Chɔm Balika Melaa le Nyɛ Chɛhowa Nda Chiisu Tosa le Numndo

Vɛɛ kɔllo wa yɛ num te chaaŋ num soli pɛ nyɛ kɛndɛ kɛndɔɔ mbo ke num? Ma naŋ kɔl tau nduyɛ ma chɔm maa a nɔ balika melaa le nyɛ o ke num koŋ ndo, lende le? Chɛhowa nda Chiisu ke naa nyɛ cho o sɔvɛ mbo hiau nyɔɔŋ kpou wo. Yɛɛ cho yɛ nyɛ koŋ? Nduyɛ vɛɛ naŋ chɔm yɛ maa ŋ nɔ balika melaa le ndu?

1. Ɔɔ nɛiyo opilɛ o naŋ chɔm maa ŋ nɔ balika melaa le nyɛ Chɛhowa nda Chiisu tosa le naa wo?

Baabuiyo dimi maa “wana o wana dɔu laalaŋndo o [Chiisu] niŋ pɛ,” o cho hunɔɔ wa achal lefafɛɛŋ. (Chɔŋ 3:​16) Yɛɛ o sim yɛ le laalaŋndo dɔwɔɔ o ndu niŋ? O cho ko dimioo maa ŋ laalaŋ o Chiisu niŋ te yeemaŋ naa o ba le. Kɛ, kɛɛsiaala naŋ tosa laŋ a sɔɔŋ naŋ tosa woŋ nɔ miŋ chɔm kɛsɛ maa ŋ nɔ laalaŋndo o ndu niŋ. (Chemisi 2:​17) Te ŋ chɔm pɛ laalaŋ naa o nyɛ naŋ dimi wo niŋ a o naŋ tosa wo, koŋ tosa miŋ nɔ chaŋyɛi kpɛɛluŋnde a Chiisu vɛlɛ a Chɛhowa Finya ndɔ.—Nuawɔ Chɔŋ 14:​21.

2. Bɔŋaŋ teŋgeŋ kuɛɛ mala yɛ naa miŋ chɔm balika melaa le nyɛ Chɛhowa nda Chiisu tosa le naa wo?

Tuupa ma dii Chiisu, mbo chɔm buɛiyaa nduaa nɛi cheleŋ nda chɔm balika melaa le sala soliaŋ ndɔɔ wo. Mbo chuuŋgiaa nda le ma bii bɔŋaŋ teŋgeŋndo opum. Bɔŋaŋndo hoo Baabuiyo veelu ni aa, “Nyɛdiaa Ichɔl Masanɔɔ.” Ndu nda veelu vɛlɛ ni aa, “Loonuŋyaa a Piɔm Kiliti Wo Okɔɔ.” (1 Kɔliŋtiaŋ 11:​20) Chiisu ndoo yeema mi kiilaa nduaa a Kilisiɔŋaa tonyaa kpou ndaa koma wa loonɔŋndo a piɔm o sɔla le nda wo okɔɔ. Le hei, mbo dimul kiilaa nduaa a bɔŋaŋndo hoo okɔɔ aa: “La wa hei tosaa le loonɔŋndo a ya.” (Luku 22:​19) Te a kuɛ pɛ o loonuŋyaa, mɛɛ keŋ chɔm maa a nɔ balika melaa le kaala bɛndu Chɛhowa nda Chiisu nɔ le naa wo.

CHƆƆLU YAASIAA

3. Yɛɛ naŋ tosa yɛ le chɔmndo maa ŋ nɔ balika melaa

Yiyaŋndɔ maa a hiŋ loo o peelo mi waŋndo piŋi num. Baa o bɛnda pa ma puɛɛnuŋ a nyɛ wana koŋ o tosal numndo? Ɔɔ a cho nɛilaŋ nuuviaa le balika melaa chɔmndo le nyɛ o tosal numndo?

Le Chɛhowa naŋ cho ni. Nuawɔ 1 Chɔŋ 4:​8-10, okoŋ mi la suukaŋ o nyunalaŋ ndaŋ choo:

• Le yɛɛ sala soliaŋ Chiisu wo cho yɛ ke teŋgeŋndo?

• Vɛɛ kɔllo cho yɛ num a nyɛ Chɛhowa nda Chiisu tosa le numndo?

Vɛɛ naŋ chɔm yɛ maa ŋ nɔ balikaa melaa le nyɛ Chɛhowa nda Chiisu tosa le naa wo? Nuawɔ 2 Kɔliŋtiaŋ 5:​15 a 1 Chɔŋ 4:​11; 5:​3. Te la chii diomndaŋ veelu o bolle Baabuile kɛ kɛ niŋ pɛ, la suukaŋ o nyunaa hoo choo:

• A mɛɛ bolle Baabuileŋ le dimi yɛ, yɛɛ naŋ nɔ yɛ miŋ tosa le miŋ chɔm balika melaa?

4. Tol tamasi Chiisu wo kɔɔli

Nɛi cheleŋ naŋ chɔm balika melaa wo cho tamasi Chiisu wo tolɔɔ kɔɔli ni. Nuawɔ 1 Pitɛ 2:​21, okoŋ mi la suukaŋ o nyunaa hoo choo:

• O nɛila kuɛɛ niŋ ŋ nɔ yɛ ma tol tamasi Chiisu wo kɔɔli nyɛkɛndɛi?

5. Wa bɔŋaŋ Loonuŋyaa biyɔɔ

Le sinaa mɛɛ bɔŋaŋ tase Nyɛdiaa Ichɔl Masanɔɔ ndoo tosaŋ yɛ, nuawɔ Luku 22:​14, 19, 20. Okoŋ, mi la suukaŋ o nyunalaŋ ndaŋ choo:

• Yɛɛ tosaŋ yɛ o bɔŋaŋ Nyɛdiaa Ichɔl Masanɔɔ?

• Yɛɛ beediiyo a muɛiyaŋ ma sim yɛ lewundu?—Tofa sɔɔŋ 19 a 20.

Chiisu ndoo yeema mi buɛiyaa nduaa ndaa wa Nyɛdiaa Ichɔl Masanɔɔ biyɔɔ lepilɛ o wɔsioo niŋ, o paale o vi leŋ choo. Le sinaa tau a bɔŋaŋ teŋgeŋndo hoo, handu VIDUEIYO. Okoŋ, mi la suukaŋ o nyunaa hoo choo:

VIDUEIYO: Loonuŋ a Piɔm Chiisu Wo Okɔɔ (1:​41)

• Yɛɛ yɔŋnuŋ yɛ o Loonuŋyaa?

Beediiyo a muɛiyaŋ ma sim le nyɛ. Beediiyo sim le dialuŋ walaŋ Chiisu soliŋ sala le naa woŋ. Muɛiyaŋ ma sim le kooma nduaŋ

SƆƆŊ KULLOŊ

Ŋ chɔm balika melaa le nyɛ Chiisu tosa le naa wo te ŋ dɔu pɛ laalaŋndo o ndu niŋ, nduyɛ miŋ wa bɔŋaŋ Loonuŋyaa biyɔɔ.

Nyunala miiŋgaa choo laŋ

• Yɛɛ o sim yɛ le laalaŋndo dɔwɔɔ o Chiisu niŋ?

• Vɛɛ num yeema yɛ ma chɔm balika melaa le nyɛ Chɛhowa nda Chiisu tosa le numndo?

• Le yɛɛ i cho yɛ suɛi sɔvɛ le miŋ bii Loonuŋya piɔm Kiliti wo?

CHƆƆLU SƆƆŊ PUM TOFA

Yɛɛ naŋ nɔ yɛ miŋ tosa te ŋ yiyaŋ pɛ a piɔm Chiisu wo okɔɔ?

Mbo Soliŋ Dialuŋ Ndɔŋ Kpeku le Chɛhowa Bɛɛleŋ Kioo (9:​28)

Chɔɔlu pɛɛku a laalaŋndo okɔɔ, nduyɛ a mɛɛ naŋ chɔm maa ŋ nɔ ndu yɛ.

“Dɔu Tiindaŋ Numndo o Mɛila Chɛhowalaŋ Niŋ” (Bandu Mɛŋgɛlaa, Saa 2016)

Tofawɔ bundɛi hei, “I Cho niŋ o Diandaa Nduyɛ Mi Wa Wana Sɔvɛ,” ma che mɛɛ pɛɛkoo a sala baŋaa Chiisu wo okɔɔ mala chua pilɛ yɛ.

“Baabuiyo Siŋga Yoomulaŋ” (Bandu Mɛŋgɛlaa, Saa 1, 2011)

Tofawɔ ma che le sabu wanaa bɔɔ di beediiyo ma kol muɛiyaŋ o loonuŋyaa le wo.

“Le Yɛɛ Seiyaa Chɛhowaa Bii Bɔŋaŋ Nyɛdiaa Ichɔl Masanɔɔ Maa Kaaŋii Cheleŋnde Le?” (Kɔ o tɛɛŋgei choo)