Wanaa Num aa Kaalaa Cho Miiŋgu Yoomu!

Mi piɔmndo chuu naa kɔl tambɛiyo a mɔnɛi tau. Lelaŋ pɛŋ Baabuiyo veelu ndu ni aa yaamɔɔnɔɔ. (1 Kɔliŋtiaŋ 15:​26) O Suɛi Lebolii 27 ve niŋ, miŋ pɛɛku maa Chɛhowa cho hunɔɔ yaamɔɔnɔɔ hoo tɛɛmbuu. Kɛ yɛɛ cho yɛ yɔŋnɔŋ a wanaa vi niŋnda? O suɛi lebolle hei bɛŋgu, ŋ cho chɔɔlu pɛɛku a tiindaŋ sɔvɛ Chɛhowa ke naa vɛlɛ wo okɔɔ. O cho waŋnda miŋgi yoomu o kɛmɛ chuu chɔm te laŋ niŋ, ma wa achal lefafɛɛŋ. A tonya, o cho nda miŋgi yoomu pila! Baa keŋ cho pa yɔŋnɔŋ kɛsɛ? Baa o choo choo niŋ nda cho wa ni ɔɔ o lɛŋndeŋ choo?

1. Yɛɛ Chɛhowa yeema yɛ mbo tosa le wanaa naa kaalaa vi wa?

Chɛhowa cho a yeemɛi le mbo huŋ miŋgi wanaa vi wa yoomu pila. Wana laalaŋndo Choobu wa ni. Nduyɛ ndoo nɔ tiindaŋndo maa te o vi pɛ, Mɛlɛka puɛɛnuŋ niŋ a ndu le. Mbo dimul Mɛlɛka aa: ‘A cho ya veelu nduyɛ mi muli num diom [o sɛiyo niŋ].’—Nuawɔ Choobu 14:​13-15.

2. Vɛɛ naŋ looku yɛ sina maa wanaa vi wa cho hunɔɔ miiŋgu yoomu?

Teleŋ Chiisu wa o chieeŋndo choo wo, mi Mɛlɛka ke ndu kpaayaa le wanaa vi wa miŋgioo yoomu. Le tamaseliiyo, mbo miŋgi chuaambɔ wɔsila 12 ndoo vi wo yoomu, vɛlɛ a chua ndoo vii pɔnɔɔ wo po ndɔɔ. (Maki 5:​41, 42; Luku 7:​12-15) Okoŋ kɔɔli mi Lasalɔɔ, chaaŋ o Chiisu bɛɛ wu. Mi che bɛɛ palɛi ihiɔɔlu ndii hiou niŋ mɛɛ nda kumbu Lasalɔɔ, kɛ mi Chiisu miŋgi ndu yoomu. Mɛɛ o piɛi o Mɛlɛka lo, mbo muli hɔlla o sɛiyo okoŋ mbo dimi choo choo kpeleŋ aa: “Lasalɔɔ, fula!” Mi po wa hoo o vilɛiyo wo miiŋgu yoomu, mbo fula! (Chɔŋ 11:​43, 44) Yiyaŋndɔ a mɛɛ yuŋgu Lasalɔɔ wo a chaaŋaa nduaa wa a nyaale yɛ!

3. Tiindaŋ yɛɛ cho yɛ le wanaa num aa kaalaa vi wa?

Baabuiyo mɛi lediom maa waŋnda “cho miiŋgu yoomu.” (Walta Kiilaa 24:​15) Wanaa Chiisu ndoo miŋgi yoomu wa, o kɛ kɛ ndoo kue choo choo le. (Chɔŋ 3:​13) Mbo miŋgi nda yoomu o chieeŋndo choo naŋ, nduyɛ ma naŋ kɔl le keŋ. Chiisu cho suŋ waŋnda hunɔɔ miŋgi yoomu o kɛmɛ chuu chɔm te laŋ niŋ, le ma tuei yoomoo yeela lefafɛɛŋ o kpele hɛnɛkiɔɔ niŋ o chieeŋndo choo. Chiisu dimi maa wanaa “cho o sɛila loonaŋndaŋ niŋnda” kpou cho hunɔɔ miiŋgu yoomu. O yɔŋ bɛɛ mi waŋnda puɛɛnuŋ niŋ a nda okɔɔ, kɛ Mɛlɛka cho loonɔŋ a nda mbo miŋgi nda yoomu.—Chɔŋ 5:​28, 29.

CHƆƆLU YAASIAA

4. Mi Chiisu chɔm maa o nɔla mbo miŋgi wanaa vi wa yoomu

Chɔɔlu pɛɛku ma sina nyɛ Chiisu tosa le Lasalɔɔ chaaŋ ndɔ wo. Nuawɔ Chɔŋ 11:​14, 38-44, okoŋ mi la suukaŋ o nyunalaŋ ndaŋ choo:

• Vɛɛ naŋ looku yɛ sina maa mi Lasalɔɔ wu pɛ?—Tofa sɔɔŋ 39.

• Te o yɔŋ pɛ aa choo choo Lasalɔɔ ndoo kuɛ ni, a yiyaŋ pa maa Chiisu wa vɛlɛ ndu miŋgi yoomu o chieeŋndo choo?

Handu VIDUEIYO.

VIDUEIYO: Chiisu Miŋgi Lasalɔɔ Yoomu (1:​16)

5. Waŋnda cho miiŋgu yoomu o kɛmɛ chuu chɔm te laŋ niŋ!

Nuawɔ Sam 37:​29, okoŋ mi la suukaŋ o nyunaa hoo choo:

• Kuɛɛ wanaa cho hunɔɔ miiŋgu yoomu o kɛmɛ chuu chɔm te laŋ niŋnda cho yɛ wa?

O cho ko wanaa cho Chɛhowa piɛiyo wa le Chiisu cho hunɔɔ miŋgi yoomu le. Nuawɔ Walta Kiilaa 24:​15, okoŋ mi la suukaŋ o nyunaa hoo choo:

• Nɛɛnɛ num yeema yɛ mbo huŋ miiŋgu yoomu?

Yiyaŋndɔ a hei okɔɔ: Chiisu nɔla mbo miŋgi waŋndo yoomu bɛɛŋ bɛɛŋ, mbo hiou bɛɛ mɛɛ finyaa tindi naa po ndɔɔ o luaŋ yɛ

6. Fulasɛiniŋndo nɔla mbo ke num kɔl dɛɛniaa a tiindaŋndo

Kona cho o Baabuiyo niŋ a chua Chaaliɔɔ wo okɔɔ wo, dɛɛniaa niŋ wanaa bɔɔbɔɔ kɔltaŋ a wanaa ndaa kaalaa vi wa. Nuawɔ konaa hoo o Luku 8:​40-42, 49-56.

Tuupa mi Chiisu miŋgi chuaambɔɔ hoo yoomu, mbo dimul Chaaliɔɔ finya ndɔ aa: “Buulaŋ te. Num nɔ laalaŋndo suee.” (Tofa sɔɔŋ 50.) Vɛɛ tiindaŋ fulasɛiniŋndo dɛɛniaa yɛ num . . .

• te wana ŋ kaala wo vi pɛ?

• te yoomu numndo wa pɛ o kpundɔɔ niŋ?

Handu VIDUEIYO, okoŋ mi la suukaŋ o nyunaa hoo choo:

VIDUEIYO: Tiindaŋ Fulasɛiniŋndo Ke Naa Kɔl Sikpaa—Vɛɛnɛ? (3:​21)

• Vɛɛ tiindaŋ fulasɛiniŋndo dɛɛniaa yɛ wanaa velu Fɛlisiti wa kɔllo?

SƆƆŊ KULLOŊ

Baabuiyo mɛi lediom maa wanaa vi wa cho miiŋgu yoomu o kɛmɛ chuu chɔm te laŋ niŋ. Chɛhowa yeema nda ma miiŋgu vɛlɛ yoomu. Nduyɛ, o ke Chiisu kpaayaa le hei tosaa.

Nyunala miiŋgaa choo laŋ

• Vɛɛ kɔllo cho yɛ Chɛhowa nda Chiisu le wanaa vi wa miŋgioo yoomu?

• Kuɛɛ wanaa cho miiŋgu yoomu o kɛmɛ chuu chɔm te laŋ niŋnda cho yɛ wa, baa o choo choo niŋ ɔɔ o lɛŋndeŋ choo? Le yɛɛ ŋ dimi yɛ lende?

• Le yɛɛ ŋ laalaŋ yɛ kɛsɛ maa wanaa num aa kaalaa vi wa cho miiŋgu yoomu?

CHƆƆLU SƆƆŊ PUM TOFA

Pɛɛku ma sina nyɛ ŋ nɔ ma tosa le ma biuŋ ndo te wana ŋ kaala wo vi pɛ.

“Malaa le Wanaa Cho Mɔnɛi Biyɔɔ Wa” (“Tiondoo!” No. 3 2018)

Baa sawala mandaala Baabuiyo la nɔla pa mi la mala wana cho mɔnɛi biyɔɔ wo?

Te Wana Ŋ Kaala Wo Vi Pɛ (5:06)

Yɛɛ nɔla yɛ mbo mala chuaambuaa ma biuŋ te wana nda kaala wo vi pɛ?

Sala Baŋaa (2:07)

Baa waŋnda cho pa a cho miiŋgu yoomu ma kuɛ choo choo wa? Nɛɛ yaa cho yɛ miiŋgu yoomu le?

“Yɛɛ Cho yɛ Fulasɛiniŋndo?” (Kɔ o tɛɛŋgei choo)