Taasioo Cho Veeloo Choo Choo Kpeleŋ

1. Mi che bɛɛ taasioo cho veeloo choo choo kpeleŋ, kɛ yɛɛ wanaa bɔɔbɔɔ cho yɛ hau tosaa? (Pulɔwaa 1:​20, 21)

O LƐŊII bɔɔbɔɔ niŋ, mi wanaa dimiaa yooŋgu kɛndiaa wa a kɔl kɛndɛ, le simndaŋ o nɛila bɛndulaŋ choo, le wanaa wa hiouwɔɔ wa yaulaŋ kioo. Kani bɛɛ a dimi niŋ yooŋgu kɛndɔɔ o nɛi waa nuaa niŋ? Te lende i cho ni, mɛɛ naapum a yiyaŋ niŋ a diomnda yau Pulɔwaa wo dimilaŋ ndaŋ. Mbo dimi maa, ‘taasioo cho veeloo choo choo kpeleŋ o luŋ, le wana kua mbo sɔla ndu wo.’ (Nuawɔ Pulɔwaa 1:​20, 21.) Sɔɔŋ taasioŋ cho o Baabuiyo niŋ a o yaula naalaŋ niŋ ni. Sɔɔŋ cho o yaulaŋ ndaŋ niŋndoŋ kpeekpei waŋnda nɔ ni ma tuei le ma sɔla yoomu fafɛɛŋndo. Le hei, miŋ wa a kɔl kɛndɛ te waŋnda bii pɛ yaula naalaŋ. Kɛ o cho waŋnda kpou le chɛl le laŋ biyɔɔ le. Waŋnda apum yeema pɛŋ ma sina nyɛ Baabuiyo dimi wo le. Nduyɛ mi apum mam naa. A yiyaŋ ko maa yau paandoo Baabuiyo cho ni. Nduyɛ mi apum pɛɛsa sɔɔŋ Baabuiyo dimi le waa a diandaa o kaa niŋndo. Ma yiyaŋ maa wanaa tual sawala Baabuiyo kɔɔli wa, chɔm bɔɔ maa a sandu. A koŋ kpou, Chɛhowa cho wɔ hiouwɔɔ lachi a waŋnda taasioo kioo. O nɛila kuɛɛ choo?

2. Vɛɛ Chɛhowa cho yɛ hau waŋnda taasioo kioo, nduyɛ yɛɛ waŋnda apum cho yɛ tosaa?

² Nɛiyo opilɛ o Chɛhowa cho hau soliŋndo kpeku le waŋnda taasioo kioo wo, cho sanaa a Diom ndɔɔ Baabuiyo ni. Sɔŋgɔ wana o wana tiuba mbo sɔla Baabuiyo. Kɛ yaula naala tɔlnuŋ o Baabuiyo choo laŋ yɛ? Laŋ bɛɛ, Chɛhowa tosa niŋ a sabu le mi la wa o sɔɔŋ maŋgalaŋ niŋ hiouwɔɔ 1,000. Mi wanaa veelu diomndaŋ o yaulaŋ ndaŋ niŋ, nduyɛ ma dɔu nyɛ nda pɛɛku wo o wali niŋ nda sɔla tɔnɔɔ tau. Kɛ, mi wanaa bɔɔbɔɔ kɛɛ kpooŋ le Chɛhowa nilaŋ yaŋɔɔ. Te a nɔ pɛ kɛɛsiaalaŋ le tosaa, ma tiindaŋ ndapila ɔɔ ma yaŋ acheleŋnda nilaŋ le ma ke nda nɛi chɔmaa. Ma chua naa pɛŋ chɔdɔ le mɛɛ naŋ cho nyɛ Baabuiyo dimi wo tolɔɔ kɔɔli yɛ. O buŋgɛi hei niŋ, ŋ cho yaasiaa le sabu waŋnda haa tosa heiyo. Le kandɔɔ, ŋ yaasiaŋndɔ fɛŋ mɛɛ naŋ looku taasioo sɔla Chɛhowa o ba yɛ.

SINAA A CHƐHOWA OKƆƆ TOSA MIŊ NƆ TAASIOO

3. Yɛɛ wana nɔ taasioo wo tosa yɛ?

³ Taasioo mala naa ni, miŋ dɔu nyɛ naŋ pɛɛku wo o wali niŋ le kɛɛsiaala kɛndɛlaŋ tosaa. Kɛ wana nɔ taasioo wo tosa mbo hiou lende. Baabuiyo dimi aa: “Te wana nɔ siooŋii Mɛlɛka Yaawɛɛ ve pɛ, mɛɛ kɔl kaloo ɔɔ taasioo, kandɔŋ ndɔɔ cho koŋ ni. Nduyɛ, wana sina Mɛlɛka [diandaa] pɛ, mɛɛ a chii sina pɛŋgoo sɔla.” (Pulɔ. 9:​10) Lelaŋ, te ŋ nɔ pɛ le kɛɛsiaa sɔvɛ sɔviɔɔ tosaa, ŋ nɔ miŋ kindiŋ le yiyaŋ Chɛhowaa sinaa. Kanifuule, Baabuiyo dimi maa, te “wana sina Mɛlɛka [diandaa] pɛ, mɛɛ a chii sina pɛŋgoo sɔla.” Ŋ tosa hei te ŋ wa pɛ Baabuiyo pɛɛkoo, a yaula tɔlnuŋ o Baabuiyo choo laŋ. Te ŋ tosa pɛ hei, mɛɛ ŋ cho chɔm maa ŋ nɔ taasioo.—Pulɔ. 2:​5-7.

4. Le yɛɛ naŋ dimi yɛ maa, Chɛhowa kinɛi tiuba ni mbo ke naa taasioo?

⁴ Chɛhowa kinɛi tiuba ni mbo ke naa taasioo. (Luomaŋ. 16:​27) Le yɛɛ naŋ dimi yɛ lende? Sabu tasoo cho ni maa, ndu toosiaa naa ni. Nduyɛ o sina nyɛ o nyɛ a nyɛm o toosiaa woŋ okɔɔ. (Sam 104:​24) Sabu diiŋ ndɔɔ cho ni maa, sɔɔŋ Chɛhowa tosa woŋ kpou chɔm maa, o nɔ taasioo. (Luomaŋ. 11:​33) Sabu yaa ndɔɔ cho ni maa, te ŋ dɔu pɛ silala ndɔlaŋ o wali niŋ, teleŋ o teleŋ mi la chuu naa tɔnɔɔ. (Pulɔ. 2:​10-12) Lelaŋ, te ŋ yeema pɛ taasioo sɔlaa, ŋ nɔ miŋ chɛl sabulaŋ ndaŋ, nduyɛ miŋ chɛl ndu mbo chɔm naa nɛiyo o sɔɔŋ naŋ tosa woŋ niŋ, vɛlɛ a le kɛɛsiaalaŋ tosaa.

5. Yɛɛ cho yɛ fulamakɔɔlioo le mɛɛ waŋnda kɛɛ taasi Chɛhowaa yɛ?

⁵ Mi wanaa bɔɔbɔɔ o chieeŋndo niŋ dimi kpendekele maa, a hɛnaŋ bɔɔ a nyɛm cho o chieeŋndoo choo woŋ. Kɛ ma kɛɛ le laalaŋndo maa waŋndo cho, o toosiaa nyɛm muŋ ndo. Nduyɛ a yiyaŋ maa, nyɛ o nyɛ a ba ndɔ o hiŋ ni. Mi apum dimi maa a laalaŋ o Mɛlɛka niŋ, kɛ sawala cho o Baabuiyo niŋndaŋ la cho bɔɔ sawala paandu. Le hei, nyɛ nda yeema wo nda tosa ni. Fulamakɔɔli kuɛɛ naŋ cho yɛ chɔɔ? Le mɛɛ waŋnda kɛɛ tiindaŋndo dɔwɔɔ o Mɛlɛka niŋ, ma wa ndapila tiindaŋndo yɛ, chieeŋndo cho hau o kɛndɛ le. O faŋaŋ okoŋ kɔɔli, waŋnda nɔ hau kɔl kɛndɛ kpeekpei le, nduyɛ a nɔ tiindaŋ le chilaŋ te. Sɔɔŋ cho hau yɔŋnɔŋndo woŋ kindi laalaŋ naa o nyɛ Baabuiyo dimi hoo wo niŋ. O dimi aa: “Mɛɛ o mɛɛ wana chioo nɔ taasioo ɔɔ sina pɛŋgoo, nduyɛ a kɔl kaloo, o nɔla mbo yem Mɛlɛka Yaawɛɛ le.” (Pulɔ. 21:​30) Hei nɔ mi i nyindu naa le miŋ hiou lachi a Chɛhowa nyunaa le mbo ke naa taasioo. Kɛ i cho suɛi imɔnɔ le sinaa maa, wanaa bɔɔbɔɔ tosa hei le. Le yɛɛ?

LE YƐƐ WAŊNDA KƐƐ YƐ TAASIOO SƆLAA?

6. A mɛɛ Pulɔwaa 1:​22-25 dimi yɛ, nɛɛ waa kɛɛ yɛ le taasioo sɔlaa?

⁶ Te kɔl kaloo ɔɔ taasioo wa pɛ veeloo choo choo kpeleŋ o luŋ, mi wanaa bɔɔbɔɔ kɛɛ le nilaŋ yaŋɔɔ. A mɛɛ Baabuiyo chɔm yɛ, waŋnda kundalaŋ la yaa kɛɛ le taasioo sɔlaa ni. “Wanaa nɔ kɔl kalu bɔɔ le wa,” “wanaa mamaa” a “diɔmnda.” (Nuawɔ Pulɔwaa 1:​22-25b.) Ŋ tofaŋndɔ sɔɔŋ ŋpum, ŋ tosa mi waŋnda haa kɛɛ le taasioo sɔlaa wo, nduyɛ miŋ che nyɛ naŋ nɔ miŋ tosa le sɔɔŋ muŋ fafaŋndo wo.

7. Le yɛɛ waŋnda apum kɛɛsiaa yɛ le waŋnɔŋndo “wanaa nɔ kɔl kalu bɔɔ le wa”?

⁷ “Wanaa nɔ kɔl kalu bɔɔ le wa,” cho wanaa nda keleŋa hui ya ni. Nduyɛ haupa ma laalaŋ nyɛ o nyɛ nda dimul nda. (Pulɔ. 14:​15) Teleŋnda bɔɔbɔɔ, miŋ komal wanaa waa nuaa o wali pollo niŋ. Le tamaseliiyo, yiyaŋndɔ a wanaa simlachiaa lepiɛiya ɔɔ simlachiaa le yalale chieeŋndo nɔ huiyo o miiliɔŋndaŋ niŋnda. Mi kɔndɔfillo bii apum, te a sina pɛ maa huiyo koni waŋnda haa cho nda ni. Kɛ mi wanaa Pulɔwaa 1:​22 soo okɔɔ wa kɛɛsiaa le hiouwɔɔ lachi a waŋnɔŋndo wanaa nɔ kɔl kalu bɔɔ le wa kanifuule, lende nda yeema ni ma wa. (Chɛlui. 5:​31) Waŋnda haa tuei nyɛ nda cho tosaa wo yeela. Nduyɛ pesiŋ bɛɛ a yeema ma pɛɛku nyɛ Baabuiyo dimi wo, ɔɔ ma tol sawala ndɔlaŋ kɔɔli le. Mi apum dimi nyɛ pilɛ kpe wanachiee pilɛ yɔŋguŋ kpou o kaŋnde ndɔleŋ niŋndo dimi wo. O Kuebɛki niŋ Kanada wanachioo hoo cho ni. Mbo dimul Sei Chɛhowa wa kɔlaŋ o ndu lo wo aa: “Te simlachinɔ naa dimul naa choolaŋ pɛ, sina ndɔɔ cho koŋ ni. O cho buulaŋ naa le cho koŋ te.” Pesiŋ bɛɛ ŋ yeema miŋ tol tamasi waŋnda haa kɔɔli a kɛɛ haa le taasioo sɔlaa a siɛlɛi fuu wa le.—Pulɔ. 1:​32; 27:​12.

8. Yɛɛ mala yɛ naa miŋ sɔla taasioo?

⁸ Baabuiyo dɛɛniaa naa kpou maa ŋ nɔ miŋ hiou lachi a waa wanaa nɔ kɔl kalu bɔɔ le wa le. Kɛ maa ŋ nɔ miŋ “simnuŋ kaasoŋnda o sinapɛŋgu [naa] niŋ.” (1 Kɔliŋ. 14:​20) Le miŋ sɔla taasioo, mɛɛ miŋ wa sawala mandaala Baabuiyo dɔwɔɔ o wali niŋ. Te ŋ wa pɛ keŋ tosaa, ŋ cho chɔ mɛɛ Baabuiyo mala naa le bahawɛilaŋ fafaŋndo yɛ. Nduyɛ ŋ cho wa kɛɛsiaala kɛndɛlaŋ tosaa. Lelaŋ, i cho suɛi kɛndɛ le miŋ wa yiyaŋndo a kɛɛsiaala naŋ tosalaŋ okɔɔ. Le tamaseliiyo, te o yɔŋ pɛ maa a cho niŋ Baabuiyo pɛɛkoo vɛlɛ ma wa kɔlaŋ o bɔŋaŋndaŋ le teleŋ vilɛi, kɛ a yɔŋguŋ ndɔ o Chɛhowa lo ma sɔla yiŋɔɔ le, mɛɛ yiyaŋ a nyɛ ŋ nɔ ma tosa le ma komal kpeleŋ koŋ ndo okɔɔ. Te o yɔŋ pɛ maa a sɔla niŋ yiŋɔɔ, baa a cho pa hiouwɔɔ lachioo tosaa le ma chaa yooŋgu kɛndɔɔ dimioo, nduyɛ ma simnuŋ wana chaa pɛɛkoo wo? Baa kɛɛsiaala ŋ tosalaŋ la chɔm pa maa a cho nyɛ ŋ cho pɛɛkoo o Baabuiyo niŋndo dɔwɔɔ o wali niŋ? Baa ma bii pa acheleŋnda mɛɛ Chiisu ndoo bii waŋnda yɛ? Te o yɔŋ pɛ ma che maa a nɔ ma tosa hiouwɔɔ lachioo, mɛɛ yiyaŋ a sawala Chɛhowalaŋ okɔɔ. Kanifuule la tosa mi ‘wanaa nɔ kɔl kalu bɔɔ le wa sɔla taasioo.’—Sam 19:​7.

9. Vɛɛ ‘wanaa mam’ sɔɔŋ Mɛlɛkaŋ nda chɔm yɛ maa a yeema ma sɔla taasioo le?

⁹ Kunda diiŋ ndɔ kɛɛ le taasioo sɔlaa wo, cho ‘wanaa mam’ sɔɔŋ taasioŋ nda ni. Teleŋndaŋ lapum, miŋ saaluŋ waŋnda haa o wali pollo niŋ. Mi waŋnda haa sinaŋ nyɛkɛndɛi te a wa pɛ naa mamɔɔ. (Sam 123:​4) Mi Baabuiyo dimi maa o palɛi mɛɛlɛi niŋ, wanaa mam sɔɔŋ Mɛlɛkaŋ nda cho wa tau. (2 Pitɛ 3:​3, 4) O sindɔɔ niŋ bɛɛ, mi lefuaa Lɔtu wa cha nyɛ Lɔtu ndoo dimul nda wo maa mamɔɔlaŋ o wa ni. Nduyɛ nyɛ pilɛ koŋ kpe waŋnda cho hau tosaa ni. (Chɛ. 19:​14) Mi wanaa bɔɔbɔɔ mam wanaa cho sawala mandaala Baabuiyo dɔwɔɔ o wali niŋnda. Waŋnda haa “yeemaŋ ndaŋ wɔɔŋndoŋ” nda tual kɔɔli ni. (Chudi 7, 17, 18) A tonya, mɛɛ Baabuiyo tɛɛsiaa wanaa mam sɔɔŋ Mɛlɛkaŋ nda yɛ, chɛlaŋ a wanaa simul tonyaa wa vɛlɛ a wanaa cheleŋ kɛɛ Chɛhowa nilaŋ yaŋɔɔ wa.

10. A mɛɛ Sam 1:​1 dimi yɛ, vɛɛ naŋ fafaŋ yɛ wanaa mam sɔɔŋ Mɛlɛkaŋ nda?

¹⁰ Yɛɛ naŋ nɔ yɛ miŋ tosa le miŋ fafaŋ wanaa mam sɔɔŋ Mɛlɛkaŋ nda? Nyɔɔ opilɛ o naŋ nɔ miŋ tosa wo cho ni maa, ŋ nɔ miŋ fafaŋ holiaŋndo a wanaa ŋɔɔchiaŋ a nyɛ o nyɛ okɔɔ wa. (Nuawɔ Sam 1:​1.) Hei sim ni maa, ŋ nɔ miŋ veelu diomndaŋ o yaula wanaa simul tonyaa wa soli laŋ niŋ, ɔɔ miŋ yaŋ nda nilaŋ te. Ŋ nɔ miŋ wa yekeŋ yɔŋii naŋ wa kiisaŋndo a mɛɛ Chɛhowa tosa sɔɔŋ yɛ, vɛlɛ a nɛila chɔmaala kɔɔna ndɔɔ cho naa kioo laŋ. Le hei fafaŋndo, ŋ nɔ miŋ nyunaŋ aa: ‘Baa mi ŋɔɔchiaŋ pa teleŋ o teleŋ naŋ sɔla pɛ nɛi chɔmaa ɔɔ sinapɛŋgu sɛnɛiyo? Baa mi nuuviaa pa wanaa cho chilaŋ chuaa wa biondɔŋndaŋ o ŋdial?’ Te ŋ nuuviaa pɛ nɛilaŋ le kaalaŋ ndaŋ soliŋndo o kɔl, mi Chɛhowa naŋ kɔl tau a naa.—Pulɔ. 3:​34, 35.

11. Vɛɛ “diɔmnda” cha yɛ sawala Chɛhowalaŋ?

¹¹ Kunda yaa ndɔ kɛɛ le taasioo sɔlaa wo cho “diɔmnda” ni. Diɔmnda waŋnda haa cho ni kanifuule, ma kɛɛ le sawala Mɛlɛkaŋ tolɔɔ kɔɔli. Nduyɛ nyɛ cho o kɛndɔɔ nda o hɔllo nda tosa ni. (Pulɔ. 12:​15) O dimi niŋ, Chɛhowa, wana taasioo fula o ba wo nda cho kiɔɔ ni. (Sam 53:​1) Te ŋ komal pɛ waŋnda haa o wali pollo niŋ, lepum ma dɔɔnuŋ tumbe a naa, le mɛɛ naŋ cho sawala Baabuiyo dɔwɔɔ o wali niŋ yɛ. Kɛ o kpeekpei niŋ, waŋnda haa tiuba ma ke naa yoomu sɔviɔɔ le. Baabuiyo dimi aa: “Diɔmndo o che bɔɔ kɔl kaloo ɔɔ taasioo suɛi bɛndu bɛndu. O kɔ bɛɛ o bɔŋaŋ o dio saasaa sondoo, o nɔla mbo dimi nyɛ o nyɛ o bɔŋaŋ koŋ niŋ te.” (Pulɔ. 24:​7) Pesiŋ bɛɛ diɔmndo tiuba mbo ke waŋndo sila taasioo le. Lelaŋ kpeekpei Chɛhowa dimul naa ni maa, “o bɛnda mi wana kela diɔmndo kɔɔli le.”—Pulɔ. 14:​7.

12. Yɛɛ mala yɛ naa ŋ tosa sɔɔŋ maa diɔmnda le?

¹² Ŋ cho maa wanaa tul sawala Chɛhowalaŋ yɛleŋ nda le. Kɛ miŋ kindiŋ le yiyaŋ Mɛlɛkaa nɔɔ, nduyɛ miŋ kaala sawala ndɔlaŋ. Te ŋ tuu pɛ fulamakɔɔli naŋ sɔla le Chɛhowa diikɔŋndo wo, a fulamakɔɔlila wanaa kɛɛ ndu diikɔŋndo wa sɔla laŋ, mi keŋ tosa mi kaala naŋ nɔ le ndu wo chɔɔlu kalu poŋ. Yiyaŋndɔ a bahawɛila waŋnda veeluŋ choo, le mɛɛ nda kɛɛ sila taasi Chɛhowaa dɔwɔɔ o wali niŋ yɛ. Nduyɛ yiyaŋndɔ vɛlɛ a mɛɛ yoomu numndo cho o sɔvɛ le mɛɛ ŋ cho Chɛhowa diikɔŋndo yɛ.—Sam 32:​8, 10.

13. Baa mi Chɛhowa baŋ naa pa le silala ndɔlaŋ dɔwɔɔ o wa niŋ?

¹³ Mi che bɛɛ mi Chɛhowa ke wana o wana taasioo, kɛ o beŋ wana le ma chɛl ndu le. Nduyɛ mbo chɔm fulamakɔɔli waŋnda sɔla wo, te a kɛɛ pɛ taasi ndɔɔ tolɔɔ kɔɔli. (Pulɔ. 1:​29-32) Baabuiyo dimi maa, wanaa cho kiɔɔ Chɛhowa diikɔŋndo wa cho “paawa [ndaa] chua.” O teleŋ biŋgi bɛŋgu, mɛɛ nda cho yoomula ndalaŋ biyɔɔ yɛ cho nda nyɛkindilaa a bahawɛilaŋ chuu. Nduyɛ o chilaŋ niŋ, a cho hunɔɔ tambei sɔla. O baa pilɔɔ choo, Chɛhowa chuel wanaa cho silala ndɔlaŋ nilaŋ yaŋɔɔ, ma wa laŋ dɔwɔɔ o wali niŋ nda buŋgɛi aa: “Wanaa tuei ya diom nda nda, le teleŋ o teleŋ waŋnɔŋndo nda waŋnuŋ o ba ndaa choo yɛlɛkɛlɛɛ ni, nyɛ o nyɛ yɔŋnuŋ nda le. Le teleŋ o teleŋ waŋnɔŋndo nda waŋnuŋ a kɔl nyulu ni, siooŋii ve nda maa wana cho nda nyɛ yɔŋ te.”—Pulɔ. 1:​33.

MI TAASIOO CHUU NAA TƆNƆLAŊ TAU

14-15. Yɛɛ naŋ pɛɛku yɛ o Pulɔwaa 4:​23 niŋ?

¹⁴ Teleŋ o teleŋ miŋ sɔla tɔnɔɔ te ŋ dɔu pɛ taasi Mɛlɛkaa o wali niŋ. A mɛɛ naŋ yaasiaa niŋ yɛ, taasi Chɛhowaa cho le wana o wana. Le tamaseliiyo, o yau Pulɔwaa wo niŋ, sɔɔŋ taasioŋ cho loŋ tau, ŋ mala naa o yoomoo niŋ lepaa o lepaa woŋ. Ŋ yaasiaŋndɔ sɔɔŋ muŋ ŋhiɔɔlu.

¹⁵ Manda yiyaŋnda numndaŋ. Baabuiyo dimi aa: “Mandaŋ a nyɛ ŋ yiyaŋ o kɔl numndo niŋ ndo, fondole, nyɛ wana chioo o yiyaŋ o kɔl ndɔɔ niŋ ndo, ndu cho yoomu wanaa chioo ni.” (Pulɔ. 4:​23) Yiyaŋndɔ a sɔɔŋ naŋ tosa le kɔl naa mandaa wo. Ŋ nɔ miŋ wa nyɛdiaa kɛndɔɔ dioo, miŋ wa dialloŋ hiiluuwo, nduyɛ miŋ fafaŋ kaala wɔɔŋndaŋ. Nyɛ pilɔɔ hoo kpe naŋ tosa ni le yiyaŋnda naalaŋ mandaa. Ŋ nɔ miŋ wa diomndaŋ veeloo o Baabuiyo niŋ lepaa o lepaa, miŋ wa bɛɛndiaŋndo le bɔŋaŋndaŋ, miŋ wa kɔlaŋ o laŋ, nduyɛ miŋ wa nyunalaŋ mulioo. Wali pollo tosaa teleŋ o teleŋ mala naa vɛlɛ miŋ wa a kala poŋ. Nduyɛ ŋ nɔ miŋ fafaŋ kaala wɔɔŋndaŋ, mɛɛ kaa ihini nɔɔlɛiyo, a chaŋyaŋ wɔɔŋndoŋ cho nuaa yɛ, yɔŋii ŋ pɔsɔŋiaa yiyaŋnda naalaŋ.

16. Vɛɛ diomnda cho o Pulɔwaa 23:​4, 5 niŋndaŋ la mala yɛ naa hau?

¹⁶ Hini kɔl a nyɛ ŋ nɔ wo. Mi Baabuiyo sila naa aa: “Yɔɔkpiaa num pila le chiee chieiyo le sullo sɔlaa le, . . . kani fondole, sullo, o teleŋ biŋgi bɛŋgu mbo kuɛŋnuŋ kpou. Mɛɛ kowɔɔ o chaŋ nuaa o lepilɛ niŋ, mbo kuɛŋnuŋ yɛ, lende o kuaŋnuŋ ni.” (Pulɔ. 23:​4, 5) Sullo ɔɔ nyɛm kiɔɔŋ ve lefafɛɛŋ te. Mi wanaa sulaa a wanaa bala fonduaa landuŋ kɔl le nyɛsɔlaa nuuviaa. Mi hei tosa ma luei balaŋ o sɔɔŋ tɛɛmbuu nda tɔɔ woŋ niŋ, ma tɛɛmbuu chaŋyaŋ kɛndɛŋ nda nɔ woŋ, nduyɛ pɛŋ, ma luei kɛndiaa ndaa o kpundɔɔ niŋ. (Pulɔ. 28:​20; 1 Timo. 6:​9, 10) O baa pilɔɔ choo, mi taasioo mala naa miŋ nɔ yiyaŋ kpeŋ kpeŋndo a kaniei okɔɔ. Mi hei mala naa vɛlɛ miŋ fafaŋ hɔlteŋ luɛiyɔɔ o nyɔɔŋ, miŋ nɔ kɔl hiniaa kpeekpeiyo, nduyɛ miŋ wa a kɔl kɛndɛ.—Ikili. 7:​12.

17. A mɛɛ Pulɔwaa 12:​18 dimi yɛ, yɛɛ mala yɛ naa le mi ‘diomnda taasilaŋ’ la wa naa fulaa o sondo?

¹⁷ Yiyaŋ tuupa ma soo. Te ŋ ve yekeŋ te, mi nyɛ naŋ dimul acheleŋnda wo tɛɛmbuu nda kɔllo tau. Baabuiyo dimi aa: “Diomnda wɔɔŋndaŋ dimioo, la yɔŋul waŋndo, nua wɔ ko mɛɛ nda lɔwa nuaa waŋndo a muɛi faŋnde yɛ. Kɛ diomnda kɔl kalula ɔɔ diomnda taasila fula waŋndo o sondo laŋ ndaŋ, siŋgioo la siŋgi waŋndo ni.” (Pulɔ. 12:​18) Te ŋ fafaŋ pɛ acheleŋnda choŋgulaŋ, nduyɛ miŋ fafaŋ suɛi a biondɔŋnda ndalaŋ okɔɔ, keŋ tosa miŋ wa o chaŋyɛi kɛndɛi niŋ a nda. (Pulɔ. 20:​19) Le miŋ luei acheleŋnda yoomuaŋ, nduyɛ miŋ fafaŋ nda kɔllo tɛɛmbuuwo, ŋ nɔ miŋ wa diomndaŋ veeloo teleŋ o teleŋ o Baabuiyo niŋ, vɛlɛ miŋ wa yiyaŋndo lechoo. (Luku 6:​45) Te ŋ wa pɛ yiyaŋndo o nyɛ Baabuiyo dimi wo choo, keŋ mala naa mi diomnda naalaŋ la wa mɛɛ “pee pɔmbɔɔ” o wa nuaa yɛ. Nduyɛ keŋ tosa mi acheleŋnda naŋ kɔl a nyɛ naŋ dimul nda wo.—Pulɔ. 18:​4.

18. Vɛɛ Pulɔwaa 24:​6 dɔwɔɔ o wali niŋ mala yɛ naa le batiuwaa sɔlaa o wali pollo niŋ?

¹⁸ Tol nɛi chɔmaa kɔɔli. Mi Baabuiyo ke naa sila mala naa le miŋ sɔla batiuwaa wo. Mbo dimi aa: “Le chɔuwo kiolɔɔ mɛɛ ma nɔ wanaa silaa kɔl kaluaa ɔɔ taasiaa. Te a nɔ wanaa silaa kɔl kaluaa ɔɔ taasiaa pɛ, ma wa tau yomɔɔ ŋ yam chɔuwo ni ɔɔ batiuwaa ŋ sɔla ni.” (Pulɔ. 24:​6) Vɛɛ bolle Baabuileŋ ndeŋ le mala yɛ naa le miŋ chaa yooŋgu kɛndɔɔ dimioo a waŋnda pɛɛkoo? Ŋ nɔ miŋ tol nɛila chɔmaala nda ke naa le yooŋgu kɛndɔɔ dimioo, a waŋnda pɛɛkoo laŋ kɔɔli, kɛ ŋ nɔ miŋ tol yiyaŋ naa kɔɔli le. Te ŋ kuɛ pɛ o bɔŋaŋnda naala leKilisiɔŋndaŋ, miŋ sɔla nɛila chɔmaalaŋ a silala tɔlnuŋ o Baabuiyo choo laŋ, sanaa a sɔɔŋ nda wa yɔŋgoo woŋ. Le handɔɔ lechoo, kɔɔna Chɛhowaa cho naa nyɛm waliŋ mala naa le yooŋgu kɛndɔɔ dimioo nyɛkɛndɛiyoŋ kioo. Nyɔɔŋ muŋ cho yaulaŋ a vidueilaŋ ni. Nduyɛ nyɔɔŋ muŋ tiuba miŋ mala waŋnda le ma bii Baabuiyo bila. A cho pa muŋ soliŋndo kpeku nyɛkɛndɛi?

19. Vɛɛ ŋ yiyaŋ yɛ a sɔɔŋ taasiŋ Chɛhowa ke naa o Diom ndɔɔ niŋndoŋ? (Pulɔwaa 3:​13-18)

¹⁹ Nuawɔ Pulɔwaa 3:​13-18. Ŋ cho bɔɔ a kɔl kɛndɛ le silala taasila cho o Diom Mɛlɛkaa niŋndaŋ. Vɛɛ yoomula naalaŋ la wa yɛ wa hau, te naŋ nɔ silala taasilaŋ ndaŋ te? O buŋgɛi hei niŋ, miŋ yaasiaa sɔɔŋ taasiŋ cho o yau Pulɔwaa wo niŋndoŋ ŋtiŋ. A tonya, silala taasilaŋ la cho o Diom Mɛlɛkaa niŋ ni. Lelaŋ, maa ŋ kɛɛsiaŋ o kɔl le laŋ dɔwɔɔ o wali niŋ lepaa o lepaa, o yoomula naalaŋ niŋ. Wanaa bɔɔbɔɔ o chieeŋndo niŋ chi silalaŋ ndaŋ la sɔvɛ le. Kɛ naŋ nɔ tiindaŋndo maa, ‘wanaa sɔla kɔl kaloo ɔɔ taasioo ma bii ndu kpiŋ nda, cho wa a kɔl kɛndɛ.’