SUƐI LEBOLII 20
Vɛɛnɛ Kundaa Cho yɛ o Kɔɔnaa?
Chɛhowa Mɛlɛka tosa sɔɔŋ laasi laasi le. (1 Kɔliŋtiaŋ 14:33) Le hei, wanaa cho ndu piɛiyo wa nɔ ma wa a kɔɔnaa. Vɛɛnɛ kunda leKilisiɔŋndo cho yɛ o kɔɔnaa? Yɛɛ naŋ nɔ yɛ miŋ tosa le mi sɔɔŋ kuɛ leniŋ nyɛkɛndɛi?
1. Nɛɛnɛ cho yɛ kundaa bolleŋ?
“Kiliti cho kundaa bolleŋ ni.” (Ɛfisiaŋnda 5:23) Mi che bɛɛ o cho choo choo, kɛ ndu cho walta wanaa Chɛhowaa cho tosaa chieeŋndo balɔɔ silɔ laŋ lachi ni. Mi Chiisu yulu “buɛi cho sakpo nduyɛ mbo wa buɛi taasi wo” isu le mbo tosa wallo ndu o ba bɛŋgu. Bɛnduaa kundaa buɛiyo hoo bɛɛ cho ni. Nduyɛ, nda naŋ veelu vɛlɛ ni aa Dialii Kuumbaŋ Choo Ve. (Nuawɔ Maatiu 24:45-47.) Dialii Kuumbaŋ Choo Ve cho ko maa kiilaa Chiisuaa a bɛnduaa kundaa wa Chulusalɛm o wɔsiŋ kɛmɛ tasoŋ niŋnda. Ndi yɔŋgu hau nɛi chɔmaa le kundalaŋ chieeŋndo balɔɔ silɔ ni. (Walta Kiilaa 15:2) Kɛ o cho waŋnda haa le cho simlachiaa le kɔɔna naa le. Nda bɛɛ Chɛhowa nda tiindaŋ ni a Diom ndɔɔ le nda nɛi chɔmaa kioo. Nduyɛ a cho a bɛɛndiaŋ le nyɛ Chiisu dimi wo tosaa.
2. Wali yɛɛ bɛnduaa kundaa nɔ yɛ le tosaa?
Waŋ piaanduaa kendu o Mɛlɛka piɛiyo niŋnda nda cho ni. Nda pɛɛku wanaa Chɛhowaa Baabuiyo ni, ma manda nda, nduyɛ ma ke nda kɔl dɛɛniaa. A paawa nda le wallo hoo le. Kɛ ma tosa ndu “a kɔllo kpou mɛɛ Mɛlɛka hɛnaŋ yɛ.” Nduyɛ, a kindiŋ le ma ‘sɔla waŋnda nyɛ o ba o kafalaŋ choo le.’ (1 Pitɛ 5:1, 2) Buɛiyaa malalaŋnda mala bɛnduaa ni. Te a tosa hiouwɔɔ lachioo pɛ, ma yulu nda isu le ma simnuŋ bɛnduaa kundaa.
Mi Dialii Kuumbaŋ Choo Ve yulu bɛnduaa apum isu le ma simnuŋ buɛiyaa ibuŋgaa. Mi buɛiyaa ibuŋgaa kuɛ kundala yɛ yɛ laŋ yilɔɔ le ma ke wanaa Mɛlɛkaa silaa a kɔl dɛɛniaa. Nda yulu puaapiliaa isu ni le ma simnuŋ bɛnduaa kundaa ɔɔ buɛiyaa malalaŋnda. Kɛ mɛɛ ma bii fɛŋ yoomu ndaa mɛɛ Baabuiyo dimi yɛ, malaŋ nda yulu nda isu.—1 Timoti 3:1-10, 12; Taitɔɔ 1:5-9.
3. Wali yɛɛ Sei Chɛhowa kɛ kɛ nɔ yɛ le tosaa?
Mi wana o wana o kundaa niŋ “saŋgala Chɛhowa.” Ŋ tosa hei te ŋ yɔŋgu pɛ mulilaŋ o bɔŋaŋndaŋ, nduyɛ miŋ dimul waŋnda yooŋgu kɛndɔɔ a mɛɛ naŋ tiuba yɛ.—Nuawɔ Sam 148:12, 13.
CHƆƆLU YAASIAA
Pɛɛku ma sina simlachinɔ suu Chiisu cho wo a mɛɛ bɛnduaa cho kindiŋndo le tamasi ndɔɔ tolɔɔ kɔɔli yɛ. Okoŋ, ma che mɛɛ naŋ tosa wallo diompilɛ a Chiisu vɛlɛ a bɛnduaa yɛ.
4. Simlachinɔ chaa waŋnda biyɔɔ wo Chiisu cho ni
Chiisu veelu naa maa naŋ huŋ o ndu lo miŋ sɔla pɛŋgioo. Nuawɔ Maatiu 11:28-30, okoŋ mi la suukaŋ o nyunaa hoo choo:
Simlachinɔ suu kuɛɛ Chiisu cho yɛ, nduyɛ yɛɛ o yeema yɛ naa miŋ sɔla?
Vɛɛ bɛnduaa kundaa tuallɛ tamasi Chiisu wo kɔɔli? Handu VIDUEIYO.
Baabuiyo chɔm naa kpendekele mɛɛ bɛnduaa nɔ ma tosa wali ndaa yɛ.
Nuawɔ Aisaya 32:2 a 1 Pitɛ 5:1-3, okoŋ mi la suukaŋ o nyunalaŋ ndaŋ choo:
Vɛɛ kɔllo cho yɛ num le sinaa maa mi bɛnduaa kindiŋ le naa kɔl dɛɛniaa kioo maa Chiisu?
O nɛila cheleŋ kuɛɛ choo bɛnduaa cho yɛ tamasi Chiisu wo tolɔɔ kɔɔli?
5. Mi tamasi bɛnduaa pɛɛku naa
Vɛɛ Chiisu yeema yɛ mi bɛnduaa che wali ndaa? Handu VIDUEIYO.
Mi Chiisu chɔm mɛɛ bɛnduaa nɔ ma chua chilaŋ o kundaa niŋ yɛ. Nuawɔ Maatiu 23:8-12, okoŋ mi la suukaŋ o nyunalaŋ ndaŋ choo:
Te a tuu pɛ sila Baabuiyo ke hoo bɛnduaa wo, a nyɛ ŋ cha simlachiaa lepiɛiya tosaa wo, ma che pa teŋgeŋndo? Yɛɛ hɛnaŋ yɛ num a teŋgeŋ ŋ cha hoo wo?
Mi bɛnduaa kundaa pɛɛku ndapila vɛlɛ a yuŋgula ndalaŋ le ma kendu o Mɛlɛka piɛiyo niŋ
Bɛnduaa kundaa buulaŋ le wana o wana o kundaa niŋ
Mi bɛnduaa dimi yooŋgu kɛndɔɔ lɔɔlɔɔ
Mi bɛnduaa pɛɛku waŋnda nduyɛ ma yɔŋguŋ le dindioo vɛlɛ a walta cheleŋ tosaa
6. Ŋ nɔ miŋ tuei bɛnduaa kundaa diom
Baabuiyo chɔm naa sabu kpeekpei naŋ nɔ miŋ tuei bɛnduaa kundaa diom ndo. Nuawɔ Hibuluiya 13:17, okoŋ mi la suukaŋ o nyunalaŋ ndaŋ choo:
Baa o bɛnda pa miŋ diikuŋ wanaa cho chilaŋ chuaa wa a mɛɛ Baabuiyo dimi yɛ? Le yɛɛ?
Nuawɔ Luku 16:10, okoŋ mi la suukaŋ o nyunaa hoo choo:
Le yɛɛ o bɛnda yɛ miŋ diikuŋ bɛnduaa o yɔŋ bɛɛ aa o sɔɔŋ pɔmbɔŋ choo?
TE WAŊNDO DIMI PƐ AA: “Mi wana nɔ bɛɛ kaaŋnde kpeekpei le ŋ kua le, o cho isɔɔ le.”
Tɔnɔla kuɛɛ ŋ yiyaŋ yɛ maa a sɔla te a wa pɛ Mɛlɛka piɛiyo a kundaa latulu?
SƆƆŊ KULLOŊ
Chiisu cho kunda leKilisiɔŋndo bolleŋ ni. Miŋ diikuŋ bɛnduaa kundaa cho wallo ndu o ba bɛŋgu wa a kɔl naa kpou. Kanifuule, ma dɛɛniaa naa kɔltaŋ nduyɛ mi tamasi ndaa pɛɛku naa.
Nyunala miiŋgaa choolaŋ
Nɛɛnɛ cho yɛ kunda leKilisiɔŋndo bolleŋ?
Vɛɛ bɛnduaa mala yɛ kundaa?
Wali yɛɛ buɛiyaa Chɛhowaa o kɛ kɛ nɔ yɛ le tosaa?
CHƆƆLU SƆƆŊ PUM TOFA
Tofawɔ tamaseliiyo ma che mɛɛ Dialii Kuumbaŋ Choo Ve a bɛnduaa kundaa buulaŋ le chaaŋaa ndaa laalaŋnda yɛ.
Pɛɛku ma sina wali buɛiyaa ibuŋgaa tosa wo.
Veelu wɔ diomndaŋ ma che wali sɔvɛ waŋ laanduaa nɔ o kundaa niŋndo.
“Baa Seiyaa Chɛhowaa Nɔ Pa Waŋ Laanduaa Pɛɛku Waŋnda Wa?” (Bandu Mɛŋgɛlaa, Tapioo 1, 2012)
Tofawɔ mɛɛ bɛnduaa kundaa tosa wallo kalaŋ le chaaŋaa ndaa laalaŋnda kɔllo dɛɛniaa yɛ.
“Bɛnduaa Kundaa Cho Wallo a Naa Latulu le Miŋ Wa a Nyaale” (Bandu Mɛŋgɛlaa, Tɛɛkpaa 15, 2013)