Sam
Chondii Deeve ve.
35 Oo Chɛhowa, suŋgu le ya ma chiŋalaŋ wanaa simul la wa.+
Sɔŋga a wanaa chiŋalaŋ ya a sɔŋgɔɔ wa.+
3 Heelul wanaa cho ya nyaanɔŋndo kɔɔli wa+ bal numndo a chuei num ii chɔu ve.*
Dimul la aa: “Ya cho wana piŋi numndo ni.”+
4 Maa tosa mi siɔmbulaŋ la bii wanaa cho ya kiltaŋ kɔɔli le ya diyɔɔ wa, nduyɛ ma tɛɛmbuu nda labɛɛ.+
Maa tosa mi wanaa cho kɛɛsiaa le ya diyɔɔ wa nyaanuŋ ya a siɔmbulaŋ.
5 Maa tosa ma simnuŋ maa latɛfɛ o hueiye niŋ.
Maa maalikɛinɔ Chɛhowa wo tou nda.+
6 Maa tosa mi nyumndaŋ ma tol nda lachi, nduyɛ mi nɛiyo yɔŋnuŋ chuluku chuluku,
Te maalikɛinɔ Chɛhowa wo wa nda pɛ kiltaŋ kɔɔli.
7 Kanifuule, I tɛɛmbuu isɔɔ o isɔɔ le, ma hendul la yalaa le mi hau.
Nduyɛ I tɛɛmbuu isɔɔ o isɔɔ le, ma tuulul la sooŋndo.
8 Maa dɛnɛ palaa del nda choo ma woolu.
Maa a hau o yala ndapila kɛsi wo niŋ.
Maa a del o sooŋ nda tou wo niŋ ma sɔla tambei.+
9 Kɛ ya ya, I cho dɔɔnɔŋ nyaale o Chɛhowa niŋ.
I cho wa a nyaale le walta ndɔla piŋiaa laŋ.
10 Paala nilaŋ kpou la dimi niŋ aa:
“Oo Chɛhowa, o nɛɛnɛ cho yɛ maa num?
Num piŋi wana nɔ wana malaa le wo wanaa kpaayaa bɛnduaa o ba ni.+
Nduyɛ, num piŋi wana nɔ wana malaa le wo a wana bala fondoo wanaa del nda choo wa o ba ni.+
11 Seiyaa lachoowaa chɛŋ,+
Ma hɛɛnduu ya sɔɔŋ ya sina le woŋ choo.
12 I tosal nda o kɛndɔɔ, ma miŋgul la maa a o wɔɔŋndo,+
Nduyɛ ma tosa mi wa mɔnɛi biyɔɔ.
13 Kɛ teleŋ nda wa a naa wo, mi wounuŋ nyɛla imɔnɔlaŋ,
Nduyɛ mi bii sumndo.
Te yaa piɛi pɛ le nda mi yala muli sɔla le,
14 Mi yaa balu a kɔl tambɛiyo, mɛɛ waŋndo chaaŋ ndɔ ɔɔ wanayɛi nduɛi wu nuaa yɛ.
Mi yaa tundu bolleŋ o mɔnɛi niŋ, mɛɛ waŋndo wa nuaa kala ndɔ chaŋndo yɛ.
15 Kɛ te yaa wa pɛ o dɛnɛ palaa niŋ, a chuuŋgiaŋ naapilɛ a dɔɔnuŋ nyaale.
A chuuŋgiaŋ naapilɛ ma viaŋnuŋ le ya delɔɔ choo.
A cho ya tɔɔ tɛɛmbuuwo, nduyɛ mei bɛɛ a cho a ndi okɔɔ le.
16 Wanaa sina a Mɛlɛka okɔɔ le wa cho ya mamɔɔ chiki chiki,
Ma wa chiŋndoŋ sɔmndo le ya chiŋalaŋndo.+
17 Oo Chɛhowa, le vɛɛ kpɛ ŋ cho yɛ wa hei tofaa?+
18 Okoŋ, mi mel num balikaa kunda bɛndu bɛndoo tɛɛŋ.+
Nduyɛ, I cho num saŋgala faŋga bɛndoo tɛɛŋ.
19 Chɛl mi yaamɔɔwaa tul la leyɛ o fondo fuuwo choo wa dɔɔnuŋ nyaale ya choo le.
Chɛl mi wanaa tul la leyɛ o fondo fuuwo choo wa+ tofa ya ŋɛlɛŋ, ma nyiu ya le.+
20 Kanifuule a suu sɔɔŋ kɔl nyulu le,
Kɛ ma tosa kɛɛsiaala wɔɔŋndaŋ le ma chiŋalaŋ wanaa kɔl nyuluaa o lɛŋndeŋ niŋ.+
21 A kumbi sondola ndalaŋ wakpa ma hɛɛnduu ya sɔɔŋ choo,
Ma wa dimioo aa: “A chaa! A chaa! Naapila che ndi a lehɔl pɛɛŋ.”
22 Oo Chɛhowa, numpila cho hei chɔɔ. A yandii meinuŋ te.+
Oo Chɛhowa, kua ya levil te.+
23 Tiondu ma chɛŋ ma suŋgu le ya.
Oo Chɛhowa Mɛlɛka nuu, suŋgu le ya ma tosa mi sɔla di nuu.
24 Oo Chɛhowa Mɛlɛka nuu, kilul la yamɛi a mɛɛ sandii numnde cho yɛ.+
A yandii, tosa mi yaamɔɔwaa niaa dɔɔnuŋ nyaale ya choo le.
25 Chɛl nda ma dimi aa: “A chaa! Ŋ sɔla nyɛ naŋ yeema wo” le.
Maa fɛɛŋ bɛɛ a dimi nuaa aa: “Ŋ chii ndu miolɔɔ” le.+
26 Maa tosa mi siɔmbulaŋ la bii nda kpou nduyɛ ma tɛɛmbuu nda labɛɛ,
Wanaa cho nyaaloo dɔɔnɔŋndo le kpundɛ komal la wo wa.
Wanaa heeluŋ ndapila ma chua ya chɔdɔ wa, a yandii, tosa mi siɔmbulaŋ a bɛɛla tambɛilaŋ la tol nda choo.
27 Kɛ tosa mi wanaa cho a kɔl kɛndɛ le sandii nii wa dɔɔnuŋ nyaale.
Maa a wa dimioo teleŋ o teleŋ aa:
“Maa Chɛhowa sɔla saŋgalaa, o cho a kɔl kɛndɛ le mɛɛ buɛi ndɔɔ cho o kɔl nyulu niŋ yɛ wo.”+