Luku

10 Okoŋ kɔɔli, mi Masanɔɔ hɛli buɛiyaa cheleŋ ŋwaŋ 70, mbo viam nda pɔɔ lachi a ŋiɔɔŋ ŋiɔɔŋnda+ o chiooŋ a o fondaŋnda ndupila ndoo nɔ le kɔlaŋ ndaŋ kpou. 2 Okoŋ mbo dimul nda aa: “Chiɛi vesa tau le kouwɔɔ, kɛ wanaa kuauwaa bɔɔ cho le. Lelaŋ, la nyɔɔlu wana ichiɔɔ le mbo yɔŋ wanaa walla o chiɛi nduɛi niŋ.+ 3 La kɔ! I cho nya viomɔɔ maa saa fɔŋnduaa visiaa biyaa tɛɛŋ.+ 4 La kua a bɔlɔ ŋkani* ɔɔ bɔlɔ nyɛdiaa le. La kua a lakɔwɛi* le,+ nduyɛ la yil wana o wana* o nɛi le. 5 Chiɛi o chiɛi nya luɛi pɛ, la dimi fɛlɛŋ aa: ‘Maa kɔl nyuloo wa nya choo fɔ.’+ 6 Te wana kɔl nyuloo wa loŋ pɛ, mɛɛ kɔl nyulu nyaa lo ndu choo. Kɛ te o ve loŋ te, kɔl nyulu nyaa miiŋgu nya choo. 7 La lo o chiɛi koŋ niŋ,+ mi la de, nduyɛ mi la kol nyɛ o nyɛ nda ke nya pɛ,+ kanifuule wana wallo nɔ mbo sɔla paawa* ndɔɔ.+ La kila yiyala faŋga faŋga le.

8 “Nduyɛ chiee o chiee nya luɛi pɛ ma chɛl nya, nyɛ o nyɛ nda ke nya pɛ, la dio. 9 La siŋgi wanaa cho loŋ a naalaŋ nda, nduyɛ mi la dimul nda aa: ‘Masale Mɛlɛkaleŋ le sɔɔŋguu niŋ nya ikɛi kpɛɛluŋ.’+ 10 Kɛ chiee o chiee nya luɛi pɛ ma chɛl nya le, la kɔ o nɛila ndɔla bɛndulaŋ mi la dimi aa: 11 ‘Chundoo o nya lo chiee nanuŋ bɛɛ, koŋɔɔ ndu mbo faŋaŋ naa o ŋpelu.+ Kɛ nduyɛ, la sina pɛŋgu maa Masale Mɛlɛkaleŋ le sɔɔŋguu niŋ kpɛɛluŋ.’ 12 Mi dimul nya, i cho wa ikala kpoke le chiee koŋ o paale leŋ* choo mbo hiou Sodɔm.+

13 “Kpundɔɔ cho le nya waŋnda Kɔluesiŋ! Kpundɔɔ cho le nya waŋnda Bɛtisaida! Kanifuule, te walta kɔndɔfilta tosaŋ o nya lo chiee laŋ laa tosaŋ Taaya a Saidɔŋ pɛ, sindɛ niŋ pa nda wa wookɔŋ ni, mi ndaa wounuŋ nyɛla labɛkilaŋ, nduyɛ mi ndaa chal o pultaŋ niŋ.+ 14 Lelaŋ, i cho wa ikala kpoke le nya o paale kɔɔsɔleŋ choo, mbo hiou Taaya a Saidɔŋ. 15 Nya waŋnda Kepaaniɔm yɛ, la yiyaŋ pa maa la cho sɔla heeloo haaa mi la fuuluu o choo choo niŋ? O Sɛiyo* niŋ nya cho tolɔɔ ni!

16 “Wana o wana yaŋ nya nilaŋ pɛ, mɛɛ ya o yaŋ nilaŋ ni.+ Nduyɛ wana o wana kɛɛ nya pɛ, mɛɛ ya o kɛɛ ni. Wana o wana kɛɛ ya pɛ, mɛɛ wana vem ya wo o kɛɛ koŋ ni.”+

17 Okoŋ mi buɛiyaa 70 wa miiŋgu a nyaaloo, ma dimi aa: “Masanɔɔ, mɛɛ naŋ soliŋ diola numndaŋ kpeku, nyinaa wɔɔŋnda bɛɛ ma tusiŋ naa o ba bɛŋgu.”+ 18 Okoŋ mi Chiisu dimul nda aa: “I che Setana fulaa o choo choo niŋ mbo del+ maa letaŋ. 19 I chii nya kpaayaa ke. La kei bɛɛ kɛuwa a ŋgeemaa nɛi choo, a yɔŋ nya nyɛ o nyɛ le. I ke nya kpaayaa yaamɔɔnɔɔ choo,+ a kpaaya ndɔɔ kpou. 20 Kɛ nduyɛ, la duaunuŋ nyaale le mɛɛ nyinaa wɔɔŋnda tusiŋ nya o ba bɛŋgu yɛ le. La dɔɔnuŋ nyaale le mɛɛ diola nyalaŋ la cho la poonyiaa o choo choo niŋ yɛ.”+ 21 A boondii keŋ, mi Chiisu duaunuŋ nyaale o sabu nyina diandaa niŋ, mbo dimi aa: “Finya nuu, num cho hoo Masanɔɔ le choo choo a lɛŋndeŋ ndo, I mel num balikaa waŋnda kpou o hɔl, le mɛɛ ŋ viŋ wanaa taasiaa+ a wanaa sinaa dɛniaa sɔɔŋ muŋ kpiŋ, ma chɔm muŋ chuaambuaa pɔmbuaa yɛ. A tonya, Finya nuu, hɛnaŋ numndo tosaŋ hoo ni.+ 22 Finya nuu chua nyɔɔŋ kpou mbo ke ya. Wana o wana sina wana ya* cho wo le, mɛɛ Finya nuu. Wana o wana sina wana Finya nuu cho wo le, mɛɛ ya.+ Nduyɛ wana o wana ya yeema pɛ, I chɔm ndu wana Finya nuu cho wo.”+

23 Okoŋ mbo muliŋ o buɛiyaa nduaa lo mbo dimul nda kpeele aa: “Kɔl kɛndɔɔ cho le wanaa cho sɔɔŋ muŋ chɔɔ wa.+ 24 Mi dimul nya, wanaa ndaa suaa le Mɛlɛka wa, a masaa bɔɔbɔɔ ndaa yeema chɔɔ sɔɔŋ nya cho muŋ chɔɔ woŋ, kɛ a chi muŋ te.+ Nduyɛ, ndaa yeema ma tuei sɔɔŋ nya cho muŋ tueiyɔɔ woŋ, kɛ a tui muŋ te.”

25 Okoŋ kɔɔli, mi wana pɛɛku waŋnda Sawala Mɛlɛkalaŋ ndo chaŋ le Chiisu tɔɔndaŋndo. Mbo nyuna ndu aa: “Wana Pɛɛkaa, yɛɛnɛ ya nɔ yɛ mi tosa le mi sɔla yoomu fafɛɛŋndo?”+ 26 Mi Chiisu nyuna ndu aa: “Yɛɛnɛ cho yɛ o poonyiaa o yau laSawaa niŋ? Vɛɛnɛ ŋ bii yɛ ndu bila?” 27 Mbo muli aa: “‘A nɔ ma kaala Chɛhowa* Mɛlɛka numndo a kɔl numndo kpou, a yoomu numndo kpou, a kpaaya numndo kpou, a yiyaŋ numndo kpou,’+ nduyɛ ‘ma kaala wana nya chiɛɛliaŋ ndo* mɛɛ ŋ kaala numpila yɛ.’”+ 28 Mi Chiisu dimul ndu aa: “A chaa muli. Hiou lachi a hei tosaa, a cho yoomoo sɔla.”+

29 Kɛ le mɛɛ poo hoo ndoo yeema mbo chɔm maa o cho wana sakpo yɛ,+ mbo nyuna Chiisu aa: “Nɛɛnɛ kpeekpei cho yɛ wana naŋ chiɛɛliaŋ ndo?” 30 Mi Chiisu mulul ndu aa: “Po pilɛ chɛŋ Chulusalɛm ni mbo wa tolɔɔ le kɔlaŋ Chɛluiko. Mi viiya kei ndu delɔɔ choo ma poondiaa nyɛ o nyɛ ndoo nɔ, okoŋ ma luaa ndu, ma mɛi ndu tendu piɔm ma kuaŋnuŋ. 31 Mi i yɔŋnuŋ kinɛi, wana soliaa lasalaa wa tolɔɔ o nɛi koŋ. Kɛ mɛɛ o che ndu, mbo keekuŋ o nɛiyo daŋgala mbo hiaunuŋ. 32 Livainɔɔ bɛɛ, mɛɛ o fuuluu o fondaŋ koŋ mbo cha ndu, mbo keekuŋ o nɛiyo daŋgala mbo hiaunuŋ. 33 Kɛ Sameeliaŋnɔ pilɛ+ wa keekoo o nɛi koŋ mbo komal ndu, mi nyiɛɛye bii ndu. 34 Le hei, mbo sɔɔŋguu ndu ikɛi, mbo duau chuɛiyaŋ a muɛima pum o pauvii nduɛi, mbo yiu yiu ndi a kolala ŋpɛŋgɛlaŋ. Okoŋ mbo heelu ndu o chɔlu ndɔɔ choo, mbo kua a ndu o chiɛi nda yiya wanaa hiauwaŋnda wo, nduyɛ mbo chiɔu ndu. 35 Diimandɔɔ, mbo chua dinaluɛiyoŋ ŋ muuŋ,* mbo ke wana chiɛiyo, okoŋ mbo dimi aa: ‘Chiɔu ndu, nduyɛ nyɛ o nyɛ cheleŋ ŋ pisi pɛ, I cho hunɔɔ num miŋgi o ba te I wa miiŋgoo pɛ.’ 36 O wanaa yaa wa haa tɛɛŋ, nɛɛnɛ chɔm yɛ maa ndu kpeekpei cho wana chiɛɛliaŋ+ a po viiya del choo wo ni?” 37 Mbo dimi aa: “Wana tuiinuŋ ndu inyiɛɛ mbo tosal ndu kɛndɛi yo.”+ Mi Chiisu dimul ndu aa: “Num bɛɛ kɔ tosa lende.”+

38 Mɛɛ nda hiou lachi a kɔlaŋ, ma fuuluu o sɔndɔkɔlɔ pum. Mi chua pilɛ diolaŋ aa Mata+ yiya ndu o ndu lo chiɛiniŋ. 39 Ndoo nɔ vɛlɛ pɔmbɔɔ diolaŋ aa Meele. Mi Meele chal o peluŋ Masanɔɔ ikɛi nduyɛ mbo wa nilaŋ yaŋɔɔ o nyɛ o wa dimioo wo.* 40 Kɛ Mata ndu wa o tuandaŋ o waltaŋ niŋ. Okoŋ, mbo huŋ naa Chiisu chua mbo dimul ndu aa: “Masanɔɔ, a cho chɔ maa pɔmbɔ nuu mal la o waltaŋ niŋ te? Dimul ndu mbo huŋ mala ya.” 41 Mi Chiisu mulul ndu aa: “Mata, Mata, a landuŋ kɔl ma wa lauwo le nyɛm faŋga faŋga tosaa. 42 Nyɔɔŋ nyɛɛmbɔ koni yeemaŋ ni, ɔɔ o pilɛ kpe. Suɛi sɔvɛi Meele hɛli ni.+ Nduyɛ wana nɔla ndu ndi poonda o ba le.”