Sɔɔŋ Sɔvɛŋ Naŋ Pɛɛku o Yaula Tiɔɔŋnda Pitɛ Poonyiaalaŋ Niŋndoŋ

1. Wali yɛɛ Chɛhowa ndoo ke yɛ Pitɛ o mɛɛlula yoomu ndɔɔ?

KIILANƆƆ Pitɛ ndoo sina maa o wa suŋ piɔmndo sɔla. Mbo piɛi Chɛhowa o laalaŋndo choo le wɔsiŋ bɔɔbɔɔ. A teleŋ Chiisu wa o chieeŋndo choo wo, Pitɛ wa a ndu latulu. Nduyɛ, ndu kandu wanaa ve ŋChuu le wa yooŋgu kɛndɔɔ dimullo ni. O faŋaŋ okoŋ kɔɔli, mbo simnuŋ vɛlɛ waŋndo opilɛ o dialii kuumbaŋ choo ve choo. O mɛɛlula yoomu ndɔɔ, mi Chɛhowa chɔɔlu ndu wallo ke tau le tosaa. Naapum chɔŋ a wɔsi 62 kɔ bii wɔsi 64 O Faŋaŋ Chiisu Wo Kɔɔli, mi Chɛhowa ke ndu nyina diandaa le mbo poonyiaa yaulaŋ latiɔɔŋ o Baabuiyo niŋ. Pitɛ tasoo a Pitɛ diiŋ ndɔɔ. Pitɛ ndoo nɔ tiindaŋndo maa, yaula laŋ la cho Kilisiɔŋnda mala o yɔŋ bɛɛ mi ndoo sɔla piɔmndo.—2 Pitɛ 1:​12-15.

2. Le yɛɛ naŋ dimi yɛ maa, a teleŋndo kinɛi Pitɛ poonyiaa yaula ndɔlaŋ ni?

² A teleŋ Pitɛ poonyiaa yaula ndɔla tiɔɔŋndaŋ ndo, “tɔɔndaŋnda yɛ yɛlaŋ” la wa chaaŋaa nduaa laalaŋnda komallo. (1 Pitɛ 1:​6) Wanaa dɛnɛ wɔɔŋnda wa kindiŋndo le pɛɛkula lachoowaa laŋ vɛlɛ a kaala nɔɔlɛilaŋ lueiyo o kundaa niŋ. (2 Pitɛ 2:​1, 2, 14) Nduyɛ Kilisiɔŋaa wa Chulusalɛmnda wa suŋ chɔ “mɛɛlula nyɛ o nyɛ.” Hei sim ni maa, sovɛiyaa maLuomaŋnda wa Chulusalɛm a chiɛi Mɛlɛkaa tɛɛmbuu. (1 Pitɛ 4:​7) Mɛɛ i cho kpendekele maa, mi yaula Pitɛ poonyiaalaŋ la mala Kilisiɔŋnda, le ma biunuŋ tɔɔndaŋnda wa nda komallo laŋ vɛlɛ ma bɛɛndiaŋ le la wa nda komal o chilaŋ niŋndaŋ.b

3. Le yɛɛ naŋ nɔ yɛ miŋ yaasiaa yaula tiɔɔŋnda Pitɛ poonyiaalaŋ?

³ Mi che bɛɛ o Kilisiɔŋaa wa o wɔsiŋ kɛmɛ tasoŋ niŋndo lo Pitɛ poonyiaa yaula ndɔlaŋ ni, kɛ mi Chɛhowa duau laŋ o Diom ndɔɔ niŋ. Lelaŋ, naa bɛɛ tiuba miŋ sɔla hau tɔnɔɔ tau o laŋ niŋ. (Luomaŋ. 15:​4) Maa Kilisiɔŋnda o wɔsiŋ kɛmɛ tasoŋ niŋ, naa bɛɛ cho hau o chieeŋ cho o piaa cha a kaala nɔɔlɛilaŋ ndo niŋ. Nduyɛ mi tɔɔndaŋnda tosa ndi ikala le Chɛhowa piɛiyo laŋ la komal naa. Le handɔɔ lechoo, naa bɛɛ cho suŋ hunɔɔ nyɛpalaa bɛndoo chɔ o yɔŋnɔŋndo. Nduyɛ, nyɛpalaa koŋ hiau niŋ o yɔŋnuŋ a teleŋ Chuuwa wo. Ŋ tiuba miŋ saaluŋ sɔɔŋ sɔvɛ sɔviɔŋ o yaula tiɔɔŋnda Pitɛ poonyiaalaŋ niŋ. Sɔɔŋ muŋ nɔla miŋ mala naa miŋ kɛsiŋ paale Chɛhowaleŋ o kɔl, miŋ soliŋ siooŋii wanachioo o kɔl, vɛlɛ miŋ kaaliaŋ vellaa velle a kɔllo kpou. Sɔɔŋ muŋ tiu vɛlɛ ba miŋ mala bɛnduaa kundaa le ma manda saa Mɛlɛkaa nyɛkɛndɛi.

KƐSIŊ PAALE CHƐHOWALEŊ O KƆL

4. A mɛɛ 2 Pitɛ 3:​3, 4 dimi yɛ, yɛɛ tosa yɛ lepum mi laalaŋ naa kuɛ le tolɔɔ toolo?

⁴ Hau, wanaa laalaŋ huuluŋ cho o Baabuiyo niŋndoŋ te wa, cho naa a balaa silɔ. Mi wanaa simul naa wa mam naa le mɛɛ naŋ cho niŋ mɛɛlula chieeŋndo hoo chumndo le wɔsiŋ bɔɔbɔɔ yɛ. Nduyɛ mi waŋnda apum dimi maa, fɛɛŋ bɛɛ mɛɛlulaŋ la hiŋ niŋ te. (Nuawɔ 2 Pitɛ 3:​3, 4.) Te ŋ tuei pɛ wanaa naŋ dimul yooŋgu kɛndɔɔ wa, wanaa naŋ tosa wallo wa, ɔɔ wanayɛi nɛi sɔɔŋ muŋ dimioo, lepum mi laalaŋ naa kuɛ le tolɔɔ toolo. Mi Pitɛ tɛɛsiaa nyɛ mala naa o hei niŋndo.

5. Yɛɛ mala yɛ naa miŋ nɔ yiyaŋ kɛndɔɔ a mɛɛlula chieeŋ dɛnɛ wɔɔŋndo hoo okɔɔ? (2 Pitɛ 3:​8, 9)

⁵ Lepum, mi waŋnda apum yiyaŋ maa Chɛhowa cho pindiei tosaa le chieeŋ dɛnɛ wɔɔŋndo hoo tɛɛmbuuwo. Diomnda Pitɛ laŋ la tiuba mi la mala naa miŋ nɔ yiyaŋ kɛndɔɔ, vɛlɛ mi la loonuŋ naa maa, mɛɛ Chɛhowa cha teleŋndaŋ yɛ cho teŋgeŋ a mɛɛ waŋnda chieeya cha laŋ yɛ. (Nuawɔ 2 Pitɛ 3:​8, 9.) Le Chɛhowa, wɔsilaŋ waa pilɛ cho ko maa paaleŋ lepilɛ. O cho biuwɔŋndo kanifuule, o yeema mi wana o wana sɔla tambei le. Kɛ te paale o kɛɛsiaa leŋ le fuuluu pɛ, o cho chieeŋ dɛnɛ wɔɔŋndo hoo tɛɛmbuu. Nuawɔ se dikeŋnaŋ bɛndu naŋ nɔ, le teleŋ lo hoo wo soliŋndo kpeku le waŋnda chieeŋndo balɔɔ silɔ dimullo a yooŋgu kɛndɔɔ okɔɔ wo!

6. Vɛɛ naŋ ‘kɛsiŋ yɛ paale Chɛhowaleŋ o kɔl kpiŋ’? (2 Pitɛ 3:​11, 12)

⁶ Mi Pitɛ dɛɛniaa naa le miŋ ‘kɛsiŋ paale Chɛhowaleŋ o kɔl kpiŋ.’ (Nuawɔ 2 Pitɛ 3:​11, 12.) Vɛɛ naŋ tosa yɛ hei? Ŋ tosa hei te ŋ wa pɛ yiyaŋndo lepaa o lepaa a salala naŋ sɔla niŋ o chieeŋ sɛnɛiyo niŋndaŋ okɔɔ. Yiyaŋ a mɛɛ ŋ wa niŋ o chieeŋ sɛnɛiyo niŋ, mi hueiyii kɛndɛi wa num hɔŋndo, ma wa nyɛdiaa kɛndɔɔ dioo, vɛlɛ ma wa wanaa num aa kaalaa vi ma wa miiŋgoo yoomu wa demullo. Yiyaŋndɔ vɛlɛ mɛɛ ŋ pɛɛku niŋ wanaa vi niŋ le teleŋ vilɛiya, a mɛɛ huuluŋ cho o Baabuiyo niŋndoŋ peeluŋ yɛ okɔɔ. Hei tosaa cho num mala ma kɛsiŋ paale Chɛhowaleŋ o kɔl, vɛlɛ ma nɔ tiindaŋndo kɛsɛ maa, o palɛi mɛɛlɛi niŋ naŋ cho ni. Mɛɛ naŋ ‘sina niŋ sɔɔŋ nɔ le yɔŋnɔŋndo o chilaŋ niŋndoŋ’ yɛ, maa ŋ chɛlnuŋ mi wanaa lachoowaa “faŋa [naa] o nɛi sakpoo choo” le.—2 Pitɛ 3:​17.

SOLIŊ SIOOŊII WANACHIOO O KƆL

7. Vɛɛ siooŋii wanachioo piiliaŋ yɛ naa?

⁷ Te ŋ ‘kɛsiŋ pɛ paale Chɛhowaleŋ o kɔl kpiŋ,’ keŋ cho naa nyindɔɔ, miŋ dimul acheleŋnda yooŋgu kɛndɔɔ. Kɛ teleŋndaŋ lapum, mi siooŋnde wa naa le suɛi o acheleŋnda lo. Le yɛɛ? Kanifuule, lepum mi siooŋnde bii naa le wanachioo. Mi i waa nuaa yɔŋnuŋ Pitɛ. O nyumma nda kilul Chiisu yamɛi yaŋ choo, mi Pitɛ kɛɛ le chɔɔmɔŋndo maa buɛi Chiisu wo o wa ni, nduyɛ mbo viinuŋ maa o sina ndu le. (Maa. 26:​69-75) Mi Pitɛ pilɔɔ hoo kpe mɛɛlu dimi a tiindaŋndo aa: “La yɔŋ isiooŋ le nyɛ waŋnda nɔ siooŋnde wo le. Nduyɛ la chɛl mi nyɛ o nyɛ paaliaŋ nya le.” (1 Pitɛ 3:​14) Nyɛ Pitɛ dimi hoo wo ke naa tiindaŋndo maa, ŋ tiuba miŋ soliŋ siooŋii wanachioo o kɔl.

8. Yɛɛ mala yɛ naa miŋ soliŋ siooŋii wanachioo o kɔl? (1 Pitɛ 3:​15)

⁸ Yɛɛ mala yɛ naa miŋ soliŋ siooŋii wanachioo o kɔl? Mi Pitɛ dimul naa aa: “La ke Masanɔ nyaa Kiliti bɛɛleŋ o kɔlta nyalaŋ niŋ.” (Nuawɔ 1 Pitɛ 3:​15.) Hei sim ni maa, ŋ nɔ miŋ wa yiyaŋndo a foofo Masanɔ naa Chiisu Kiliti nɔ wo, vɛlɛ a kpaaya ndɔɔ okɔɔ. Te o yɔŋ pɛ ma sɔla fondaa le acheleŋnda yooŋgu kɛndɔɔ dimullo kɛ ma wa buulaŋndo ɔɔ mi siooŋnde wa num, loonuŋ a Masa naa okɔɔ. Kindiŋ ma cheŋnuŋ o kɔl mɛɛ Chiisu cho o masaleŋ choo o choo choo niŋ, mi maalikɛiya o miiliɔŋndaŋ niŋ wa ndu a balaa silɔ yɛ okɔɔ. Loonuŋ maa, Mɛlɛka ke ndu “kpaayaa nyɛ o nyɛ choo o choo choo niŋ a o lɛŋndeŋ choo,” vɛlɛ maa o cho wa a naa “latulu lepaa o lepaa haaa mi chieeŋndo fuuluu o mɛɛlulaŋ.” (Maa. 28:​18-20) Mi Pitɛ dɛɛniaa naa le miŋ “wa a bɛɛndiaŋnda lɔɔlɔɔ,” le waŋnda tɛɛsiallo a laalaŋ naa okɔɔ. Baa a yeema pa ma dimi yooŋgu kɛndɔɔ o fondaŋ ŋ tosa wallo wo, o sukuu ɔɔ o fondaŋ cheleŋ? Te a yeema pɛ hei tosaa, mɛɛ yiyaŋ a nyɛ ŋ nɔ ma dimi wo okɔɔ, nduyɛ ma bɛɛndiaŋ nyɛkɛndɛi tuupa mi teleŋ koŋ fuuluu. Piɛi o Chɛhowa lo le kɔl simulaa, nduyɛ ma nɔ tiindaŋndo maa o cho num mala le siooŋii wanachioo soliŋndo o kɔl.—Walta. 4:​29.

Ŋ NƆ MIŊ “KAALIAŊ VELLAA VELLE A KƆLLO KPOU”

9. A teleŋ pilɛ, vɛɛ Pitɛ kɛɛ yɛ puaapiliaa nduaa kaalaa chɔmndo? (Tofa vɛlɛ fotueiyo.)

⁹ Mi Pitɛ pɛɛku le puaapiliaa a ndepiliaa nduaa kaalaa chɔmndo. O wa o hɔlndɔ mi Chiisu dimi aa: “I cho nya sawa sɛnɛiyo ke. Ndu cho ni maa, la kaaliaŋ vellaa velle. Mɛɛ ya kaala nya yɛ, nya bɛɛ la kaaliaŋ lende vellaa velle.” (Chɔŋ 13:​34) A koŋ kpou, le mɛɛ Pitɛ ndoo nɔ siooŋnde le Kilisiɔŋaa Chuuwa yɛ, mbo pɛŋgi nyɛdiaa dioo a puaapiliaa nduaa ve ŋChuu le wa. Mi kiilanɔɔ Pɔɔl veelu nyɛ Pitɛ tosa koŋ ndo aa, ‘kaa mulu muluaŋndo.’ (Kalee. 2:​11-14) Mi Pitɛ chɛl sila nda ke ndu koŋ ndo, nduyɛ mbo pɛɛku nyɛ leniŋ. O yaula o poonyiaalaŋ niŋ, mbo kindila maa, ŋ nɔ ko miŋ dimi maa ŋ kaala puaapiliaa a ndepiliaa naa le. Kɛ ŋ nɔ miŋ chɔm nda kaalaa.

10. Te o yɔŋ pɛ miŋ nɔ ‘kaala mulu muluaŋndo’ le chaaŋaa naa laalaŋnda le, mɛɛ yɛɛ keŋ chɔm yɛ? Tɛɛsiaawɔ. (1 Pitɛ 1:​22)

¹⁰ Mi Pitɛ dimi maa, ŋ nɔ miŋ nɔ ‘kaala mulu muluaŋndo’ le chaaŋaa naa laalaŋnda le. (Nuawɔ 1 Pitɛ 1:​22.) Te ŋ nɔ kaala waa nuaa le, keŋ cho chɔm maa, ŋ “diikuŋ tonyaa.” Nduyɛ tonya koŋ otiŋ cho ni maa, “Mɛlɛka hɛli ŋwaŋnda chiee le.” (Walta. 10:​34, 35) Te o yɔŋ pɛ miŋ chɔm puaapiliaa a ndepiliaa apum kaalaa o kundaa niŋ, kɛ miŋ chɔm acheleŋnda kaalaa le, mɛɛ ŋ tiuba miŋ dimi maa ŋ cho sawa Chiisu ke naa le kaalaa chɔmndo wo diikɔŋndo le. I cho tonya maa, maa Chiisu, lepum o cho a waŋnda kpou le naŋ wa o chaŋyɛi kpɛɛluŋnde niŋ te. (Chɔŋ 13:​23; 20:​2) Kɛ mi Pitɛ loonuŋ naa maa, ŋ nɔ miŋ kindiŋ le ‘puaapiliaa naa kpou kaalaa’ kanifuule, o yuŋgu pilɔɔ niŋ naŋ cho ni.—1 Pitɛ 2:​17.

11. Yɛɛ o sim yɛ le ‘kaaliaŋndo vellaa velle a kɔllo kpou’?

¹¹ Mi Pitɛ dɛɛniaa naa le miŋ “kaaliaŋ vellaa velle a kɔllo kpou.” O hei niŋ, ‘kaaliaŋndo vellaa velle a kɔllo kpou’ sim le waŋndo kaalaa chɔmndo o yɔŋ bɛɛ mi i wa ikala num o ba le tosaa. Le tamaseliiyo, te o yɔŋ yɛ mi puaapilɛnɔɔ tɛɛmbuu naa kɔllo, ɔɔ mbo pilaŋ naa tana o nɛilaŋ lapum choo? O tasela ndɔ, yeemɛi nɛi wa ni le ndu maa miŋgullo. O cho le ndu kaala chɔm te. Kɛ mi Pitɛ pɛɛku Chiisu o ba maa, maa miŋgiaa nɛŋi Mɛlɛka kɔl te. (Chɔŋ 18:​10, 11) Mbo poonyiaa aa: “Te waŋndo tosal nya suɛi wɔɔŋnde pɛ, la miŋgul ndu maa le. Te o yei nya pɛ, la miŋgi le. Kɛ la dɔu wana koŋ sala.” (1 Pitɛ 3:​9) Chɛl mi kaala ŋ nɔ le puaapiliaa a ndepiliaa numnda wo nyindu num le ma mal wana koŋ haki, o yɔŋ bɛɛ mbo tɛɛmbuu num kɔllo.

12. (a) Yɛɛ ‘kaaliaŋndo a kɔllo kpou’ nyindu yɛ naa le tosaa? (b) A mɛɛ vidueiyo hoo, Manda Ke Sɔvɛ Naŋ Nɔ Le Waa o Diompilɔɔ Niŋndo chɔm yɛ, yɛɛ ŋ nɔ yɛ ma kindiŋ le tosaa?

¹² O yau tase Pitɛ poonyiaa wo niŋ, mbo soliŋ diomndaŋ ndaŋ la “kaaliaŋ vellaa velle a kɔllo kpou” kpeku. Kaala waa nuaa kumbu ko hakilaŋ nyɛɛmbɔ le. Kɛ mbo “kumbu hakila bɔɔbɔɔ.” (1 Pitɛ 4:​8) Naapum, mi Pitɛ loonuŋ sɔɔŋ sɔvɛŋ Chiisu pɛɛku ndu a acheleŋnda malɔɔ haki woŋ okɔɔ. A teleŋ koŋ, naapum mbo yiyaŋ maa, te o mal pɛ puaapilɛnɔ ndɔɔ haki le “bɛmbɔɔ le ŋɔmmɛu,” mɛɛ kaa kɛndɔɔ o cho koŋ chɔmndo ni. Kɛ mi Chiisu pɛɛku ndu vɛlɛ a naa kpou, le miŋ mal acheleŋnda haki “bɛmbɔɔ 77.” Keŋ sim ni maa, acheleŋnda malɔɔ haki nɔ lamɛɛlu le. (Maa. 18:​21, 22) Te o yɔŋ pɛ ma che ndi ikala le silaa hoo dɔwɔɔ o wali niŋ, mɛɛ tambu kɔl te. Buɛiyaa Chɛhowaa kpou, teleŋndaŋ lapum mi i wa ikala nda o ba le acheleŋnda malɔɔ haki. Nyɛ sɔvɛ ŋ nɔ ma tosa suŋ suŋndo cho ni maa, a nɔ ma kindiŋ o nɛi o nɛi niŋ le ma mal puaapilɛnɔ numndo haki, nduyɛ ma tosa a sabu le mi la wa o kɔl nyulu niŋ.c

BƐNDUAA KUNDAA, LA MANDA SAA MƐLƐKAA

13. Lepum, le yɛɛ i wa yɛ ikala bɛnduaa kundaa o ba, le ma nuuviaa teleŋndo le puaapiliaa a ndepiliaa ndaa kɔltaŋ dɛɛniaa?

¹³ Naapum, pesiŋ bɛɛ Pitɛ puɛɛnuŋ a nyɛ Chiisu dimul ndu wo le, mɛɛ o miiŋgu yoomu. Mbo dimul ndu aa: “Manda saa niaa pɔmbuaa.” (Chɔŋ 21:​16) Te bɛndu kundaa ŋ cho ni, mɛɛ a sina maa num bɛɛ diomndaŋ ndaŋ la piiliaŋ num. Lepum, mi i wa ikala bɛnduaa kundaa o ba, le ma nuuviaa teleŋndo le wali sɔviɔɔ hoo tosaa. Bɛnduaa nɔ fɛŋ ma ke yuŋgula ndalaŋ nyɛm nda hauba woŋ, ma dɛɛniaa nda kɔltaŋ, vɛlɛ ma mala nda o Mɛlɛka piɛiyo niŋ. Ma chua vɛlɛ chilaŋ o wali pollo niŋ, nduyɛ ma bɛɛndiaa vɛlɛ sɔɔŋ le bɔŋaŋnda naalaŋ, bɔŋaŋnda ibuŋgalaŋ, a la bɛŋndaŋ. Bɛnduaa apum nɔ vɛlɛ kalaŋndo le wallo tosaa latulu a Kunda Suaa o Wanaa Chiɔuwaa Lo Wo ɔɔ Kunda Cho le Toŋgola leMasalaŋ Taŋgullo Wo. A tonya, bɛnduaa kundaa cho kpɔndi kpɔndi.

14. Yɛɛ tiu yɛ ba mbo nyindu bɛnduaa kundaa le saa Mɛlɛkaa mandaa? (1 Pitɛ 5:​1-4)

¹⁴ Mi Pitɛ dimul chaaŋaa nduaa bɛnduaa kundaa aa: “La manda saa Mɛlɛka ke nya le mandaa wa.” (Nuawɔ 1 Pitɛ 5:​1-4.) Te bɛndu kundaa ŋ cho ni, ŋ sina maa a kaala puaapiliaa a ndepiliaa numnda, nduyɛ a nɔ yeemɛi le nda kɔltaŋ dɛɛniaa. Kɛ lepum, ma yiyaŋ maa a cho o saŋgɛi yɔkɔɔ ɔɔ a cho bɔɔ kpɔndi kpɔndi le wali keŋnuŋ num hoo wo tosaa. Yɛɛ ŋ nɔ yɛ ma tosa? Piɛi o Chɛhowa lo a ndi okɔɔ, nduyɛ ma dimul ndu mɛɛ ŋ cho sinaŋndo yɛ. Mi Pitɛ poonyiaa aa: “Te le wallo tosaa [waŋndo sɔla kioo] ni, o tosa ndu mɛɛ Mɛlɛka ke ndu yoomuaŋ yɛ.” (1 Pitɛ 4:​11) I cho tonya maa, bahawɛilaŋ lapum la komal puaapiliaa a ndepiliaa naa laŋ, pesiŋ bɛɛ ŋ chii niŋ laŋ soli kpou o chieeŋ dɛnɛ wɔɔŋndo hoo niŋ te. Kɛ loonuŋ maa, “wana mandaa lasaa bɛndoo” Chiisu Kiliti, cho nda mala mbo hiou mɛɛ ŋ tiuba le tosaa yɛ. O nɔla mbo tosa hei suŋ suŋ vɛlɛ a o chieeŋ sɛnɛiyo niŋ. Nyɛ kinɛi Chɛhowa yeema mi bɛnduaa kundaa tosa wo cho ni, a nɔ ma kaala puaapiliaa ndaa, ma dɛɛniaa nda kɔltaŋ, vɛlɛ ma “wa maa tamasi” le nda.

15. Vɛɛ bɛndu kunda pilɛ dɛɛniaa yɛ puaapiliaa a ndepiliaa nduaa kɔltaŋ? (Tofa vɛlɛ fotueiyo.)

¹⁵ Puaapilɛnɔ viou niŋ waa bɛndu kunda wo diolaŋ Wuliɛm, bii bila mɛɛ i cho suɛi sɔvɛ le saa Mɛlɛkaa mandaa yɛ. Mɛɛ Naa Kolonaa kanduŋ, mi ndu nda chaaŋaa nduaa bɛnduaa kundaa tosa kɛɛsiaa, le mi bɛndu kunda kɛ kɛ veelu wanaa cho o kunda wali poli ndɔɔ niŋ nda lɔɔ o lɔɔ. Mbo tɛɛsiaa le sabu ndaa tosa heiyo. Mbo dimi aa: “Puaapiliaa bɔɔbɔɔ waŋnuŋ kpeele o la ndalo bɛɛ. Nduyɛ a teleŋ koŋ, haupa mi waŋndo ndoo kandu yiyaŋnda wɔɔŋndaŋ nɔɔ.” Te puaapiliaa a ndepiliaa wa pɛ Wuliɛm bahawɛila ndalaŋ chɔmndo, mbo yaŋ nilaŋ yekeŋ le chɔɔ nyɛm nda hauba woŋ, vɛlɛ a yeemaŋ ndaŋ. Okoŋ, o nuuviaa nyɛ kpeekpei mala puaapilɛnɔɔ ɔɔ ndepilɛnɔ koŋ ndo. Nduyɛ teleŋnda bɔɔbɔɔ, vidueilaŋ o tɛɛŋgii nɛi choo o soliŋ kpeku ni le nda malaa. Mbo dimi aa: “Puaapiliaa a ndepiliaa naa yeema kɔl dɛɛniaa suŋ suŋ, mbo hiau maa paandu. Sɛmbɔɔ pila naŋ duau ni le waŋnda malaa ma pɛɛku a Chɛhowa okɔɔ. Lelaŋ, ŋ nɔ miŋ dɔu sɛmbɛ waa lende le saa Chɛhowaa mandaa, nduyɛ miŋ mala nda ma lo o tonyaa niŋ.”

CHƐL MI CHƐHOWA SIOU NUM PƐƐKU

16. O nɛila kuɛɛ choo naŋ duau yɛ sɔɔŋ sɔvɛŋ naŋ pɛɛku, o yaula tiɔɔŋnda Pitɛ poonyiaa laŋ niŋndoŋ o wali niŋ?

¹⁶ O buŋgɛi hei niŋ, sɔɔŋ sɔviɔŋ nyɛɛmbɔ koni naŋ yaasiaa o yaula Pitɛ poonyiaalaŋ niŋ ni. Naapum ma saaluŋ naa ŋ nɔ ma tosa hiouwɔɔ lachioo wa. Le tamaseliiyo, baa a yeema pa ma wa yiyaŋndo teleŋ o teleŋ a salala naŋ sɔla niŋ o chieeŋ sɛnɛiyo niŋndaŋ okɔɔ? Baa a kɛsi pa kpeleŋndo le yooŋgu kɛndɔɔ dimioo o fondaŋ num wallo, o sukuu ɔɔ o fondaŋ cheleŋ? Baa a saaluŋ pa nɛila ŋ tiuba ma chɔɔlu puaapiliaa a ndepiliaa numnda kaala a kɔllo kpou laŋ? Bɛnduaa kundaa, baa la kɛɛsiaŋ pa o kɔl le saa Chɛhowaa mandaa a kɔllo kpou, vɛlɛ mi la nɔ yeemɛi le ndi tosaa? Te o yɔŋ pɛ ma yaasiaŋ o nɛiyo hoo choo, nduyɛ ma che naa ŋ vi ŋdialla, mɛɛ tambu kɔl te. Loonuŋ maa ‘Masanɔ naa Chiisu, cho wana kɛndɛ.’ O cho num mala le ma tosa hiouwɔɔ lachioo. (1 Pitɛ 2:​3) Mi Pitɛ ke naa tiindaŋndo aa: “Mɛlɛka . . . cho nya siou pɛɛku. O cho tosa mi la sim yi, mbo luei nya yoomuaŋ, nduyɛ mbo tosa la hiiluŋ te.”—1 Pitɛ 5:​10.

17. Te a hiou pɛ lachi a Chɛhowa piɛiyo o laalaŋndo choo, nduyɛ ma chɛl le mbo siou num pɛɛku, yɛɛ cho yɛ wa fulamakɔɔlioo?

¹⁷ A teleŋ pilɛ, mi Pitɛ yiyaŋ maa o cho o sɔvɛ le mbo sɔɔŋguu Po Mɛlɛkaa ikɛi le. (Luku 5:​8) Kɛ a mala Chɛhowa nda Chiisu ke ndu wo, mbo tosa wallo kalaŋ le mbo hiou lachi a Chiisu tolɔɔ kɔɔli. Fulamakɔɔlioo wa ni, mi Pitɛ sɔla dioo, “le luɛiyɔɔ o Masale fafɛɛŋ Masanɔ naa, a wana naa piŋiaa Chiisu Kiliti leŋ niŋ.” (2 Pitɛ 1:​11) Nuawɔ se fanda bɛndu o sɔla wo! Te a hiou pɛ lachi a Chɛhowa piɛiyo o laalaŋndo choo maa Pitɛ, nduyɛ ma chɛl le mbo siou num pɛɛku, num bɛɛ o cho num fanda a yoomu fafɛɛŋndo o chilaŋ niŋ. A tonya, “laalaŋ [numndo] cho num hunɔɔ piŋi.”—1 Pitɛ 1:​9.