Lɛvitikɔɔ

15 Mi Chɛhowa hiau lachi a suɛi o Muuse nda Elɔŋ ndo, mbo dimi aa: 2 “La dimul Isɔluɛiya aa, ‘Te wana pɔnɔɔ nɔ pɛ naa wana chii o lɛmbɔɔ niŋndo, mɛɛ naa koŋ siiŋguu ndu wana nɔɔlɛi.+ 3 O simnuŋ wana nɔɔlɛi. O yɔŋ bɛɛ mbo wa wɔ hiouwɔɔ lachi a chiiyo o lɛmbɔɔ niŋ, ɔɔ mbo pɛŋgi wɔ le teleŋ biŋgi, wana nɔɔlɛiyo o cho ni.

4 “‘Kpele kɛ kɛ wana cho koŋ chiiyo o lɛmbɔɔ niŋndo hini pɛ choo, kpele koŋ cho simnɔŋ o nɔɔlɛi. Nduyɛ nyɛ o nyɛ o chal pɛ choo, nyɛ koŋ cho simnɔŋ o nɔɔlɛi. 5 Wana o wana pilaŋ pɛ kpele wana koŋ, wana koŋ nɔ mbo tɔɔ nyɛla ndɔlaŋ, mbo puluŋ, nduyɛ o cho wa o nɔɔlɛi haaa mi paaleŋ le del.+ 6 Wana o wana chal pɛ o nyɛ wana cho koŋ chiiyo o lɛmbɔɔ niŋndo chal choo wo, wana koŋ nɔ mbo tɔɔ nyɛla ndɔlaŋ, mbo puluŋ, nduyɛ o cho wa o nɔɔlɛi haaa mi paaleŋ le del. 7 Wana o wana pilaŋ pɛ wana cho koŋ chiiyo o lɛmbɔɔ niŋndo, wana koŋ nɔ mbo tɔɔ nyɛla ndɔlaŋ, mbo puluŋ, nduyɛ o cho wa o nɔɔlɛi haaa mi paaleŋ le del. 8 Te wana cho koŋ chiiyo o lɛmbɔɔ niŋndo tufu pɛ wana cho o diandaa wo lɔluaŋ choo, wana koŋ nɔ mbo tɔɔ nyɛla ndɔlaŋ, mbo puluŋ, nduyɛ o cho wa o nɔɔlɛi haaa mi paaleŋ le del. 9 Visi o visi wana cho koŋ chiiyo o lɛmbɔɔ niŋndo chal pɛ choo, visi koŋ cho wa o nɔɔlɛi. 10 Wana o wana pilaŋ pɛ nyɛ wana cho koŋ chiiyo o lɛmbɔɔ niŋndo chal choo wo, wana koŋ cho wa o nɔɔlɛi haaa mi paaleŋ le del. Nduyɛ wana o wana chua vɛlɛ nyɛ koŋ pɛ mbo kuɛ a ndu inɛ, wana koŋ nɔ mbo tɔɔ nyɛla ndɔlaŋ, mbo puluŋ, nduyɛ o cho wa o nɔɔlɛi haaa mi paaleŋ le del. 11 Te wana cho koŋ chiiyo o lɛmbɔɔ niŋndo+ pulu balaŋ te mbo pilaŋ waŋndo, wana koŋ nɔ mbo tɔɔ nyɛla ndɔlaŋ, mbo puluŋ, nduyɛ o cho wa o nɔɔlɛi haaa mi paaleŋ le del. 12 Te wana cho koŋ chiiyo o lɛmbɔɔ niŋndo pilaŋ pɛ nyɛi laandii nda toosiaa a puuloo ve, a nɔ ma pesi pesi ndi. Nduyɛ te o pilaŋ pɛ nyɛi laandii nda toosiaa a yɔmndo ve, a nɔ ma tɔɔ ndi fo fo.+

13 “‘Te wana cho a naa koŋ ndo seŋgu pɛ, o nɔ mbo chɔm palɛi i ŋɔmmɛu chɔŋ a paale o pɛŋgi chiiyo o lɛmbɔɔ niŋndeŋ. O nɔ mbo tɔɔ nyɛla ndɔlaŋ, mbo puluŋ a mɛŋma nda kɔndu sɛnɛi o peelo waŋ, okoŋ mbo simnuŋ o diandaa.+ 14 O paale ŋɔmaa leŋ choo, o nɔ mbo chua piiŋnda a ŋiɔɔŋ+ ɔɔ kaŋgbuaa fɔŋnduaa a ŋiɔɔŋ, mbo huŋ ke wana soliaa lasalaa ya Chɛhowa lachi, o tɛndii bɔŋaŋndo hɔlndɔ. 15 Wana soliaa lasalaa cho o pilɛ soli sala hakioo, mbo soli o pilɔɔ sala luamaa. Nduyɛ mi wana soliaa lasalaa nyuna le malɔɔ hakioo le ndu ya Chɛhowa lachi le naa wa ndu wo.

16 “‘Te wana pɔnɔɔ chii pɛ o lɛmbɔɔ niŋ, o nɔ mbo puluŋ a bolleŋ kpou, nduyɛ o cho wa o nɔɔlɛi haaa mi paaleŋ le del.+ 17 Nyɛ o nyɛ chuɛɛnaŋ wana chii koŋ o lɛmbɔɔ niŋndo pilaŋ pɛ, o wa o nda toosiaa a yau visioo wo, o nɔ mbo tɔɔ ndu, nduyɛ o cho wa o nɔɔlɛi haaa mi paaleŋ le del.

18 “‘Te wana pɔnɔɔ wa pɛ a wana lanɔɔ nduyɛ mi poo chii, nda ŋiɔɔŋ kpou nɔ ma puluŋ nduyɛ ma wa a nɔɔlɛi haaa mi paaleŋ le del.+

19 “‘Te wana lanɔɔ wa pɛ o teleŋ ndɔɔ niŋ, o cho wa o nɔɔlɛi le palɛi i ŋɔmmɛu.+ Nduyɛ wana o wana pilaŋ ndu pɛ, wana koŋ cho wa o nɔɔlɛi haaa mi paaleŋ le del.+ 20 Boondii o cho wa o teleŋ ndɔɔ niŋnde, nyɛ o nyɛ o hini pɛ choo, nyɛ koŋ simnuŋ o nɔɔlɛi. Nduyɛ nyɛ o nyɛ o chal pɛ choo, nyɛ koŋ bɛɛ simnuŋ o nɔɔlɛi.+ 21 Wana o wana pilaŋ pɛ kpele ndɔɔ, wana koŋ nɔ mbo tɔɔ nyɛla ndɔlaŋ, mbo puluŋ, nduyɛ o cho wa o nɔɔlɛi haaa mi paaleŋ le del. 22 Wana o wana pilaŋ pɛ nyɛ o chal choo wo, wana koŋ nɔ mbo tɔɔ nyɛla ndɔlaŋ, mbo puluŋ, nduyɛ o cho wa o nɔɔlɛi haaa mi paaleŋ le del. 23 Te o chal pɛ o kpele ɔɔ o nyɛ o nyɛ cheleŋ choo, wana o wana pilaŋ pɛ kpele koŋ ɔɔ nyɛ koŋ, wana koŋ cho wa o nɔɔlɛi haaa mi paaleŋ le del.+ 24 Nduyɛ wana pɔnɔ o wana pɔnɔ wa pɛ a chua koŋ, mi teleŋ ndɔ koŋ o suiinuŋ ndu,+ po koŋ cho wa o nɔɔlɛi le palɛi i ŋɔmmɛu. Nduyɛ kpele kɛ kɛ o hini pɛ choo, kpele koŋ bɛɛ cho wa o nɔɔlɛi.

25 “‘Te wana lanɔɔ che pɛ teleŋ ndɔɔ le palɛi bɔɔbɔɔ,+ mbo ve a boondii o cha teleŋ ndɔɔ+ ve le, ɔɔ mbo che teleŋ ndɔɔ le palɛi bɔɔbɔɔ mbo hiou maa paandu, o cho wa o nɔɔlɛi o palɛi keŋ niŋ kpou, mɛɛ o wa o nɔɔlɛi a boondii o wa o teleŋ ndɔɔ niŋnde yɛ. 26 Kpele kɛ kɛ o hini pɛ choo, kpele koŋ cho wa o nɔɔlɛi, mɛɛ kpele ndɔɔ wa o nɔɔlɛi a boondii o cha teleŋ ndɔɔ+ ve yɛ. Nduyɛ nyɛ o nyɛ o chal pɛ choo, nyɛ koŋ cho wa o nɔɔlɛi, mɛɛ nyɔɔ wa o nɔɔlɛi a boondii o cha teleŋ ndɔɔ ve yɛ. 27 Wana o wana pilaŋ pɛ kpele koŋ ɔɔ nyɛ koŋ, o simnuŋ o nɔɔlɛi. Wana koŋ nɔ mbo tɔɔ nyɛla ndɔlaŋ, mbo puluŋ, nduyɛ o cho wa o nɔɔlɛi haaa mi paaleŋ le del.+

28 “‘Kɛ te o chii pɛ teleŋ ndɔɔ, o nɔ mbo chɔm palɛi i ŋɔmmɛu chɔŋ a paale o chii teleŋ ndɔɔ leŋ, le mbo simnuŋ o diandaa.+ 29 O paale ŋɔmaa leŋ choo, o nɔ mbo chua piiŋnda a ŋiɔɔŋ ɔɔ kaŋgbuaa fɔŋnduaa a ŋiɔɔŋ,+ mbo huŋ ke wana soliaa lasalaa o tɛndii bɔŋaŋndo hɔlndɔ.+ 30 Wana soliaa lasalaa cho o pilɛ soli sala hakioo, mbo soli o pilɔɔ sala luamaa. Nduyɛ mi wana soliaa lasalaa soli sala malɔɔ lahakioo le ndu ya Chɛhowa lachi, le boondii o wa o teleŋ ndɔɔ+ niŋnde.

31 “‘Lelaŋ, la mala Isɔluɛiya le ma fafaŋ nyɛ o nyɛ cho o nɔɔlɛi, yɔŋii nda sɔla piɔmndo le mɛɛ nda simnuŋ a nɔɔlɛi, okoŋ ma nɔɔliaa tɛndii nuu, o cho nya tɛɛŋ+ ndo yɛ.

32 “‘Te wana pɔnɔɔ sɔla pɛ naa o chii o lɛmbɔɔ niŋndo ɔɔ mbo simnuŋ o nɔɔlɛi le mɛɛ o chii+ o lɛmbɔɔ niŋ yɛ, 33 mi wana lanɔɔ wa o teleŋ ndɔɔ+ niŋ, mi wana pɔnɔ kɛ kɛ sɔla naa wana chii o lɛmbɔɔ niŋndo,+ ɔɔ mi wana lanɔɔ che teleŋ ndɔɔ mbo ve a boondii o cha teleŋ ndɔɔ ve le, nduyɛ mi wana pɔnɔɔ wa a wana lanɔ simnuŋ o nɔɔlɛiyo, sawa cho a nda okɔɔ wo cho hoo ni.’”