A Loonuŋ Pa?

Baa ma veelu pa diomndaŋ nyɛkɛndɛi o buŋgaŋ Bandu Mɛŋgɛlaa niŋ le wɔsioo hoo? Te lende i cho ni, mɛɛ kindiŋ ndɔ le nyunalaŋ ndaŋ mulioo.

Yɛɛ diomndaŋ ndaŋ, “la siŋgaŋ mi la nɔ yiyaŋnda sɛnɛilaŋ” sim yɛ? (Luomaŋ. 12:2)

Diomndaŋ ndaŋ “la siŋgaŋ mi la nɔ yiyaŋnda sɛnɛilaŋ” sim maa, ŋ nɔ ko miŋ tosa sɔɔŋ kɛndɔŋ nyɛɛmbɔ le. Kɛ ŋ nɔ miŋ yaasiaa wana suu naŋ cho wo, nduyɛ miŋ tosa siŋgaŋnda yeemaŋ ndaŋ le halikpeŋ miŋ diikuŋ sawala Chɛhowalaŋ.—w23.01, peele 8-9.

Vɛɛ naŋ wa yɛ kpeŋkpeŋ te ŋ wa pɛ chɔɔ sɔɔŋ yɔŋnɔŋndo o chieeŋndo niŋ?

Ŋ nɔ yeemɛi le chɔɔ sɔɔŋ cho yɔŋnɔŋndo o chieeŋndo hoo niŋ, miŋ wa huuluŋ Baabuiyo peeloo woŋ. Kɛ tuupa miŋ kandu dimioo maa sɔɔŋ masaa waa dimi woŋ peelu huului cho o Baabuiyo niŋnde, nyɛ naŋ dimi wo nɔ mbo tɔlnuŋ o yaula kɔɔna Chɛhowaa soli laŋ choo. Keŋ mala naa ŋ dimi nyɛ o nyɛ huŋ a piɔuviaŋndo o kundaa niŋndo le. (1 Kɔliŋ. 1:10)—w23.02, peele 16.

Teŋgeŋ kuɛɛ cho yɛ yiŋɔɔ Chiisu sɔla wo tɛɛŋ a o buɛiyaa nduaa sɔla wo?

Chiisu ndoo nɔ lɛ mbo yɔŋguŋ o Chɛhowa lo o piɛileŋ niŋ mɛɛ naŋ tosa yɛ le. Kanifuule, o kaale wa le yɔŋgaŋ o Mɛlɛka lo leŋ niŋ o veluŋ ni. Ndoo nɔ mbo mal yɔŋ ndɔ wɔɔŋndo, mbo siŋgaŋ ɔɔ mbo nɔ kɔl iyama walaŋndo le. Kanifuule, wana walaŋndo o wa ni.—w23.03, peele 5.

Yɛɛ naŋ nɔ yɛ miŋ tosa le mi acheleŋnda bɛɛ yɔŋgu mulilaŋ?

Ŋ nɔ miŋ yɔŋgu mulioo o biŋgi. Hei tosa mi wanaa bɔɔbɔɔ sɔla fondaa le mulioo yɔŋgoo. Fafaŋ suɛi a nyɛ o nyɛ cho o pɛllo niŋ okɔɔ. Keŋ tosa mi acheleŋnda nɔ nyɛ le dimi.—w23.04, peele 23.

Yɛɛ “‘Nɛi Diandaa Mɛlɛkaa,’” o Aisaya 35:8 soo a ndu okɔɔ wo sim yɛ?

Nɛi bɛndu Aisaya poonyiaa a ndu okɔɔ wo, wa nɛi Chuuwa keeku choo le Babilɔŋ malɔɔ ma kuɛ o lɛŋnde ndaleŋ niŋndo ni. Kɛ yɛɛ nɛiyo hoo sim yɛ o palɛi nɛi niŋ? Le wɔsilaŋ o kɛmɛlaŋ niŋ tuupa mi wɔsi 1919 fuuluu, mi Chɛhowa soliŋ puaa ndaa nɔ siooŋii nduɛi ya kpeku le nɛiyo hoo bɛɛndiaa. Mi puaa kaŋ kandu Baabuiyo hivioo a ndu solioo o pei choo vɛlɛ a sɔɔŋ cheleŋ tosaa. Wanaa Mɛlɛkaa bii niŋ kɔlaŋ o “Nɛi Diandaa” hoo choo, haaa ma luɛi o kpele hɛnɛkiɔɔ o Mɛlɛka piɛiyo niŋ. Nduyɛ, nɛiyo hoo cho tosa miŋ huŋ sɔla salala bɔɔbɔɔ o Masale Mɛlɛkaleŋ niŋ.—w23.05, peele 15-19.

Sila kuɛɛ Pulɔwaa bolle 9 yɔŋgu yɛ a waŋ laanduaa a ŋiɔɔŋ okɔɔ?

Yau Pulɔwaa wo soo a ‘wana lanɔ diɔmndo’ okɔɔ, o veelu waŋnda o ndulo chiɛi niŋndo. Kɛ ‘wanaa chɛl veelu chuaa hoo wa, piɔmndo nda sɔla ni.’ Mi yauwo hoo suaa vɛlɛ a ‘wana lanɔ taasioo’ okɔɔ. Ndu bɛɛ, mbo veelu waŋnda o ndulo chiɛi niŋ. Mi wanaa chɛl veelu ndɔɔ wa “tol nɛi sinapɛŋgoo kɔɔli,” nduyɛ a cho hunɔɔ wa achal lefafɛɛŋ. (Pulɔ. 9:​1, 6, 13, 18)—w23.06, peele 22-24.

Mi Mɛlɛka chɔm maa o tusiŋ, nduyɛ maa o nɔ sinapɛŋgoo a mɛɛ o bii Lɔtu yɛ. O nɛi kuɛɛ choo?

Mi Chɛhowa dimul Lɔtu le mbo mal Sodɔm, okoŋ mbo nyaanuŋ o pemboŋ choo. Kɛ mi Lɔtu nyɔɔlu le mi ndu a yuŋgu ndɔɔ kuɛ o chiee pɔmbɔɔ Sowaa. Nduyɛ mi Chɛhowa chɛl kɛɛsiaa ndɔɔ.—w23.07, peele 21.

Yɛɛ lanɔɔ nɔ yɛ mbo tosa te pɔnɔ ndɔ wa pɛ fotueila tumfondolaŋ tofaa?

O nɔ mbo loonuŋ maa, o nɔ mbo biinuŋ tɔɔyaŋ te. O nɔ mbo kindiŋ le kɔllo handɔɔ o chaŋyɛi o nɔ a Chɛhowa ve choo, nduyɛ mbo veelu diomndaŋ o Baabuiyo niŋ a waŋ laanduaa ndaa tambu kɔllo ma piɛi o Chɛhowa lo, le kɔl dɛɛniaa wa okɔɔ, nduyɛ mbo yiyaŋ lechoo. O tiuba mbo mala pɔnɔ ndɔ le mbo fafaŋ sɔɔŋ tosa mbo luei balaŋ leniŋ ndoŋ.—w23.08, peele 14-17.

Te waŋndo simul pɛ laalaŋnda naalaŋ, vɛɛ kɔl kaloo mala yɛ naa miŋ chɔm kaa mɔɔsɔlɔɔ wo?

Ŋ nɔ miŋ che nyuna ndɔɔ maa, nɛi naŋ tiuba miŋ sina nyɛ cho o sɔvɛ le ndu wo cho koŋ ni. Keŋ mala naa miŋ wa a bɛɛndiaŋ le wana koŋ mulullo o nɛi lebɛɛ niŋ, nduyɛ miŋ chɔm kaa mɔɔsɔlɔɔ wo—w23.09, peele 17.

Yɛɛ naŋ pɛɛku yɛ Meele o ba te o hiŋ pɛ a yoomuaŋ sɔlaa okɔɔ?

Mɛɛ maalikɛinɔɔ dimul Meele maa o cho hunɔɔ Mɛsayanɔɔ violɔɔ, mbo sɔla yoomuaŋ wanaa cheleŋ o ba. Mi Keebilɛɛ nda Elisabɛɛ ke ndu kɔl dɛɛniaa. Naa bɛɛ chaaŋaa naa laalaŋnda tiuba ma luei naa yoomuaŋ.—w23.10, peele 15.

Vɛɛ Chɛhowa muli yɛ piɛile naaleŋ teleŋndaŋ lapum?

Chɛhowa mɛi lediom maa o cho piɛile naaleŋ nilaŋ yaŋɔɔ, vɛlɛ mbo yiyaŋ a mɛɛ nyɛ naŋ nyuna ndu wo chɛlaŋ a tuu ndɔɔ yɛ okɔɔ. (Chɛlui. 29:12) Lepum, mbo muli piɛile naaleŋ a sɔɔŋ pilɔŋ okɔɔ, o nɛila yɛ yɛlaŋ niŋ. Nduyɛ, o cho wa naa malaa teleŋ o teleŋ.—w23.11, peele 21-22.

Luomaŋnda 5:2 soo a “tiindaŋndo” okɔɔ, mɛɛ le yɛɛ nda soo yɛ vɛlɛ a ndu okɔɔ o sɔɔŋ 4 niŋ?

Teleŋ tase ŋ tuei yooŋgu kɛndɔɔ wo, num aa nɔ tiindaŋ sɔvɛ sɔviɔɔ le yoomu fafɛɛŋndo tueiyɔɔ yeela o kpele hɛnɛkiɔɔ niŋ o lɛŋndeŋ choo. Naapum tɔɔndaŋnda yɛ yɛlaŋ la komal num niŋ. Kɛ mɛɛ ŋ biunuŋ ndaŋ, ma cha maa Mɛlɛka hini kɔl a num. Nduyɛ le mɛɛ ŋ sina maa Mɛlɛka hini kɔl a num yɛ, mi keŋ ke num tiindaŋndo maa, a cho nyɛm o chuel num buŋgɛi yoŋ sɔla. Tiindaŋ numndo cho niŋ o kala poŋ mbo hiau maa paandu.—w23.12, peele 12-13.