Tosa mi Kaala Ŋ Nɔ le Chɛhowa a le Acheleŋnda wo Hindu

1. Tonyala kuɛɛ ŋ pɛɛku yɛ mɛɛ ŋ kandu Baabuiyo pɛɛkoo?

BAA a loonuŋ pa teleŋ ŋ kandu Baabuiyo pɛɛkoo wo? Naapum mi kɔndɔfillo bii num, mɛɛ ŋ pɛɛku maa Mɛlɛka nɔ diolaŋ. Nduyɛ naapum ma naŋ kɔl tau mɛɛ ŋ pɛɛku maa Mɛlɛka dou wana o leyiŋ niŋ te. O faŋaŋ okoŋ kɔɔli, naapum ma naŋ vɛlɛ kɔl tau, mɛɛ ŋ pɛɛku maa a cho vɛlɛ wanaa num aa kaalaa vi wa chɔ, mi la wa diompilɛ o kpele hɛnɛkiɔɔ niŋ o chieeŋndo choo.

2. O faŋaŋ o tonyala ŋ pɛɛku o Baabuiyo niŋndaŋ kɔɔli, hiouwɔɔ lachi cheleŋ kuɛɛ ŋ tosa yɛ niŋ? (Ɛfisiaŋnda 5:​1, 2)

² Mɛɛ num oo pɛɛku Diom Mɛlɛkaa fau, lende koni kaala numndo le ndu ndoo hindu ni. Mi kaala koŋ nyindu num, ma duau nyɛ ŋ pɛɛku wo o wali niŋ. Nduyɛ ma tosa kɛɛsiaala tɔlnuŋ o sawala mandaala Baabuiyo choo wo. Ma tosa hiouwɔɔ lachioo o kaala numndaŋ niŋ kanifuule, num oo yeema ma nɛŋi Mɛlɛka kɔllo. Mɛɛ chuaambɔɔ tual nuaa tamasi wanaa velu ndu wa kɔɔli yɛ, lende num bɛɛ tol tamasi Finya num cho o choo choo niŋndo kɔɔli ni.​—Nuawɔ Ɛfisiaŋnda 5:​1, 2.

3. Nyunala kuɛɛ naŋ nɔ yɛ miŋ nyunaŋ?

³ Ŋ nɔ miŋ nyunaŋ aa: ‘Baa kaala ya nɔ le Chɛhowa suŋ suŋndo cho pa o kala poŋ, mbo hiau kaala yaa nɔ le ndu o tasela ndɔ teleŋ ya sɔla yiŋɔɔ wo? Chɔŋ a teleŋ ya sɔla yiŋɔɔ wo, baa mɛɛ ya yiyaŋ o sɔɔŋ choo yɛ vɛlɛ a sɔɔŋ ya tosa woŋ chɔm pa maa I cho tamasi Chɛhowaa tolɔɔ kɔɔli, taama taama te o hiŋ pɛ a mɛɛ ya chɔm puaapiliaa a ndepiliaa niaa kaalaa yɛ?’ Te a sina pɛ maa kaala num oo nɔ o tasela ndɔ wo tol toolo o nɛilaŋ lapum choo, mɛɛ tambu kɔl te. Mi nyɛ pilɛ waa nuaa yɔŋnuŋ Kilisiɔŋnda o wɔsiŋ kɛmɛ tasoŋ niŋ. Kɛ Chiisu vi ŋdial le nda malaa le. Nduyɛ num bɛɛ o cho wu ŋdial le num malaa le. (Sɔɔŋ. 2:​4, 7) O sina maa ŋ tiu vɛlɛ ba miŋ nɔ kaala tase naŋ nɔ wo teleŋ naŋ kandu Baabuiyo pɛɛkoo wo.

4. Yɛɛ naŋ cho yɛ pɛɛku o buŋgɛi hei niŋ?

⁴ O buŋgɛi hei niŋ, ŋ cho pɛɛku nyɛ naŋ nɔ miŋ tosa le mi kaala naŋ nɔ le Chɛhowa a le acheleŋnda wo hiou lachi a hindɔɔ wo. Okoŋ miŋ che tɔnɔlaŋ latiŋ la naa a acheleŋnda sɔla laŋ, te ŋ chɔm nda pɛ kaalaa.

TOSA MI KAALA Ŋ NƆ LE CHƐHOWA WO HINDU

5-6. Simulta kuɛɛ komallɛ kiilanɔɔ Pɔɔl teleŋ o wa wali pollo tosaa wo, nduyɛ yɛɛ mala yɛ ndu mbo hiau lachi a Chɛhowa piɛiyo?

⁵ Mi kiilanɔɔ Pɔɔl tuɛi yoomoo yeela o Chɛhowa piɛiyo niŋ. Kɛ mi simulta bɔɔbɔɔ komal ndu. Lepum, mi ndoo kuɛ o tiŋnda leviltaŋ niŋ. Nduyɛ a teleŋ koŋ, i ve bɛɛŋ bɛɛŋ le kelaa le. O kela ndɔɔ niŋ, lepum mi ndoo kuɛ le ‘lo o peelo,’ nduyɛ mi ndoo ‘kei viiya tɛɛŋ.’ O faŋaŋ okoŋ kɔɔli, teleŋnda bɔɔbɔɔ mi wanaa wa ndu simullo wa ndaa bii ndu biyɔɔ wɔɔŋndo. (2 Kɔliŋ. 11:​23-27) Nduyɛ o cho teleŋ o teleŋ te puaapiliaa ndaa chɔm balika melaa le sɛmbɛ o wa dɔwɔɔ le nda malaa wo le.—2 Kɔliŋ. 10:​10; Filipi. 4:​15.

⁶ Yɛɛ mala yɛ Pɔɔl mbo hiau lachi a Chɛhowa piɛiyo? Mbo pɛɛku tau a suliŋnda Chɛhowalaŋ okɔɔ o Baabuiyo niŋ, vɛlɛ a o sɔɔŋ ndɔŋ yɔŋnaŋndoŋ niŋ. Nduyɛ mi keŋ tosa mbo laalaŋ kɛsɛ maa, Chɛhowa Mɛlɛka kaala ndu. (Luomaŋ. 8:​38, 39; Ɛfi. 2:​4, 5) Mi keŋ tosa vɛlɛ, mbo kaala Chɛhowa tau. Mbo chɔm kaala ndɔɔ le Chɛhowa, mɛɛ o ‘mala wanaa laalaŋnda, nduyɛ mbo hiau lachi a nda malaa.’—Hibu. 6:​10.

7. Ɔɔ nɛiyo opilɛ o naŋ tosa le mi kaala naŋ nɔ le Chɛhowa wo hiou lachi a hindɔɔ wo?

⁷ Nɛiyo opilɛ o naŋ tosa mi kaala naŋ nɔ le Mɛlɛka wo hiou lachi a hindɔɔ wo, cho Diom ndɔɔ pɛɛkoo teleŋ o teleŋ ni. Te a wa pɛ diomndaŋ veeloo o Baabuiyo niŋ, kindiŋ ma che nyɛ buŋgɛi keŋ pɛɛku num a Chɛhowa okɔɔ wo. Nyunaŋndɔ aa: ‘Vɛɛ buŋgɛi hei chɔm yɛ maa Chɛhowa kaala ya? Sabula kuɛɛ i ke yɛ ya le ndu kaalaa?’

8. Vɛɛ piɛileŋ le mala yɛ naa mi kaala naŋ nɔ le Mɛlɛka wo hindu?

⁸ Nɛi cheleŋ naŋ tosa le mi kaala naa le Chɛhowa hiou lachi a hindɔɔ wo, cho piɛileŋ teleŋ o teleŋ o ndulo ni vɛlɛ miŋ chɔm ndu nyɛ o nyɛ cho naa o kɔl. (Sam 25:​4, 5) Nduyɛ mi Chɛhowa muli piɛile naaleŋ. (1 Chɔŋ 3:​21, 22) Mi ndepilɛnɔ pilɛ o Eesiaa niŋ diolaŋ Kaŋ dimi aa: “O tasela ndɔ, kaala yaa nɔ le Chɛhowa wo ndoo tɔlnuŋ o kɔl kalu yaa nɔ a ndu okɔɔ wo choo. Kɛ mi chɔɔlu kaala yiŋgoloŋndo nɔ le ndu, mɛɛ ya che mɛɛ o muli piɛile nileŋ yɛ. Mi hei nyindu ya le sɔɔŋ nɛŋi ndu kɔllo woŋ tosaa.”b

TOSA MI KAALA Ŋ NƆ LE ACHELEŊNDA WO HINDU

9. Vɛɛ Timoti chɔm yɛ maa o wa hiouwɔɔ lachioo tosaa le kaalaa chɔmndo?

⁹ Mɛɛ Pɔɔl simnuŋ Kilisiɔŋnɔɔ, wɔsioŋ ŋtiŋ okoŋ kɔɔli, mbo chiikaŋ a po feleŋgɔnɔɔ diolaŋ Timoti. Timoti ndoo kaala Chɛhowa a waŋnda chieeya tau. Mi Pɔɔl dimul Filipiaŋnda a ndu okɔɔ aa: “I nɔ wana o wana cheleŋ nanuŋ, o landuŋ kɔl le bahawɛila nyalaŋ maa ndu le.” (Filipi. 2:​20) O bolle Baabuileŋ ndeŋ niŋ, Pɔɔl suu a mɛɛ Timoti ndoo chaa sɔɔŋ kɔɔnaa, ɔɔ a mɛɛ ndoo chaa sɔɔŋ yɔŋgoo yɛ okɔɔ le. Kɛ mbo suaa a mɛɛ Timoti ndoo kaala puaapiliaa a ndepiliaa nduaa yɛ okɔɔ. I cho kpendekele maa, mi kundala Timoti ndoo kua yilɔɔlaŋ laa wa lehɔl o nɛi le ndu vɛlɛ chɔɔ.—1 Kɔliŋ. 4:​17.

10. Vɛɛ Ana nda pɔnɔ ndɔ chɔm yɛ kaalaa le puaapiliaa a ndepiliaa ndaa?

¹⁰ Naa bɛɛ nɔ miŋ nuuviaa nɛilaŋ le puaapiliaa a ndepiliaa naa malaa. (Hibu. 13:​16) Ŋ tofaŋndɔ suɛi yɔŋnaŋii Ana naŋ soo a ndu okɔɔ o buŋgɛi naŋ hiou ve niŋndo. Mɛɛ hueiyii bɛnduei hɔŋ, mi ndu nda pɔnɔ ndɔ kua yuŋgu cho Chɛhowa piɛiyo wo yilɔɔ. Nduyɛ ma saaluŋ maa, mi hueiyii bɛnduii keŋ tɛɛmbuu chiɛi ndaa. Fulamakɔɔlioo wa ni, mi nyɛla ndala wounaŋ ndaŋ kpou nɔɔla. Mi Ana dimi aa: “Miŋ chua nyɛla ndalaŋ, miŋ kɔ tɔɔ laŋ, miŋ siɛɛnduu laŋ, vɛlɛ miŋ tui tui laŋ, okoŋ miŋ yoo nda. Nduyɛ miŋ yiyaŋ maa suɛi taaniŋnde naŋ tosa ni. Kɛ mi nyɛ naŋ tosa koŋ ndo luei naa o chaŋyɛi kpɛɛluŋnde niŋ a nda.” Kaala Ana nda pɔnɔ ndɔ nɔ le puaapiliaa a ndepiliaa wo nyindu nda ni, le nyɛ tosa le nda malaa.—1 Chɔŋ 3:​17, 18.

11. (a) Vɛɛ sɛmbɛ naŋ duau le acheleŋnda kaalaa chɔmndo wo piiliaŋ yɛ nda? (b) A mɛɛ Pulɔwaa 19:​17 dimi yɛ, yɛɛ Chɛhowa tosa yɛ te ŋ chɔm pɛ acheleŋnda kaalaa?

¹¹ Teleŋ o teleŋ naŋ tosal pɛ acheleŋnda kɛndɛi, vɛlɛ miŋ chɔm nda kaalaa, ma che maa ŋ cho kindiŋndo le tamasi Chɛhowaa tolɔɔ kɔɔli. Nduyɛ mi balika melaa nda chɔm naa wo hiou pɛŋ mɛɛ naŋ yiyaŋ yɛ. Mi Kaŋ naŋ laŋga soo a ndu okɔɔ wo loonuŋ a mɛɛ acheleŋnda mala ndu yɛ okɔɔ. Mbo dimi aa: “I nɔ bɔɔ balika melaa le ndepiliaa kuɛ a ya o wali pollo niŋ nda. Mi ndaa chua ya o nyɛm ndaŋ nyaanaŋndoŋ niŋ, ma kuɛ a ya inɛ le nyɛdiaa pɔmbɔ, nduyɛ ma tosa a sabu le mi fuuluu kɛndɛ o ya lo bɛɛ. Kɛ suŋ suŋ ya sina ni maa, wallo kalaŋ ndaa tosa ni le ya malaa. Nduyɛ le mɛɛ nda kaala ya yɛ, ndaa tosa ndi ni.” I cho tonya maa, o cho wana o wana le mel naa balikaa le nyɛ naŋ tosal nda wo le. Mi Kaŋ dimi a wanaa mala ndu wa okɔɔ aa: “I yeema bɔɔ mi miŋgul nda kɛndɛi nda tosalla ve. Kɛ I sina naa nda kpou cho wa le. A koŋ kpou, Chɛhowa sina naa nda cho wa. Nduyɛ I cho piɛileŋ le mbo miŋgul nda kɛndɛi keŋ.” Tonya Kaŋ dimi ni. Mi Chɛhowa che kɛndɛi naŋ tosal acheleŋnda ve, o yɔŋ bɛɛ a kɛndɛi taaniŋnde naŋ tosa ni. Mbo che ndi maa sala soliaŋndo i cho ni, vɛlɛ maa kuoo naŋ wuu ndu ni. Nduyɛ mbo miŋgi naa paawa.—Nuawɔ Pulɔwaa 19:​17.

12. Vɛɛ puaapiliaa chɔm yɛ puaapiliaa a ndepiliaa ndaa kaalaa o kundaa niŋ? (Tofa vɛlɛ fotueilaŋ.)

¹² Te o yɔŋ pɛ maa puaapilɛnɔɔ ŋ cho ni, vɛɛ ŋ chɔm yɛ acheleŋnda kaalaa, vɛlɛ ma tosa nyɛ le nda malaa? Mi puaapilɛnɔ feleŋgɔnɔ pilɛ diolaŋ Chɔɔndaŋ nyuna bɛndu kundaa le mbo chɔm ndu nyɛ o nɔ mbo tosa, le mbo chɔɔlu kundaa mala wo. Mi bɛndu kunda koŋ mel ndu balikaa le hiouwɔɔ lachi o tosa niŋndo, nduyɛ mbo chɔm ndu sɔɔŋ ŋpum, ŋ o nɔ mbo tosa hiouwɔɔ lachioo woŋ. Le tamaseliiyo, mbo dimul Chɔɔndaŋ maa, i wa bɔɔ suɛi kɛndɛ le mbo keleŋa lakɔ o bɔŋaŋndaŋ, okoŋ mbo yil puaapiliaa, mbo wa mulilaŋ yɔŋgoo, mbo wa kɔlaŋ o wali pollo niŋ teleŋ o teleŋ a kunda ndɔɔ latulu, nduyɛ mbo nuuviaa nɛilaŋ le acheleŋnda malaa. Mɛɛ Chɔɔndaŋ dɔu kɛɛsiaala laŋ o wali niŋ, o cho ko sɔɔŋ sɛnɛiyoŋ te o pɛɛku le, kɛ mi keŋ mala ndu, mi kaala ndɔɔ le puaapiliaa a ndepiliaa hiau lachi a hindɔɔ. Mi Chɔɔndaŋ pɛɛku maa, o cho mɛɛ mi puaapilɛnɔɔ simnuŋ fɛŋ buɛi malalaŋndo malaŋ o kandu acheleŋnda malaa le. Kɛ a teleŋ koŋ o hiau lachi a nda malaa ni.—1 Timo. 3:​8-10, 13.

13. Vɛɛ kaalaa mala yɛ puaapilɛnɔ pilɛ diolaŋ Kilisiaŋ le mbo suliŋ vɛlɛ le mbo wa bɛndu kundaa?

¹³ Te o wa yɛ maa, a wa paandu buɛi malalaŋndo ɔɔ bɛndu kundaa? Kɛsiŋ o kɔl maa mi Chɛhowa loonuŋ a nyɛ ŋ tosa o paandoo niŋndo, vɛlɛ a mɛɛ kaala numndo ndoo nyindu num le ndu tosaa yɛ. (1 Kɔliŋ. 15:​58) Mbo che vɛlɛ mɛɛ ŋ cho hiouwɔɔ lachi a acheleŋnda kaalaa chɔmndo yɛ. Mi puaapilɛnɔ pilɛ diolaŋ Kilisiaŋ, tambu kɔllo tau mɛɛ nda faŋa ndu bɛndu kundaleŋ. Kɛ mbo dimi aa: “Mi kɛɛsiaa le mi tosa nyɛ ya tiuba wo o Chɛhowa piɛiyo niŋ, o yɔŋ bɛɛ mi wa bɛndu kundaa ɔɔ mi ve bɛɛ le.” Mɛɛ teleŋ tiŋ hiou, ma miŋgi ndu yulɔɔ isu le mbo wa bɛndu kundaa. Mi Kilisiaŋ dimi aa: “Siooŋnde wa ya le waa vɛlɛ bɛndu kundaa. Kɛ mi kɛɛsiaa maa, te Chɛhowa chɛlla pɛ le mi wa vɛlɛ bɛndu kundaa, mɛɛ I cho chɛlɔɔ kanifuule, I kaala ndu, nduyɛ I yeema mi mala puaapiliaa a ndepiliaa niaa.”

14. Yɛɛ ŋ pɛɛku yɛ o nyɛ ndepilɛnɔ pilɛ o Chɔɔchiaa niŋ dimi wo niŋ?

¹⁴ Mi buɛiyaa Chɛhowaa chɔm vɛlɛ wanaa nda chiɛɛliaŋnda kaalaa. (Maa. 22:​37-39) Le tamaseliiyo, mi ndepilɛnɔ pilɛ o Chɔɔchiaa niŋ diolaŋ Ɛlina dimi aa: “O tasela ndɔ, nyɛ kinɛi ndoo nyindu ya le yooŋgu kɛndɔɔ dimioo wo, cho kaala ya nɔ le Chɛhowa wo ni. Kɛ mɛɛ kaala ya nɔ le ndu wo hindu fau, lende koni kaala ya nɔ le waŋnda chieeya wo bɛɛ hindu ni. Mi kindiŋ le yiyaŋndo a bahawɛila nda nɔlaŋ okɔɔ, vɛlɛ a sɔɔŋ pilaŋ nda kɔllo woŋ. Mɛɛ ya yiyaŋ a nda okɔɔ fau o nɛiyo hoo choo, lende koni ya nɔ yeemɛi ni le nda malaa.”—Luomaŋ. 10:​13-15.

TƆNƆLA NAŊ SƆLA LAŊ TE Ŋ CHƆM PƐ ACHELEŊNDA KAALAA

15-16. A mɛɛ fotueila nda tuuliaa laŋ la cho chɔmndo yɛ, tɔnɔla kuɛɛ naŋ sɔla yɛ te ŋ chɔm pɛ acheleŋnda kaalaa?

¹⁵ Te ŋ chɔm pɛ puaapiliaa a ndepiliaa naa kaalaa, o cho ko nda le sɔla tɔnɔɔ le. Mɛɛ Naa Kolonaa kanduŋ, mi puaapilɛnɔ pilɛ diolaŋ Paolo nda laa ndɔ, mala bɛnduaa yuuwaa bɔɔbɔɔ le ma pɛɛku le nyɛm ndaŋ mapuuloŋ soliŋndo kpeku, le yooŋgu kɛndɔɔ dimioo. Nduyɛ mi ndepilɛnɔ pilɛ ndoo che ndi ikala o tasela ndɔ le nyɛ ndɔ mapuuloo soliŋndo kpeku wo mɛɛlu batiuwaa sɔla. Mbo soliŋ nyɛ ndɔ mapuuloo kpeku, le wanayaŋ ndɔŋ veeloo o Loonuŋyaa. Mi wanayaŋ ndɔŋ bele ŋɔmpum soliŋ nyɛm ndaŋ mapuuloŋ kpeku, le bɔŋaŋ koŋ biyɔɔ. Mi ndepilɛnɔ koŋ nda wanayaŋ ndɔŋ sɔla tɔnɔɔ tau, o mala Paolo nda laa ndɔ ke ndu wo niŋ. Mɛɛ teleŋ tiŋ hiou, mbo poonyial Paolo aa: “Nuwali tau le naa bɛnduaa yuuwa pɛɛkoo mɛɛ naŋ soliŋ nyɛm naŋ mapuuloŋ kpeku yɛ. Fɛɛŋ bɛɛ I puɛɛnuŋ a mɛɛ Chɛhowa buulaŋ le naa, vɛlɛ a sɛmbɛ ŋ dɔu le naa malaa wo le.”

¹⁶ Mi sɔɔŋ yɔŋnaŋ waa nuaa pɛɛku Paolo suɛi sɔvɛ sɔvɛi. Mi i loonuŋ ndu maa, kaala naŋ chɔm puaapiliaa wo hiou wa o sɔvɛ, a kɔl kalu naŋ nɔ wo, ɔɔ sɔɔŋ naŋ chaa tosaa woŋ. Mbo dimi aa: “I wa paandu buɛile ibuŋgaleŋ tosaa. Kɛ suŋ suŋ ya sina ni maa, lepum mi wanaa dimiaa yooŋgu kɛndiaa ndaa puɛɛnuŋ a sɔɔŋ yaa yɔŋgu woŋ okɔɔ. Kɛ, ma loonuŋ ndɔ a nyɛ ya tosa le nda malaa wo okɔɔ.”

17. Nɛɛ cheleŋ sɔla yɛ tɔnɔɔ te ŋ chɔm pɛ kaalaa?

¹⁷ Te ŋ chɔm pɛ acheleŋnda kaalaa, mi naa bɛɛ sɔla tɔnɔɔ o nɛila naŋ ve kɔl te laŋ choo. Mi puaapilɛnɔ pilɛ o Niu Zilaŋ niŋ chɛl maa hei cho tonya. O Ndaama pilɛ choo a paale kala leŋ, mbo cha kɔɔfanɔɔ yooŋgu kɛndɔɔ dimioo a pɛŋgɛi mapuuluei o nɛi bɛndoo choo. Le hei, mbo kɛɛsiaa le ma wa kɔlaŋ yooŋgu kɛndɔɔ dimioo nda kɔɔfanɔ koŋ, o Ndaamalaŋ choo ipalaa. Kɛ o tasela ndɔ, ndoo sina kposoŋ mɛɛ o wa tɔnɔɔ sɔla o keŋ niŋ yɛ le. Mbo dimi aa: “A teleŋ koŋ o yoomu nuu niŋ, yaa kaala wali pollo tau le. Kɛ mɛɛ yaa cha fau mɛɛ kɔɔfanɔ koŋ ndoo chaa waŋnda pɛɛkoo yɛ, vɛlɛ a mɛɛ ndoo sɔla batiuwaa o wali pollo niŋ yɛ, mi keŋ tosa mi kaala wali pollo tau. Mi chaŋyɛi kpɛɛluŋnde luɛi naa tɛɛŋ naa puaapilɛnɔ koŋ, nduyɛ mbo mala ya tau, le mi tuei wali pollo yeela, vɛlɛ mi sɔɔŋguu Chɛhowa ikɛi kpɛɛluŋ.”

18. Yɛɛ Chɛhowa yeema yɛ naa miŋ tosa?

¹⁸ Chɛhowa yeema naa kpou miŋ tosa mi kaala naŋ nɔ le ndu a le acheleŋnda wo hiou lachi a hindɔɔ. A mɛɛ naŋ pɛɛku o buŋgɛi hei niŋ yɛ, ŋ kindi kaala naŋ nɔ le ndu wo, te ŋ wa pɛ diomndaŋ veeloo o Baabuiyo niŋ, nduyɛ miŋ wa yiyaŋndo lechoo. Ŋ tosa vɛlɛ hei te ŋ wa pɛ piɛileŋ o ndulo teleŋ o teleŋ. Ŋ tiu vɛlɛ ba miŋ tosa mi kaala naŋ nɔ le puaapiliaa a ndepiliaa naa wo hindu, te ŋ wa nda pɛ sɔɔŋ mala nda woŋ tosallo. Mɛɛ kaala naa le Chɛhowa a le acheleŋnda hindu fau, lende koni naŋ sɔɔŋguu Chɛhowa ikɛi vɛlɛ a yuŋgu ndɔɔ ni. Nduyɛ ŋ cho chaŋyɛi keŋ tueiyɔɔ yeela lefafɛɛŋ!