Wanaa Sɛnɛiya a Ŋiɔɔŋ Handuŋ o Dialii Kuumbaŋ Choo Ve Choo
O KPEKEDOO choo, Tɛɛkpaa 18, 2023, mi yonda teŋgeŋndo fula o jw.org choo maa, Ŋgɔɔ Gage Fleegle a Ŋgɔɔ Jeffery Winder sɔla suei yulaŋnde le waa o Dialii Kuumbaŋ Seiyaa Chɛhowaa choo. Puaapiliaa ŋiɔɔŋnda haa kpou bii niŋ tosaa tau o Chɛhowa piɛiyo niŋ.
Gage Fleegle nda laa ndɔ, Nadia
Ŋgɔɔ Fleegle mandaŋ o Pɛŋsiveeniaa niŋ Amɛlika ba paaleŋ le chaŋndo. O tonyaa niŋ wanaa velu ndu wa manda ndu ni. Mɛɛ o wa feleŋgɔnɔ, mi wanaa velu ndu wa kua o chiee pɔmbɔ pilɛ niŋ, naa yeemɛi wa tau wa. Mɛɛ teleŋ tiŋ hiou, mbo sɔla yiŋɔɔ a Bɛŋgufɔnɔɔ 20, wɔsi 1988.
Teleŋ o teleŋ, mi wanaa velu ndu wa ndaa dɛɛniaa ndu le luɛiyɔɔ o wali lɔɔlɔɔ Mɛlɛkaa niŋ. Mi ndaa yiya buɛiyaa ibuŋgaa a Bɛtɛlaitiiya o nda lo bɛɛ, nduyɛ mi Ŋgɔɔ Fleegle ndoo che mɛɛ puaapiliaa a ndepiliaa kaŋ ndaa wa a kɔl kɛndɛ yɛ. Mɛɛ o sɔla yiŋɔɔ, nyɔɔ viou bɛɛ le, mbo kandu kɔɔfale lɔɔlɔɔ leŋ tosaa a Tapioo 1, wɔsi 1989. Wɔsilaŋ latiɔɔŋ okoŋ kɔɔli, mbo komal kpeleŋ o kɛsi teleŋ o wa wɔsilaŋ 12 ndo. Kpeleŋ koŋ wa le wallo tosaa o Bɛtɛɛl ni. Mbo kandu wallo o Bɛtɛɛl o Bulukiliŋ niŋ, a Saa wɔsi 1991.
Mbo tosa wallo o Fondaŋ nda Toosiaa Yaula Naalaŋ Ndo le wɔsilaŋ la ŋɔmaa. Okoŋ kɔɔli, ma dimul ndu le mbo tosa wallo a Kunda Kɔɔna Sɔɔŋ o Lɛuve le Wali Pollo Wo. O teleŋ koŋ niŋ, o wa o kunda dimi Lɔɔsiaŋnde ve niŋ le wɔsilaŋ latiŋ. A wɔsi 2006, mbo chua Nadia o nɔɔ niŋ. Okoŋ, ma hiau lachi a wallo tosaa o Bɛtɛɛl. Le teleŋ tiŋ, a wa o kunda dimi Potukisiiye wo niŋ. Nduyɛ, ma chua wɔsilaŋ hiouwɔɔ tɔ o kunda dimi Spanisiiye wo niŋ. Mɛɛ Ŋgɔɔ Fleegle chua wɔsilaŋ tau a Kunda Kɔɔna Sɔɔŋ o Lɛuve le Wali Pollo Wo, ma hivi ndu o Kunda Pɛɛkaa choo. Mɛɛ teleŋ tiŋ hiou, ma hivi ndu vɛlɛ o Kunda Kɔɔna Waltaŋ Ndo choo. A Fuoo wɔsi 2022, ma yulu ndu isu le mbo wa wana malaa le Kunda Kɔɔna Sɔɔŋ le Dialii Kuumbaŋ Choo Ve Wo.
Jeffrey Winder nda laa ndɔ, Angela
O Mɔliita, Kalifoniaa niŋ, Amɛlika, Ŋgɔɔ Winder mandaŋ ni. O tonyaa niŋ wanaa velu ndu wa manda ndu ni. Nduyɛ mbo sɔla yiŋɔɔ a Fuoo 29, wɔsi 1986. Paŋgei ipilɛ okoŋ kɔɔli, mbo kɛɛsiaa le kɔɔfale malalaŋndeŋ tosaa. Nduyɛ mbo tuɛi leŋ yeela tau. Lelaŋ, mbo kɛɛsiaa le mbo hiou lachi. Mɛɛ o tosa kɔɔfale malalaŋndeŋ le paŋguŋ bɔɔbɔɔ, mbo kandu kɔɔfale lɔɔlɔɔ leŋ a Saa 1, wɔsi 1986.
Mɛɛ Ŋgɔɔ Winder simnuŋ feleŋgɔnɔ, mbo kua bɛndaa nduaa ŋiɔɔŋaa wa wallo tosaa o Bɛtɛɛl la yilɔɔ. Mi yilɔɔ koŋ tosa mbo nɔ yeemɛi le mbo peelu yauwo le wallo tosaa o Bɛtɛɛl te o sul pɛ kaasoŋnɔ. Nduyɛ a Bukuloo wɔsi 1990, ma veelu ndu le wallo tosaa o Bɛtɛɛl, Wɔɔkil.
Mi Ŋgɔɔ Winder tosa wallo o kundala bɔɔbɔɔ niŋ o Bɛtɛɛl. Mbo tosa wallo a Kunda Kɔɔna Sɔɔŋ le Dindioo Wo, Kunda Kɔɔna Sɔɔŋ le Wallo o Chiɛi Niŋndo, a Kunda Kɔɔna Sɔɔŋ o Bɛtɛɛllo. Mi ndu nda Angela chal o nɔɔ niŋ a wɔsi 1997, nduyɛ nda ŋiɔɔŋ kpou cho wɔ wallo tosaa kɛ o Bɛtɛɛl. O wɔsi 2014 niŋ, ma kua Wɔɔwik. Mi Ŋgɔɔ Winder mala le fondaŋnda leboltaŋ taŋgullo. O wɔsi 2016 niŋ, ma kua o Fondaŋnda Leboltaŋ le Sukuula Kɔɔnaa Patasiŋ. Nduyɛ mi Ŋgɔɔ Winder tosa wallo a Kunda Cho le Vidueilaŋ ndo. Wɔsilaŋ lahiɔɔlu okoŋ kɔɔli, ma miiŋgu Wɔɔwik. Okoŋ, ma dimul Ŋgɔɔ Winder le mbo tosa wallo a Kunda Kɔɔna Sɔɔŋ le Wanaa Cho Wallo o Bɛtɛɛl La. A Fuoo wɔsi 2022, ma yulu ndu isu le mbo wa wana malaa le Kunda Kɔɔna Sɔɔŋ le Wanaa Cho Wallo o Bɛtɛɛl La le Dialii Kuumbaŋ Choo Ve.
Ŋ cho piɛileŋ o Chɛhowa lo le mbo dɔu ‘puaa o yɔŋgu haa ma ke’ wa sala, le halikpeŋ ma hiou lachi a wallo tosaa kalaŋ le Masale ndɔleŋ tooloo.—Ɛfi. 4:8.