“Nɔ Kɔl Simulaa Ma Tosa Wallo”

1, 2. (a) Wali sɔvɛ yɛɛ Sɔlɔmɔŋ ndoo sɔla yɛ le tosaa? (b) Le yɛɛ Deeve ndoo buulaŋ yɛ a Sɔlɔmɔŋ okɔɔ?

MI SƆLƆMƆŊ sɔla wali teŋgeŋndo le tosaa. Mi Chɛhowa yulu ndu iso le mbo wa simlachinɔɔ le maaŋndo taŋgullo Chulusɛlɛm. Taŋgul sɔvɛ ndoo hiou taŋgultaŋ kpou wo o wa ni! Chiɛiyo hoo ndoo nɔ mbo wa “Chiɛi tɔɔma bɛndu o chieeŋndo choo.” Nduyɛ ndoo nɔ niŋ tɔɔ le naŋɔɔ ndɔɔ. I hiou wa i sɔvɛ ve cho ni, “chiɛi Mɛlɛka Yaawɛɛ wo” ndoo wa niŋ ni.—Koloniko Tasoo 22:​1, 5, 9-11.

² Masaa Deeve ndoo nɔ tiindaŋndo maa Mɛlɛka cho Sɔlɔmɔŋ mala. Kɛ Sɔlɔmɔŋ ve wɔ “o bɔɔ le nduyɛ ndoo sina wɔ isɔɔ le.” Baa ndoo nɔ pa kɔl simulaa le mbo chɛl wali keŋnuŋ ndu hoo le maaŋndo taŋgullo wo? Le mɛɛ ndoo ve wɔ o bɔɔ ɔɔ sina wɔ isɔɔ le yɛ kuuna ndu pa wallo hoo tosaa? Le mbo tiuba, kɔl simulaa ndoo yeemaŋ Sɔlɔmɔŋ o ba nduyɛ mbo tosa wallo.

3. Yɛɛ Sɔlɔmɔŋ ndoo pɛɛku yɛ a kɔl simulaa finya ndɔ o ba?

³ Naapum Sɔlɔmɔŋ ndoo pɛɛku niŋ tau a kɔl simulaa okɔɔ Deeve finya ndɔ o ba. A boondii Deeve wa bɛɛ chuaambɔ ve, mi ndoo sɔŋga a visiaa yonduaa ndaa huŋ saa finya ndɔ wa biyɔɔ wa. (Saamiɛɛ Tasoo 17:​34, 35) Mbo chɔm vɛlɛ kɔl simulaa mɛɛ o sɔŋga a kuubanɔ ndoo nɔ tɔɔ bɛndoo le kpaayaa wo yɛ, Koolaya. A tonya, a mala Mɛlɛkaa, mi Deeve dii Koolaya a pou faandaa.—Saamiɛɛ Tasoo 17:​45, 49, 50.

4. Le yɛɛ Sɔlɔmɔŋ ndoo nɔ yɛ mbo chɔm kɔl simulaa?

⁴ Ŋ sina niŋ le sabu Deeve wa wana kpekpeiyo le Sɔlɔmɔŋ kɔl simulaa kioo nduyɛ mbo taŋgul maaŋndo wo. (Nuawɔ Koloniko Tasoo 28:​20.) Te Sɔlɔmɔŋ ndoo nɔ kɔl simulaa le, siooŋnde wa ndu biyɔɔ. Nduyɛ hei wa ndu kuuna pɛɛŋ le wali koŋ kandɔɔ. Nduyɛ keŋ ndii wɔu niŋ mbo hiau wallo kandɔɔ mbo dema.

5. Le yɛɛ naŋ yeema yɛ kɔl simulaa?

⁵ Maa Sɔlɔmɔŋ, mɛɛ miŋ sɔla malaa Chɛhowa o ba le miŋ nɔ kɔl simulaa le wali o ke naa wo tosaa. Lelaŋ, ŋ pɛɛkuŋ ndɔ taamaseliilaŋ la tiŋ a wanaa ndaa chɔm kɔl simulaa o paandoo niŋnda. Okoŋ, miŋ yiyaŋ niko a mɛɛ naa bɛɛ ŋ chɔm kɔl simulaa le chiiyo wali o ke naa wo yɛ.

TAAMASELIILA WANAA CHƆM KƆL SIMULAA WA

6. Yɛɛ ŋ hɛnaŋ yɛ a kɔl simulaa Choosɛ wo?

⁶ Mi Choosɛ chɔm kɔl simulaa mɛɛ lanɔɔ Pɔtifa kindiŋ le kaa ihini nɔɔlɛiyo tosaa a ndu. Choosɛ ndoo sina dɔɔ maa te o kɛɛ pɛ chua koŋ, yoomu ndɔɔ wa luɛiyɔɔ o kpundɔɔ niŋ. Kɛ a koŋ kpou, mbo chɔm kɔl simulaa, okoŋ, mbo kɛɛ ndu o foofo koŋ choo.—Chɛnɛsee 39:​10, 12.

7. Vɛɛ Luehabi ndoo chɔm yɛ kɔl simulaa? (Tofa fotueiyo o peele naŋ kandu leŋ choo.)

⁷ Luehabi cho vɛlɛ taamaselii cheleŋ le kɔl simulaa nɔɔ ni. Mɛɛ suaŋsuaŋnda fula Isɔluɛi ma huŋ o ndu lo bɛɛ, siooŋnde ndii tosa ndu mi ndoo kɛɛ le nda malaa. Kɛ le tiindaŋ ndoo nɔ o Chɛhowa niŋndo, mbo nɔ kɔl simulaa le puaa ŋiɔɔŋaa kaŋ vioŋɔɔ, nduyɛ mbo mala nda ma nyaanuŋ o kɛndiaa niŋ. (Chɔɔsuaa 2:​4, 5, 9, 12-16) Luehabi ndoo nɔ laalaŋndo maa Chɛhowa cho Mɛlɛka tonyaa ni. Nduyɛ ndoo nɔ tiindaŋndo maa o nɛi o nɛi niŋ Mɛlɛka wa Isɔluɛiya lɛŋndeŋ ke. O chɛl mi siooŋii acheleŋnda, kɔ bii masaa Chɛliko a laŋgbaa nduaa, bii ndu le. Kɛ, mbo nɔ kɔl simulaa nduyɛ mbo kiindiaa ndupila vɛlɛ a yuŋgu ndɔɔ.—Chɔɔsuaa 6:​22, 23.

8. Vɛɛ kɔl simulaa Chiisoo ndoo piiliaŋ yɛ wanaa o vem hɔlte ndɔ wa?

⁸ Mi wanaa laalaŋaa Chiisu vem hɔlte ndɔ wa bɛɛ chɔm kɔl simulaa. Ma cha kɔl simulaa Chiisu ndoo chɔmndo, nduyɛ mi hei mala nda le taamasi ndɔɔ tolɔɔ kɔɔli. (Maatiu 8:​28-32; Chɔŋ 2:​13-17; 18:​3-5) Mɛɛ Sadusiiya kindiŋ le ma kuuna nda pɛɛkoo a Chiisu okɔɔ, mi wanaa Chiisu vem hɔlte ndɔ wa kɛɛ le keŋ tosaa.—Walta Wanaa Chiisuaa 5:​17, 18, 27-29.

9. Vɛɛ Timoti Diiŋ Ndɔɔ 1:​7 mala yɛ naa le biyɔɔ bila naa kɔl simulaa fula wa?

⁹ Choosɛ, Luehabi, Chiisu, a wanaa Chiisu vem hɔlte ndɔ wa ndaa nɔ yeemɛi le sɔɔŋ tosaa sakpo. A dou tiindaŋndo o ndapila niŋ le kɔl simulaa chɔmndo le, kɛ ma duau tiindaŋ ndaa o Chɛhowa niŋ. Te ŋ yeema pɛ kɔl simulaa teleŋndaŋ lapum, naa bɛɛ nɔ miŋ dɔu tiindaŋndo o Chɛhowa niŋ, kɛ o cho o naapila niŋ te. (Nuawɔ Timoti Diiŋ Ndɔɔ 1:​7.) Ŋ mɛɛndaŋ ndɔ nɛilaŋ la tiɔɔŋ naa naŋ chɔm kɔl simulaa o yoomoo niŋnda. O yuŋgoo niŋ a o kundaa niŋ.

SƆƆŊ NAŊ YEEMA KƆL SIMULAA WOŊ

10. Le yɛɛ Kilisiɔŋaa feleŋguaa nɔ yɛ ma chɔm kɔl simulaa?

¹⁰ Sɔɔŋ cho tau ŋ Kilisiɔŋaa feleŋguaa nɔ ma chɔm kɔl simulaa le Chɛhowa piɛiyo wo. A tiuba ma pɛɛku nduyɛ ma tol taamaselii Sɔlɔmɔŋndo kɔɔli, o ndoo chɔm kɔl simulaa le kɛɛsiaalaŋ tosaa a taasi le mbo chii maaŋndo taŋgullo. Mi che bɛɛ feleŋguaa nɔ ma sɔla nɛi chɔmaa wanaa velu nda wa o ba, kɛ a nɔ ma tosa kɛɛsiaala sɔvɛlaŋ a ba nda. (Pulɔwaa 27:​11) A nɔ ma nɔ kɔl simulaa le kɛɛsiaala taasi laŋ tosaa le chaŋyaŋ nda cho hɛli woŋ, yelelaŋ suu nda hɛnaŋ ndo, mɛɛ nda nɔ ma wa a diandaa o kaa niŋ yɛ, a teleŋ nda cho yiŋɔɔ sɔlaa wo. A nɔ ma chɔm kɔl simulaa kanifuule, yeemɛi Setana ve nda cho keŋ simullo ni, o chua Mɛlɛkaa chɔdɔ wo.

11, 12. (a) Vɛɛ Muuse chɔm yɛ kɔl simulaa? (b) Vɛɛ feleŋguaa tuallɛ taamasi Muuse wo kɔɔli?

¹¹ Kɛɛsiaa sɔvɛ Kilisiɔŋaa feleŋguaa nɔ ma tosa wo opilɛ cho kpeleŋnda nda nɔ ma kɛsi laŋ ni. O lɛŋnde ipum niŋ, ma wa feleŋguaa baŋɔɔ le dɛnɛ sinaa bɛndoo, a wali nɔ kaniei tau wo sɔlaa. O lɛŋii cheleŋnde niŋ, suɛi nyɛsɔlaa cho o kala kpoke. Lelaŋ, mi feleŋguaa handu kɔllo lepum o wali nda tosa le yuŋgula ndalaŋ malaa kinɛiyo. Te a wa pɛ o yɔm tɛndaa hoo tɛɛŋ, yiyaŋ a taamasi Muuse wo okɔɔ. Chua Felo wo manda ndu ni. Lelaŋ, ndoo kɛsi kpeleŋndo le mbo wa wana sɔvɛ ɔɔ wana nyɛsɔlaa bɛndoo pila. Yiyaŋndɔ a nyɛ yuŋgu ndɔɔ Ichipi, wanaa wa ndu pɛɛkoo wa, a wanaa nduaa silaa wa ndu dimullo wo! Kɛ Muuse ndoo nɔ kɔl simulaa nduyɛ mbo hɛli le waa latulu a wanaa Mɛlɛkaa. Mɛɛ Muuse mɛi Ichipi a sulta ndɔlaŋ, mbo duau tiindaŋndo kpou o Chɛhowa niŋ. (Hibuluiya 11:​24-26) Fulamakɔɔlioo wa ni, mi Chɛhowa duau ndu sala tau, nduyɛ o cho vɛlɛ salalaŋ sɔla tau o chilaŋ niŋ.

¹² Te feleŋguaa kɛsi pɛ kpeleŋndaŋ le Chɛhowa piɛiyo a kɔl simulaa, nduyɛ ma kɛsi Masale Mɛlɛkaleŋ nyɛ tase o yoomu ndaa niŋ, o cho nda salaa dɔuwɔɔ. O cho nda mala ma sɔla nyɛm nda hau ba le yuŋgula ndalaŋ ndoŋ. O wɔsiŋ kɛmɛ tasoŋ niŋ, mi Timoti handu kɔllo o wali Mɛlɛkaa choo, num bɛɛ tiuba ma tosa lende.a (Tofa tɛɛsiaa amatou.)—Nuawɔ Filipiaŋnda 2:​19-22.

13. Vɛɛ kɔl simulaa mala yɛ ndepilɛnɔ pum le kpeleŋnda ndɔlaŋ komallo?

¹³ Ndepilɛnɔ pum o Alabama niŋ, Amɛlika, ndoo yeema kɔl simulaa le kpeleŋndaŋ kɛsioo o wali Mɛlɛkaa niŋ. Mbo poonyiaa aa, “Teleŋ ya wa chuaambɔ wo, yaa nɔ bɔɔ Siɔmbulaŋ. Ndoo kendu mi yaa soo o waŋnda lo o Toŋgo leMasaa niŋ, kɛlɛŋgaa niŋ te le kundɔɔ diola wanaa ya sina le wa.” Kɛ a mala wanaa velu ndu wa vɛlɛ a acheleŋnda o kundaa niŋ, mi feleŋgɔnɔɔ hoo tiuba le kpeleŋ ndɔɔ komallo. Mbo simnuŋ kɔɔfanɔ lɔɔlɔɔ wo. Mbo dimi aa, “Chieeŋ Setanaa kɛsi dɛnɛ sinaa bɛndoo, tɔɔ bɛndoo, nyɛsɔlaa, a nyɛm kiɔɔŋ nɔɔ tau, maa kpeleŋnda kɛndɛlaŋ la cho laŋ ni.” Kɛ mbo sina vɛlɛ maa wanaa bɔɔbɔɔ tiuba le kpeleŋnda laŋ komallo le. Nduyɛ kɔl landɛiyo a saŋgaa koni la chuu wana ni. Mbo chɔɔlu dimi aa, “Wallo le Chɛhowa chuu ya nyaale bɛndoo, nduyɛ mi sina maa I sɔla nyɛ ya wa kɔllo.”

14. Teleŋnda kuɛɛ kalaŋ chuauwaa Kilisiɔŋnda nɔ yɛ ma chɔm kɔl simulaa?

¹⁴ Kalaŋ chuauwaa Kilisiɔŋnda bɛɛ nɔ ma chɔm kɔl simulaa. Le taamaseliiyo, naapum mi wana ke num wallo wo yeema num le ma chɔɔlu wallo tosa o palɛi ŋ kɛɛsiaa le pɛɛku leyuŋgoo, kɔlaŋ o wali pollo niŋ, a bɔŋaŋndaŋ ndo. Mɛɛ ma nɔ kɔl simulaa le wali koŋ kiɔɔ, nduyɛ ma kɛsi taamasi kɛndɔɔ le chuauwaa numnda. Ɔɔ naapum mi kalaŋ chuauwa apum o kundaa niŋ chɛl chuauwaa ndaa le sɔɔŋ pum tosaa. Num yɛ, a yeema mi chuauwaa numnda tosa sɔɔŋ muŋ te. Te kalaŋ chuauwaa kaŋ nyuna num pɛ le sabu koŋ, a nɔ pa kɔl simulaa le ma tɛɛsial nda o nɛi lebɛɛ niŋ?

15. Vɛɛ Sam 37:​25 a Hibuluiya 13:​5 mala yɛ kalaŋ chuauwa?

¹⁵ Mɛɛ ma nɔ kɔl simulaa ma mala chuauwaa numnda ma kɛsi kpeleŋndaŋ o wali Mɛlɛkaa niŋ, nduyɛ ma komal taŋ. Le taamaseliiyo, mi kalaŋ chuauwa apum yɔŋ siooŋnde le chuauwaa ndaa dɛɛniaa le waltaŋ ndaŋ tosaa. La tiŋ la cho ni, kɔɔfaleŋ, kɔlaŋ yooŋgu kɛndɔɔ dimioo naa yeemɛi cho tau wa, wallo o Bɛtɛɛl, ɔɔ le malaa Toŋgola leMasalaŋ a Toŋgola Bɔŋaŋnda Bɛndaŋ taŋgullo. Naapum ma yiyaŋ maa te a yuuwa pɛ chuauwaa ndaa nɔla ma manda nda le. Kɛ kalaŋ chuauwaa nɔ taasioo wa chɔm kɔl simulaa nduyɛ ma dɔu tiindaŋndo o Chɛhowa niŋ maa o cho sɔɔŋ o dimi woŋ peelu. (Nuawɔ Sam 37:​25; Hibuluiya 13:​5.) Kalaŋ chuauwaa chɔm kɔl simulaa waa lende nduyɛ ma dɔu tiindaŋ ndaa o Chɛhowa niŋnda mala chuauwaa ndaa le keŋ tosaa.—Saamiɛɛ Tasoo 1:​27, 28; Timoti Diiŋ Ndɔɔ 3:​14, 15.

16. Vɛɛ kalaŋ chuauwaa bɔɔbɔɔ mala yɛ niŋ chuauwaa ndaa le kpeleŋndaŋ kɛsioo o Mɛlɛkaa piɛiyo niŋ? Nduyɛ tɔnɔla yɛɛ chuauwaa ndaa sɔla yɛ niŋ?

¹⁶ Mi pɔnɔɔ a lanɔɔ o Amɛlika niŋ mala chuauwaa ndaa le ma handu kɔllo le Chɛhowa piɛiyo. Mi pɔnɔɔ dimi aa, “Tuupa mi chuauwaa naa chaa kɔlaŋ a suɛi, mi naŋ dimul nda tau a nyaale cho o kɔɔfaleŋ niŋndo vɛlɛ a wallo o kundaa niŋ. Kpeleŋ ndaa cho niŋ hoo ni.” Mbo dimi vɛlɛ maa le mɛɛ chuauwaa ndaa kɛsi kpeleŋndaŋ nduyɛ ma komal taŋ yɛ, o mala nda ma chɔulaba tɔɔndaŋnda cho hau o chieeŋ Setanaa niŋndaŋ. Nduyɛ ma handu kɔllo le Chɛhowa piɛiyo. Mi puaapilɛnɔ nɔ chuauwa a ŋiɔɔŋ ndo poonyiaa aa, “Mi kalaŋ chuauwaa bɔɔbɔɔ soliŋ yoomuma ndaŋ a nyɛ nda sɔlaa kpeku tau le chuauwaa ndaa malaa ma komal kpeleŋndaŋ, mɛɛ pisultaŋ, yelelaŋndo, a dɛnɛ sinaa cho naa yɛ. O wa suɛi taasi le ma yɔŋgu yoomuma numndaŋ a nyɛ num sɔlaa le chuauwaa numnda malaa le komallo kpeleŋnda mala nda ma nɔ simnda kɛndɛlaŋ a Chɛhowa wo. Hei chuu naa kɔl hiniaa o cho ko le mɛɛ chuauwaa naa komal kpeleŋnda ndalaŋ o Mɛlɛka piɛiyo niŋ yɛ le, kɛ le mɛɛ naŋ cho kɔlaŋ naa ndaa o nɛi pilɔɔ choo yɛ.” Nɔ tiindaŋndo maa Mɛlɛka hini kɔl a kalaŋ chuauwaa mala chuauwaa ndaa le kpeleŋndaŋ komallo o Mɛlɛka piɛiyo niŋnda.

KƆL SIMULAA O KUNDAA NIŊ

17. Chɔm taamaseliilaŋ a kɔl simulaa okɔɔ o kunda leKilisiɔŋndo niŋ.

¹⁷ Ŋ nɔ vɛlɛ miŋ chɔm kɔl simulaa o kundaa niŋ. Le taamaseliiyo, te waŋndo tosa suɛi wɔɔŋnde pɛ, bɛnduaa kundaa nɔ ma chɔm kɔl simulaa le bahawɛi koŋ solioo. Ɔɔ te a wa pɛ malaa wanaa yoomula ndalaŋ la cho o kpundɔɔ niŋ o fondaŋ chiɔuwaa wo. Mi bɛnduaa apum kuɛ o chiɛila manyumndaŋ niŋ le pɛɛkoo a wanaa chɔm yeemɛi ya ɔɔ le bɔŋaŋndaŋ biyɔɔ a nda. Ndepiliaa cho wɔ o nɔ le wa yɛ? Nda bɛɛ nɔ dilakeŋnaŋndaŋ tau le ma chɔm kɔl simulaa nduyɛ ma piɛi Chɛhowa. A tosa kɔɔfaleŋ, a kua naa yeemɛi cho tau le yooŋgu kɛndɔɔ dimioo wa, a tosa wallo a Kunda Cho le Toŋgola leMasalaŋ Taŋgullo Wo, a yɔŋgɔŋndo le kɔlaŋ o Sukuuwo le Wanaa Dimi Yooŋgu Kɛndɛ leMasaa Wa. Ma veelu pɛɛŋ apum le kɔlaŋ o Sukuuwo Kiiliadi.

18. Vɛɛ ndepiliaa yuuwa chɔm yɛ kɔl simulaa?

¹⁸ Ŋ kaala ndepiliaa naa yuuwa, nduyɛ ŋ naŋ bɔɔ kɔl le nda nɔɔ o kundaa niŋ! Mi che bɛɛ apum a tiu lɛ ba ma tosa mɛɛ ndaa tosa paandu o wali Mɛlɛkaa niŋ yɛ le, kɛ nda bɛɛ chɔm kɔl simulaa nduyɛ ma tosa wallo. (Nuawɔ Taitɔɔ 2:​3-5.) Le taamaseliiyo, ndepilɛnɔ yuuwo nɔ mbo chɔm kɔl simulaa te bɛnduaa kundaa dimul ndu pɛ le ndepilɛnɔ feleŋgɔnɔɔ silaa a chuɛɛnɔŋ kɛndɔɔ okɔɔ. O kue mbo dimul ndepilɛnɔ feleŋgɔnɔ koŋ diomnda nɛiyaa laŋ te. Kɛ o nɛi lebɛɛ niŋ, o tiuba mbo dimul ndu mɛɛ chuɛɛnɔŋ ndɔɔ o paaliaŋ acheleŋnda yɛ. (Timoti Tasoo 2:​9, 10) Te ndepiliaa yuuwa chɔm pɛ kaalaa o nɛila waa naa choo, ma kindi kundaa poŋ.

19. (a) Vɛɛ puaapiliaa yiŋ nda chɔm yɛ kɔl simulaa? (b) Vɛɛ Filipiaŋnda 2:​13; 4:​13 mala yɛ puaapiliaa le maa chɔm kɔl simulaa?

¹⁹ Puaapiliaa yiŋ nda bɛɛ nɔ ma chɔm kɔl simulaa nduyɛ ma tosa wallo. Te a yɔŋguŋ pɛ le simnɔŋndo buɛiyaa malalaŋnda a bɛnduaa kundaa, mi kundaa sɔla tɔnɔɔ tau. (Timoti Tasoo 3:​1) Kɛ mi apum kiisaŋ le hei tosaa. Naapum mi puaapilɛnɔ tosa biondɔŋndo o paandoo niŋndo, yiyaŋ maa o suliŋ le mbo simnuŋ buɛi malalaŋ ɔɔ bɛndu kunda le. Mi puaapilɛnɔ cheleŋ yiyaŋ maa o nɔla mbo simnuŋ buɛi malalaŋ ɔɔ bɛndu kunda le. Te o wa pɛ lende ŋ yiyaŋ ni, Chɛhowa mala num ma nɔ kɔl simulaa. (Nuawɔ Filipiaŋnda 2:​13; 4:​13.) Loonuŋ taamaselii Muuse wo. Ndu bɛɛ, mi ndoo yiyaŋ maa o nɔla mbo tosa nyɛ Chɛhowa ndoo dimul ndu le tosaa wo le. (Ɛsɔdɔɔ 3:​11) Kɛ mi Chɛhowa mala ndu le kɔl simulaa sɔlaa nduyɛ mbo tosa nyɛ bɛnda wo. Vɛɛ puaapilɛnɔ yiŋndo sɔla yɛ kɔl simulaa waa lende? O nɔ mbo piɛi o Chɛhowa lo nduyɛ mbo wa diomndaŋ veeloo o Baabuiyo niŋ lepaa o lepaa. O nɔ mbo yiyaŋ a taamaseliila wanaa chɔm kɔl simulaa o Baabuiyo niŋnda. O nyuna bɛnduaa kundaa a lebɛɛ le ndu pɛɛkoo, nduyɛ mbo yɔŋguŋ le kundaa malaa o nɛi o nɛi niŋ. Ŋ cho puaapiliaa yiŋ nda kpou dɛɛniaa le ma chɔm kɔl simulaa nduyɛ ma tosa wallo kalaŋ le kundaa!

“MƐLƐKA YAAWƐƐ, . . . CHO A NUM LATULU”

20, 21. (a) A yɛɛ Deeve yiyalaŋ yɛ Sɔlɔmɔŋ? (b) Tiindaŋ yɛɛ naŋ nɔ yɛ?

²⁰ Mi Masaa Deeve yiyalaŋ Sɔlɔmɔŋ maa Chɛhowa cho wa a ndu latulu haaa mbo chii maaŋndo taŋgul. (Koloniko Tasoo 28:​20) Mi Sɔlɔmɔŋ yiyaŋ yiŋgoloŋ o diomndaŋ ndaŋ choo. O chɛl le mɛɛ ndoo ve wɔ o bɔɔ ɔɔ sina wɔ isɔɔ le yɛ kuuna ndu wallo hoo tosa le. Kɛ mbo chɔm kɔl simulaa bɛndoo. Nduyɛ a mala Chɛhowaa, mbo chii maaŋ tɔɔma bɛndu koŋ taŋgul o wɔsioŋ ŋ ŋɔmmɛu a tɛndaa tɛɛŋ bɛŋgu.

²¹ Mi Chɛhowa mala Sɔlɔmɔŋ. Naa bɛɛ o mala naa miŋ chɔm kɔl simulaa le miŋ nɔla wali naa tosa o yuŋgoo niŋ a o kundaa niŋ. (Aisaya 41:​10, 13) Te ŋ chɔm pɛ kɔl simulaa o Chɛhowa piɛiyo niŋ, ŋ nɔ tiindaŋndo maa o cho naa salaa dɔuwɔɔ suŋ suŋ a o chilaŋ niŋ. Lelaŋ, “nɔ kɔl simulaa ma tosa wallo.”