“A Kaala Ya Mbo Hiau Suuwa Haa?”

1, 2. Mɛɛ Pitɛ lɔl yɔɔyaa pii, yɛɛ o pɛɛku yɛ?

BUƐIYAA Chiisuaa a ŋɔmmɛu lɔl yɔɔyaa pii o Pioo Kalili. Kɛ kelaleŋ bɛɛ a bii le. Paaleŋ le sɛ niko. Nduyɛ Chiisu fula o sɛiyo niŋndo sim o daa choo mbo wa nda tofaa. Okoŋ mbo dimul nda aa, “La wuu wɔ yalaa o ba nya kɛndɔɔ choo. La cho suuwa chua. Ma wuu yalaa o ba kɛndɔɔ choo. Mbɔ kɛ num. Suuwaa pilɛ kpe nda aa luɛi leniŋ ni. Ma bumba nda nanɔɔ o dɛndɔɔ niŋ.”—Chɔŋ 21:​1-6.

² Mi Chiisu ke buɛiyaa nduaa beediiyo a suuwa le saasaŋ faŋaa. Okoŋ, mbo muliŋ o Saimɔŋ Pitɛ lo mbo nyuna ndu aa, “Saimɔŋ, po Chɔŋ ndo, a kaala ya mbo hiau suuwa haa?” Chiisu ndoo sina maa Pitɛ ndoo kaala yɔɔyaa. Wana che pɛ maa nyunaa Chiisu wa Pitɛ ni te o kaala pɛ ndu Chiisu, a sɔɔŋ o pɛɛku ndu woŋ mbo hiau wali ndɔ yɔɔyaa. Mi Pitɛ mulul Chiisu aa, “Ei, Masanɔɔ, a sina maa I kaala num.” (Chɔŋ 21:​15, NW) Chɔŋ a paale leŋ, mi Pitɛ chɔm maa a kɔl ndɔɔ kpou o dimi hei ni. Mbo chɔm kaala ndɔɔ le Kiliti a mɛɛ o wa o tuandaŋ o yooŋgu kɛndɔɔ dimioo niŋ yɛ, nduyɛ mbo simnuŋ wana sɔviɔɔ o kunda leKilisiɔŋndo niŋ.

3. A yɛɛ okɔɔ Kilisiɔŋnda nɔ yɛ ma wa yekeŋ?

³ Yɛɛ naŋ pɛɛku yɛ o nyɛ Chiisu dimul Pitɛ wo niŋ? Ŋ nɔ miŋ wa yekeŋ yɔŋi kaala naŋ nɔ le Kiliti wo nyulul. Mi Chiisu sina maa yoomoo o chieeŋndo hoo niŋ cho wa o piaa cha a kɔl tambɛiyo, nduyɛ maa buulaŋndaŋ a simultaŋ la cho naa wa komallo. O tale Chiisu dimi a wana saŋ yɛiye wo okɔɔ, mbo dimi maa waŋnda apum ma “tuei yooŋgoo a masale Mɛlɛkaleŋ okɔɔ” o tase ndɔɔ, nduyɛ ma wa a dialuŋ fulaa. Kɛ okoŋ kɔɔli, mi “buulaŋ nyɛm chieeŋndoŋ a yeemɛi sullo ŋ luɛi nda o lakɔl.” Okoŋ, mi “yɔɔŋ ŋ kaya kayaŋ diom Mɛlɛka nda tuei yo.” Nduyɛ mi dialuŋ fulaa waŋnda haa nɔ woŋ ŋ pɔlul. (Maatiu 13:​19-22; Maki 4:​19) Te ŋ ve yekeŋ te, mi buulaŋndaŋ o yoomoo niŋ la paaliaŋ wali naa o Chɛhowa lo. Lelaŋ, mi Chiisu sila buɛiyaa nduaa aa, “La mandaŋ. La yɔŋguŋ nya pila o kuuliaala nyɛ diaa laŋ choo, a o kolɔɔ kala kalaa niŋ te. Nduyɛ, la yɔŋguŋ o kɔl landaŋ nyɛ nuuwaa chieeŋndo hoo niŋ te.”—Luku 21:​34.

4. Yɛɛ mala yɛ naa le sinaa te kaala naŋ nɔ le Kiliti wo cho pɛ o kala poŋ? (Tofa fotueiyo o peele naŋ kandu leŋ choo.)

⁴ Maa Pitɛ, ŋ chɔm maa ŋ kaala Kiliti a mɛɛ naŋ chua wali dimiaa yooŋgu kɛndɔɔ nyɛ tase peŋ o yoomu naa niŋ yɛ. Vɛɛ naŋ chɔm yɛ maa ŋ cho hiouwɔɔ lachi a hei tosaa? Ŋ nyunaŋndɔ aa, ‘Yɛɛnɛ ya kaala yɛ tau tau o yoomoo niŋ? Baa o Chɛhowa piɛiyo niŋ ya sɔla nyaaloo ni ɔɔ o sɔɔŋ cheleŋndoŋ niŋ?’ Le mulioo sɔlaa le nyunalaŋ ndaŋ, ŋ yaasiaŋndɔ sɔɔŋ sala yaa o yoomoo niŋ ŋ dii kaala naa le Kiliti woŋ. Muŋ cho ni, wallo, pisultaŋ, a nyɛm kiɔɔŋ.

KƐSI WALLO O FONDA BƐNDA WO

5. Kalaŋ kuɛɛ wanaa cho yuŋgoo bolleŋ nda nɔ yɛ?

⁵ Le Pitɛ ndu, o fulawɔ o yɔɔyaa hɛnaŋndo kɔɔli, kɛ wali koŋ ndoo tosa ni le yuŋgu ndɔɔ baloo dɔuwɔɔ. Hau bɛɛ, Chɛhowa ke wanaa cho yuŋgoo bolleŋ nda kalaŋndo le yuŋgu ndaa mandaa. (Timoti Tasoo 5:​8) A nɔ ma tosa wallo kalaŋ le hei tosaa. Kɛ, o palɛi mɛɛlɛi hei niŋ, mi wallo hiŋ a kɔl landɛiyo tau.

6. Le yɛɛ walta mapuululaŋ la nɔ yɛ kɔl tambɛiyo?

⁶ Wanaa cho kela waltaŋ nda hiou poloŋ a walta cho laŋ. Le saboo hoo, waŋnda cho bolle kundiaŋndo le waltaŋ sɔlaa. Mi apum yiyaŋ maa a nɔ ma chɔɔlu teleŋndo handɔɔ o wali ndaa choo, lepum salaa ve pɛŋ o bɔɔ le. Wanaa toosiaa nyɔɔŋ nda cho chɔɔloo nyɔɔŋ toosiaa, kɛ wanaa bɔɔ cho le wallo maa paandu le. Lelaŋ, mi wanaa walla tambu kɔl, ma saŋga tau, nduyɛ pɛŋ ma naa. Mi a bɔɔbɔɔ buulaŋ maa wallo cho nda hiɔlɔŋ. Lelaŋ, nyɛ o nyɛ wana nda banaa dimul nda pɛ le tosaa, mɛɛ ma tosa ndu.

7, 8. (a) Nɛɛnɛ naŋ chɔm yɛ lo lechoo wo mbo hiau wana o wana cheleŋ? (b) Suɛi sɔvɛ kuɛɛ puaapilɛnɔɔ o lɛŋnde Tailaŋndeŋ niŋ pɛɛku yɛ a wali ndɔɔ okɔɔ?

⁷ Naa Kilisiɔŋnda, ŋ nɔ miŋ chɔm lo lechoo wo o Chɛhowa lo mbo hiau wana o wana cheleŋ, nduyɛ wana chua naa le wallo wo bɛɛ. (Luku 10:​27) Wali mapuuloo cho nɛiyo opilɛ ni le nyɛm naŋ hau ba woŋ sɔlaa vɛlɛ a wali naa dimiaa yooŋgu kɛndɔɔ tooloo. Kɛ te ŋ ve yekeŋ te, kalaŋnda naŋ nɔ o wali naa niŋndaŋ la cho piɛile naaleŋ paaliaŋ. Ŋ pɛɛku isɔɔ o nyɛ yɔŋnuŋ puaapilɛnɔɔ o lɛŋnde Tailaŋndeŋ niŋndo. Mbo dimi aa, “Wali ni mapuuloo le kɔmpitɛilaŋ toosiaa wa bɔɔ wali kɛndɛ. Kɛ teleŋndo pila ndoo dia ni. Fulamakɔɔlioo wa ni, yaa nɔ lɛ teleŋ bɔɔ le sɔɔŋ iMɛlɛkayaŋ te. O mɛɛlulaŋ kpɔŋ mi cha maa le Masale Mɛlɛkaleŋ kɛsioo nyɛ tase, mɛɛ mi siŋga wali nuu.” Yɛɛ puaapilɛnɔɔ hoo ndoo tosa yɛ?

⁸ Mbo tɛɛsiaa aa, “Mɛɛ ya tuu le wɔsioo opilɛ, mi kɛɛsiaa le mi wa nɔnɔ yeelɛi nyulul vili vili wo pisioo o nɛi. O kandɔŋndo, bahawɛi nyɛsɔlaa wa bɔɔ ya palaa nduyɛ mi hei tɛɛmbuu ya kɔllo. Te naŋ chiikaŋ pɛ naa wanaa naŋ wa wallo latulu wa, a mam ya, okoŋ, a nyuna ya le sabu ya che pisioo o nɛi nyɛ sɔvɛ mbo hiau kɔmpitɛilaŋ toosiaa o fondaŋ nyululaa kɛndɔɔ niŋndo. Mi yaa piɛi o Chɛhowa lo. Mi yaa nyuna ndu le mbo mala ya mi biunuŋ nduyɛ le mi komal kpeleŋ nuu le teleŋndo sɔlaa tau o walta iMɛlɛkayalaŋ niŋ. O viou bɛɛ le, mi sɔɔŋ kandu bɛndaa. Mi chɔɔlu sina mɛɛ wanaa niaa piandaa yeema mi wa nɔnɔ yeelɛiyo toosiaa yɛ, nduyɛ mi chɔɔlu taasioo sɔla mɛɛ wana toosiaa nɔnɔ koŋ yɛ. O boondii biŋgi bɛŋgu, te yaa toosiaa pɛ, o chuu fo o paaleŋ niŋ. Wana dimi isɔɔ a tonya, mi sɔla kaniei mbo hiau teleŋ ya wa wallo a kɔmpitɛilaŋ (ɔdinatɛɛlulaŋ) ndo. Mi hei ke ya nyaaloo kanifuule, buulaŋ yaa nɔ o wali ni paandoo niŋndo ve lɛ ya kuee le. Nduyɛ i hiou kpou ve, suŋ suŋ, I chɔɔlu sɔɔŋguu Chɛhowa ikɛi kpɛɛluŋ.”—Nuawɔ Maatiu 5:​3, 6, NW.

9. Vɛɛ naŋ hiau yɛ lachi a yiyaŋ kpeŋ kpeŋndo nɔɔ le wallo?

⁹ Chɛhowa naŋ bɔɔ kɔl te ŋ tosa pɛ wallo kalaŋ. Tɔnɔɔ cho o wali kala kalaa tosaa niŋ. (Pulɔwaa 12:​14) Kɛ ŋ nɔ miŋ tosa a sabu yɔŋi wali naa simnuŋ nyɛ sɔvɛ mbo hiou wali Chɛhowaa. Mi Chiisu suaa a nyɛm naŋ hauba woŋ okɔɔ aa, “La landuŋ ndɔ fɛŋ kɔl le mi Mɛlɛka wa nya choo masaa mbo hiou a nyɛ o nyɛ cheleŋ. Nduyɛ, mi la landuŋ kɔl mi la tosa nyɛ Mɛlɛka hɛnaŋ nya le tosaa wo. O koŋ kɔɔli, nyɔɔŋ ŋ tɔɔŋ bɛɛ fau Mɛlɛka nɔla mbo ke nya.” (Maatiu 6:​33) Kɛ vɛɛ naŋ looku yɛ sina te yiyaŋ naa cho pɛ kpeŋ kpeŋ a wallo okɔɔ? Ŋ nyunaŋndɔ aa, ‘I che pa wali nuu nyɛ sɔvɛ nduyɛ maa nyɛ yeelɛi bɛndu, kɛ mi cha wali Mɛlɛkaa nyɛ taaniŋ nduyɛ maa nyɛ kala?’ Yiyaŋndo a nyunaa hoo okɔɔ mala naa miŋ sina nyɛ kpeekpei naŋ kaala wo walaŋ?

10. Suɛi sɔvɛ kuɛɛ Chiisu pɛɛku yɛ naa?

¹⁰ Chiisu pɛɛku naa nyɛ nɔ mbo wa o tase o yoomu naa niŋndo. Paale pilɛ, mbo kua ndepiliaa a ŋiɔɔŋ yilɔɔ, Meele nda Mata. Hau pa, mi Mata kandu bɛɛ nyɛdiaa toosiaa le ndu. Kɛ mi Meele ndu chalnuŋ Chiisu ikɛi nduyɛ mbo wa ndu nilaŋ yaŋɔɔ o pɛɛku o wa wo. Mi Mata bii seiyo maa Meele cho ndu mala le. Mi Chiisu dimul Mata aa, “O kɛndɔɔ, ndu Meele hɛli ni. Nduyɛ, wana bii ndu ndu o ba le.” (Luku 10:​38-42) Mi Chiisu pɛɛku naa suɛi sɔvɛi o taamasioo hoo niŋ. Le miŋ kpakpala tuandɔŋndo o nyɛm naŋ hauba woŋ niŋ, okoŋ miŋ chɔm maa ŋ kaala Kiliti, ŋ nɔ miŋ “hɛli” o cho “o kɛndɔɔ” wo. Hoo sim maa chaŋyɛi nɛi a Chɛhowa nɔ mii wa nyɛ sɔvɛ sɔviɔɔ o yoomu naa niŋ.

MƐƐ NAŊ CHE PISULTAŊ A YELELAŊNDO YƐ

11. Yɛɛ Baabuiyo dimi yɛ a pɛŋgioo okɔɔ?

¹¹ Yoomula naalaŋ la cho bɔɔ la tuandaŋ. Lelaŋ lepum, o bɛnda miŋ chal miŋ pɛŋgi nyɛ pɔmbɔ. Baabuiyo dimul naa aa, “Wana chioo nyɛ bɛnda le ndu suee wo koni cho dioo a kolɔɔ ni mbo de saŋga ndɔɔ tɔnɔ.” (Ikilisiaatii 2:​24) Mi Chiisu sina maa i wa suɛi sɔvɛ le mi buɛiyaa nduaa ndaa pɛŋgi. Le taamaseliiyo, mɛɛ nda niilu kpɛŋ wali dimiaa yooŋgu kɛndɔɔ tosaa kekelee, mi Chiisu dimul nda aa, “Ŋ kɔnuŋ naa doŋ doŋnda mi ŋ kɔ pɛŋgi nyɛ pɔmbɔ.”—Maki 6:​31, 32.

12. Le yɛɛ naŋ nɔ yɛ miŋ wa yekeŋ a pisultaŋ vɛlɛ a yelelaŋndo okɔɔ? Chɔmndɔ taamaseliiyo.

¹² Pisultaŋ a yelelaŋndo mala naa miŋ pɛŋgi nyɛ pɔmbɔ. Kɛ ŋ nɔ miŋ kɛsiŋ o kɔl maa nyɔɔŋ muŋ tueiyɔɔ yeela nɔ mbo simnuŋ nyɛ sɔvɛ bɛndu o yoomu naa niŋ te. O wɔsiŋ kɛmɛ tasoŋ niŋ, wanaa bɔɔbɔɔ ndaa nɔ kaa hoo, “Ŋ dionuŋ diola naa, mi ŋ kolnuŋ kolɔɔ naa, kani fondole, te ŋ vi yɛ siɔdii?” (Kɔliŋtiaŋ Tasoo 15:​32) Hau bɛɛ, kaa suu waa naa cho o tiuwaa sɔ. Le taamaseliiyo, mi chua piaandu pilɛ o Yulopi niŋ Ba Paaleŋ le del lo kandu bɔŋaŋnda naalaŋ o lɔɔ bɛŋgu biyɔɔ. Kɛ ndoo kaala bɔɔ yelelaŋndo. Le hei, mbo kialu holiaŋndo a Seiyaa Chɛhowaa. Okoŋ kɔɔli, mbo huŋ sina maa kɔl o dɔu o yelelaŋndo wo chuu ndu bahawɛila faŋga. Mbo kandu vɛlɛ Baabuiyo pɛɛkoo. Mɛɛ teleŋ biŋgi hiou, mbo kandu yooŋgu kɛndɛ leMasaa dimioo. Mɛɛ o yiŋ, mbo dimi aa, “Suei ya kel kinɛi ye cho ni maa, I tɛɛmbuu fɛŋ teleŋndo tau tuupa mi huŋ sina maa Chɛhowa piɛiyo nɔ nyaaloo mbo hiau yelelaŋ cho o chieeŋndo hoo niŋndo poloŋ.”

13. (a) Chɔmndɔ taamaseliiyo le sinaa sabu pisultaŋ a yelelaŋ bɛndoo bɛnda le wo. (b) Yɛɛ mala yɛ naa le yiyaŋ kpeŋ kpeŋndo nɔɔ a pisultaŋ vɛlɛ a yelelaŋndo okɔɔ?

¹³ Pisultaŋ la mala naa miŋ pɛŋgi nduyɛ miŋ miiŋgu yoomuaŋ sɔla. Lelaŋ, vɛɛ kpɛ naŋ nɔ yɛ miŋ chua teleŋndo o pisultaŋ niŋ? Le mulioo sɔlaa, ŋ tuuwɔ ndi naa. Wanaa bɔɔbɔɔ hɛnaŋ katolaŋ a nyɛm nimi nimi pɔm pɔmbɔŋ dioo. Kɛ ŋ sina maa te ŋ wa nyɔɔŋ muŋ dioo lɔɔlɔɔ pɛ, ŋ cho kɛndiaa naa paaliaŋ. Te ŋ yeema pɛ miŋ wa o kɛndiaa niŋ, ŋ nɔ miŋ de nyɛdiaa bɛnda le naa wo. Mɛɛ lende koni. Te ŋ soliŋ pɛ teleŋ naa kpeku tau o pisultaŋ niŋ a yelelaŋndo, chaŋyɛi nɛi a Chɛhowa cho i tambu. Yɛɛ mala yɛ naa le sinaa te ŋ nɔ pɛ yiyaŋ kpeŋ kpeŋndo a yelelaŋndo okɔɔ ɔɔ ŋ nɔ le? Nyɛ pilɛ naŋ nɔ miŋ tosa wo cho ni, ŋ nɔ miŋ hɛli lɔɔ nduyɛ miŋ poonyiaa teleŋ naŋ chua o walta Chɛhowalaŋ tosaa niŋndo, mɛɛ bɔŋaŋnda leKilisiɔŋndaŋ biyɔɔ cho naa yɛ, wali pollo, a Baabuiyo pɛɛkoo. Koŋ faŋaŋ pɛ, a poonyiaa vɛlɛ teleŋ naŋ chua o pisultaŋ niŋ o lɔɔ pilɛ koŋ kpe bɛŋgu wo, mɛɛ bɔllo lɔɔ cho naa yɛ, tɛlivisiɔŋndo nuaa, ɔɔ vidueilaŋ. Te ŋ tuu pɛ teleŋnda tiɔɔŋndaŋ ndaŋ, yɛɛ naŋ pɛɛku yɛ? Ŋ nɔ pa miŋ tosa siŋgaŋndo?—Nuawɔ Ɛfisiaŋnda 5:​15, 16.

14. Yɛɛ mala yɛ naa miŋ hɛli pisultaŋ a yelelaŋ kɛndɔɔ?

¹⁴ Chɛhowa chɛl naa le miŋ hɛli pisultaŋ a ba naa, nduyɛ mi wanaa cho yuŋgoo bolleŋ nda hɛli pisultaŋ le yuŋgu ndaa. O Baabuiyo niŋ, Chɛhowa ke naa sawala mandaalaŋ le naa chɔmndo mɛɛ o yiyaŋ yɛ. Sawala mandaalaŋ ndaŋ la mala naa miŋ tosa kɛɛsiaala kɛndɛlaŋ.a (Tofa tɛɛsiaa amatou.) Pisulta kɛndɛlaŋ, “Mɛlɛka ke ndɔ o ke naa wo cho koŋ ni.” (Ikilisiaatii 3:​12, 13) I cho tonya maa o cho pisulta suu pilɛ le waŋnda kpou yeema le. (Kaleesiaŋnda 6:​4, 5) Kɛ pisulta suu o suu naŋ hɛli pɛ, ŋ nɔ miŋ wa yekeŋ. Mi Chiisu dimi aa, “Naa waŋndo kɛsi nyɛm ndɔŋ baa kalaŋ nda, loŋ koni kɔl ndɔɔ wa ni.” (Maatiu 6:​21) Kaala naŋ nɔ le Masa naa Chiisu wo, nyindu naa ni miŋ yiyaŋ, miŋ soo, nduyɛ miŋ tosa sɔɔŋ o nɛi chɔm maa Masale Mɛlɛkaleŋ le cho nyɛ sɔvɛ mi le hiau nyɛ o nyɛ cheleŋndo.—Filipiaŋnda 1:​9, 10.

HƆLTE NYƐM KIƆƆŊ CHƆULABAA

15, 16. (a) Vɛɛ hɔlte nyɛm kiɔɔŋ simnuŋ yɛ yaŋɔɔleŋ le naa? (b) Sila taasi kuɛɛ Chiisu sila yɛ naa a nyɛm kiɔɔŋ okɔɔ?

¹⁵ Wanaa bɔɔbɔɔ hau yiyaŋ maa mɛɛ ma sɔla nyɛla laŋga fula laŋ, foŋndaŋ, kɔmpitɛilaŋ, vɛlɛ a nyɛm cheleŋndoŋ. Hɔlte nyɛm kiɔɔŋ le tiu nda ba, ndu cho yɛ kaa chɔm maa nyɛm kiɔɔŋ a kaniei cho nyɛ sɔvɛ mbo hiau nyɛ o nyɛ cheleŋndo. Num Kilisiɔŋnɔɔ, yɛɛ cho yɛ nyɛ sɔvɛ bɛndoo le num? Nyunaŋndɔ aa, ‘Baa I chua pa teleŋndo tau le yiyaŋndo a mɔmbilta sɛnɛila fula laŋ okɔɔ, ɔɔ nyɛm sɛnɛi cheleŋ mbo hiau teleŋ ya chua le bɛɛndiaŋndo le bɔŋaŋndaŋ o kundaa niŋndo? I cho pa o tuandaŋ tau o waltaŋ niŋ mbo hiau teleŋndo chuaa le piɛileŋ ɔɔ diomndaŋ veeloo o Baabuiyo niŋ?’ Te ŋ ve yekeŋ te, kaala naŋ nɔ le nyɛm kiɔɔŋ ndo cho simnɔŋ nyɛ sɔvɛ mbo hiou kaala naŋ nɔ le Kiliti wo. Ŋ nɔ miŋ yiyaŋ a nyɛ Kiliti dimi wo. “La mandaŋ, yɔŋi yeemɛi le nyɛm faŋga faŋgaŋ i hiou nya o kɔl kɔɔli.” (Luku 12:​15) Le yɛɛ o dimi yɛ hei?

¹⁶ Mi Chiisu dimi maa “buɛi o buɛi cho mbo wa le masaa ŋiɔɔŋ te.” Mbo hiau lachi a dimioo aa, “Wana lenduŋ kɔl o nyɛ sɔlaa, ma nɔla Mɛlɛka saaŋgial te.” Ŋ nɔla miŋ ke Chɛhowa a kɔl naa kpou le, te ŋ handu pɛ kɔllo o nyɛm kiɔɔŋ choo. I sim wali le. Mi Chiisu tɛɛsiaa maa ‘te hoo naŋ kaala ni, ŋ tul o pilɔɔ leyɛ.’ Ɔɔ ‘te hoo naŋ diikuŋ ni, ŋ diikuŋ o pilɔɔ le.’ (Maatiu 6:​24) Le mɛɛ naŋ cho wanaa lahaki yɛ, ŋ nɔ miŋ hiou lachi a “nyɛ o nyɛ dialluŋ naŋ muŋ yeema le tosaa” chɔulabaa, ndu cho ni, hɔlte nyɛm kiɔɔŋ.—Ɛfisiaŋnda 2:​3.

17. (a) Le yɛɛ apum che yɛ ndi suɛi kala le yiyaŋ kpeŋ kpeŋndo nɔɔ a nyɛm kiɔɔŋ okɔɔ? (b) Yɛɛ mala yɛ naa le hɔlte nyɛm kiɔɔŋ chɔulabaa?

¹⁷ Wanaa bɔɔbɔɔ landuŋ bɔɔ kɔl le yeemaŋ ndaŋ ŋdialloŋ. Le saboo hoo, a che ndi suɛi kala kpoke le yiyaŋ kpeŋ kpeŋndo nɔɔ a nyɛm kiɔɔŋ okɔɔ. (Nuawɔ Kɔliŋtiaŋ Tasoo 2:​14, NW.) Le mɛɛ nda cho yiyaŋ nyɛkɛndɛi le yɛ, i wa ikala le nda le ma sina teŋgeŋndo ikɛndɛi a iwɔɔŋnde tɛɛŋ. (Hibuluiya 5:​11-14) Mi yeemɛi ndɛi le nyɛm kiɔɔŋ hiou lachi a kaloo. Mɛɛ nda sɔla fau, lende koni nda chɔɔlu yeema ni. (Ikilisiaatii 5:​10) Kɛ nyɛ cho le miŋ tosa le yiyaŋ waa naa chɔulabaa. Diomndaŋ veeloo o Diom Mɛlɛkaa niŋ lɔɔlɔɔ ke naa yoomuaŋ le hɔlte nyɛm kiɔɔŋ chɔulabaa. (Pitɛ Tasoo 2:​2) Mi Chiisu yiyaŋ yiŋgoloŋ o taasi Chɛhowaa choo, nduyɛ keŋ mala ndu ni mbo simul tɔɔndaŋnda Masa Nyinaa Wɔɔŋnda. (Maatiu 4:​8-10) Hau bɛɛ, te ŋ yeema pɛ hɔlte nyɛm kiɔɔŋ chɔulabaa, ŋ nɔ miŋ dɔu taasi Chɛhowaa o wali niŋ. Hoo cho Chiisu chɔm maa ŋ kaala ndu mbo hiau nyɔɔŋ.

18. Yɛɛ ŋ kɛɛsiaa yɛ le tosaa a kɔllo kpou?

¹⁸ Mɛɛ Chiisu nyuna Pitɛ aa, “A kaala ya mbo hiau suuwa haa?” pɛɛkoo o wa koŋ Pitɛ ni maa Chɛhowa piɛiyo nɔ mbo wa nyɛ tasoo o yoomu ndɔɔ niŋ. I cho suɛi kɛndɛ le sinaa maa Pitɛ laŋ la sim ni maa “Pouwo.” Wana tuu suiliŋnda kɛndɛla Pitɛ laŋ a pouwo. (Walta Wanaa Chiisuaa 4:​5-20) Hau, naa bɛɛ yeema mi kaala naa le Kiliti wa o kala poŋ. Lelaŋ, ŋ nɔ miŋ tosa a sabu le wallo, pisultaŋ, a nyɛm kiɔɔŋ kɛsioo o fonda ndɔɔ. Te ŋ tosa lende pɛ, mɛɛ ŋ cho dimi maa Pitɛ aa, “Masanɔɔ, a sina maa I kaala num.”