Mɛlɛka Toosiaa Wana Pɔnɔɔ a Wana Lanɔ Tasoo

Mi Chɛhowa toosiaa kpeloo o fondaŋ nda veelu aa Idɛŋ ndo. Kpele koŋ wa o piaa cha a bilta peeŋgelaŋ, yɔmnde, vɛlɛ a visiaa. Okoŋ, mi Mɛlɛka toosiaa wana pɔnɔ tasoo a puuloo diolaŋ aa Adam, nduyɛ mbo hul ndu hueiye o miliŋ. A sina pa nyɛ ndoo yɔŋnuŋ okoŋ kɔɔli wo? Mi wana pɔnɔ koŋ simnuŋ wana chiee yoomaa. Mi Chɛhowa dimul Adam le mbo wa kpeloo hɔlteŋ, nduyɛ mbo dimul ndu le mbo ke visiaa kpou diolaŋ.

Mi Chɛhowa ke Adam sawa sɔvɛ sɔviɔɔ. Mbo dimul ndu aa: ‘A dia komɔɔ yɔmnde kpou, kɛ mɛɛ yɔmndo opilɛ kpe, ndu a nɔ ma de komɔɔ ndɔɔ le. Te a de komɔɔ yɔm koŋ pɛ, a cho wu.’

Okoŋ kɔɔli, mi Chɛhowa dimi aa: ‘I cho wana malaa toosiaa le Adam.’ Mbo hivi Adam o luaŋ yikpi, nduyɛ mbo soliŋ kpɛndɛi Adam nde kpeku, mbo toosial ndu lanɔɔ. Mbo ke ndu diolaŋ aa Ifi. Mi Adam nda Ifi simnuŋ yuŋgu tasoo. Vɛɛ kɔllo wa yɛ Adam mɛɛ o che laa ndɔ sɛnɛiyo? Mi Adam naŋ kɔl tau, nduyɛ mbo dimi aa: ‘Nuawɔ wana Chɛhowa toosiaa a kpɛndɛi nii ve. Aa ma che! Hoo ndu cho ko maa ya.’

Mi Chɛhowa dimul Adam nda Ifi le ma velu chuauwa, okoŋ ma pei chieeŋndo. Ndoo yeema nda ma tosa wallo diompilɛ a nyaale, le ma siiŋguu chieeŋndo kpou kpele hɛnɛkiɔɔ maa kpeloo Idɛŋ. Kɛ sɔɔŋ yɔŋnuŋ lende le. Le yɛɛnɛ? Ŋ cho chɔɔlu pɛɛku a hei okɔɔ o buŋgɛi cho lachi ve niŋ.