Vɛɛ Kaalaa a Balikaa Nɔɔ le Chɛhowa Mala yɛ Num Ma Yiŋ?

1-2. A mɛɛ Walta Wanaa Chiisuaa 8:​27, 28, 30, 31, 35, 36, 38 dimi yɛ, yɛɛ ndoo nyindu yɛ laŋunɔ Itoopiaanɔɔ le yiŋɔɔ?

BAA a yeema pa ma yiŋ le ma simnuŋ buɛi Kiliti wo opilɛ? Kaalaa a balika melaa wanaa bɔɔbɔɔ nɔ le Chɛhowa wo nyindu nda ni le keŋ tosaa. Tofawɔ taamaselii laŋunɔ wa wallo le wɛɛŋ masa wa Itoopiaa wo.

² Mɛɛ laŋunɔɔ hoo pɛɛku Diom Mɛlɛkaa mbo sina maa o nɔ mbo sɔla yiŋɔɔ, tamala bɛɛ o dounuŋ te. (Nuawɔ Walta Wanaa Chiisuaa 8:​27, 28, 30, 31, 35, 36, 38.) Yɛɛ ndoo nyindu yɛ ndu le yiŋɔɔ? Ndoo hɛnaŋ a Diom Mɛlɛkaa kanifuule, o wa o nyɛ nyaanaŋ ndɔɔ niŋ mbo wa kɔlaŋ a diomndaŋ veeloo o yau Aisaya wo niŋ. Mɛɛ Filipi tɛɛsial ndu niŋ nyɛ o wa nuaa wo, mbo naŋ kɔl a nyɛ Chiisu tosa le ndu wo. Kɛ le yɛɛ laŋunɔɔ hoo ndoo kuɛ yɛ Chulusɛlɛm? Le mɛɛ ndoo kaala Chɛhowa yɛ. Le yɛɛ naŋ dimi yɛ lende? Kanifuule, le Chɛhowa piɛiyo ndoo kuɛ loŋ ni. Wana dimi maa mi laŋunɔɔ hoo mal piɛile ndɔleŋ mbo tual wanaa wa Mɛlɛka tonyaa piɛiyo wa kɔɔli. Kaala laŋunɔɔ hoo ndoo nɔ le Chɛhowa wo nyindu ndu vɛlɛ ni le nyɛ cheleŋ tosaa. Ndu cho ni, yiŋɔɔ le simnɔŋndo buɛi Kilitioo.—Maa. 28:​19.

3. Yɛɛ kuuna yɛ lepum waŋndo yiŋɔɔ? (Tofa kɔfoo hoo “Lɛŋnde Suu Kuɛɛ Kɔl Numndo Vellɛ?”)

³ Kaala ŋ nɔ le Chɛhowa wo nɔla mbo nyindu num le yiŋɔɔ sɔlaa. Kɛ te a mandaŋ te, kaalaa nɔla vɛlɛ mbo kuuna num yiŋɔɔ. O nɛi kuɛɛ choo? Tofawɔ nɛilaŋ lapum. Kaala ŋ nɔ le yuŋgu numndo a chaaŋaa num aa cho Chɛhowa piɛi le wa tosa ma yɔŋ siooŋnde le yiŋɔɔ. Kanifuule, ma buulaŋ maa te a yiŋ pɛ, a cho num yɛleŋ tul. (Maa. 10:​37) Ɔɔ naapum a hɛnaŋ tau a kaala ŋ sina kɛsɛ maa Mɛlɛka hɛnaŋ te laŋ, nduyɛ, ma che ndi ikala le laŋ malɔɔ. (Sam 97:​10) Kɛlɛŋgaa teleŋ num oo sina wɔ Chɛhowa le wo, mi nyaa biilu dunyaŋ tɔlnuŋ o piɛiyii lachoowɛi choo woŋ. Naapum mi nyɔɔ hɛnaŋ ndɔ num tau te a yiyaŋ pɛ a mɛɛ nyaa tuɛi muŋ yeela yɛ. Le hei, ma che ndi wɔ dɔɔ ikala le balaŋ solioo o muŋ niŋ mi che bɛɛ a sina maa Chɛhowa tul muŋ leyɛ. (1 Kɔliŋ. 10:​20, 21) Mɛɛ suŋ suŋ niŋ, a nɔ ma nyunaŋ aa: “O nɛɛnɛ ɔɔ yɛɛnɛ ya hiou yɛ kaala?”

WANA NAŊ NƆ MIŊ HIOU KAALA WO

4. Yɛɛ kpeekpei cho yɛ num nyindɔɔ le ma sɔla yiŋɔɔ?

⁴ Sɔɔŋ kɛndɔŋ cho tau ŋ nɔ ma kaala nduyɛ ma chɔm balika melaa le muŋ ndo. Le taamaseliiyo, naapum tuupa bɛɛ ma kandu pɛɛkoo a Seiyaa Chɛhowaa, num aa nɔ bɛɛleŋ tau le Baabuiyo. Nduyɛ, num aa nɔ vɛlɛ kaalaa le Chiisu. Mɛɛ ŋ sina vɛlɛ niŋ Seiyaa Chɛhowaa, ma hɛnaŋ dɔɔ vɛlɛ tau le waa latulu a nda lɔɔlɔɔ. Kɛ o kpeekpei niŋ, o cho kaala ŋ nɔ le sɔɔŋ kɛndɔŋ muŋ kpou wo le nɔla mbo nyindu num le yɔŋgɔŋndo o Chɛhowa lo ma sɔla yiŋɔɔ le. Nyɛ kpeekpei nɔla mbo nyindu num le hei tosaa wo cho kaala ŋ nɔ le Chɛhowa pila wo ni. Te a kaala pɛ Chɛhowa mbo hiau nyɔɔŋ kpou, wana o wana ɔɔ nyɛ o nyɛ kuuna num ndu piɛiyo le. Kaala ŋ nɔ le Chɛhowa wo cho pemale yaa num le yiŋɔɔ sɔlaa wo ni. Nduyɛ, mɛɛ yɔm waŋnda saa le tallo taŋɔɔ wo mala nda ma taŋ yɛlɛkɛlɛɛ yɛ, lende koni kaalaa hoo mala vɛlɛ num ni ma lo ndu piɛiyo haaa o mɛɛlulaŋ.

5. Nyunala kuɛɛ naŋ cho yɛ yaasiaa?

⁵ Mi Chiisu dimi maa naŋ nɔ miŋ kaala Chɛhowa a kɔl naa, yoomu naa, yiyaŋ naa, a kpaaya naa kpou. (Maki 12:​30) Yɛɛ mala yɛ naa le Chɛhowa kaalaa a ndu bɛɛle yiŋgoloŋ nde waa naa kioo? Nyɛ mala naa wo cho yiyaŋndo a nɛila ndu chɔm naa niŋ kaalaa laŋ okɔɔ ni. (1 Chɔŋ 4:​19) Te kaala Chɛhowaa luɛi num pɛ o kɔl, yɛɛ cheleŋ ŋ nɔla yɛ ma tosa?b

6. A mɛɛ Luomaŋnda 1:​20 dimi yɛ, ɔɔ nɛiyo opilɛ o ŋ nɔla ma sina a Chɛhowa okɔɔ wo?

⁶ Mɛɛndaŋ nyɛm Chɛhowa toosiaa woŋ le sinaa a ndu okɔɔ. (Nuawɔ Luomaŋnda 1:​20; Sɔɔŋ. 4:​11) Yiyaŋndɔ a tɔlɔɔlaŋ a visiaa Chɛhowa toosiaa wa okɔɔ le sinaa mɛɛ kpɛ o cho wana taasi yɛ. Challɔ vɛlɛ ma yiyaŋ a mɛɛ o toosiaa dialuŋ numndoŋ o nɛi kɔndɔfili niŋ yɛ. (Sam 139:​14) Yiyaŋndɔ a kpaaya paaleŋ le nɔ vɛlɛ wo okɔɔ. Nduyɛ, o cho bɛɛ leŋ kinɛi le Chɛhowa toosiaa a kpaaya waa lende le. Looŋc cho o biiliɔŋndaŋ niŋ ŋ hiou paaleŋ kpaaya poloŋ ndo. (Aisaya 40:​26) A nɔla ma chɔɔlu bɛɛleŋ nɔ tau le Chɛhowa te a wa pɛ yiyaŋndo a nyɛm o toosiaa woŋ okɔɔ. Kɛ o cho ko sinaa maa Chɛhowa cho wana taasi nduyɛ maa o nɔ kpaayaa kinɛi le mala num ma nɔ chaŋyɛi a ndu le. Le ma nɔ kaala yiŋgoloŋndo le ndu, mɛɛ ma chɔɔlu sina tau a ndu okɔɔ.

7. Le ma nɔ kaala yiŋgoloŋndo le Chɛhowa, yɛɛ fɛŋ ŋ nɔ yɛ ma laalaŋ?

⁷ A nɔ ma laalaŋ kɛsɛ maa Chɛhowa buulaŋ a num okɔɔ. Baa ma che ndi pa ikala le laalaŋndo maa Wana Toosiaa choo choo a lɛŋndeŋ ndo sina maa a cho yoomu nduyɛ maa o buulaŋ a num okɔɔ? Te lende i cho ni, mɛɛ kɛsiŋ o kɔl maa Chɛhowa cho “levil a wana o wana le.” (Walta. 17:​26-28) Mbo “tofa o kɔlta waŋnda chieeya niŋ.” Nduyɛ a mɛɛ Deeve dimul Sɔlɔmɔŋ po ndɔ yɛ, “te a nuuviaa ndu pɛ, a cho ndu saalɔŋ.” (1 Kolo. 28:​9) Chɛhowa dimi maa “o kandɔŋndo pa” o kaala num ni. Lelaŋ pɛŋ o tosa a sabu ni ma wa Baabuiyo pɛɛkoo suŋ suŋ a ndu okɔɔ. (Chɛlui. 31:​3) Mɛɛ ŋ hiau lachi fau a sinaa nɛila Chɛhowa cho num kaalaa chɔmndo laŋ, lende koni ŋ kaala ndu ni.

8. Vɛɛ num bɛɛ chɔm yɛ maa a kaala Chɛhowa?

⁸ Nɛiyo opilɛ o num bɛɛ chɔm maa a kaala Chɛhowa wo cho piɛileŋ o ndu lo ni. Chɔm ndu buulaŋnda numndaŋ o piɛileŋ niŋ nduyɛ ma mel ndu balikaa le sɔɔŋ kɛndɛŋ o cho num tosallo woŋ. Te a wa pɛ keŋ tosaa, kaala ŋ nɔ le ndu wo cho num hiouwɔɔ o kɔl kɔɔli. Nduyɛ, chaŋyɛi cho nya tɛɛŋnde cho kpɔlɔka te a wa pɛ chɔɔ mɛɛ o muli piɛile numndeŋ yɛ. (Sam 116:​1) Okoŋ, a cho laalaŋ kɛsɛ maa mbo bii yiyaŋnda numndaŋ bila. Kɛ le ma hiou lachi a sɔɔŋguu wo Chɛhowa ikɛi kpɛɛluŋ, mɛɛ mi num bɛɛ bii yiyaŋ ndɔɔ bila. A nɔ ma sina nyɛ o yeema num o ŋdiallo. Nyɛ mala num le keŋ sinaa kinɛiyo cho Diom ndɔɔ pɛɛkoo ni.

9. Vɛɛ ŋ chɔm yɛ maa a chua Baabuiyo nyɛ sɔvɛ?

⁹ Chua Baabuiyo nyɛ sɔvɛ. O Baabuiyo niŋ kinɛi ŋ saaluŋ tonyaa a Chɛhowa okɔɔ ni. Nduyɛ, ndu koni nɔla vɛlɛ ni mbo chɔm num sabu Chɛhowa nɔ le numndo. A chɔm maa a chua Baabuiyo nyɛ sɔvɛ te a wa pɛ diomndaŋ veeloo leniŋ lepaa o lepaa. A tosa vɛlɛ hei te a wa pɛ bɛɛndiaŋndo lɔɔlɔɔ le pɛɛku numndo nduyɛ, ma wa dɔwɔɔ nyɛ ŋ cho pɛɛkoo wo o wali niŋ. (Sam 119:​97, 99; Chɔŋ 17:​17) Baa a nɔ pa kɛɛsiaa le diomndaŋ veeloo o Baabuiyo niŋ? A cho pa kɛɛsiaa numndo tolɔɔ kɔɔli lepaa o lepaa?

10. Ɔɔ nyɔɔ opilɛ o tosa mi Baabuiyo wa teŋgeŋ a yaula cheleŋ ndo?

¹⁰ Baabuiyo nɔ konala wanaa che Chiisu pɛɛŋ a lehɔl la. Hei cho nyɔɔ opilɛ o tosa mbo wa teŋgeŋ a yaula cheleŋ ndo ni. Ndu kinɛi nɔla mbo pɛɛku num tonyaa a nyɛ Chiisu tosa le num ndo okɔɔ ni. Te a wa pɛ konala cho o Baabuiyo niŋ a Chiisu okɔɔ laŋ pɛɛkoo, a cho yeemɛi nɔ le mbo wa chaaŋ num.

11. Yɛɛ mala yɛ num ma kaala Chɛhowa?

¹¹ Te a kaala pɛ Chiisu, kaala ŋ nɔ le Chɛhowa wo cho hiouwɔɔ lachi. Le yɛɛ naŋ dimi yɛ lende? Kanifuule, Chiisu chua kaala Finya ndɔlaŋ kpou ni. (Chɔŋ 14:​9) Lelaŋ, mɛɛ ŋ pɛɛku fau a ndu okɔɔ, lende koni ŋ kaala Chɛhowa nduyɛ ma sina wana suu o cho wo ni. Yiyaŋndɔ a mɛɛ Chiisu ndoo tuiinuŋ wanaa ndaa chua chɔdɔ wa inyiɛɛ yɛ, mɛɛ wanaa tambɛiya, wanaa lanaa a wanaa ndaa nɔ kpaaya le wa wa naa yɛ. Yiyaŋndɔ vɛlɛ a silala sɔvɛla o ke num ndaŋ okɔɔ. Nduyɛ te a dɔu laŋ pɛ o wali niŋ, yoomu numndo cho wa nyɛkɛndɛi.—Maa. 5:​1-11; 7:​24-27.

12. Te a sina pɛ a Chiisu okɔɔ, yɛɛ o cho yɛ num nyindɔɔ le tosaa?

¹² Kaala ŋ nɔ le Chiisu wo nɔla mbo hiou num o kɔl kɔɔli te a yiyaŋ pɛ a baŋa o baŋa naa le mi Mɛlɛka mal naa haki wo okɔɔ. (Maa. 20:​28) Mi Chiisu yɔŋguŋ wulee ma dii ndu le num. Hei sinaa cho num nyindɔɔ ma mulul yɔŋnda numnda wɔɔŋndaŋ kɔɔ, nduyɛ ma nyuna Mɛlɛka le mbo mal num haki. (Walta. 3:​19, 20; 1 Chɔŋ 1:​9) Te kaalaa luɛi num pɛ o kɔl le Chiisu a Chɛhowa, a nɔla vɛlɛ ma kaala wanaa kaala nda wa.

13. Yɛɛ Chɛhowa tosa yɛ le num malaa?

¹³ Kaala wanaa cho o yuŋgu Chɛhowaa niŋnda. Naapum yuŋgu numndo a chaaŋaa num aa cho Chɛhowa piɛi le wa cho sina le sabu ŋ yeema yɔŋgɔŋndo o Chɛhowa lo wo le. Kɛlɛŋgaa a cho num pɛŋ wa simullo. Chɛhowa cho num ke yuŋgu cheleŋ. Ndu cho puaapiliaa a ndepiliaa cho ndu piɛiyo o kunda leKilisiɔŋndo niŋnda ni. Puaapiliaa a ndepiliaa haa cho num kaala nduyɛ ma mala num te a holnuŋ nda pɛ. (Maki 10:​29, 30; Hibu. 10:​24, 25) Teleŋ cho fuuluu mi wanaa cho o yuŋgu numndo niŋnda yeema num tolɔɔ kɔɔli le Chɛhowa piɛiyo, nduyɛ ma kandu sawala ndɔlaŋ diikɔŋndo.—1 Pitɛ 2:​12.

14. A mɛɛ Chɔŋ Tasoo 5:​3 dimi yɛ, yɛɛ num che yɛ niŋ a nyɛ Chɛhowa dimul naa le tosaa wo okɔɔ?

¹⁴ Chua sawala Chɛhowalaŋ nyɛ sɔvɛ nduyɛ ma dɔu laŋ o wali niŋ. Kɛlɛŋgaa tuupa ma sina Chɛhowa, nyɛ ŋ hɛnaŋndo num aa tosa lɔɔlɔɔ ni. Kɛ mɛɛ ŋ kandu pɛɛkoo a ndu okɔɔ, ma cha maa nyɛ o dimul naa le tosaa wo hiou nɔ tɔnɔɔ. (Sam 1:​1-3; nuawɔ Chɔŋ Tasoo 5:​3.) Yiyaŋndɔ a sila Baabuiyo ke piaanduaa, laanduaa, kalaŋ chuauwa, a chuauwa wo okɔɔ. (Ɛfi. 5:​22–6:​4) Chɔŋ a teleŋ ŋ kandu sila koŋ dɔwɔɔ o wali niŋndo, hiouwɔɔ lachioo yɔŋnuŋ niŋ pa o yuŋgu numndo niŋ? Chɔŋ a teleŋ ŋ kandu sila Chɛhowaa tolɔɔ kɔɔli le chaŋyaŋ kɛndɔŋ hɛlioo wo, baa a nɔla niŋ pa kaala wɔɔŋnda bɔɔbɔɔ malɔɔ? Baa a nɔ niŋ pa nyaaloo o yoomu numndo niŋ mbo hiau maa paandu? (Pulɔ. 13:​20; 1 Kɔliŋ. 15:​33) Naapum a nɔla ma chɛl nyunalaŋ ndaŋ a dialuŋ fulaa.

15. Yɛɛ ŋ nɔ yɛ ma tosa te a yeema pɛ le sinaa mɛɛ ŋ duau sawala mandaala Baabuiyo o wali niŋ yɛ?

¹⁵ Lepum, mbo wa ikala le ma sina mɛɛ ŋ duau sawala mandaala Baabui ŋ cho pɛɛkoo laŋ o wali niŋ yɛ. Lelaŋ Chɛhowa cho kɔɔna ndɔɔ soliŋndo kpeku ni le num yaula tɔlnuŋ o Baabuiyo choo laŋ kioo. Yaulaŋ ndaŋ la mala num ni ma sina yɛ yiɔɔ suɛi naŋ le tosaa ve tɛɛŋ a i niŋ le tosa le ve. (Hibu. 5:​13, 14) Te a chua pɛ teleŋndo le laŋ pɛɛkoo nyɛkɛndɛi, a cho tɔnɔɔ sɔla tau o sila kɛndɛ cho leniŋndo niŋ. Nduyɛ, keŋ tosa vɛlɛ pɛŋ ma kaala kɔɔna Chɛhowaa.

16. Vɛɛ Chɛhowa kɔɔna yɛ hau wanaa nduaa?

¹⁶ Nɔ kaalaa le kɔɔna Chɛhowaa nduyɛ ma toolu ndu. Chɛhowa kɔɔna wanaa nduaa o kundala leKilisiɔŋndaŋ niŋ, nduyɛ, Chiisu Po ndɔ cho nda kpou bolleŋ ni. (Ɛfi. 1:​22; 5:​23) Chiisu yulu puaa sɔla pɔyaŋndo wa apum iso le ma kɔɔna wali o yeema mbo tosaŋ o palɛi nɛi hei niŋndo. Kunda pɔmbɔ o yulu koŋ iso wo o veelu ni aa, “buɛi cho sakpo, nduyɛ, mbo wa buɛi kɔl kalu wo.” Puaa haa pisul a wali nda sɔla hoo le num kioo nyɛm mala num ma pɛɛku a Mɛlɛka okɔɔ woŋ te. Nduyɛ, a cho lɔɔlɔɔ lahɔl le num malaa ma nɔ chaŋyɛi kpɛɛluŋnde a Mɛlɛka. (Maa. 24:​45-47) Nɛiyo opilɛ o buɛi cho hoo sakpo wo soliŋ kpeku le num mandaa wo cho tosaa a sabu le mi bɛnduaa kundaa hɛliŋ ni. (Aisaya 32:​1, 2; Hibu. 13:​17; 1 Pitɛ 5:​2, 3) Bɛnduaa haa cho lɔɔlɔɔ a yɔŋgaŋ le num malaa a num kɔllo dɛɛniaa. Nduyɛ, ma tosa a sabu le mi chaŋyɛi ŋ nɔ a Chɛhowa ve wa ikala poŋ. Kɛ nyɛ nda tosa vɛlɛ le num ndo cho pɛɛkoo num ma sina mɛɛ num bɛɛ mala waŋnda ma pɛɛku a Chɛhowa okɔɔ yɛ ni.—Ɛfi. 4:​11-13.

17. A mɛɛ Luomaŋnda 10:​10, 13, 14 dimi yɛ, le yɛɛ naŋ nɔ yɛ miŋ pɛɛku waŋnda a Chɛhowa okɔɔ?

¹⁷ Mala waŋnda le ma kaala Chɛhowa. Mi Chiisu dimul buɛiyaa nduaa maa a pɛɛku waŋnda a Chɛhowa okɔɔ. (Maa. 28:​19, 20) O cho le mɛɛ wallo hoo cho num kuee yɛ le ŋ nɔ ma tosa ndu le. Mɛɛ kaala ŋ nɔ le Chɛhowa wo hiau lachi fau, lende ko num bɛɛ cho nɔ yiyaŋ Pitɛ nda Chɔŋ ndaa nɔ a wallo hoo okɔɔ wo ni. Ma dimi aa: “Nyɛ yɔnuŋ mi ŋ cha, nduyɛ, mi ŋ tuɛi yo, ŋ nɔla mi ŋ pɛŋgi suɛi a ndu okɔɔ le.” (Walta. 4:​20) Nyaaloo pila naŋ sɔla ni te ŋ mala pɛ waŋndo mbo kaala Chɛhowa. Yiyaŋndɔ a Filipi wana dimiaa yooŋgu kɛndɛ Mɛlɛkaa okɔɔ. Mbo naŋ kɔl tau mɛɛ o mala laŋunɔ Itoopiaanɔ koŋ mbo pɛɛku tonya cho o Baabuiyo niŋndo nduyɛ mbo yiŋ! A chɔm maa a yeema ma simnuŋ Sei Chɛhowaa te a tol pɛ taamasi Filipi wo kɔɔli, nduyɛ ma tosa wali dimiaa yooŋgu kɛndɛ Chiisu ke num ndo. (Nuawɔ Luomaŋnda 10:​10, 13, 14.) Te a wa keŋ tosaa pɛ, teleŋ cho fuuluu ma nyunaŋ mɛɛ laŋunɔ Itoopiaanɔ koŋ nyunaŋ yɛ aa: “Yɛɛnɛ kuuna yɛ ya yiŋɔɔ sɔlaa?”—Walta. 8:​36.

18. Yɛɛ naŋ cho yɛ pɛɛku o buŋgɛi cho lachi ve niŋ?

¹⁸ Kɛɛsiaa sɔvɛ ŋ cho tosa o yoomu numndo niŋ mbo hiou la tɔ laŋ kpou wo cho kɛɛsiaa le yiŋɔɔ ni. Mɛɛ kɛɛsiaa hoo cho o sɔvɛ yɛ, a nɔ ma sina nyɛ yeemaŋndo. Yɛɛ ŋ nɔ yɛ ma sina a yiŋɔɔ okɔɔ? Yɛɛ ŋ nɔ yɛ ma tosa tuupa ma yiŋ? Nduyɛ te a yiŋ pɛ, yɛɛ ŋ nɔ yɛ ma hiou lachi a tosaa? Ŋ cho nyunalaŋ ndaŋ muli o buŋgɛi cho lachi ve niŋ.