Ditɔnɔmii

28 “Te la yaŋ pɛ Chɛhowa Mɛlɛka nyaa nilaŋ nyɛkɛndɛi, nduyɛ mi la wa yekeŋ le sawala ya cho nya laŋ hau kioo laŋ biyɔɔ kpou, Chɛhowa Mɛlɛka nyaa cho nya heelu tema, mi la hiou kaalaŋ kpou o lɛŋndeŋ choo.+ 2 Te la hiou pɛ lachi a Chɛhowa Mɛlɛka nyaa nilaŋ yaŋɔɔ, salalaŋ ndaŋ kpou la wa niŋ nya choo ni:+

3 “Salaa cho nya wa choo te la wa pɛ chiee, nduyɛ salaa cho nya wa choo te la wa pɛ yondoo niŋ.+

4 “Salaa cho wa chuauwaa nyaa choo,+ tɔlɔɔla nyalaŋ, chɔluaa nyaa, nauwaa fɔŋnduaa, a saa fɔŋnduaa nyaa.+

5 “Salaa cho wa o kambɛila nyalaŋ choo,+ a o hɛŋgɛila nyala nya linda kpeyaŋ luamaa beediiyo laŋ choo.*+

6 “Salaa cho nya wa choo te la luɛi pɛ, nduyɛ salaa cho nya wa choo te la fula pɛ.

7 “Te yaamɔɔwaa nyaa chiŋalaŋ nya pɛ, Chɛhowa cho tosa mi la yem nda.+ A fula niŋ nɛiyo o pilɛ le nya chiŋalaŋndo, kɛ ma sɛŋiŋ o nɛilaŋ la ŋɔmmɛu choo le nya nyaanɔŋndo.+ 8 Chɛhowa cho kondala nyalaŋ salaa dɔwɔɔ a nyɛ o nyɛ nya tosa.+ Nduyɛ, Chɛhowa Mɛlɛka nyaa cho nya salaa dɔwɔɔ o lɛŋnde o cho nya kioo leŋ niŋ. 9 Te la hiou pɛ lachi a sawala Chɛhowa Mɛlɛka nyaa diikɔŋndo, nduyɛ mi la kuɛ o nɛila ndɔlaŋ choo,+ Chɛhowa cho tosa mi la simnuŋ wanaa diandaa+ ndu o hɔl le fɛɛŋ a fɛɛŋ. 10 Waŋnda o lɛŋndeŋ choo kpou cho sina maa diola Chɛhowa laŋ la cho nya choo,+ nduyɛ mi siooŋii nyɛi bii nda.+

11 “Chɛhowa cho tosa mi la velu chuauwa tau. O cho tosa mi chɔluaa nyaa kui, nduyɛ mi tɔlɔɔla nyalaŋ la yɔŋgu kɔmnde kɛndɛleŋ,+ o lɛŋnde Chɛhowa chuel finyaa nyaa mamaa buŋgɛi le nya kioo leŋ niŋ.+ 12 Chɛhowa cho choo choo kumbi mɛɛ waŋndo kumbi nuaa konda ndɔɔ yɛ, nduyɛ mbo yɔŋ nya piɔɔ a teleŋ bɛnda wo,+ okoŋ mbo dɔu nya sala o nyɛ o nyɛ niŋ nya tosa. La wuu niŋ waŋnda o lɛŋii bɔɔbɔɔ niŋ kueelaŋ, kɛ nya heu niŋ ba le kuee biyɔɔ le.+ 13 Te la hiou pɛ lachi a sawala Chɛhowa Mɛlɛka nyaa diikɔŋndo, la ya cho nya kioo paale hauleŋ ndeŋ ndaŋ, nduyɛ mi la tosa nyɛ la dimi wo, Chɛhowa cho tosa mi la wa o bolleŋ,+ kɛ o cho o tumndo le. Nduyɛ la wa niŋ waŋnda choo, kɛ la ve niŋ nda o ba bɛŋgu le. 14 Sawala ya cho nya kioo paale hauleŋ ndeŋ ndaŋ kpou, la nɔ mi la faŋaŋ o laŋ choo mi la kuɛ o ba kɛndɔɔ choo ɔɔ o ba miallo choo,+ mi la tol mɛlɛkaa cheleŋnda kɔɔli le nda sooluuwo le.+

15 “Kɛ te la yeŋ Chɛhowa Mɛlɛka nyaa nilaŋ, mi la bii sawala ndɔla ya cho nya kioo paale hauleŋ ndeŋ ndaŋ kpou le, sendilaŋ ndaŋ kpou la wa niŋ nya choo ni:+

16 “Sendioo cho nya wa choo te la wa pɛ chiee, nduyɛ sendioo cho nya wa choo te la wa pɛ yondoo niŋ.+

17 “Sendioo cho wa o kambɛila nyalaŋ choo,+ a o hɛŋgɛila nyala nya linda kpeyaŋ luamaa beediiyo laŋ choo.+

18 “Sendioo cho wa chuauwaa nyaa choo,+ tɔlɔɔla nyalaŋ, chɔluaa nyaa, nauwaa fɔŋnduaa a saa fɔŋnduaa nyaa.+

19 “Sendioo cho nya wa choo te la luɛi pɛ, nduyɛ sendioo cho nya wa choo te la fula pɛ.

20 “Chɛhowa cho nya sendioo handɔɔ choo mi la laasiaŋ, mbo tusi nya nyɛpalaa choo, haaa mbo wɔɔsuu nya paku o lepilɛ niŋ kpe, le mɛɛ nya cho sɔɔŋ wɔɔŋndoŋ tosaa, mi la kɛɛ ndu* yɛ.+ 21 Chɛhowa cho nya naalaŋ tusi choo haaa mbo chii nya paku o lɛŋnde nya cho kɔlaŋ challe leŋ niŋ.+ 22 Chɛhowa cho tosa mi soliŋii vesɛiye bii nya, naa dialuŋ tuuwo,+ a luaaluaa. O cho tosa mi walu bɛndoo sim, ma diu diu nya a muɛi faŋnde,+ mi haŋgul tuuwo a dɛluaa+ tɛɛmbuu tɔlɔɔla nyalaŋ. Kpundɛlaŋ ndaŋ la cho nya lo choo haaa mi la chuu paku. 23 O cho halaa kinda piɔɔ se lɛ niŋ te, nduyɛ mbo tosa mi lɛŋndeŋ le kɛɛ le kɔmndeŋ yɔŋgoo.*+ 24 Chɛhowa cho tosa mi piɔɔ sia o lɛŋnde nyaleŋ niŋndo simnuŋ pultaŋ. Nduyɛ, o cho nya lo chundoo tusioo choo haaa mi la chuu paku. 25 Chɛhowa cho tosa mi yaamɔɔwaa nyaa yem nya.+ La fula niŋ nɛiyo o pilɛ le yaamɔɔwaa nyaa chiŋalaŋndo, kɛ mi la sɛŋiŋ o nɛilaŋ la ŋɔmmɛu choo le nda nyaanɔŋndo. Siooŋnde cho masɛi o lɛŋndeŋ choo kpou biyɔɔ a nyɛ cho nya yɔŋnɔŋndo.+ 26 Dialuŋ nyaŋ vilɛiyoŋ cho simnɔŋ nyɛdiaa le youwa kpou, a visiaa o lɛŋndeŋ choo. Nduyɛ wana o wana tuu niŋ nda le.+

27 “Chɛhowa cho tosa mi hindɔɔla fula waŋnda Ichipi laŋ la fula nya. O cho tosa mi bondokpalaŋ, nyaŋgafoo, a naa ihuiiŋndo fula nya. Nduyɛ, la siŋgu niŋ a naalaŋ ndaŋ te. 28 Chɛhowa cho nya seemiaa, mbo suumiaa nya,+ nduyɛ mi la yɔŋnuŋ laasi laasi.* 29 La cho wa balaŋ keeliaa ipala deŋ, mɛɛ wana sumɛiyo wa nuaa lɔɔ lɔɔ o nyumndaŋ niŋ yɛ.+ Nduyɛ nyɛ o nyɛ nya tosa, la sɔla niŋ batiuwaa le. Teleŋ o teleŋ, a cho nya wa delɔɔ choo ma poondiaa nyɛm nyaŋ, nduyɛ wana o wana piŋi niŋ nya le.+ 30 Waŋndo duau niŋ wana lanɔɔ fulu, mi wana pɔnɔ cheleŋ kpuuwa ndu. Waŋndo cho chiɛiyo taŋgul, kɛ o luei niŋ leniŋ te.+ Waŋndo cho kpele makilepiiyo tosa, kɛ o di niŋ maŋ te.+ 31 A cho nauwaa nyaa diyɔɔ nya o hɔl, kɛ la di niŋ nda le. A cho sofɛliaa nyaa chiimbuu nya o hɔl, kɛ a miŋgul nya niŋ nda le. Yaamɔɔwaa nyaa cho saa nyaa biu biu, kɛ la nɔ niŋ wana piŋiaa le. 32 La cho lo tofaa mi wanaa cheleŋ huŋ biu puaa nyaa a chuaa nyaa laanduaa.+ Teleŋ o teleŋ yeemɛi cho nya wa le nda, kɛ la nɔla niŋ nyɛ o nyɛ tosa le. 33 Wanaa nya sina bɛɛ le wa cho nyɛm nya cho kouwɔɔ o chiɔɔŋ nyaŋ niŋ, a nyɛm nya cho kendi o tɔlɔɔla nyalaŋ niŋndoŋ dio ni.+ Nduyɛ teleŋ o teleŋ, a cho wa nya nyɛpalaa tusioo choo, ma bii nya biyɔɔ wɔɔŋndo. 34 Nyɛ nya cha niŋ a lehɔl lo cho tosa mi la seema.

35 “Chɛhowa cho tosa mi hindɔɔla nɛiyaa nɛiyaala siŋgu le laŋ la fula nya, chɔŋ o peluŋ kɔlloŋ haaa o bolleŋ. 36 Chɛhowa cho nya a masa nya hɛli a ba nya wo touwɔɔ o lɛŋnde nya, a finyaa nyaa mamaa sina le leŋ niŋ.+ Loŋ nya cho lakɔ mɛlɛkaa cheleŋnda sooluu ni, mɛlɛkaa nda toosiaa a yɔmnde vɛlɛ a poutaŋ nda.+ 37 Te Chɛhowa tou nya pɛ, siooŋnde cho waŋnda biyɔɔ a nyɛ cho nya yɔŋnɔŋndo. La cho simnɔŋ nyɛ wɔɔŋndo waŋnda kpou o hɔl, nduyɛ mi la simnɔŋ nyɛ mamaa.*+

38 “La cho kulloŋ saŋɔɔ tau o chiɔɔŋ nyaŋ niŋ, kɛ la kuu niŋ ŋ bɔɔ le.+ Kanifuule, soonuaa cho muŋ tɛɛmbuu. 39 La cho kpelela makilepiilaŋ tosa, kɛ la kendi niŋ maŋ nduyɛ mi la kol muɛima maŋ te.+ Kanifuule, dɛluaa cho maŋ tɛɛmbuu. 40 La cho nɔ yɔmii ɔlifiive o tanda nyaa niŋ kpou, kɛ la suiinuŋ niŋ chuɛima nduaŋ te. Kanifuule, i cho deli. 41 La cho chuauwa violɔɔ, kɛ a ve niŋ le nya le. Kanifuule, a cho lakɔŋnɔŋ a nda o biyɔɔ niŋ.+ 42 Kambalaa kunda bɛnduaa cho yɔmii nyɛi tɛɛmbuu a kɔmnde tɔlɔɔla nyalaŋ. 43 Mialaa cho nya tɛɛŋnda cho kpaayaa sɔla ma hiou nya poloŋ, mi nya miiŋgu nda o ba bɛŋgu. 44 A cho nya kueelaŋ wuu, kɛ nya wuu niŋ nda lakuee le.+ Nda cho wa nya o bolleŋ ni, mi nya miiŋgu o tumndo.+

45 “Sendilaŋ ndaŋ kpou,+ ba o ba nya kɔ, la cho wa nya kɔɔli haaa mi la chuu paku.+ Kanifuule, la yeŋ Chɛhowa Mɛlɛka nyaa lani, mi la bii sawala ndɔla o ke nya laŋ te.+ 46 Le fɛɛŋ a fɛɛŋ, sendilaŋ ndaŋ la cho nya, a chuauwaa nyaa wa choo le nya silaa.+ 47 Kanifuule, teleŋ nyaa nɔ nyɔɔŋ tau tau wo, la piɛi Chɛhowa Mɛlɛka nyaa a nyaale vɛlɛ a kɔl kɛndɛ le.+ 48 Chɛhowa cho tosa mi yaamɔɔwaa nyaa huŋ chiŋalaŋ nya, nduyɛ mi la simnuŋ chiaa le nda.+ La wa niŋ a yiaaŋ+ vɛlɛ a kolɔɔ biyaa. La nɔ niŋ nyɛ chuɛiyaŋ te, nduyɛ nyɛ o nyɛ wa niŋ nya lepɛŋ. A cho nya chiliŋuŋ lusulɛiyoŋ baa o ŋkɛsu, haaa ma chii nya paku.

49 “Chɛhowa cho tosa mi lɛŋnde cho landaŋ a nya leŋ,+ lɛŋnde cho o chieeŋndo mɛɛlulaŋ ndeŋ, le nya sina bɛɛ suɛi ndɛi maŋgalɛi le leŋ,+ le huŋ del nya choo o lepilɛ niŋ kpe, mɛɛ kowɔɔ del nuaa nyɔɔ choo yɛ.+ 50 Waŋnda haa wa niŋ wanaa dɛnɛ wɔɔŋ bɛndu, a nɔ niŋ inyiɛɛ le bɛnduaa yuuwa a chuaambuaa le.+ 51 A cho lo chɔluaa nyaa a tɔlɔɔla nyalaŋ dioo haaa mi la chuu paku. Kuluŋ nyaŋ ni, muɛima nyama sɛnɛiyaŋ a chuɛiyaŋ ni, nauwaa nyaa fɔŋnduaa a saa nyaa ni, a mel nya niŋ nyɛ o nyɛ le, haaa ma chii nya diu paku.+ 52 A cho nya luei o piŋndo niŋ, ma kinda nya o chieeŋ bɛnduŋ* cho o lɛŋnde nyaleŋ niŋndoŋ kpou, haaa mi kpakila nyala filioŋnda kala kalala nya tiindaŋ ndaŋ la koombiaa kpou. A tonya, a cho nya luei o piŋndo niŋ o chieeŋ bɛnduŋ lɛŋnde Chɛhowa Mɛlɛka nyaa ke nya leŋ niŋ kpou.+ 53 Le mɛɛ yaamɔɔwaa nyaa cho nya nyɛkindilaa kala kalaa tusi choo teleŋ nya cho wa o piŋndo niŋndo yɛ, la cho chuauwaa nyaa dio, puaa nyaa, a chuaa nyaa laanduaa+ Chɛhowa Mɛlɛka nyaa ke nya wa.

54 “Wana pɔnɔ sul sul bɛndoo mbo nɔ kɛndɛi nya tɛɛŋ ndo bɛɛ, o nɔ niŋ inyiɛɛ le bɛ ndɔ ɔɔ pɔmbɔ ndɔ ɔɔ laa ndɔ kaalaa ɔɔ chuauwaa nduaa cho lo yoomu wa le. 55 Nduyɛ, o ke niŋ nda visiŋ puaa nduaa o cho wa dioo woŋ te. Kanifuule, o nɔ lɛ niŋ nyɛ o nyɛ diaa cheleŋ te. Le mɛɛ yaamɔɔwaa nyaa cho nya luei o piŋndo niŋ, ma tusi nya nyɛkindilaa kala kalaa choo yɛ hei cho yɔŋnɔŋ ni.+ 56 Wana lanɔ sul sul bɛndoo mbo nɔ kɛndɛi nya tɛɛŋ, nduyɛ le mɛɛ o cho wana sɔvɛ yɛ,+ o chɛl le pelei tusioo lɛŋ te wo, o chɔm niŋ inyiɛɛ le pɔnɔ ndɔ kaalaa, po ndɔɔ, ɔɔ chua ndɔɔ le. 57 Nduyɛ te o velu pɛ sɛnɛi, o cho kɔɔlima fula ndu niŋndaŋ dio latulu a chuauwaa o vialu niŋnda. Le mɛɛ yaamɔɔwaa nyaa cho nya nyɛkindilaa kala kalaa tusi choo, teleŋ nya cho wa o piŋndo niŋ o chieeŋ nyaŋ bɛndoŋ niŋndo yɛ hei cho yɔŋnɔŋ ni.

58 “Te la tosa nyɛ cho o poonyiaa o yau laSawaa hoo niŋndo kpou nyɛkɛndɛi le,+ nduyɛ mi la nɔ siooŋnde le diola tɔɔmala bɛndula+ Chɛhowa+ Mɛlɛka nyaa le, 59 Chɛhowa cho nya kpundɛlaŋ tusi choo, kpundɛla bɛndula chuu le laŋ,+ a naala wɔɔŋ wɔɔŋnda siŋgu le laŋ. 60 Naala bii waŋnda Ichipi mi la nɔ siooŋnde le laŋ ndaŋ, o cho tosa mi la bii nya nduyɛ la siŋgu niŋ a laŋ te. 61 O fulawɔ okoŋ kɔɔli, naala wɔɔŋnda suu o suu a kpundɛla cho bɛɛ o yau laSawaa hoo niŋ te laŋ, Chɛhowa cho nya laŋ tusi choo, haaa mi la chii nya paku. 62 Mi che bɛɛ la choŋnuŋ a hɔbɛi mɛɛ looŋ cho nuaa o choo choo niŋ yɛ,+ kɛ nyɛɛmbɔ koni nya cho lo ni.+ Kanifuule, la yeŋ Chɛhowa Mɛlɛka nyaa lani le.

63 “Nduyɛ mɛɛ Chɛhowa ndoo nɔ yeemɛi le mbo tosa mi la sul nduyɛ mi la kui tau tau yɛ, lende Chɛhowa nɔ niŋ yeemɛi le nya tɛɛmbuuwo ni, mbo basu nya tɛɛ. O cho nya hunɔɔ faŋa bau o lɛŋnde nya cho kɔlaŋ challe leŋ niŋ.

64 “Chɛhowa cho tosa mi la sɛŋiŋ o lɛŋnde niŋ kpou, chɔŋ o chieeŋndo kpeŋgei i pilɛ mbo kɔ bii o chieeŋndo kpeŋgei i pilɛi.+ Nduyɛ loŋ nya cho lakɔ mɛlɛkaa nda toosiaa a yɔmnde, vɛlɛ a poutaŋ nda sooluu ni. Mɛlɛkaa nya a finyaa nyaa mamaa ndaa sina le wa.+ 65 Chɛhowa cho tosa la sɔla niŋ kɔl nyulu o lɛŋii keŋ niŋ te,+ kɛlɛŋgaa niŋ te naa chalaa. Kɛ la cho luɛiyɔɔ o buulaŋ bɛndoo niŋ,+ kɔl tambɛiyo, nduyɛ la chi lɛ niŋ lapi le.+ 66 Yoomula nyalaŋ la cho wa o kpundɔɔ niŋ, nduyɛ la cho wa a siooŋnde idii a ichɔl. La nɔ niŋ tiindaŋ le waa yoomu le. 67 Le mɛɛ siooŋii bɛnduei cho nya wa o lakɔl lɛ, a le nyɛ nya wa niŋ chɔɔ wo, la cho wa dimioo idii puŋ aa, ‘Maa nyumndaŋ ma tol niŋ fɔ!’ Nduyɛ mi la wa dimioo ichɔl aa, ‘Maa paaleŋ le siɔ niŋ fɔ!’ 68 Chɛhowa cho nya miŋgi Ichipi pila o dɛndɛla mamɛŋndaŋ niŋ, a nɛi o dimul nya aa, ‘Fɛɛŋ bɛɛ la chi lɛ ndu le’ wo. Nduyɛ, la cho lakɔ yɔŋgɔŋ le mi yaamɔɔwaa nyaa pendu nya o chɛleŋ niŋ, kɛ wana o wana pindu nya niŋ te.”