Wa a Kɔl Kɛndɛ te A Wa Pɛ Chɛhowa Chumndo

A koŋ kpou, Chɛhowa yeema naa miŋ chum teleŋ bɛnda a ndu wo. Le yɛɛ o yeema yɛ naa miŋ tosa keŋ? Yɛɛ mala yɛ naa le miŋ wa a kɔl kɛndɛ, nduyɛ miŋ hiou lachi a chumndo?

LE YƐƐ CHƐHOWA YEEMA YƐ NAA LE MIŊ CHUM?

Baabuiyo dimi maa: “Mɛlɛka Yaawɛɛ o yeema wɔ kɛ mbo tuiinuŋ nya inyiɛɛ. O cho o bɛɛndiaŋ le teleŋ o teleŋ mbo tuiinuŋ nya inyiɛɛ, kani fondole, Mɛlɛka Yaawɛɛ, Mɛlɛka tosa sɔɔŋ sakpo wo o cho ni. Nduyɛ wana o wana tiindaŋ Mɛlɛka Yaawɛɛ pɛ, wana koŋ o pɛl tɔnɔɔ.” (Aisaya 30:18) Diomnda Aisaya dimilaŋ ndaŋ la wa kpeekpei le Chuuwaa nilakaluaa. (Aisaya 30:1) Kɛ, Chuuwaa ndaa diikuŋ Mɛlɛka wa bɛɛ wa nda tɛɛŋ. Nduyɛ mi diomndaŋ ndaŋ la ke nda tiindaŋndo. Hau bɛɛ, diomndaŋ ndaŋ la ke buɛiyaa laalaŋaa Chɛhowaa tiindaŋndo.

Lelaŋ, ŋ nɔ miŋ biunuŋ chumndo kanifuule, Chɛhowa bɛɛ cho chumndo. O nɔ teleŋ o cho hunɔɔ chieeŋ dɛnɛ wɔɔŋndo hoo tɛɛmbuuwo, nduyɛ o cho paale leŋ a hawɛi koŋ chumndo le mbo fuuluu. (Maa. 24:36) Nyina wɔɔŋndo hɛɛnduu Chɛhowa choolaŋ choo a wanaa cho ndu piɛiyo wa. A teleŋ koŋ, ŋ cho chɔ kpendekele maa, sɔɔŋ o hɛɛnduu nda muŋ choo woŋ, choolaŋ ŋ cho ni. Okoŋ mbo tɛɛmbuu niko Setana a wanaa cho ndu kɔɔli wa kpou, kɛ mbo “chɔm [naa] nyiɛɛye.”

Le suŋ suŋndɔ, naapum Chɛhowa feŋa niŋ nyɛkindilaa cho naa choo wo le. Kɛ o ke naa tiindaŋndo maa, ŋ nɔla miŋ wa a kɔl kɛndɛ, nduyɛ miŋ hiou lachi a ndu chumndo. A mɛɛ Aisaya dimi yɛ, ŋ nɔla miŋ wa a kɔl kɛndɛ haaa mi nyɛ kɛndɛ naŋ cho lehɔl o nɛiyo yɔŋnuŋ. (Aisaya 30:18) Vɛɛ naŋ sɔla yɛ kɔl kɛndɛ koŋ? Ŋ cho chɔ nɛilaŋ lahiɔɔlu la mala naalaŋ.

WA A KƆL KƐNDƐ MA HIOU LACHI A CHUMNDO

Handu kɔllo o sɔɔŋ kɛndɔŋ choo. Mi Masaa Deeve cha sɔɔŋ wɔɔŋndoŋ yɔŋnɔŋndo o yoomu ndɔɔ niŋ tau. (Sam 37:35) Kɛ, mbo poonyiaa aa: “Biunuŋ ma chum Mɛlɛka Yaawɛɛ. Chɔ bɛɛ waŋndo mi dɛnɛ wa ndu [nɛŋi], tambu kɔl te. Wana wɔɔŋndo o wa bɛɛ tɔnɔɔ sɔlaa o sɔɔŋ ndɔŋ wɔɔŋndoŋ niŋ, saalaŋ te.” (Sam 37:7) Mi Deeve pila duau silaa hoo o wali niŋ, mɛɛ o handu kɔllo o buŋgaŋ Chɛhowa chuel ndu le ndu mandaa woŋ choo. Ndoo nɔ vɛlɛ balika melaa le sɔɔŋ kɛndɛŋ Chɛhowa tosal ndu woŋ. (Sam 40:5) Te o yɔŋ pɛ miŋ handu kɔllo o sɔɔŋ kɛndɛŋ cho yɔŋnɔŋndo o yoomu naa niŋndoŋ choo, okoŋ miŋ kɛɛ kɔllo handɔɔ o sɔɔŋ wɔɔŋ yɔŋnuŋ naa woŋ choo, i wa tɛtɛlɛ le miŋ hiou lachi a Chɛhowa chumndo.

Yɔŋguŋ tau o Chɛhowa saŋgalaa niŋ. Naapum Deeve poonyiaa Sam bolle 71 ni. Mbo dimul Chɛhowa aa: “Kɛ ya ya, I cho hiouwɔɔ lachi a tiindaŋ nuu dɔwɔɔ o num niŋ. I cho hiouwɔɔ lachi a num saŋgalaa kpeekpei.” (Sam 71:14) Vɛɛ ndoo saŋgala yɛ Chɛhowa? Mi ndoo dimul acheleŋnda a ndu okɔɔ. Nduyɛ mi ndoo saŋgala ndu o chondoŋ niŋ. (Sam 71:​16, 23) Maa Deeve, ŋ nɔla miŋ sɔla nyaaloo o Chɛhowa chumndo niŋ. Ŋ saŋgala ndu te ŋ dimul pɛ acheleŋnda a ndu okɔɔ o yooŋgu kɛndɔɔ dimioo niŋ, miŋ soo a ndu okɔɔ o chaaŋaa naa a o yuŋgulaŋ naalaŋ ndo, vɛlɛ miŋ soli chonduŋ naŋ. Te a wa chonduŋ naŋ leMasaŋ solioo lɔɔ cheleŋ pɛ, yiyaŋ a mɛɛ diomnda cho leniŋndaŋ la ke num nyaaloo yɛ.

Chɛl mi puaapiliaa a ndepiliaa numnda dɛɛniaa num. Mɛɛ Deeve wa o nyɛkindilaa bɛŋgu, mbo dimul Chɛhowa aa: “Te wanaa numnda a chuuŋgiaŋ le num sooluuwo pɛ, I sim niŋ nda o hɔl mi lisa num, maa a cho wana kɛndɛ.” (Sam 52:9) Naa bɛɛ ŋ nɔla miŋ sɔla kɔl dɛɛniaa, te ŋ wa pɛ a puaapiliaa a ndepiliaa naa latulu. O cho ko o bɔŋaŋnda naalaŋ ɔɔ o wali pollo niŋ te, kɛ te ŋ chuuŋgiaŋ vɛlɛ pɛ le yelelaŋndo.—Luomaŋ. 1:​11, 12.

Kindi tiindaŋ numndo. Mi Sam 62:5 dimi aa: “Mɛlɛka ndupilɛ kpe ya I tiindaŋ ni, o ndu niŋ ya I dɔu tiindaŋ nuu ni.” I cho bɔɔ suɛi sɔvɛ le miŋ nɔ tiindaŋ kala kalaa, taama taama te teleŋ naŋ wa kɔl le mi mɛɛlula chieeŋndo la fuuluu wo, fuuluu wɔ le. Ŋ nɔ miŋ nɔ tiindaŋndo maa nyɛ Chɛhowa dimi wo kpou cho yɔŋnɔŋ, o yɔŋ bɛɛ miŋ viou ndu chumndo. Ŋ nɔla miŋ kindi tiindaŋ naa te ŋ wa pɛ Diom Mɛlɛkaa pɛɛkoo. Le tamaseliiyo, ŋ nɔ miŋ pɛɛku huuluŋ Baabuiyo, mɛɛ Baabuiyo chɛlaŋ yɛ, vɛlɛ a sɔɔŋ Chɛhowa pila chɔɔmuŋ a ndupila okɔɔ woŋ. (Sam 1:​2, 3) Nduyɛ, te ŋ wa pɛ chumndo le chieeŋ sɛnɛiyo, ŋ nɔ miŋ hiou lachi a ‘piɛileŋ le mi nyina diandaa chɔm naa nɛiyo,’ okoŋ miŋ kindi chaŋyɛi nɛi a Chɛhowa poŋ.—Chudi 20, 21.

Maa Masaa Deeve, nɔ tiindaŋndo maa hɔlte Chɛhowaleŋ le cho wanaa cho ndu chumndo wa choo. O cho nda kaala ndɔɔ chɔm le teleŋ o teleŋ. (Sam 33:​18, 22) Te a wa pɛ Chɛhowa chumndo, handu kɔllo o sɔɔŋ kɛndɔŋ choo o yoomu numndo niŋ. Saŋgala ndu. Chɛl mi puaapiliaa a ndepiliaa numnda dɛɛniaa num kɔllo. Nduyɛ hiou lachi a laalaŋ numndo kindioo poŋ.