Lɛvitikɔɔ

9 O paale ŋɔmaa leŋ choo,+ mi Muuse veelu Elɔŋ, puaa nduaa, a waŋ banaa o Isɔluɛi niŋ. 2 Mbo dimul Elɔŋ aa: “Chua nau fɔŋndɔɔ le sala hakioo,+ a saa kondoo le sala luamaa, ma soli nda salaa Chɛhowa lachi. Nda ŋiɔɔŋ kpou, a nɔ ma nɔ sɔŋ o sɔŋ te. 3 Kɛ a nɔ ma dimul Isɔluɛiya aa, ‘La chua chuiŋ tooyoo le sala hakioo, a nau fɔŋndɔɔ, vɛlɛ a saa fɔŋndɔ piaandoo le sala luamaa. O kɛ kɛ nɔ mbo chii wɔsioo o pilɛ, nduyɛ o nɔ mbo nɔ sɔŋ o sɔŋ te. 4 A nɔ vɛlɛ ma chua nau towaa a saa kondoo le salala kɔl nyulu laŋ,+ a sala ŋkul+ nda muuliaŋ a chuɛiyaŋ ndo, ma soli laŋ salaa Chɛhowa lachi. Kanifuule, Chɛhowa cho nya hau chɔɔmɔŋ.’”+

5 Okoŋ, ma chua nyɛ o nyɛ Muuse dimul nda, ma kua o tɛndii bɔŋaŋndo hɔlndɔ. Nduyɛ mi Isɔluɛiya kpou sɔɔŋguu, ma kɔ sim Chɛhowa lachi. 6 Mi Muuse dimi aa: “Nyɛ Chɛhowa dimul nya le mi la tosa wo cho hoo ni, le mi Chɛhowa chɔm nya naŋɔɔ ndɔ bɛndoo.”+ 7 Mi Muuse dimul Elɔŋ aa: “Sɔɔŋguu o bandu luamaa lasalaa ikɛi ma soli sala hakioo+ a sala luamaa, le mi num+ a yuŋgu numndo nyuna le malɔɔ hakioo. Okoŋ ma soli salaa le waŋnda kpou,+ le ma nyuna le malɔɔ hakioo le nda,+ a mɛɛ Chɛhowa dimi yɛ.”

8 O lepilɛ niŋ kpe, mi Elɔŋ sɔɔŋguu o bandu luamaa lasalaa ikɛi, mbo dii nau fɔŋndɔ cho le sala hakioo+ wo le ndupila. 9 Okoŋ mi puaa nduaa yoo ndu kooma nduaŋ,+ mbo yiŋ suei o kooma maŋ niŋ, mbo duau maŋ o leela cho o bandu luamaa lasalaa laŋ choo. Nduyɛ, mbo hulu ma tuaŋ o bandu luamaa lasalaa bɛŋgu.+ 10 Mbo chua chuɛima sala hakioo, kɔl keloŋ a yemii hɔlle, mbo luam o bandu luamaa lasalaa choo, a mɛɛ Chɛhowa dimul Muuse yɛ.+ 11 Mbo soli visiŋ tɔŋ kpou a yauwo latulu o dɔɔŋgɔɔ niŋ,+ mbo kɔ lom.

12 Okoŋ kɔɔli, mi Elɔŋ dii chɔlu cho le sala luamaa wo, mi puaa nduaa ke ndu kooma nduaŋ, nduyɛ mbo fasaŋiaa maŋ o bandu luamaa lasalaa kpeŋgoŋ kpou.+ 13 Ma ke ndu buŋgaŋ chɔlu sala luamaa latulu a bolleŋ, mbo luam o bandu luamaa lasalaa choo. 14 Okoŋ mbo tuaa peloŋ a puloŋ, mbo handu o sala luamaa wa ŋɔɔ o bandu luamaa lasalaa choo wo, mbo luam.

15 Mɛɛ o chua chuiŋ sala haki cho le waŋnda wo, mbo dii ndu, okoŋ mbo soli salaa le nda. Mɛɛ o tosa a o tasoo yɛ koni o tosa a ndu le sala hakioo solioo ni. 16 Nduyɛ mbo huŋ a chɔlu sala luamaa, mbo soli ndu salaa mɛɛ nda tosa paandu yɛ.+

17 Mbo huŋ vɛlɛ a sala ŋkullo,+ mbo kuandu o tiŋ mbo pei baa cha, nduyɛ mbo luam ndu o bandu luamaa lasalaa choo, o faŋaŋndɔ o sala luamaa idiiyo+ kɔɔli.

18 Okoŋ kɔɔli, mbo dii nau towaa a saa kondoo le sala kɔl nyulu cho le waŋnda wo. Mi puaa nduaa ke ndu kooma maŋ, nduyɛ mbo fasaŋiaa maŋ o bandu luamaa lasalaa kpeŋgoŋ kpou.+ 19 Okoŋ, ma chua chuɛima nau towaa,+ chuɛima cho o puiile saa kondoo waŋ, ma balu puloŋ ndaŋ, kɔl keloŋ, a yemii hɔlle,+ 20 ma handu muŋ kpou o takpala chɔluaa kaŋ choo, nduyɛ mi Elɔŋ luam chuɛiyaŋ o bandu luamaa lasalaa choo.+ 21 Kɛ mi Elɔŋ chua takpala chɔluaa kaŋ a lɔlu ba kɛndɔɔ, mbo keeliaa laŋ maa sala keeliaa Chɛhowa lachi, a mɛɛ Muuse dimul ndu yɛ.+

22 Okoŋ, mi Elɔŋ muli hɔlla kpeŋgii waŋnda wa ve, mbo heelu balaŋ choo choo, mbo duau nda sala.+ Nduyɛ mɛɛ o chii sala hakioo, sala luamaa, a salala kɔl nyulu laŋ soli, mbo tual o bandu luamaa lasalaa choo. 23 O mɛɛlulaŋ kpɔŋ, mi Muuse nda Elɔŋ luɛi o tɛndii bɔŋaŋndo niŋ. Nduyɛ mɛɛ nda fula o bɛɛ, ma duau waŋnda sala.+

Okoŋ, mi waŋnda kpou cha naŋɔɔ bɛndu Chɛhowa wo.+ 24 Mi Chɛhowa yɔŋ yiŋndeŋ,+ mi le huŋ lom sala luamaa a chuɛima wa o bandu luamaa lasalaa choo waŋ. Mɛɛ waŋnda kpou che hei, ma deŋi choo choo a kɔl kɛndɔɔ, nduyɛ ma tundu hɔlla lɛŋ.+