A Tiuba Ma Wa o Kɔl Nyulu Niŋ te Sɔɔŋ Kɔl Tambɛiyo Komal Num Pɛ

1. Yɛɛ kɔl nyulu Mɛlɛka yɔŋgu wo tosallɛ naa, nduyɛ tɔnɔ yɛɛ naŋ sɔla yɛ te ŋ nɔ ndu pɛ? (Filipiaŋnda 4:​6, 7)

KƆL nyulu pum cho, waŋnda o chieeŋndo hoo niŋ sina a ndu okɔɔ kposoŋ te. Ndu cho “kɔl nyulu Mɛlɛka yuŋgu wo” ni. Mi kɔl nyuloo hoo tosa miŋ kɛsi kɔllo le mɛɛ naŋ nɔ chaŋyɛi kpɛɛluŋnde a Finya naa o choo choo niŋ yɛ. Te ŋ nɔ pɛ kɔl nyuloo hoo, miŋ waŋnuŋ hɛnɛkɛ, siooŋii bii naa le. (Nuawɔ Filipiaŋnda 4:​6, 7.) Miŋ nɔ chaŋyɛi kɛndɛi a wanaa kaala ndu wa, nduyɛ miŋ nɔ chaŋyɛi kpɛɛluŋnde a “Mɛlɛka kɔl nyuloo.” (1 Tɛsa. 5:​23) Te ŋ sina pɛ Finya naa nyɛkɛndɛi, miŋ diikuŋ ndu, miŋ tiindaŋ ndu nduyɛ miŋ fafaŋ buulaŋndo, mi kɔl nyulu o ke naa wo tosa miŋ kɛsi kɔllo o yɔŋ bɛɛ mi sɔɔŋ kindilaŋ komal naa.

2. Le yɛɛ naŋ nɔ yɛ tiindaŋndo maa ŋ tiuba miŋ nɔ kɔl nyulu Mɛlɛka yɔŋgu wo?

² Baa ŋ tiuba pa miŋ wa o kɔl nyulu niŋ te sɔɔŋ kɔl tambɛiyoŋ komal naa pɛ, mɛɛ naala tiu ba o ba fee laŋ, kpundɔɔ, chɔulaŋ, ɔɔ nyɛpalaa nda tusi naa choo wo cho nuaa yɛ? Mi sɔɔŋ palaŋ muŋ i kɛ kɛ tosa mi siooŋnde bii naa. A koŋ kpou, mi Chiisu ke buɛiyaa nduaa silaa aa: “La wa a kɔlta tambɛi le. Nduyɛ la yɔŋ isiooŋ te.” (Chɔŋ 14:​27) I cho suɛi kɔl kɛndɛ le sinaa maa puaapiliaa a ndepiliaa naa bɔɔbɔɔ dɔu niŋ silaa hoo o wali niŋ. A mala Chɛhowaa, mi che bɛɛ mi sɔɔŋ kindilaŋ komal nda, kɛ a waŋnuŋ o kɔl nyulu niŋ.

WA O KƆL NYULU NIŊ TE NAA TIU BA O BA FEE WO DEL PƐ

3. Te naa tiu ba o ba fee wo del pɛ, vɛɛ keŋ paaliaŋ yɛ naa?

³ Te naa tiu ba o ba fee wo del pɛ, mi sɔɔŋ siŋgaŋ o yoomula waŋnda niŋ. Ŋ tofaŋndɔ mɛɛ naa Kolonaa piiliaŋ wanaa bɔɔbɔɔ yɛ. O kona pilɛ niŋ, mi waŋnda saaluŋ maa wanaa bɔɔbɔɔ ndaa lɔl te. Mi naa hoo tosa mi waŋnda apum kandu buulaŋ bɛndoo, mi apum yɔŋnuŋ yolomaŋ yolomaŋ, nduyɛ mi a bɔɔbɔɔ kandu muɛiyaŋ kolɔɔ bɛndoo a taaŋ bɛndoo kolɔɔ. O fulawɔ okoŋ ­kɔɔli, mi niilu latandaa luɛi o yuŋgulaŋ lapum niŋ, nduyɛ pɛŋ, mi apum kindiŋ le ndapila diinɔŋndo. Te naa tiu ba o ba fee wo del pɛ o fondaŋ numndo, yɛɛ mala yɛ num ma pɛŋgi buulaŋ bɛndoo vɛlɛ ma tuei kɔl nyulu Mɛlɛka yɔŋgu wo yeela?

4. Vɛɛ nyɛ Chiisu dimi a palɛi mɛɛlɛi okɔɔ wo tosa yɛ miŋ wa o kɔl nyulu niŋ?

⁴ Mi Chiisu dimi maa te palɛi mɛɛlɛi le chieeŋndo hoo fuuluu pɛ, naala tiu ba o ba fee laŋ la cho “tiu o fondaŋnda bɔɔbɔɔ.” (Luku 21:​11) Vɛɛ hei sinaa mala yɛ naa miŋ wa o kɔl nyulu niŋ? Te ŋ tuei pɛ a naala tiu ba o ba fee laŋ okɔɔ, kɔndɔfili bii naa le. Miŋ sina kpendekele maa sɔɔŋ muŋ cho yɔŋnɔŋndo mɛɛ Chiisu dimi yɛ. Le hei, ŋ nɔ miŋ diikuŋ sila o ke naŋ cho hau achal o palɛi mɛɛlɛi niŋnda. Mbo dimi aa: “Siooŋii bii nya le.”​—Maa. 24:6.

5. (a) A mɛɛ Filipiaŋnda 4:​8, 9 dimi yɛ, a yɛɛ okɔɔ naŋ nɔ yɛ miŋ piɛi te naa tiu ba o ba fee wo del pɛ? (b) Vɛɛ ndepilɛnɔ pilɛ sɔla yɛ tɔnɔɔ mɛɛ o yaŋ nilaŋ o diomnda nda chua o Baabuiyo niŋndaŋ, nduyɛ yɛɛ naŋ pɛɛku yɛ o tamasi ndɔɔ niŋ?

⁵ Te naa tiu ba o ba fee wo del pɛ, mi keŋ tosa miŋ buulaŋ, nduyɛ miŋ wa a siooŋnde. Hei ndii yɔŋnuŋ ndepilɛnɔ pilɛ ni diolaŋ Desi.b Mi bom ndɔ, po finya ndɔ pɔmbɔ wo, a wana ndɔ chiɔuwaa sɔla piɔmndo a naa Kolonaa. Le hei, mi siooŋnde bii ndu maa ndu bɛɛ cho naa Kolonaa sɔla, okoŋ mi naa koŋ taŋ kala ndɔ yuwɛiyo. O wa vɛlɛ buulaŋndo maa wali ndɔɔ cho ndu hiɔluŋ, o nɔ lɛ niŋ nyɛsɔlaa le nyɛdiaa piondɔɔ a paawa chiɛiyo yɔŋgoo le. Lelaŋ, mi ndoo buulaŋ tau. Ndoo hini bɛɛ ndoo lɔl te. Kɛ mi Desi miiŋgu vɛlɛ wa a kɔl nyulu. Yɛɛ mala yɛ ndu? Mbo piɛi o Chɛhowa lo le mbo mala ndu mbo kɛsi kɔllo, nduyɛ mbo yiyaŋ o sɔɔŋ kɛndɔŋ choo. (Nuawɔ Filipiaŋnda 4:​8, 9.) Mi ndoo chɛl mi Chɛhowa soo o ndu lo sanaa a diomnda nda chua o Baabuiyo niŋndaŋ nilaŋ yaŋɔɔ. Mbo dimi aa: “Mi diomnda kɔl dɛɛniaala ya wa tueiyɔɔ laŋ la mala ya mi pɛŋgi buulaŋndo, nduyɛ mi la loonuŋ ya maa Mɛlɛka inyiɛɛyo Chɛhowa cho ni.”​—Sam 94:19.

6. Vɛɛ pɛɛkɔŋ ipilayaa a kɔlaŋ o bɔŋaŋndaŋ la mala yɛ naa?

⁶ Te naa tiu ba o ba fee wo del pɛ, naapum mi sɔɔŋ naŋ tosa woŋ ŋpum siŋgaŋ. Kɛ chɛl mi hei kuuna num pɛɛkɔŋ ipilayaa tosaa a kɔlaŋ o bɔŋaŋndaŋ te. Mi sɔɔŋ yɔŋnaŋ bɔɔbɔɔ o yaulaŋ a o vidueila naalaŋ niŋ loonuŋ naa a mɛɛ puaapiliaa a ndepiliaa naa cho hiouwɔɔ lachi a pimbi nda simiaa chɔmndo yɛ, mi che bɛɛ mi sɔɔŋ waa nuaa komal nda. (1 Pitɛ 5:9) Kɔlaŋ o bɔŋaŋndaŋ la mala naa miŋ wa yiyaŋndo a sɔɔŋ cho o Baabuiyo niŋndoŋ okɔɔ. Hei mala naa vɛlɛ miŋ dɛɛniaa acheleŋnda nduyɛ mi naa bɛɛ sɔla kɔl dɛɛniaa. (Luomaŋ. 1:​11, 12) Te ŋ wa pɛ yiyaŋndo a mɛɛ Chɛhowa mala buɛiyaa nduaa teleŋ nda wa a naalaŋ, ma wa a siooŋnde, ɔɔ ma wa wanapilɛyɛi sinaŋndo yɛ okɔɔ, mi keŋ kindi laalaŋ naa poŋ.

7. Yɛɛ naŋ pɛɛku yɛ kiilanɔɔ Chɔŋ o ba?

⁷ Dɔu sɛmbɔɔ le waa suukaŋndo a puaapiliaa a ndepiliaa numnda. Teleŋndaŋ lapum, te naa tiu ba o ba fee wo del pɛ, ma dimul naa le miŋ fafaŋ holiaŋndo a waŋnda o yɔŋ bɛɛ aa chaaŋaa naa laalaŋnda. A teleŋnda waa nuaa, miŋ sinaŋ mɛɛ kiilanɔɔ Chɔŋ ndoo sinaŋ yɛ. Ndoo nɔ yeemɛi le chiikaŋndo a chaaŋ ndɔ Kayɔɔ. (3 Chɔŋ 13, 14) Kɛ Chɔŋ ndoo sina maa a teleŋ koŋ, ndoo tiuba mbo che Kayɔɔ le. Le hei, mbo tosa nyɛ ndoo tiuba wo. Mbo poonyial Kayɔɔ yauwo. O nɛi pilɛ koŋ choo, te o yɔŋ pɛ maa a tiuba le kɔlaŋ puaapiliaa a ndepiliaa numnda yilɔɔ le, a veelu nda o foŋndo choo, veeloo mi la wa chaŋnaŋndo, ɔɔ a yɔŋ nda yooŋgoo o foŋndo choo. Te a nuuviaa pɛ nɛilaŋ le ma wa suukaŋndo a chaaŋaa num aa laalaŋnda, keŋ cho tosa ma wa o kɔl nyulu niŋ. I mala num vɛlɛ ma wa hɛnɛkɛ, siooŋii ve num te. Te a wa pɛ buulaŋndo tau, dimul bɛnduaa a ndi okɔɔ, nduyɛ ma chɛl kɔl dɛɛniaa nda cho num ke wo.​—Aisaya 32:​1, 2.

WA O KƆL NYULU NIŊ TE KPUNDƆƆ DEL PƐ

8. Te kpundɔɔ del pɛ, vɛɛ keŋ paaliaŋ yɛ kɔl nyulu numndo?

⁸ Naapum mi mɛŋma hunaŋ, lɛŋnde nyiiyaa leŋ, ɔɔ mi yiŋnde bɛŋndeŋ le mal kpundɔɔ o fondaŋ ŋ cho wo. Te hei yɔŋnuŋ pɛ, ma luɛi o buulaŋ bɛndoo niŋ le teleŋ vilɛi. Te wana ŋ kaala wo sɔla pɛ piɔmndo o kpundɛ koŋ niŋ, ɔɔ mi nyɛm kɛŋ numndoŋ hɛluŋ num, naapum ma tambu kɔl tau, a nɔ lɛ tiindaŋ te. Ɔɔ, ma tuulu kɔl tau. O kpeekpei niŋ, hei sim nuaa maa a kaala bɔɔ nyɛm kiɔɔŋ ɔɔ a nɔ tiindaŋ te le. Suɛi kpundɛi komal num ni. Le hei, mi apum wa num kɔl le sɔɔŋ biyɔɔ o nɛi bɛnda le wo choo. (Choobu 1:​11) Kɛ o yɔŋ bɛɛ mi suɛi waa nuaa komal num, a tiuba ma wa a kɔl nyulu. O nɛi kuɛɛ choo?

9. Yɛɛ Chiisu dimi yɛ le naa bɛɛndiaa le sɔɔŋ kpundɛŋ komal naa woŋ?

⁹ Loonuŋ nyɛ Chiisu dimi wo. Waŋnda apum o chieeŋndo niŋ yiyaŋ maa pesiŋ bɛɛ sɔɔŋ kpundɔŋ komal niŋ nda le. Kɛ naŋ cho maa nda le kanifuule, ŋ sina maa sɔɔŋ kpundɔŋ cho hiouwɔɔ lachi a yɔŋnɔŋndo. Nduyɛ ŋ sina maa sɔɔŋ muŋ ŋpum cho naa komal. Mi Chiisu dimul buɛiyaa nduaa maa lɛŋnde nyiiyaa leŋ le wa niŋ tau. Nduyɛ maa kpundɛla cheleŋ la cho yɔŋnɔŋ tuupa mi mɛɛlula chieeŋndo la fuuluu. (Luku 21:​11) Mbo dimi vɛlɛ maa “dɛnɛ wɔɔŋndo cho hiouwɔɔ lachi a kuiyo.” Nduyɛ sawa tɛɛmbaa, niilu latandaa, a delɔɔla choolaŋ, chɔm maa hei cho tonya. (Maa. 24:​12) O cho wanaa cho Chɛhowa piɛi le wa koni le Chiisu dimi maa sɔɔŋ muŋ cho nda komal te. Nduyɛ pɛŋ, buɛiyaa laalaŋaa Chɛhowaa a bɔɔbɔɔ sɔɔŋ muŋ komal nda niŋ. (Aisaya 57:​1; 2 Kɔliŋ. 11:​25) Teleŋndaŋ ­lapum, Chɛhowa tosa kaamaa le naa piŋioo o kpundɔɔ niŋ te. Kɛ mbo ke naa nyɛ o nyɛ naŋ hauba le miŋ kɛsi kɔllo, nduyɛ miŋ wa o kɔl nyulu niŋ.

10. Le yɛɛ bɛɛndiaŋndo tuupa mi kpundɔɔ komal naa, chɔm yɛ maa ŋ nɔ tiindaŋndo o Chɛhowa niŋ? (Pulɔwaa 22:3)

¹⁰ Te ŋ bɛɛndiaŋ pɛ tuupa mi kpundɛ naŋ ve kɔl te wo komal naa, keŋ tosa ndi tɛtɛlɛ le miŋ kɛsi kɔllo. Kɛ te ŋ bɛɛndiaŋ pɛ, baa keŋ chɔm ni maa ŋ nɔ tiindaŋ o Chɛhowa niŋ te? Sako. Nduyɛ pɛŋ, te o yɔŋ pɛ miŋ bɛɛndiaŋ tuupa mi kpundɔɔ komal naa, mi keŋ chɔm maa ŋ tiindaŋ ndu le naa malaa. O nɛi kuɛɛ choo? Diom ndɔɔ sila naa maa ŋ nɔ miŋ bɛɛndiaŋ tuupa mi kpundɔɔ komal naa. (Nuawɔ Pulɔwaa 22:3.) Sanaa a yaula naalaŋ, bɔŋaŋndaŋ, a yondala naŋ tuɛi laŋ, mi kɔɔna ndɔɔ dɛɛniaa naa teleŋ o teleŋ le miŋ bɛɛndiaŋ le kpundɛ naŋ ve kɔl te wo.c Baa ŋ nɔ pa tiindaŋndo o Chɛhowa niŋ? Te lende i cho ni, mɛɛ ŋ nɔ miŋ tol silaa hoo kɔɔli suŋ suŋ, tuupa mi kpundɔɔ del.

11. Yɛɛ ŋ pɛɛku yɛ o tamasi Makilɛti wo niŋ?

¹¹ Ŋ tofaŋndɔ suɛi yɔŋnaŋii ndepilɛnɔ pilɛ diolaŋ Makilɛti. Ma dimul ndu le mbo mal chiɛi ndɔɔ, mɛɛ yiŋnde bɛŋndeŋ le kandu sandei o fondaŋ ndaa niŋ. Le mɛɛ wanaa bɔɔbɔɔ wa yiŋndeŋ ndeŋ nyaanɔŋndo yɛ, mi nɛiyo pia cha a waŋnda chieeya nduyɛ fondaŋ hiauwaa ve le. Mi choo piimiaa kpilo a kumnde. Makilɛti wa o mɔmbil ndɔɔ niŋ le teleŋ vilɛi o sɔla naa hiauwaa le. Kɛ mbo chinda o kpundɛ koŋ niŋ kanifuule, o wa o bɛɛndiaŋ. Ndoo nɔ nyɛ chɔm waŋnda nɛilaŋ ndo o bɔlɔ ndɔ pɔmbɔɔ niŋ. O paandoo niŋ, ndoo soliŋ niŋ nyɛ koŋ kpeku le kelaa o nɛila laŋ choo le halikpeŋ mbo wa o bɛɛndiaŋ nyɛkɛndɛi tuupa mi kpundɔɔ del. Le mɛɛ ndoo bɛɛndiaŋ nyɛkɛndɛi yɛ, o sɔla piɔm o kpundɛ koŋ niŋ te.

12. Te kpundɔɔ del pɛ, le yɛɛ naŋ nɔ yɛ miŋ diikuŋ nɛila chɔmaala naŋ sɔla laŋ?

¹² Te kpundɔɔ del pɛ, mi masaleŋ le kɛsi teleŋ wana o wana nɔ mbo wa o ndu lo bɛɛ wo. Lepum, ma dimul naa le miŋ mal fondaŋ naa ɔɔ le miŋ tosa sɔɔŋ cheleŋ le halikpeŋ kpundɛ koŋ komal naa le. Waŋnda apum keleŋa sawala waa nuaa diikɔŋ te. Nduyɛ mi apum pɛɛsa nyɛ masaleŋ le dimi wo kanifuule, a yeema mi nyɛm nda nɔ woŋ hɛluŋ nda le. Yɛɛ Kilisiɔŋnda nɔ yɛ ma tosa o sɔɔŋ waa nuaa niŋ? Baabuiyo dimi aa: “Le sabu Masanɔɔ, la tusiŋ simlachiaa waŋchieeya kpou o ba bɛŋgu, o wa masa bɛndoo, ɔɔ masaa ŋbuŋgaa.” (1 Pitɛ 2:​13, 14) Mi kɔɔna Mɛlɛkaa ke naa vɛlɛ nɛila chɔmaalaŋ le naa mandaa. Teleŋ o teleŋ ma loonuŋ naa maa ŋ nɔ miŋ ke bɛnduaa kundaa nɔmbɛila naalaŋ, le ma veelu naa te kpundɔɔ del pɛ. Baa a tosa niŋ pa keŋ? Naapum, ma ke naa vɛlɛ nɛi chɔmaa maa ŋ nɔ miŋ chal o la naalo bɛɛ. Lepum yɛ, miŋ sɔla nɛi chɔmaa maa ŋ nɔ miŋ mal fondaŋnda naalaŋ. Nduyɛ ma chɔm naa vɛlɛ mɛɛ naŋ looku nyɛm masaleŋ le yɔŋgu le waŋnda malaa woŋ sɔla yɛ, mɛɛ naŋ looku acheleŋnda mala yɛ vɛlɛ a teleŋ naŋ nɔ miŋ tosa ndi wo. Te ŋ kɛɛ pɛ le nɛila chɔmaalaŋ ndaŋ diikɔŋndo, mi keŋ tosa miŋ luei yoomu naa a yoomula bɛnduaa kundaa o kpundɔɔ niŋ. Loonuŋ maa, puaa haa Mɛlɛka cho soliŋndo kpeku ni le ma wa naa hɔlteŋ choo. (Hibu. 13:​17) Mi Makilɛti dimi aa: “I laalaŋ kɛsɛ maa nɛila chɔmaala bɛnduaa kundaa a la kɔɔna Chɛhowaa yɔŋgu laŋ tolɔɔ kɔɔli mala ya ni, I sɔla piɔm te.”

13. Yɛɛ mala yɛ niŋ puaapiliaa a ndepiliaa mal fondaŋnda ndalaŋ nda, le ma wa a kɔl kɛndɛ, nduyɛ ma wa o kɔl nyulu niŋ?

¹³ Puaapiliaa a ndepiliaa bɔɔbɔɔ mal niŋ fondaŋnda ndalaŋ le mɛɛ kpundɔɔ, chɔuwo, ɔɔ wooluŋ wooluŋndo cho o fondaŋnda ndalaŋ yɛ, ma kua o fondaŋnda cheleŋ. Puaapiliaa a ndepiliaa haa dɛli niŋ sɔɔŋ tosaa mɛɛ wanaa cheleŋ o fondaŋ nda nyaanuŋ ndo tosa sɔɔŋ yɛ. Nduyɛ, a cho a tuandaŋ o sɔɔŋ ŋMɛlɛkayaŋ tosaa niŋ. A cho kindiŋndo le tamasi Kilisiɔŋnda o wɔsiŋ kɛmɛ tasoŋ niŋ tolɔɔ kɔɔli. Mɛɛ nda tusi Kilisiɔŋnda o wɔsiŋ kɛmɛ tasoŋ niŋ nyɛpalaa choo, ma saŋnuŋ o fondaŋnda bɔɔbɔɔ, nduyɛ ma hiau lachi a “yooŋgu kɛndɔɔ dimioo ba o ba fee.” (Walta. 8:4) Mi yooŋgu kɛndɔɔ dimioo mala puaapiliaa naa haa le ma handu kɔllo o Masale Mɛlɛkaleŋ choo, vɛlɛ ma pɛŋgi yiyaŋndo a bahawɛila ndalaŋ okɔɔ. Fulamakɔɔlioo cho ni, a cho hiouwɔɔ lachi a waa a kɔl kɛndɛ, nduyɛ ma wa o kɔl nyulu niŋ.

WA O KƆL NYULU NIŊ O YƆŊ BƐƐ MA TUSI NUM NYƐPALAA CHOO

14. Vɛɛ nyɛpalaa nda tusi naa choo wo paaliaŋ yɛ kɔl nyulu naŋ nɔ wo?

¹⁴ Te a tusi naa nyɛpalaa choo pɛ, mi keŋ tosa ŋ ve lɛ sɔɔŋ bɔɔbɔɔ chuu naa kɔl nyuloo woŋ tosa le. Miŋ wa a kɔl kɛndɛ nduyɛ miŋ nɔ kɔl hiniaa, te ŋ wa pɛ bɔŋaŋndaŋ biyɔɔ fɛɛsɛŋ, a yooŋgu kɛndɔɔ dimioo kpendekele. Mi hei mala naa vɛlɛ, miŋ wa sɔɔŋ tosaa siooŋii ve naa maa a cho naa biyɔɔ le. Te a kuuna naa pɛ sɔɔŋ muŋ tosaa, mi siooŋnde bii naa, nduyɛ miŋ wa yiyaŋndo a nyɛ cheleŋ yɔŋnuŋ niŋ okoŋ kɔɔli wo okɔɔ. O kpeekpei niŋ, i cho suɛi wɔɔŋ le buulaŋnda waa nuaa nɔɔ le. A koŋ kpou, ŋ nɔ miŋ wa yekeŋ. Kanifuule mi Chiisu dimi maa nyɛpalaa nda wa buɛiyaa nduaa tusi choo wo wa tosa ma faŋaŋ ndu kɔɔli. (Chɔŋ 16:​1, 2) Mɛɛ yɛɛ naŋ nɔ yɛ miŋ tosa le miŋ hiou lachi a waa o kɔl nyulu niŋ te a tusi naa pɛ nyɛpalaa choo?

15. Le yɛɛ ŋ nɔ miŋ yɔŋ isiooŋ te o yɔŋ bɛɛ mi waŋnda tusi naa nyɛpalaa choo? (Chɔŋ 15:​20; 16:33)

¹⁵ Diom Mɛlɛkaa dimul naa kpendekele aa: “Wanaa yeema yɔŋgɔŋndo o Mɛlɛka lo, nduyɛ ma wa buɛiya le Chiisu Kiliti wa kpou, waŋnda cho nda nyɛpalaa tusi choo.” (2 Timo. 3:​12) I wa ikala puaapilɛnɔ pilɛ diolaŋ Andilee o ba, le laalaŋndo nyɛ Baabuiyo dimi hoo wo mɛɛ nda kuuna wali naa o lɛŋnde ndaleŋ niŋ. Mbo dimi aa: ‘Seiyaa Chɛhowaa cho tau o lɛŋnde naalaŋ niŋ, masaleŋ le nɔla naa kpou dɔwɔɔ o chiɛi manyumndo niŋ te.’ Mi hei tosa Andilee ve o kɔl nyulu niŋ te. O wa buulaŋndo teleŋ o teleŋ. Mi puaapiliaa apiliaa mal Chɛhowa nyɛ o nyɛ o ba. Pesiŋ bɛɛ a yiyaŋ nuaa maa a bii nda niŋ te le. Ma yiyaŋ maa naapum a cho nda biyɔɔ ma dɔu nda o chiɛi manyumndo niŋ. Le hei, a ve buulaŋ tau maa Andilee le. Mi Andilee bɛɛ kɛɛsiaa le mbo tol tamasi ndaa kɔɔli mbo dɔu tiindaŋndo o Mɛlɛka niŋ. Nyɔɔ viu bɛɛ le, mbo cha maa o cho o kɔl nyulu niŋ. Nduyɛ suŋ suŋ niŋ, o cho a kɔl kɛndɛ mi che bɛɛ sɔɔŋ palaŋ cho ndu choo. Nyɛpilɔɔ hoo tiuba mbo yɔŋnuŋ naa.​—Nuawɔ Chɔŋ 15:​20; 16:33.

16. Nɛila chɔmaala kuɛɛ naŋ nɔ yɛ miŋ diikuŋ te a kuuna pɛ wali naa kpou ɔɔ otiŋ o lɛŋnde naaleŋ niŋ?

¹⁶ Te a kuuna pɛ wali naa kpou ɔɔ otiŋ o lɛŋnde naaleŋ niŋ, lepum miŋ sɔla nɛila chɔmaalaŋ lɛuve o ba a bɛnduaa kundaa. Mi nɛila chɔmaa laŋ ndaŋ la manda naa, nduyɛ mi la mala naa miŋ hiou lachi a nyɛm mala naa le pɛɛkoo a Mɛlɛka okɔɔ woŋ sɔlaa. Mi la mala naa vɛlɛ miŋ hiou lachi a yooŋgu kɛndɔɔ dimioo mɛɛ naŋ tiuba yɛ. Kindiŋ o nɛi o nɛi niŋ le nɛila chɔmaala ŋ sɔla laŋ diikɔŋndo, o yɔŋ bɛɛ ma bii laŋ bila tau le. (Chemi. 3:​17) O faŋaŋ okoŋ kɔɔli, fɛɛŋ bɛɛ dimul waŋnda a sɔɔŋ puaapiliaa a ndepiliaa okɔɔ, ɔɔ a mɛɛ kundaa tosa sɔɔŋ yɛ le. Taama taama te o yɔŋ pɛ maa, a nɔ kposoŋ ma sina a muŋ okɔɔ le.​—Ikili. 3:7.

17. Maa kiilaa o wɔsiŋ kɛmɛ tasoŋ niŋ, yɛɛ naŋ nɔ yɛ miŋ kɛɛsiaa le tosaa?

¹⁷ Sabu kpeekpei Setana cho hau wanaa Mɛlɛkaa chiŋalaŋndo wo cho le mɛɛ nda cho “yooŋgoo dimioo a Chiisu okɔɔ” yɛ ni. (Sɔɔŋ. 12:​17) Chɛl mi Setana a chieeŋ ndɔɔ luei num siooŋnde le. Yooŋgu kɛndɔɔ dimioo a waŋnda pɛɛkoo tosa miŋ wa a kɔl kɛndɛ, nduyɛ miŋ wa o kɔl nyulu niŋ o yɔŋ bɛɛ mi waŋnda simul naa. O wɔsiŋ kɛmɛ tasoŋ niŋ, mɛɛ masaa waa dimul kiilaa le ma pɛŋgi yooŋgu kɛndɔɔ dimioo, mi puaa kaŋ kɛɛsiaa le Mɛlɛka diikɔŋndo. Ma hiau lachi a yooŋgu kɛndɔɔ dimioo, nduyɛ mi keŋ tosa ma wa a kɔl kɛndɛ. (Walta. 5:​27-29, 41, 42) I cho tonya maa te a kuuna pɛ wali naa otiŋ o lɛŋnde naalaŋ niŋ, ŋ nɔ miŋ dimi yooŋgu kɛndɔɔ a taasi. (Maa. 10:​16) Kɛ te ŋ tosa pɛ o naŋ tiuba wo, ŋ cho wa o kɔl nyulu niŋ le mɛɛ naŋ cho Chɛhowa kɔllo nɛŋioo, miŋ wa yooŋgu piŋi yoomula waŋnda wo dimioo yɛ.

“MƐLƐKA KƆL NYULOO CHO WA A NUM LATULU”

18. Yɛɛ naŋ nɔ yɛ miŋ loonuŋ te sɔɔŋ kɔl tambɛiyoŋ komal naa pɛ?

¹⁸ Ŋ nɔ miŋ nɔ tiindaŋndo maa o yɔŋ bɛɛ mi sɔɔŋ kɔl tambɛiyoŋ komal naa, ŋ tiuba miŋ wa o kɔl nyulu niŋ. A teleŋnda waa nuaa, ŋ nɔ miŋ loonuŋ maa, kɔl nyulu Mɛlɛka yɔŋgu wo kinɛi tiuba ni mbo mala naa. Dɔu tiindaŋ numndo o ndu niŋ te naa tiu ba o ba fee wo del pɛ o fondaŋ nyaa. Nduyɛ tiindaŋ ndu te kpundɔɔ del pɛ o fondaŋ nyaa, ɔɔ te waŋnda wa num pɛ nyɛpalaa tusioo choo. Hiou lachi a kɔɔna Chɛhowaa tooloo. Wa yiyaŋndo a chila sɔvɛla cho naa lachi laŋ okɔɔ. Te a tosa pɛ sɔɔŋ muŋ, “Mɛlɛka kɔl nyuloo cho wa a num latulu.” (Filipi. 4:9) O buŋgɛi cho lachi ve niŋ, ŋ cho pɛɛku mɛɛ naŋ mala chaaŋaa naa laalaŋaa cho o tɔɔndaŋndo bɛŋgu wa, le ma nɔ kɔl nyulu Mɛlɛkaa yɛ.