Walta Kiilaa
10 Po pilɛ wa Sisaliaa diolaŋ aa Kɔniiliɔɔ. Wana bɛndu puaa chɔuwa* o wa le kunda Italiaŋndo* ni. 2 Ndoo nɔ siooŋii Mɛlɛkɛi, nduyɛ mi ndu a yuŋgu ndɔɔ ndaa piɛi Mɛlɛka. Mi ndoo ke wanaa bala fonduaa nyɔɔŋ tau, nduyɛ mi ndoo nyɔɔlu Mɛlɛka lɔɔlɔɔ o piɛileŋ niŋ. 3 Paale pilɛ, a lɔɔ 3:00+ ipalaa,* mbo cha kpendekele mi maalikɛinɔ Mɛlɛkaa huŋ naa ndu chua o yilaŋnde niŋ. Mbo veelu ndu aa: “Kɔniiliɔɔ!” 4 Mi Kɔniiliɔɔ tofa maalikɛinɔɔ chiŋ a siooŋnde, mbo nyuna ndu aa: “O yɛɛnɛ, Masanɔɔ?” Mi maalikɛinɔɔ dimul ndu aa: “Mɛlɛka tuei piɛile numndeŋ, nduyɛ o naŋ kɔl a kɛndɛi ŋ tosal wanaa bala fonduaa ve.+ 5 Viom waŋnda Chopa suŋ suŋ o Saimɔŋ lo, o nda veelu aa Pitɛ wo ma kɔ huŋ nda ndaa. 6 Poo hoo cho o yiya o Saimɔŋ lo, o tosa wallo a yaula visiaa, mi chiɛi ndɔɔ wa o mɛŋma ihɛllaŋ ikɛiyo.” 7 Mɛɛ maalikɛinɔ soo o ndu lo wo kuɛŋnuŋ dɔɔ, mi Kɔniiliɔɔ veelu buɛiyaa nduaa a ŋiɔɔŋ a puaa chɔuwaa wa ndu o ba bɛŋgu wa o pilɛ. 8 Mbo chɔm nda nyɛ o nyɛ yɔŋnuŋ, okoŋ mbo viam nda Chopa.
9 Diimandɔɔ, mɛɛ nda wa kɔlaŋ o nɛi, ma wa sɔɔŋguuwo Chopa ikɛi, mi Pitɛ hel o chiɛiyo choo a lɔɔ 12:00 ipalaa* le piɛileŋ. 10 Kɛ yiaaŋ ma wa ndu nɛiyo tau, nduyɛ ndoo yeema nyɛdiaa dioo. A lo nyɛdiaa toosiaa, mbo cha yilaŋnde.+ 11 Mbo cha mi choo choo kumbiŋ, mi nyɔɔ wa tolɔɔ lɛŋ, mɛɛ nda saa nuaa kola feŋgbɛ bɛndoo o kpeŋguŋ hiɔɔloŋ o lɛŋndeŋ choo ma wa ndu tusioo yɛ. 12 O nyɔɔ hoo niŋ, visiaa suu o suu wa leniŋ. A peluŋ hiɔɔluaa, a kua o demboo choo wa, a youwa. 13 Okoŋ mbo tuɛi diomndo aa: “Pitɛ, chɔŋ ma dii ma de!” 14 Kɛ mi Pitɛ dimi aa: “Ɛ ɛ, Masanɔɔ. Kanifuule, lepilɛ bɛɛ I di wɔ nyɛ cho o nɔɔlɛi Mɛlɛka o hɔl lo le.”+ 15 Mbo tuɛi vɛlɛ mi diomndo dimi aa: “Pɛŋgi nyɛm Mɛlɛka chii dindi woŋ veeloo nyɛm nɔɔlɛiyoŋ.” 16 Mi hei yɔŋnuŋ haaa bɛmbɔɔ le yaa. O lepilɛ niŋ kpe, mi nyɛ kalaa helnuŋ o choo choo niŋ.
17 Pitɛ lo kɔllo keelaa le nyɛ yilaŋii o che ve sim ndo, mi wanaa Kɔniiliɔɔ vem nda nyuna le chiɛi Saimɔŋndo. Okoŋ ma sim o dio.+ 18 Ma nyuna wana chiɛiyo te loŋ Saimɔŋ, wana nda veelu aa Pitɛ wo cho o yiya ni. 19 Pitɛ wa wɔ kɔllo keelaa le isɔɔ sina a yilaŋnde hei okɔɔ, mi nyina Mɛlɛkaa+ dimul ndu aa: “Saimɔŋ! Puaa a yaa cho nyunaa le num. 20 Lelaŋ chɔŋ ma tol mi la kuɛ nya ndaa. Nɔ kiisaŋ o kiisaŋ te, kanifuule ya vem nda ni.” 21 Okoŋ mi Pitɛ tual mbo kua o nda lo. Mbo dimi aa: “Ya cho wana nya cho nuuviaa wo ni. La vɛ hunɔɔ?” 22 Ma dimi aa: “Kɔniiliɔɔ,+ wana bɛndu puaa chɔuwa vem naa ni. O cho wana sakpo, nduyɛ o nɔ siooŋii Mɛlɛkɛi. Chuuwa kpou dimi sɔɔŋ kɛndɔŋ a ndu okɔɔ. Maalikɛinɔɔ chɔɔmuŋ ndu o yilaŋnde niŋ, mbo dimul ndu maa o veelu num ma kuɛ o chiɛi ndɔɔ, le mbo tuei nyɛ ŋ nɔ le dimioo wo.” 23 Mi Pitɛ luei nda chiɛiniŋ, mbo yiya nda.
Diimandɔɔ, mbo bɛɛndiaŋ ma kua nda ndaa. Mi puaapiliaa apum Chopa kua a nda latulu. 24 Diimandɔɔ pilɔɔ, ma fuuluu Sisaliaa. Kɔniiliɔɔ wa niŋ nda chumndo, nduyɛ ndoo chuuŋgiaa niŋ wanayaŋ ndɔŋ a chaŋyaŋ ndɔŋ kpɛɛluŋndoŋ diompilɛ. 25 Mɛɛ Pitɛ luɛi, mi Kɔniiliɔɔ kua ndu lachi mbo kɔ beŋ ndu wulaŋ le ndu bɛɛleŋ kioo. 26 Kɛ mi Pitɛ saa ndu, mbo dimul ndu aa: “Chɔŋ. Ya bɛɛ wanachioo ya cho ni.”+ 27 A lo baltaŋ dɔwɔɔ nda Kɔniiliɔɔ, ma luɛi chiɛiniŋ. Mbo komal waŋnda tau chiɛiniŋ. 28 Mbo dimul nda aa: “Nyapila sina ndi walaŋ maa sawa naa maChuuwo dimi maa, Chuuwa nɔ ma holiaŋ a wanaa lekaawa le.+ Nduyɛ, a nɔ ma luɛi o la nda lo chiɛiniŋ te. Kɛ mi Mɛlɛka chɔm ya maa o bɛnda mi veelu wana o wana maa wana nɔɔlɛi le.+ 29 Lelaŋ, mɛɛ ŋ vem waŋnda ya veeloo, I kiisaŋ te, mi huŋ. Chɔm ya niko le sabu ŋ veelu ya wo.”
30 Mi Kɔniiliɔɔ dimi aa: “O cho niŋ hau palɛi i hiɔɔlu, I wa piɛileŋ o ya lo chiɛiniŋ a lɔɔ 3:00 ipalaa,* mi po pum huŋ sim ya lachi o nyɛla ŋɛlɛŋgi ŋɛlɛŋgilaŋ niŋ. 31 Mbo dimul la aa: ‘Kɔniiliɔɔ, Mɛlɛka tuei piɛile numndeŋ, nduyɛ o naŋ kɔl a kɛndɛi ŋ tosal wanaa bala fonduaa ve. 32 Lelaŋ, viom waŋnda Chopa o Saimɔŋ lo, o nda veelu aa Pitɛ wo. Poo hoo cho o yiya o Saimɔŋ lo, o tosa wallo a yaula visiaa, mi chiɛi ndɔɔ wa o mɛŋma ihɛllaŋ ikɛiyo.’+ 33 O lepilɛ niŋ kpe, mi viam waŋnda naa num chua. Nduyɛ ma tosa a sabu ma huŋ. Lelaŋ, naa kpou ŋ chuuŋgiaŋ nanuŋ Mɛlɛka o hɔl le nilaŋ yaŋɔɔ o sɔɔŋ Chɛhowa* vem num le dimioo woŋ kpou.”
34 Okoŋ mi Pitɛ kandu suɛi, mbo dimi aa: “I sina niŋ kɛsɛ maa Mɛlɛka cho wana hɛliaa le.+ 35 Kɛ o lekaa o lekaa niŋ, wana nɔ pɛ siooŋii nduɛi, nduyɛ mbo tosa nyɛ cho sakpo wo, chɛlɔɔ Mɛlɛka chɛl ndu ni.+ 36 O yɔŋ diom ndɔɔ o waŋnda Isɔluɛi lo, le nda yooŋgu kɛndɔɔ dimullo a kɔl nyuloo+ okɔɔ o sabu Chiisu Kiliti wo niŋ, o cho Masanɔɔ le waŋnda kpou wo.+ 37 La sina maa waŋnda wa dimioo a suɛi hei okɔɔ o Chudiaa niŋ kpou. Kalili i kanduŋ ni,+ teleŋ Chɔŋ dimul waŋnda yooŋgoo a yiŋɔɔ okɔɔ wo. 38 A Chiisu fula Naasaluɛi yo okɔɔ suɛi hei wa ni, a mɛɛ Mɛlɛka pɔya ndu a nyina diandaa+ nduyɛ mbo ke ndu kpaayaa yɛ. Mbo balu ba o ba fee waŋnda sɔɔŋ kɛndɔŋ tosallo, a wanaa Setana*+ wa nyɛpalaa tusioo choo wa siŋgioo, kanifuule Mɛlɛka wa ndu kɔɔli.+ 39 Ŋ cho seiya le nyɛ o nyɛ o tosa o tandala Chuuwa wa niŋndaŋ a Chulusalɛm. Kɛ mi waŋnda baŋ ndu o yɔmndo choo ma dii ndu. 40 Mi Mɛlɛka miŋgi ndu yoomu o paale yaa ndɔleŋ choo,+ nduyɛ mbo tosa mi waŋnda cha ndu. 41 Kɛ o cho waŋnda kpede le che ndu le. Naŋ de nyɛdiaa, nduyɛ miŋ kol a ndu latulu wa kinɛi che ndu ni mɛɛ o miiŋgu yoomu, kanifuule naa Mɛlɛka hɛli ni le miŋ che ndu, nduyɛ miŋ soo a ndu okɔɔ.+ 42 Mbo dimul vɛlɛ naa le miŋ dimul waŋnda yooŋgu kɛndɔɔ a ndu okɔɔ nyɛkɛndɛi,+ maa ndu Mɛlɛka hɛli ni le wanaa cho yoomu wa a wanaa vi wa kɔɔsaa.+ 43 Mi wanaa ndaa suaa le Mɛlɛka wa kpou timbi seileŋ a ndu okɔɔ,+ maa wana o wana dɔu laalaŋndo o ndu niŋ pɛ, Mɛlɛka mal ndu haki le hakila ndɔlaŋ o diola ndɔlaŋ niŋ.”+
44 Pitɛ lo sɔɔŋ muŋ dimioo, mi nyina diandaa tual wanaa wa ndu nilaŋ yaŋɔɔ wa choo kpou.+ 45 Mi kɔndɔfillo bii wanaa laalaŋaa sɔla hivi chiɛi kɔɔlioo wa, a hiŋ nda Pitɛ waa latulu wa, le mɛɛ wanaa ve ŋChuu le wa bɛɛ sɔla nyina diandaa yɛ. 46 Kanifuule, a wa nda tueiyɔɔ suɛi o sɔɔŋ maŋgalaŋ cheleŋ niŋ, ma wa Mɛlɛka saŋgalaa.+ Okoŋ mi Pitɛ dimi aa: 47 “Waŋnda haa sɔla nyina diandaa maa naa. Lelaŋ, wana cho pa mbo kuuna nda yiŋɔɔ sɔlaa+ a mɛŋndaŋ?” 48 Mi Pitɛ dimul nda le ma yiŋ o diola Chiisu Kiliti laŋ niŋ.+ Okoŋ, ma dimul ndu maa a wa loŋ nda ndaa le palɛi i tiŋ.