Tuupa mi Sala Baŋaa Yɔŋguŋ, Vɛɛ Mɛlɛka Ndoo Mallɛ Waŋnda Haki?

Sala baŋaa Chiisu wo kinɛi tosa ni miŋ sɔla malɔɔ hakioo. (Ɛfi. 1:7) A koŋ kpou, Baabuiyo dimi aa: “[Mi Mɛlɛka] biunuŋ naa, nduyɛ mbo mal naa haki le yɔŋnda wɔɔŋnda naŋ tosa paandu laŋ.” Hei sim ni maa, yɔŋnda wɔɔŋnda naŋ tosa tuupa mi Chiisu huŋ soliŋ sala le naa baŋaa laŋ. (Luomaŋ. 3:25) Vɛɛ Chɛhowa ndoo nɔla yɛ waŋnda chieeya malɔɔ haki tuupa mi Chiisu huŋ wu le naa, nduyɛ mi ndoo wa vɛlɛ Mɛlɛka sandu wo?

Mi Chɛhowa mɛi lediom maa, o cho wana piŋiaa yɔŋ le wanaa duau niŋ tiindaŋndo o ndu niŋ a o mɛɛla ndɔlaŋ niŋnda. Buŋgɛi o chua keŋ nde wa ko maa sala baŋaa ndoo chuu paawa. (Chɛ. 3:15; 22:18) Mɛlɛka ndoo nɔ tiindaŋndo kɛsɛ maa, Po ndɔɔ wa yɔŋgɔŋ a kɔllo wulee, teleŋ ndoo yeema niŋ ndu mbo huŋ soliŋ sala wo. (Kalee. 4:4; Hibu. 10:​7-10) Teleŋ Chiisu wa o lɛŋndeŋ choo wo, mi Chɛhowa ke ndu kpaayaa le waŋnda chieeya malɔɔ haki, tuupa pɛŋ mbo wu le naa baŋaa. Chiisu ndoo tiuba mbo tosa hei le wanaa dɔu tiindaŋndo o ndu niŋnda kanifuule, ndoo sina maa o wa hunɔɔ yoomu ndɔɔ yɔŋgu le nda baŋaa.—Maa. 9:​2-6.