Maatiu

25 “Masale Mɛlɛkaleŋ le cho ko maa chuaa laanduaa yufuaa ŋwaŋ tɔ, a chua lambuila ndalaŋ+ ma kua wana cho lanɔɔ chuaa wo demullo wa.+ 2 A ŋuɛɛnu ndaa nɔ diɔmnde, kɛ a ŋuɛɛnuaa apiliaa ndaa nɔ taasioo.+ 3 Mi a diɔmnda chua lambuila ndalaŋ, kɛ a chue chuɛima cheleŋ te. 4 Kɛ mi a taasiaa chua lambuila ndalaŋ a chuɛima cheleŋ. 5 Nduyɛ wana wa lanɔɔ chuaa wo yala hunɔɔ le, okoŋ mi luaŋ ma bii nda kpou, ma hiaunuŋ o luaŋ. 6 A ditɛɛŋndo kpeŋ, ma tuɛi yondaa aa: ‘Wana cho lanɔɔ chuaa wo hiŋ! La kɔ demul ndu.’ 7 Okoŋ, mi chuaa laanduaa yufuaa haa kpou tiandu o luaŋ ma bɛɛndiaa lambuila ndalaŋ.+ 8 Mi a diɔmnda dimul a taasiaa aa, ‘La ke naa chuɛima nyaŋ ma tiŋ, kanifuule lambuila naalaŋ la hiŋ nyumndo.’ 9 Mi a taasiaa dimul nda aa: ‘Ma ve niŋ letuu le naa nyaa le. La kɔ o wanaa pisi maŋ nda lo, mi la kɔ piondu ma nyaŋ.’ 10 Mɛɛ nda wa kɔlaŋ le maŋ piondɔɔ, mi wana cho lanɔɔ chuaa wo koma huŋ. Mi yufuaa wa a bɛɛndiaŋ nda luɛi a ndu latulu le nyɛdiaa nɔ kɛsiaa,+ okoŋ ma kinda dioo. 11 Mɛɛ teleŋ tiŋ hiou, mi yufuaa apiliaa bɛɛ huŋ, ma dimi aa: ‘Fallo, Fallo, kumbul naa dioo fɔ!’+ 12 Kɛ mbo dimul nda aa: ‘Mi dimul nya tonyaa, I sina nya le.’

13 “Lelaŋ, la wa lahɔl,+ kanifuule la sina paaleŋ kɛlɛŋgaa hawɛiyo* le.+

14 “I cho ko maa po pilɛ. Mɛɛ o wa kɔlaŋ kelaa o lɛŋnde cheleŋ niŋ, mbo veelu buɛiyaa nduaa mbo mel nda nyɛm kɛŋ ndɔŋ le ma wa muŋ hɔlteŋ.+ 15 Mbo ke o pilɛ talɛŋndoŋ ŋuɛɛnu,* o pilɔɔ ŋ muuŋ, nduyɛ o pilɔɔ i pilɛ. Mbo ke nda muŋ mɛɛ o kɛ kɛ nɔla wallo yɛ, okoŋ mbo kuaŋnuŋ. 16 O lepilɛ niŋ kpe, mi buɛi sɔla talɛŋndoŋ ŋuɛɛnu wo kua bɛɛ mbo kandu yulaleŋ tosaa a muŋ, nduyɛ mbo sɔla talɛŋndoŋ ŋuɛɛnu lechoo. 17 O sɔla talɛŋndoŋ ŋ muuŋ ndo bɛɛ, mbo sɔla ŋ muuŋ lechoo. 18 Kɛ buɛi sɔla talɛŋnde i pilɛ kpe wo ndu, mbo kɔ tou sooŋndo mbo kumbu kanii* masanɔ ndɔɔ leniŋ.

19 “Mɛɛ nyɔɔ viou tei, mi masanɔ ndaa huŋ, nduyɛ mbo veelu nda le ma dɔɔnuŋ kona.+ 20 Mi buɛi sɔla talɛŋndoŋ ŋuɛɛnu wo huŋ a talɛŋ cheleŋ ŋuɛɛnu mbo ke masanɔ ndɔɔ. Mbo dimi aa: ‘Masanɔɔ, a ke ya talɛŋndoŋ ŋuɛɛnu. Kɛ, I sɔla talɛŋndoŋ ŋuɛɛnu lechoo.’+ 21 Mi masanɔ ndɔɔ dimul ndu aa: ‘Nuwali tau. A cho bɔɔ buɛi kɛndɛ nduyɛ ma wa sakpo! Le mɛɛ ŋ wa sakpo o nyɛm pɔmbɔŋ choo yɛ, I cho num handɔɔ nyɛm bɔɔbɔɔ bolleŋ.+ Sɔɔŋguu niko miŋ dɔɔnuŋ nyaale latulu.’+ 22 Okoŋ kɔɔli, mi buɛi sɔla talɛŋndoŋ ŋ muuŋ ndo bɛɛ huŋ mbo dimi aa: ‘Masanɔɔ, a ke ya talɛŋndoŋ ŋ muuŋ. Kɛ, I sɔla talɛŋndoŋ ŋmuuŋ lechoo.’+ 23 Mi masanɔ ndɔɔ dimul ndu aa: ‘Nuwali tau. A cho bɔɔ buɛi kɛndɛ nduyɛ ma wa sakpo! Le mɛɛ ŋ wa sakpo o nyɛm pɔmbɔŋ choo yɛ, I cho num handɔɔ nyɛm bɔɔbɔɔ bolleŋ. Sɔɔŋguu niko miŋ dɔɔnuŋ nyaale latulu.’

24 “O mɛɛlulaŋ kpɔŋ, mi buɛi sɔla talɛŋnde i pilɛ wo huŋ, mbo dimi aa: ‘Masanɔɔ, I sina maa suɛi numnde kendu bɔɔ. Naa ŋ seŋ te wa, loŋ ŋ kuau ni. Nduyɛ naa ŋ tol te wa, loŋ ŋ kendi ni.+ 25 Le saboo hoo siooŋnde bii ya ni mi kɔ vioŋ kanii numnde o puuloo bɛŋgu. Lelaŋ, a che nyɛ ŋ ke ya wo.’ 26 Okoŋ, mi masanɔ ndɔɔ dimul ndu aa: ‘A cho bɔɔ buɛi dɛnɛ wɔɔŋ bɛndu. Nduyɛ a cho wana siɛlɛi bɛndu. A sina maa naa ya seŋ te wa, loŋ ya kuau ni. Nduyɛ maa naa ya tol te wa, loŋ ya kendi ni, lende le? 27 Mɛɛ le yɛɛnɛ a dou kanii nii o chiɛi kɛsiaa nyɛsɔlaa niŋ te? Mɛɛ ya hiŋ nuaa yɛ, I wa ndi chua a tɔnɔɔ lechoo.

28 “‘La puu ndu talɛŋnde o ba, mi la ke wana nɔ talɛŋndoŋ tɔ wo.+ 29 Kanifuule, wana o wana nɔ o ba, o cho chɔɔlu sɔla tau, nduyɛ mbo kui ndu o ba. Kɛ wana o wana nɔ le, hali o pɔmbɔ o nɔ wo bɛɛ, a cho ndu ndu poonda o ba.+ 30 Nduyɛ buɛi fondoo hoo ndu ndu, la viou ndu o bɛɛ o nyumndaŋ niŋ. Loŋ o wa niŋ koŋullo a chiŋndoŋ sɔmndo ni.’

31 “Te Po wanachioo+ hiŋ pɛ hunɔɔ lemasaa a maalikɛiya kpou latulu,+ o chal niŋ o kpeŋgbei* ndɔ lemasa kɛndɛ bɛndoo choo. 32 Okoŋ mi kaalaŋ kpou la chuuŋgiaŋ ndu o hɔl. Mbo piɔu waŋnda chieeya tɛɛŋ mɛɛ wana mandaa lasaa piɔu saa a chuiŋnda tɛɛŋ yɛ. 33 O cho saa+ hivi o ba ndɔ kɛndɔɔ choo, nduyɛ mbo hivi chuiŋnda o ba ndɔ miallo choo.+

34 “Okoŋ, Masaa cho wanaa cho wa o ba ndɔ kɛndɔɔ choo wa dimul aa: ‘La huŋ, nya Finya nuu dɔu sala wa. La huŋ luɛi o Masale o bɛɛndiaa le nya chɔŋ a kandɔŋ chieeŋndo leŋ niŋ. 35 Kanifuule, I wa a yiaaŋ, mi la ke ya nyɛdiaa. I wa a bolola vesɛilaŋ, mi la ke ya mɛŋndaŋ mi kol. I wa miallo, mi la yiya ya.+ 36 I wa a fɛlioo, mi la ke ya nyɛ chuɛɛnaŋndo.+ I wa a naa, mi la manda ya. I wa o chiɛi manyumndo niŋ, mi la kua ya yilɔɔ.’+ 37 Okoŋ mi wanaa cho sakpo wa nyuna ndu aa: ‘Masanɔɔ, teleŋ kuɛɛnɛ naŋ che yɛ num a yiaaŋ, miŋ ke num nyɛdiaa, ɔɔ a bolola vesɛilaŋ, miŋ ke num mɛŋndaŋ ma kol?+ 38 Teleŋ kuɛɛnɛ ŋ wa yɛ miallo, miŋ yiya num, ɔɔ a fɛlioo, miŋ ke num nyɛ chuɛɛnaŋndo? 39 Teleŋ kuɛɛnɛ naŋ che yɛ num a naa, ɔɔ o chiɛi manyumndo niŋ, miŋ kua num yilɔɔ?’ 40 Okoŋ mi Masanɔɔ mulul nda aa, ‘A tonya mi dimul nya, te la tosal puaapiliaa niaa tusiaŋnda haa o pilɛ bɛɛ sɔɔŋ muŋ pɛ, mɛɛ ya nya tosal ni.’+

41 “Okoŋ kɔɔli, Masaa cho wanaa cho wa o ba ndɔ miallo choo wa dimul aa: ‘La faŋaŋ ya nanuŋ,+ nya Mɛlɛka kilul yamɛi le kɔlaŋ o yiŋnde fafɛɛŋndeŋ niŋ ni,+ le o bɛɛndiaa le Setana* a maalikɛiyaa nduaa leŋ.+ 42 Kanifuule, I wa a yiaaŋ, kɛ la ke ya nyɛdiaa le. I wa a bolola vesɛilaŋ, kɛ la ke ya mamɛŋ mi kol te. 43 I wa miallo, kɛ la yiya ya le. I wa a fɛlioo, kɛ la ke ya nyɛ chuɛɛnaŋ te. I wa a naa, nduyɛ mi wa o chiɛi manyumndo niŋ, kɛ la kue ya yilɔɔ le.’ 44 Okoŋ mi nda bɛɛ nyuna ndu aa, ‘Masanɔɔ, teleŋ kuɛɛnɛ naŋ che yɛ num a yiaaŋ, ɔɔ a bolola vesɛilaŋ, ɔɔ miallo, ɔɔ a fɛlioo, ɔɔ a naa, ɔɔ o chiɛi manyumndo niŋ, miŋ kɛɛ le num malaa?’ 45 Okoŋ mbo mulul nda aa, ‘A tonya mi dimul nya, te la kɛɛ puaapiliaa niaa tusiaŋnda haa o pilɛ bɛɛ sɔɔŋ muŋ tosallo pɛ, mɛɛ ya nya kɛɛ muŋ tosallo ni.’+ 46 Waŋnda haa cho tambii fafɛɛŋnde sɔla,+ kɛ mi wanaa cho sakpo wa sɔla yoomu fafɛɛŋndo.”+