɔl nyulu nya kuɛ wo cho nda wa choo.+ Kɛ te a kɛɛ nya pɛ, kɔl nyulu nyaa miiŋgu nya choo. 14 Te wana o wana o chiɛi koŋ ɔɔ o chiee koŋ niŋ kɛɛ nya pɛ, ɔɔ mbo yeŋ nya lani le, te la wa faŋaŋndo loŋ pɛ, la koŋ chundu cho nya o ŋpelu wo.+ 15 A tonya mi dimul nya, o Paale Kɔɔsɔleŋ choo, i cho wa ikala kpoke le chiee koŋ, mbo hiou Sodɔm a Komoolua.+

16 “I cho nya viomɔɔ maa lasaa visiaa biyaa tɛɛŋ. Lelaŋ, la wa yekeŋ maa kɛuwa, nduyɛ mi la nɔ taasioo maa piinda.+ 17 La mandaŋ a waŋnda chieeya, kanifuule a cho lakɔ a nya o toŋgola kɔɔsɔlaŋ niŋ,+ nduyɛ ma lɔɔ nya+ o chiɛila Chuuwa piɛi Mɛlɛka laŋ niŋ.+ 18 A kua niŋ a nya o wanaa bɛnduaa lo a o masaa waa+ lo le sabu nuu. Hei cho wa maa lesei le nda a wanaa cho ŋChuu le wa.+ 19 Kɛ te a kuɛ pɛ a nya, la buulaŋ a nyɛ nya nɔ le dimioo wo, ɔɔ mɛɛ nya nɔ le suɛi yɛ le. Kanifuule, la cho sɔla nyɛ nya nɔ le dimioo wo a teleŋ koŋ.+ 20 O ve niŋ nya kinɛi le cho wa suɛi le. Kɛ nyina Mɛlɛka Finya nya wo cho nya mala ni mi la soo.+ 21 Waŋndo mal niŋ pɔmbɔ ndɔ ɔɔ bɛ ndɔ waŋnda o ba ma dii ndu. Finyaa mal niŋ chuauwaa nduaa waŋnda o ba ma dii nda. Chuauwa simul niŋ wanaa velu nda wa, nduyɛ ma mal wanaa velu nda wa waŋnda o ba ma dii nda.+ 22 Waŋnda kpou cho nya yɛleŋ tul le diola nilaŋ.+ Kɛ wana o wana biunuŋ pɛ haaa o mɛɛlulaŋ, o cho pioŋɔɔ sɔla.+ 23 Te a tusi nya pɛ nyɛpalaa choo o chioo hoo niŋ, la nyaanuŋ o chiee cheleŋ niŋ.+ A tonya mi dimul nya, la cho chii chiooŋ kpou o Isɔluɛi niŋ bɔŋa le, mi Po wanachioo hiŋ.

24 “Sukuunɔɔ* hiu wana ndɔ pɛɛkaa le. Nduyɛ, chiɔɔ hiu masanɔ ndɔɔ le.+ 25 Sukuunɔɔ nɔ mbo naŋ kɔl le simnɔŋndo maa wana ndɔ pɛɛkaa, nduyɛ mi chiɔɔ bɛɛ naŋ kɔl le simnɔŋndo maa masanɔ ndɔɔ.+ Te waŋnda veelu pɛ wana cho yuŋgoo bolleŋ ndo aa Bɛɛsibɔɔ,*+ ɔɔ niŋ wanaa cho ndu o ba bɛŋgu wa? 26 Lelaŋ, la yɔŋ isiooŋ le nda le, kanifuule nyɛ o nyɛ cho o kumbaa, o cho hunɔɔ fula kpendekele. Nyɛ o nyɛ cho o viaŋnaŋ, waŋnda cho hunɔɔ sina a ndu okɔɔ.+ 27 Nyɛ ya cho nya dimullo naa nyaa kpeele wo, la dimi ndu waŋnda o hɔl kpendekele. Nyɛ nya tuei mi dimi toolo wo, la yonda ndu o chiɛilaŋ choo.+ 28 Nduyɛ, la yɔŋ isiooŋ le wanaa dii dialloŋ, kɛ a nɔla ma dii yoomoo le wa le.+ La nɔ siooŋnde le wana nɔla mbo tɛɛmbuu dialloŋ a yoomoo Kɛhɛna* wo.+ 29 Nɛɛnɛɛya cho youwaa nɔ baa bɔɔ le, vɛ o cho lende le? A ŋiɔɔŋ kanii kpalɛiye i pilɛ* nda pisi nda ni. Kɛ o pilɛ bɛɛ sɔla piɔmndo mi Finya nya kɛɛ sina a ndi okɔɔ le.+ 30 Yiiŋii cho nya o lebol le bɛɛ, Mɛlɛka sina mɛɛ kpɛ i cho yɛ. 31 Lelaŋ, la yɔŋ isiooŋ te. La cho a sɔvɛ mbo hiau nɛɛnɛɛya poloŋ, mɛɛ mɛɛ nda wa faŋga.+

32 “Wana o wana chɔm pɛ waŋnda o hɔl+ maa buɛi nuu o cho ni, ya bɛɛ cho Finya nuu o choo choo niŋ chɔm maa buɛi nuu o cho ni.+ 33 Kɛ wana o wana kɛɛ ya pɛ waŋnda o hɔl, ya bɛɛ cho ndu kɛɛ Finya nuu o choo choo niŋ o hɔl.+ 34 La yiyaŋ nuaa maa kɔl nyuloo le ya hiŋ o lɛŋndeŋ choo le. O cho kɔl nyulu le ya hiŋ te, kɛ piɔuwaŋndo* ya hiŋ waŋnda lueiyo tɛɛŋ ni.+ 35 I cho piɔuwaŋndo luei poo nda finya ndɔ tɛɛŋ, chuaa nda kala ndɔ, vɛlɛ a lanɔɔ nda kalalɛi ndɔ tɛɛŋ.+ 36 Waŋndo, o ndupila lo chiɛiniŋ yaamɔɔwaa nduaa fula niŋ ni. 37 Wana o wana kaala finya ndɔ ɔɔ kala ndɔ mbo hiou ya pɛ, mɛɛ o suliŋ le mbo wa buɛi ni le. Nduyɛ wana o wana kaala po ndɔɔ ɔɔ chua ndɔɔ mbo hiou ya pɛ, mɛɛ o suliŋ le mbo wa buɛi ni le.+ 38 Wana o wana ve o bɛɛndiaŋ mbo chua yɔm ndɔ imɔnɔɔ* mbo tol la kɔɔli le, o suliŋ le waa buɛi ni le.+ 39 Wana o wana kindiŋ pɛ le yoomu ndɔɔ piŋioo, o cho ndu hiɔlɔŋ. Nduyɛ wana o wana yoomu ndɔɔ hɛluŋ pɛ le sabu nuu, o cho ndu sɔla.+

40 “Wana o wana chɛl nya pɛ, mɛɛ ya o chɛl koŋ ni. Nduyɛ wana o wana chɛl la pɛ, mɛɛ wana vem ya wo o chɛl koŋ ni.+ 41 Wana o wana chɛl pɛ wana suaa le Mɛlɛka wo le mɛɛ o cho wana suaa le Mɛlɛka wo yɛ, o cho fanda+ wana suaa le Mɛlɛka wo sɔla. Wana o wana chɛl pɛ wana cho sakpo wo le mɛɛ o cho sakpo yɛ, o cho fanda wana cho sakpo wo sɔla. 42 A tonya mi dimul nya, wana o wana ke pɛ buɛiyaa niaa tusiaŋnda haa o pilɛ mɛŋma kolaŋ o yɔŋ bɛɛ aa taalaa cha le mɛɛ o cho buɛi nuu yɛ, wana koŋ cho hunɔɔ fandaa sɔla.”+