Yau Dialii Kuumbaŋ Choo Ve Poonyiaa Wo

O wanaa kaala Chɛhowa Mɛlɛka a Diom ndɔɔ wa lo:

Mi Chiisu dimi aa: “La cho tonya cho a Mɛlɛka okɔɔ wo sina, nduyɛ, mi tonya koŋ o baŋa nya.” (Chɔŋ 8:​32) Teleŋ tase ŋ kandu tonya cho o Baabuiyo niŋndo pɛɛkoo wo, yiyaŋndɔ mɛɛ kɔllo wa num yɛ! I wa bɔɔ suɛi kɔl kɛndɛ le sinaa maa ŋ nɔla miŋ pɛɛku tonyaa o chieeŋ lachoowaa hoo niŋ.—Timoti Diiŋ Ndɔɔ 3:​1.

Chɛhowa Mɛlɛka yeema naa miŋ sina tonyaa. Nduyɛ le mɛɛ naŋ kaala waŋnda yɛ, ŋ yeema miŋ dimul nda a ndu okɔɔ. Kɛ ŋ nɔ miŋ tosa tau le Mɛlɛka piɛiyo. Ŋ nɔ miŋ kindiŋ miŋ wa maa ŋKilisiɔŋ kanifuule ŋ nɔ bɔɔ bɛɛleŋ le sawala mandaala Baabuiyo. Mi Chiisu tɛɛsiaa nɛi sɔvɛ bɛndu naŋ chɔm Mɛlɛka maa ŋ kaala ndu wo. Mbo dimi aa: “Te la chua sawala nilaŋ pɛ, mɛɛ la cho hiouwɔɔ lachi a waa o kaala nuu bɛŋgu. Mɛɛ ya I chua sawala Finya nuu, mi I wa hiouwɔɔ lachi a waa o kaala ndɔɔ bɛŋgu yɛ.”—Chɔŋ 15:​10.

Chiisu kaala bɔɔ Finya ndɔ. Nduyɛ, mbo tosa nyɛ o nyɛ Finya ndɔ dimul ndu. Te ŋ tol pɛ taamasi Chiisu wo kɔɔli o yoomu naa niŋ, Chɛhowa cho naa kaala nduyɛ ŋ cho wa a kɔl kɛndɛ kpeekpeiyo. Mi Chiisu dimi aa: “Mɛɛ nya sina niŋ sɔɔŋ muŋ nuaa yɛ, te o wa pɛ mi la tosa muŋ, mɛɛ la pɛl tɔnɔɔ.”—Chɔŋ 13:​17.

Ŋ nɔ tiindaŋndo maa yauwo hoo cho num mala ma dɔu tonya ŋ cho pɛɛkoo o Baabuiyo niŋndo o wali niŋ, nduyɛ ma simnuŋ chaaŋ o Mɛlɛka. Ŋ cho piɛileŋ le ma hiou lachi a Mɛlɛka kaalaa nduyɛ ma lo “o kaala Mɛlɛkaa bɛŋgu” okoŋ ma “chum le yoomu kpeekpei nɔ lamɛɛlu le wo.”—Chudi 21.