Masa Kɛndɛ Mɛɛlaa Kpɔŋ Isɔluɛi

WƆSILAŊ la ŋɔmaa kpe Chosaya wa ni mbo sul masaa le kayii ŋiinde ba touwo o Isɔluɛi niŋ. O cho bɔɔ chuaambɔ le waa masa. Le hei, mɛɛ o kandu masaleŋ, mi bɛnduaa kɔlkaluaa pum mala ndu.

Mɛɛ Chosaya chii wɔsilaŋ la ŋɔmmɛu o masaleŋ choo, mbo kandu fonda lepiɛi Jɛhowaa nuuviaa. Tamaselii kɛndɛ masaa Deeveo, Chɛhosiafaa vɛlɛa Hɛsikayaa o tol kɔɔli ni. Teleŋ Chosaya wa o wɔsila tɔlaŋ niŋndo, mbo tosa suɛi kɔl sikpɛi pum.

Le teleŋ vilɛi sɔɔŋ wɔɔŋndoŋ Isɔluɛitiiyaa bɔɔ bɔɔ ndaa tosa ni. Mɛlɛkaa lachoowaa ndaa sooluu ni. O piɔmnda bɛŋgu ndaa tuŋnduŋ ni le nda sooloo. Mi Chosaya a laŋgbaa nduaa kandu sooluula piɔmaa kaŋ faŋaa o lɛŋndeŋ niŋ. O ve wali bɛɛŋ bɛɛŋ te, kanifuule wanaa bɔɔ bɔɔ o lɛŋnde leŋ niŋ mɛlɛkaa lachoowaa ndaa sooluu ni. A cha bɛɛ Chosaya nda puaa nduaa piɔmaa kalaa pesi pesio naŋ.

Mɛɛ keŋ hiou fokpi, mi Chosaya handu simlachiaa a yaa le maaŋ Jɛhowaa miŋgioo toosiaa. Mi waŋnda chuuŋgiaa kanioŋ, okoŋ ma ke puaa haa le wali nɔ le tosaŋndo wo. Mɛɛ nda wa maaŋndo hoo toosiaa, mi Hilikaya masa wanaa soliaa salaa saaluŋ nyɛ sɔwɛ pum. Yau Muuse ndoo poonyiaa sawala Jɛhowalaŋ leniŋ sindɛ pa wo. O wa o looniŋ le wɔsila siaama.

Ma kua a yauwo hoo o Chosaya lo, okoŋ mbo dimul wana kuɛ a ndu wo le mbo nuel ndu leniŋ. Mɛɛ Chosaya wa nilaŋ yaŋɔɔ, mbo sina maa waŋnda ve sawala Jɛhowalaŋ biyɔɔ kposoŋ te. Mbo tambu kɔl tau. Le hei, mbo sɛɛsiaŋ nyɛlaŋ lekɔɔ paku, a mɛɛ ŋ cho naa chɔɔ o fotueiyo niŋ yɛ. Mbo dimi aa: ‘Jɛhowa dɔunuŋ tumbe a naa, kanifuule sawala cho la poonyiaa kinɛi o yauwo hoo niŋndaŋ, finyaa naa bii laŋ kposoŋ te.’

Mi Chosaya dimul Hilikaya, masa wanaa soliaa salaa maa o nyuuniaa mbo sina nyɛ Jɛhowa cho hunɔɔ tosa a nda wo. Mɛɛ mi Hilikaya kua o Huuda lo. Huuda yɛ, wana lanɔ suaa le Mɛlɛka wo o wa ni. Okoŋ, mi Huuda dimul ndu le mbo miiŋgu pila naa Chosaya cha a yooŋgu o sɔla o Jɛhowa lo wo aa: ‘Chulusalɛm vɛlɛa waŋnda kpou nɔ le nyɛ palaa sɔlaa le mɛɛ nda wa mɛlɛkaa lachoowaa sooloo yɛ, nduyɛ mi yɔŋwɔɔŋndo pia cha o lɛŋndeŋ niŋ. Kɛ num Chosaya, le mɛɛ ŋ tosa o kɛndɔɔ yɛ, nyɛ palaa hoo o cho hunɔɔ teleŋ ŋ cho hoo achallo le, mɛɛ o piɔm numndo kɔɔli.’