Polowaa
19 Waa wana bala fondoo ma tosa sɔɔŋ o nɛi sakpoo choo bɛnda,+
Mbo hiau waa diɔmndo nduyɛ ma dimi choolaŋ.+
2 O bɛnda mi waŋndo kɛɛ kɔl kaloo nɔɔ le.+
Nduyɛ te wana lau* pɛ o sɔɔŋ tosaa niŋ, a tosa hakioo.
3 Waŋndo, diɔmii nduɛi yaa ndu o nɛi wɔɔŋndo choo ni,
Nduyɛ mbo dɔɔnuŋ tumbe a Chɛhowa.
4 Te wana nɔ sullo pɛ, a sɔla chaŋyaŋ tau.
Kɛ wana bala fondoo ndu, hali chaaŋaa nduaa bɛɛ ma fafaŋ ndu.+
5 Wana timbi seile lakafaleŋ ndo, dɛnɛ palaa nda tusi ndu choo ni.+
Nduyɛ, wana yoomu mi choolaŋ la fula wo heluŋ niŋ te.+
6 Wanaa bɔɔbɔɔ yeema mi wana fula tɔɔ wo* hini kɔl a nda.
Nduyɛ, wana o wana yeema mbo bii wana tosa kɛndɛi yo ichaŋya.
7 Wana bala fondoo, mi wanaa nda fula kala pilɔɔ wa kpou tul ndu leyɛ.+
Nduyɛ chaaŋaa nduaa bɛɛ, ma fafaŋ ndu!+
O nyɔɔlu niŋ bɛɛ nda o nyɛ o nyɛ niŋ, a mulul ndu le.
8 Wana o wana nɔ pɛ kɔl kalu kpeekpeiyo, mɛɛ o kaala ndupila.+
Nduyɛ wana o wana che pɛ sinapɛŋgoo nyɛ sɔvɛ,* o cho batiuwaa sɔla.+
9 Wana timbi seile lakafaleŋ ndo, dɛnɛ palaa nda tusi ndu choo ni.
Nduyɛ, wana yoomu mi choolaŋ la fula wo cho tambei sɔla.+
10 Mɛɛ o bɛnda mi diɔmndo wa o sullo choo le yɛ,
O bɛnda vɛlɛ mi buɛiyo simnuŋ masaa masaa waa choo le.+
11 Te waŋndo nɔ pɛ sinapɛŋgoo, keŋ tosa o doonuŋ tumbe chɔ chɔ le.+
Nduyɛ, mbo sɔla bɛɛleŋ tau le mɛɛ o hendu kɔllo o sɔɔŋ wɔɔŋ nda tosal ndu woŋ choo le yɛ.+
12 Kɔl tuu masaa cho ko mɛɛ kpɔkuŋndo* pɛɛliaa nuaa yɛ,+
Kɛ te o hini kɔl a num pɛ, o wa ko mɛɛ mɔmndo chuchu nuaa o billo choo yɛ.
13 Po diɔmndo chuu finya ndɔ kpundɔɔ ni.+
Nduyɛ lanɔ lasɛɛŋgiaŋndo cho ko mɛɛ chiɛiyo wa nuaa o pɛŋgi lullo le yɛ.+
14 Chiɛiyo a nyɛm kiɔɔŋ, finyaa o ba wana sɔla muŋ ni.
Kɛ lanɔ taasioo, Chɛhowa ke wana ndu ni.+
15 Siɛlɛiye huŋ a lɔma bɛnduaŋ ni.
Nduyɛ wana isiɛlɛiyo lɔl a yiaaŋ ni.+
16 Te waŋndo bii pɛ sawala Mɛlɛkalaŋ, o cho hiouwɔɔ lachi a waa yoomu.+
Kɛ wana buulaŋ le fulamakɔɔlila sɔɔŋ o tosa woŋ te wo cho wu.+
17 Wana o wana tosal pɛ wana bala fondoo kɛndɛi, mɛɛ Chɛhowa o cho kuoo wuuwo ni.+
Nduyɛ, o cho ndu paawa* le sɔɔŋ o tosa woŋ.+
18 Sila po numndo boondii o nɔla wɔ mbo chɛl silaa ve.+
Nduyɛ, chɛl mi tɔɔyaŋ piɔm ndɔɔ wa num choo le.+
19 Wana kɔl tuuwo cho fulamakɔɔlioo sɔla le nyɛ o tosa wo.
Nduyɛ te a kindiŋ pɛ le ndu malaa, mɛɛ a cho wa ndu malaa teleŋ o teleŋ.+
20 Yaŋ nilaŋ o silaa nduyɛ ma chɛl nyɛ nda dimul num ndo,+
Le halikpeŋ ma simnuŋ wana taasi o chilaŋ niŋ.+
21 Mi waŋndo tuunuŋ sɔɔŋ bɔɔbɔɔ o kɔl le tosaa,
Kɛ nyɛ Chɛhowa yeema wo yɔŋnuŋ ni.+
22 Nyɛ sɔviɔɔ o yoomu wanachioo niŋ cho kaala lo lechoo ndɔɔ ni.+
Nduyɛ, o bɛnda mi wana wa wana bala fondoo mbo hiau waa wana lachoowaa.
23 Siooŋnde nɔɔ le Chɛhowa ke wana yoomoo ni.+
Nduyɛ wana o wana nɔ pɛ siooŋii waa lende, o cho waŋnɔŋ o pɛŋgioo niŋ, suɛi wɔɔŋ komal ndu le.+
24 Mi wana siɛlɛiyo wou baa o hɛŋgɛi nyɛdiaa niŋ,
Kɛ hali le kɔndɔɔ mbo mɛɛnuŋ, o nɔla le.+
25 Fukpa wana mam waŋnda wo,+ le halikpeŋ mi wana nɔ kɔl kalu le wo simnuŋ wana taasi.+
Nduyɛ, ma sila wana bii sɔɔŋ bila wo le mbo chɔɔlu kɔl kaloo sɔla.+
26 Chua bii finya ndɔ biyɔɔ wɔɔŋndo nduyɛ mbo tou kala ndɔ wo,
Ndu huŋ a siɔmbulaŋ vɛlɛ a bɛɛla tambɛilaŋ ni.+
27 Po nuu, te a pɛŋgi pɛ nilaŋ yaŋɔɔ o silaa,
Mɛɛ a cho sɔɔŋ kɔl kaloŋ kɔɔ mulul.
28 Sei lachoowaa chi sandei nyɛ sɔvɛ le.+
Nduyɛ, mi wana dɛnɛ wɔɔŋndo tuei yɔŋ wɔɔŋndo tosaa yeela mɛɛ o tuɛi nyɛdiaa yeela yɛ.+