Bɛnduaa Kundaa, La Hiou Lachi a Tamasi Kiilanɔɔ Pɔɔl Wo Tolɔɔ Kɔɔli

1-2. Vɛɛ tamasi kiilanɔɔ Pɔɔl wo mala yɛ bɛnduaa kundaa hau?

KIILANƆƆ Pɔɔl ndoo kaala puaapiliaa nduaa tau. Le hei, mi ndoo tosa wallo kalaŋ le nda. (Walta. 20:​31) Mi hei tosa mi chaaŋaa nduaa laalaŋnda bɛɛ kaala ndu tau. A teleŋ pilɛ, mi bɛnduaa kundaa kpou o Ɛfisɔɔ niŋ, “piɔl a chaŋndo” mɛɛ nda sina maa a ve lɛ Pɔɔl chɔ le. (Walta. 20:​37) Bɛnduaa kundaa naa bɛɛ kaala naa tau. Nduyɛ ma tosa wallo kalaŋ le naa malaa. (Filipi. 2:​16, 17) Kɛ lepum, mi simulta bɔɔbɔɔ la komal nda. Yɛɛ mala yɛ nda le simultaŋ ndaŋ chɔulabaa?

² Bɛnduaa kundaa naa tiuba ma tol tamasi Pɔɔl wo kɔɔli. (1 Kɔliŋ. 11:​1) Wana hakioo Pɔɔl wa ni maa naa. Nduyɛ teleŋnda bɔɔbɔɔ, mi ndoo chɔulaba kalaŋ le nyɛ bɛnda wo tosaa. (Luomaŋ. 7:​18-20) Mi bahawɛilaŋ laa komal ndu tau. Kɛ o vi ŋdial ɔɔ mbo kɛɛ wa a kɔl kɛndɛ o wali o wa tosaa wo niŋ te. Te bɛnduaa kundaa tol pɛ tamasi Pɔɔl wo kɔɔli, keŋ mala nda ma tiu simulta komal nda laŋ ba, nduyɛ ma hiou lachi a waa a kɔl kɛndɛ o Chɛhowa piɛiyo niŋ. Ŋ cho hunɔɔ yaasiaa a mɛɛ nda tosa hei yɛ okɔɔ.

3. Yɛɛ naŋ cho yɛ yaasiaa o buŋgɛi hei niŋ, nduyɛ yɛɛ naŋ cho yɛ pɛɛku?

³ O buŋgɛi hei niŋ, ŋ cho yaasiaa simultaŋ la hiɔɔlu la komal bɛnduaa kundaa laŋ. (1) Waa kpeŋkpeŋ o wali dimiaa yooŋgu kɛndɔɔ niŋ, a o kalaŋnda cheleŋnda nda nɔ laŋ niŋ, (2) teleŋndo chuaa le puaapiliaa a ndepiliaa kɔl dɛɛniaa kioo, (3) dialuŋ ndaŋ vilɛiyoŋ chɔulabaa, nduyɛ (4) biuwɔŋndo siɔwuŋ chaaŋaa ndaa laalaŋnda. Ŋ cho pɛɛku nyɛ mala Pɔɔl le simultaŋ ndaŋ chɔulabaa wo, a mɛɛ bɛnduaa kundaa tual tamasi ndɔɔ kɔɔli yɛ.

WAA KPEŊKPEŊ O WALI DIMIAA YOOŊGU KƐNDƆƆ NIŊ, A O KALAŊNDA CHELEŊ NIŊ

4. Le yɛɛ i wa yɛ simullo bɛnduaa kundaa o ba le chilaŋ chuaa o yooŋgu kɛndɔɔ dimioo niŋ?

⁴ Le yɛɛ hei wa yɛ simullo? Mi che bɛɛ bɛnduaa kundaa nɔ ma chua chilaŋ o yooŋgu kɛndɔɔ dimioo niŋ, kɛ a nɔ vɛlɛ kalaŋnda cheleŋ tau. Le tamaseliiyo, ma chua chilaŋ o bɔŋaŋ naŋ bii o lɔɔ tɛɛŋndo, a le pɛɛku Baabui kundaa tosaa. Ma tosa vɛlɛ wallo kalaŋ le sɔɔŋ yɔŋgoo. Ma yɔŋguŋ le buɛiyaa malalaŋnda pɛɛkoo, nduyɛ ma dɛɛniaa vɛlɛ puaapiliaa a ndepiliaa kɔltaŋ. (1 Pitɛ 5:​2) Mi bɛnduaa kundaa apum tosa wallo le Toŋgola leMasalaŋ, a fondaŋnda naala lepiɛila cheleŋ taŋgullo, vɛlɛ a laŋ bɛɛndiaa. Mi che bɛɛ wana o wana nɔ mbo dimi yooŋgu kɛndɔɔ, kɛ nda chua chilaŋ ni le ndu dimioo.—Maa. 28:​19, 20.

5. Tamasi kuɛɛ Pɔɔl kɛsi yɛ a yooŋgu kɛndɔɔ dimioo okɔɔ?

⁵ Nyɛ bɛnduaa kundaa pɛɛku o tamasi Pɔɔl wo niŋndo. Nyɛ mala Pɔɔl le batiuwaa sɔlaa wo cho o Filipiaŋnda 1:​10 niŋ. Mbo dimul naa loŋ aa: “La handu kɔltaŋ o sɔɔŋ hiou wa ŋ sɔvɛ woŋ choo.” Mi Pɔɔl duau sila o yɔŋgu hoo wo o wali niŋ. Mɛɛ o simnuŋ Kilisiɔŋnɔɔ, mi Mɛlɛka ke ndu wali dimiaa yooŋgu kɛndɔɔ le tosaa. Nduyɛ le wɔsiŋ bɔɔbɔɔ, wallo hoo tosaa wa nyɛ sɔviɔɔ o yoomu ndɔɔ niŋ ni. Baabuiyo dimi maa, mi ndoo ‘dimi yooŋgu kɛndɔɔ chiɛiyo a chiɛiyo a o luŋ kpendekele.’ (Walta. 20:​20) Pɔɔl ndoo kɛsi lepaa o lɔɔ tɛɛŋ le yooŋgu kɛndɔɔ dimioo le. Mi ndoo dimi ndu lepaa o lepaa, teleŋ kɛ kɛ, nduyɛ a ba o ba ndoo saaluŋ pɛ waŋnda. Le tamaseliiyo, mɛɛ o wa chaaŋaa nduaa chumndo Atɛŋ, mbo dimul wanaa yɛ yiaa o chiee koŋ niŋ yooŋgu kɛndɔɔ, nduyɛ mbo sɔla fulamakɔɔlila kɛndɛlaŋ. (Walta. 17:​16, 17, 34) A teleŋ o wa o “biyɔɔ niŋ” ndo bɛɛ, mi ndoo dimul waŋnda yooŋgu kɛndɔɔ.—Filipi. 1:​13, 14; Walta. 28:​16-24.

6. Yɛɛ Pɔɔl ndoo pɛɛku yɛ Chɔŋ Maki nda Timoti le tosaa?

⁶ Mi Pɔɔl ndoo soliŋ teleŋ ndɔɔ kpeku nyɛkɛndɛi. Teleŋnda bɔɔbɔɔ, mi ndoo dimul acheleŋnda le ma kɔ dimi yooŋgu kɛndɔɔ a ndu latulu. Le tamaseliiyo, o balɔɔ ndɔ tase lemisiɔnalueiyo niŋ, mbo dimul Chɔŋ Maki le mbo kuɛ a ndu latulu. O balɔɔ ndɔ diiŋ ndɔɔ niŋ, mbo dimul Timoti le mbo kuɛ a ndu latulu. (Walta. 12:​25; 16:​1-4) Mi Pɔɔl tosa tau le puaa haa pɛɛkoo mɛɛ wana kɔɔna kundaa yɛ, mɛɛ wana tosa yilɔɔ kɔl dɛɛniaa yɛ, nduyɛ a mɛɛ nda simnuŋ wanaa chaa waŋnda pɛɛkoo wa yɛ.—1 Kɔliŋ. 4:​17.

7. Vɛɛ bɛnduaa kundaa duau yɛ nyɛ Pɔɔl dimi o Ɛfisiaŋnda 6:​14, 15 niŋndo o wali niŋ?

⁷ Nyɛ naŋ pɛɛku wo. Bɛnduaa kundaa tual tamasi Pɔɔl wo kɔɔli le yooŋgu kɛndɔɔ dimioo chiɛiyo a chiɛiyo. O fulawɔ okoŋ kɔɔli, a nɔ ma wa a bɛɛndiaŋ le ndu dimioo teleŋ o teleŋ, vɛlɛ a fondaŋ o fondaŋ nda saaluŋ pɛ waŋnda. (Nuawɔ Ɛfisiaŋnda 6:​14, 15.) Le tamaseliiyo, a tiuba ma dimi yooŋgu kɛndɔɔ te a kuɛ pɛ o lɔɔ niŋ, ɔɔ te a kuɛ pɛ o fondaŋ nda tosa wallo wo. Ɔɔ te o yɔŋ pɛ ma wa Toŋgo leMasaa taŋgullo, a tiuba ma dimul wanaa balu nda wa, a wanaa nda piandu nyɔɔŋ o ba wa yooŋgu kɛndɔɔ. Maa Pɔɔl, bɛnduaa kundaa soliŋ teleŋ nda wa yooŋgu kɛndɔɔ dimioo wo kpeku le acheleŋnda pɛɛkoo, mɛɛ buɛiyaa malalaŋnda cho nuaa yɛ.

8. Lepum, yɛɛ bɛndu kundaa nɔ yɛ mbo tosa?

⁸ Bɛnduaa kundaa nɔ ma wa a tuandaŋ o walta cheleŋ tosaa niŋ le kundaa, ɔɔ le buŋgɛi, okoŋ ma faŋa kɔllo le wali dimiaa yooŋgu kɛndɔɔ tosaa le. Le ma hiou lachi a waa kpeŋkpeŋ, lepum a nɔ ma kɛɛ dilakeŋnaŋndaŋ lapum. Te a piɛi pɛ nduyɛ ma yiyaŋ a ndi okɔɔ, a cho sina maa te ndaa chɛl pɛ dikeŋnaŋ koŋ, a ve nɔ teleŋ le sɔɔŋ hiou wa ŋ sɔvɛ woŋ tosaa le. Sɔɔŋ muŋ ŋtiŋ cho ni, pɛɛku leyuŋgoo tosaa lɔɔ o lɔɔ, yooŋgu kɛndɔɔ dimioo, a chuauwaa ndaa pɛɛkoo le yooŋgu kɛndɔɔ dimioo nyɛkɛndɛi. Mi bɛnduaa kundaa apum che ndi ikala le dilakeŋnaŋndaŋ lapum kiɔɔ. Kɛ te a tosa lende pɛ, Chɛhowa cho nda biyɔɔ bila kanifuule, a yeema ma wa kpeŋkpeŋ o sɔɔŋ tosaa niŋ.

TELEŊNDO CHUAA LE PUAAPILIAA A NDEPILIAA KƆL DƐƐNIAA KIOO

9. Simulta kuɛɛ komallɛ bɛnduaa kundaa?

⁹ Le yɛɛ hei wa yɛ simullo? Mi wanaa Chɛhowaa sɔla simulta bɔɔbɔɔ. O palɛi mɛɛlɛi hei niŋ, naa kpou yeema kɔl dɛɛniaa a malaa. Nduyɛ lepum, mi waŋndo yeema vɛlɛ malaa le sɔɔŋ wɔɔŋndoŋ fafaŋndo. (1 Tɛsa. 5:​14) O kpeekpei niŋ, bɛnduaa kundaa tiuba ma faŋa simulta komal wanaa Chɛhowaa laŋ te. A koŋ kpou, Chɛhowa yeema nda ma dɛɛniaa saa nduaa, nduyɛ ma manda nda. Vɛɛ bɛnduaa kundaa nuuviaa yɛ teleŋndo le hei tosaa?

10. A mɛɛ 1 Tɛsaloniaŋ 2:​7 dimi yɛ, vɛɛ Pɔɔl ndoo bii yɛ wanaa Chɛhowaa?

¹⁰ Vɛɛ bɛnduaa kundaa tuallɛ tamasi Pɔɔl wo kɔɔli? Mi Pɔɔl ndoo nuuviaa nɛilaŋ le puaapiliaa a ndepiliaa nduaa chandɔɔ, vɛlɛ a le nda kɔltaŋ dɛɛniaa. Bɛnduaa kundaa nɔ ma kindiŋ le tamasi ndɔɔ tolɔɔ kɔɔli, le halikpeŋ ma bii wanaa Chɛhowaa o nɛi kaalaa niŋ. (Nuawɔ 1 Tɛsaloniaŋ 2:​7.) Mi Pɔɔl ndoo dimul chaaŋaa nduaa laalaŋnda maa o kaala nda, nduyɛ maa Chɛhowa bɛɛ kaala nda. (2 Kɔliŋ. 2:​4; Ɛfi. 2:​4, 5) Mi ndoo bii wanaa wa o kundaa niŋnda ichaŋya. Nduyɛ pɛŋ, mi ndoo chua teleŋndo a nda latulu. Mi ndoo dimul nda a siɔwuŋ ndɔŋ, vɛlɛ a dialuŋ ndɔŋ vilɛiyoŋ okɔɔ. Hei chɔm ni kɛsɛ maa ndoo nɔ tiindaŋndo o nda niŋ. (2 Kɔliŋ. 7:​5; 1 Timo. 1:​15) Pɔɔl ndoo kɛsi kɔllo o bahawɛila ndɔlaŋ choo le. Kɛ ndoo nɔ yeemɛi tau le puaapiliaa nduaa malaa.

11. Le yɛɛ Pɔɔl ndoo sila yɛ puaapiliaa a ndepiliaa nduaa?

¹¹ Lepum, Pɔɔl ndoo nɔ mbo ke puaapiliaa a ndepiliaa nduaa silaa. Kɛ ndoo tosa hei a tumbe le. Mi ndoo ke nda silaa kanifuule, ndoo buulaŋ a nda. Nduyɛ ndoo yeema nda malaa ma fafaŋ luɛiyɔɔ o kpundɔɔ niŋ. Mi ndoo tosa sila ndɔɔ tɛtɛlɛ le halikpeŋ ma bii ndu bila, nduyɛ ma chɛl sila koŋ. Le tamaseliiyo, o yau o poonyial Kɔliŋtiaŋnda wo niŋ, mbo ke nda sila kala kalaa. Mɛɛ o chii yau koŋ poonyiaa, mbo ke Taitɔɔ le mbo you nda. Pɔɔl ndoo nɔ yeemɛi kpeekpei le sinaa nyɛ Kilisiɔŋaa kaŋ wa tosa wo, te ndaa veelu pɛ diomndaŋ o yau koŋ niŋ. Mbo naŋ kɔl tau mɛɛ o tuei maa mi Kilisiɔŋaa kaŋ chɛl sila koŋ, nduyɛ ma duau ndu o wali niŋ!—2 Kɔliŋ. 7:​6, 7.

12. Vɛɛ bɛnduaa kundaa kindi yɛ chaaŋaa ndaa laalaŋnda?

¹² Nyɛ naŋ pɛɛku wo. Bɛnduaa kundaa tual vɛlɛ tamasi Pɔɔl wo kɔɔli, te a chua pɛ teleŋndo a chaaŋaa ndaa laalaŋnda latulu. Nɛiyo opilɛ o nda tosa heiyo cho keleŋaa kɔlaŋ o bɔŋaŋndaŋ le halikpeŋ ma dɔu balta kɔl dɛɛniaalaŋ a nda ni. Teleŋnda bɔɔbɔɔ, chemchemndaŋ nyɛɛmbɔ koni naŋ soliŋ kpeku ni le puaapiliaa a ndepiliaa kɔl dɛɛniaa nda yeema wo kioo. (Luomaŋ. 1:​12; Ɛfi. 5:​16) Mi bɛndu kunda cho tamasi Pɔɔl wo tolɔɔ kɔɔli wo soliŋ Diom Mɛlɛkaa kpeku le chaaŋaa nduaa laalaŋnda taŋgullo. O fulawɔ okoŋ kɔɔli, mbo ke nda vɛlɛ tiindaŋndo maa Mɛlɛka kaala nda. O nɔ vɛlɛ mbo tosa ma sinaŋ maa o kaala nda. Te bɛndu kundaa wa pɛ silaa yɔŋgoo, o nɔ mbo tosa a sabu mi sila koŋ tɔlnuŋ o Diom Mɛlɛkaa choo. Mbo chɔm nyɛ kpeekpei puaapilɛnɔɔ ɔɔ ndepilɛnɔɔ nɔ mbo tosa wallo choo wo kanifuule, o yeema ndu mbo dɔu sila koŋ o wali niŋ.—Kalee. 6:​1.

DIALUŊ VILƐIYOŊ CHƆULABAA

13. Vɛɛ dialuŋ vilɛi bɛndu kundaa nɔ woŋ tosa yɛ mbo sinaŋ?

¹³ Le yɛɛ hei wa yɛ simullo? Wanaa lahakiaa bɛnduaa kundaa cho ni. Le hei, nda bɛɛ ma tosa biondɔŋndaŋ. (Luomaŋ. 3:​23) Lepum, mi nda bɛɛ kindiŋ kpoke le dialuŋ ndaŋ vilɛiyoŋ chɔulabaa. Mi apum buulaŋ tau a biondɔŋnda nda tosalaŋ okɔɔ, nduyɛ mi keŋ tosa ma tambu kɔl. Apum yɛ, haupa ma yɔŋgu kafɛilaŋ le biondɔŋnda ndalaŋ. Mi hei tosa a chi lɛ naa nda nɔ ma tosa hiouwɔɔ lachioo wa le.

14. A mɛɛ Filipiaŋnda 4:​13 dimi yɛ, vɛɛ kaa tusiaŋndo mala yɛ Pɔɔl le dialuŋ ndɔŋ vilɛiyoŋ chɔulabaa?

¹⁴ Vɛɛ bɛnduaa kundaa tuallɛ tamasi Pɔɔl wo kɔɔli? Wana tusiaŋndo Pɔɔl wa ni. Le hei, ndoo sina maa o tiuba mbo chɔulaba dialuŋ ndɔŋ vilɛiyoŋ a ba ndɔ le. Yoomuma Mɛlɛka ndoo luei ndu waŋ ndoo tiindaŋ ni. O kandɔŋndo, wana ndoo tusi Kilisiɔŋnda nyɛpalaa choo wo Pɔɔl wa ni. Kɛ mbo siŋgaŋ. Nduyɛ mbo sina maa suɛi wɔɔŋnde o wa keŋ tosaa ni. Le hei, mbo chɛl a kɔllo kpou le siŋgaŋndaŋ tosaa o yoomu ndɔɔ niŋ. (1 Timo. 1:​12-16) A mala Chɛhowaa, mi Pɔɔl simnuŋ bɛndu kunda nɔ kaalaa, nyiɛɛye, a kaa tusiaŋndo wo. Ndoo sina maa mbo tosa biondɔŋndaŋ tau, kɛ o hendu kɔllo o biondɔŋnda laŋ choo le. Ndoo nɔ laalaŋndo maa Chɛhowa cho ndu malɔɔ haki. (Luomaŋ. 7:​21-25) O ve ndupila kɔl le mbo wa sɔɔŋ tosaa o nɛi walaŋndo choo le. Kɛ mbo tosa wallo kalaŋ, le yooŋgu kɛndɔɔ dimioo. Nduyɛ mbo tiindaŋ mala Chɛhowaa le halikpeŋ mbo sɔla batiuwaa o wallo hoo niŋ.—1 Kɔliŋ. 9:​27; nuawɔ Filipiaŋnda 4:​13.

15. Yɛɛ bɛnduaa kundaa nɔ yɛ ma wa tosaa?

¹⁵ Nyɛ naŋ pɛɛku wo. A yulu bɛnduaa kundaa isu, le ma tosa sɔɔŋ o nɛi walaŋndo choo le. A koŋ kpou, Chɛhowa yeema nda ma sina maa nda bɛɛ ma tosa biondɔŋndaŋ, nduyɛ ma nɔ kaala leKilisiɔŋndaŋ. (Ɛfi. 4:​23, 24) Bɛnduaa kundaa nɔ ma wa Diom Mɛlɛkaa pɛɛkoo teleŋ o teleŋ, le ma sina naa nda nɔ ma tosa hiouwɔɔ lachioo wa, okoŋ ma tosa siŋgaŋnda yeemaŋ ndaŋ. Te a tosa hei pɛ, Chɛhowa cho nda mala ma wa a kɔl kɛndɛ, nduyɛ ma sɔla batiuwaa.—Chemi. 1:​25.

BIUNUŊ SIƆWUŊ CHAAŊAA NUMAA LAALAŊNDA

16. Yɛɛ yɔŋnuŋ yɛ te bɛndu kundaa handu pɛ kɔllo o siɔwuŋ acheleŋnda choo?

¹⁶ Le yɛɛ hei wa yɛ simullo? Te bɛnduaa kundaa chua pɛ teleŋndo tau a puaapiliaa a ndepiliaa ndaa o kundaa niŋ, i wa tɛtɛlɛ le ma sina siɔwuŋ ndaŋ. Nduyɛ te a handu pɛ kɔllo o keŋ choo, haupa ma tambu kɔl a nda, ma bii nda ŋuasu ŋuasu, ɔɔ ma kilul nda yamɛi. Mi Pɔɔl chɔm Kilisiɔŋnda kpendekele maa, keŋ Setana yeema nda ni ma tosa.—2 Kɔliŋ. 2:​10, 11.

17. Yiyaŋ kuɛɛ Pɔɔl ndoo nɔ yɛ a puaapiliaa a ndepiliaa nduaa okɔɔ?

¹⁷ Yɛɛ bɛnduaa kundaa pɛɛku yɛ o tamasi Pɔɔl wo niŋ? Pɔɔl ndoo nɔ yiyaŋ kɛndɔɔ a puaapiliaa a ndepiliaa nduaa okɔɔ. Ndoo sina biondɔŋnda ndalaŋ, nduyɛ mi sɔɔŋ ndaa tosa lepum ndoŋ muŋ tɛɛmbuu ndu kɔllo. Mbo sina vɛlɛ maa, biondɔŋ waŋndo tosa wo siiŋguu ndu wana wɔɔŋ te. Ndoo kaala puaapiliaa a ndepiliaa nduaa, nduyɛ mbo handu kɔllo o suliŋnda ndala kɛndɛlaŋ choo. Te chaaŋaa nduaa laalaŋnda ndaa wa pɛ kindiŋndo le nyɛ bɛnda wo tosaa, mi ndoo che maa a yiyaŋ kɛndɔɔ nda wa ndi tosaa ni, nduyɛ maa ndaa yeema malaa.

18. Yɛɛ ŋ pɛɛku yɛ a mɛɛ Pɔɔl bii Yuwodiaa nda Siŋtike yɛ? (Filipiaŋnda 4:​1-3)

¹⁸ Ŋ tofaŋndɔ tamaseliiyo, miŋ che mɛɛ Pɔɔl ndoo bii ndepiliaa a ŋiɔɔŋ o kundaa Filipai niŋ yɛ. (Nuawɔ Filipiaŋnda 4:​1-3.) Naapum mi kɛɛ sinapɛŋgoo luɛi Yuwodiaa nda Siŋtike tɛɛŋ. Nduyɛ mi keŋ tosa, a ve lɛ o diompilɛ niŋ te. Kɛ Pɔɔl bii nda ŋuasu ŋuasu ɔɔ mbo kilul nda iyama le. Mbo handu kɔllo o suliŋnda ndala kɛndɛlaŋ choo. Ndepiliaa haa ndaa piɛi niŋ Chɛhowa o laalaŋndo choo le wɔsiŋ bɔɔbɔɔ. Pɔɔl ndoo sina maa Chɛhowa kaala nda. Nduyɛ le mɛɛ ndoo nɔ yiyaŋ kɛndɔɔ a ndepiliaa haa okɔɔ yɛ, mbo dɛɛniaa nda le ma miiŋgu o diompilɔɔ niŋ. Le mɛɛ Pɔɔl ndoo handu kɔllo o suliŋnda kɛndɛla acheleŋnda choo yɛ, mi keŋ tosa mbo hiau lachi a waa a kɔl kɛndɛ, nduyɛ mbo nɔ chaŋyɛi kɛndɛi a chaaŋaa nduaa laalaŋnda.

19. (a) Yɛɛ bɛnduaa kundaa nɔ yɛ ma tosa le ma nɔ yiyaŋ kɛndɔɔ a puaapiliaa a ndepiliaa ndaa okɔɔ? (b) O fotueiyo choo, bɛndu kundaa cho Toŋgo leMasaa dindioo. Yɛɛ keŋ pɛɛku yɛ num?

¹⁹ Nyɛ naŋ pɛɛku wo. Bɛnduaa kundaa, la handu kɔllo o suliŋnda kɛndɛla puaapiliaa a ndepiliaa nɔ laŋ choo. Mi che bɛɛ o kɛ kɛ cho walaŋ te, kɛ a nɔ suliŋnda kɛndɛla naŋ hɛnaŋ ndaŋ. (Filipi. 2:​3) I cho tonya maa, bɛnduaa kundaa nɔ ma wa yiyaŋnda puaapilɛnɔɔ ɔɔ ndepilɛnɔɔ siɛɛnduuwo teleŋ o teleŋ. Kɛ maa Pɔɔl, bɛnduaa nɔ ma handu kɔllo o diomnda wɔɔŋndaŋ, ɔɔ sɔɔŋ wɔɔŋ puaapilɛnɔ ndaa tosa woŋ choo le. A nɔ ma handu kɔllo o kaala nda nɔ le Chɛhowa wo choo, biuwɔŋ ndaa, a sɛmbɛ nda nɔ le o kɛndɔɔ tosaa wo. Mi bɛnduaa kundaa handu kɔllo o suliŋnda kɛndɛla acheleŋnda choo wa, mala puaapiliaa a ndepiliaa ndaa ma sinaŋ maa a kaala nda tau.

HIOU LACHI A TAMASI PƆƆL WO TOLƆƆ KƆƆLI

20. Yɛɛ bɛnduaa kundaa nɔ yɛ ma tosa le ma hiou lachi a tɔnɔɔ sɔlaa o tamasi Pɔɔl wo niŋ?

²⁰ Bɛnduaa kundaa cho tɔnɔɔ sɔla tau te a pɛɛku pɛ a Pɔɔl okɔɔ, nduyɛ ma tol tamasi ndɔɔ kɔɔli. Le tamaseliiyo, a tofa o yauwo hoo niŋ, Watch Tower Publications Index, o suɛi lebolle hei bɛŋgu, “Pɔɔl.” Nduyɛ ma tofa suɛi lebolii pɔmbuɛi hei “Tamaseliiyo le Bɛnduaa Kundaa.” Te bɛndu kundaa wa pɛ diomndaŋ veeloo o sɔɔŋ lebolluŋ cho loŋ ndoŋ ŋpum niŋ, o nɔ mbo nyunaŋ aa: ‘Vɛɛ tamasi Pɔɔl wo mala yɛ ya mi hiou lachi a waa a kɔl kɛndɛ, nduyɛ mi sɔla batiuwaa o wali nuu niŋ?’

21. Yɛɛ bɛnduaa kundaa nɔ yɛ ma loonuŋ?

²¹ Bɛnduaa kundaa, la loonuŋ maa, Chɛhowa cho nya kɔl le mi la wa walaŋ te. Kɛ nyɛ o yeema nya o ba wo cho lo lechoo wo ni. (1 Kɔliŋ. 4:​2) Mbo naŋ kɔl tau le wali kala kala Pɔɔl wa tosaa wo, a lo lechoo ndɔɔ. Nya bɛɛ la loonuŋ maa Chɛhowa che nyɛ nya cho tosaa o ndu piɛiyo niŋndo o sɔvɛ. Fɛɛŋ bɛɛ o “puɛɛnuŋ a wali nya cho tosaa wo le. Nduyɛ o puɛɛnuŋ a kaala nya chɔm le diola ndɔlaŋ ndo le. La cho wanaa laalaŋnda malaa, nduyɛ mi la wa hiouwɔɔ lachi a nda malaa.”—Hibu. 6:​10.