Miiŋgu o Chaŋyɛi Kɛndɛi Niŋ a Chɛhowa

IWƆSI o iwɔsi, mi wanaa ndaa sɔla solioo o kunda leKilisiɔŋndo niŋnda sɔla miŋgioo. Yiyaŋndɔ mɛɛ kpɛ ‘nyaaloo wa o choo choo niŋ’ le hei yɛ. (Luku 15:7, 10) Te o yɔŋ pɛ maa ma sɔla solioo kɛ ma miiŋgu, mɛɛ nɔ tiindaŋndo maa, Chiisu, maalikɛiya a Chɛhowa kpou cho a kɔl kɛndɛ le mɛɛ ŋ miiŋgu o kunda leKilisiɔŋndo niŋ yɛ. Kɛ le ma miiŋgu vɛlɛ o chaŋyɛi kɛndɛi niŋ a Chɛhowa, simultaŋ la cho num wa komallo. Simulta kuɛɛ la cho yɛ laŋ, nduyɛ yɛɛ mala yɛ num le laŋ tiuwo ba?

SIMULTA KUƐƐ CHO YƐ NUM KOMAL?

Mi wanaa bɔɔbɔɔ ndaa sɔla solioo wa, hiouwɔ lachi kɛ a waa a kɔl tambɛiyo mi che bɛɛ a sɔla niŋ miŋgioo. Naapum a cho sinaŋndo mɛɛ Masaa Deeve ndoo sinaŋ yɛ mi che bɛɛ mi Chɛhowa mal ndu haki le yɔŋ ndɔ wɔɔŋndo. Mbo dimi aa: “Sɔɔŋ palaŋ ŋ mel la chɔŋgɔmu.” (Sam 40:12; 65:3) O yɔŋ bɛɛ mi waŋndo miiŋgu Chɛhowa o ibuŋ, lepum mbo hiouwɔ lachi a ndupila tɔɔyaŋndo biyɔɔ ɔɔ mbo nɔ wɔ siɔmbulaŋ le wɔsiŋ bɔɔbɔɔ. Mi Lisabɛɛ, ndepilɛnɔ wa o soliaa le wɔsioŋ hiouwɔɔ 20a dimi aa: “I wa ikala ya o ba le laalaŋndo maa Chɛhowa cho ya malɔɔ haki.” Te a tambu kɔl pɛ, keŋ tosa ma vi vɛlɛ ŋdial o Mɛlɛka piɛiyo niŋ. (Pulɔ. 24:10) Tosa a sabu maa keŋ yɔŋnuŋ num te.

Mi apum wa yiyaŋndo maa a nɔla niŋ sɔɔŋ kpou tosa, le ma miiŋgu vɛlɛ o chaŋyɛi kpɛɛluŋnde niŋ a Chɛhowa le. Le hei ma wa buulaŋndo. Mɛɛ puaapilɛnɔ pilɛ diolaŋ Aŋtuaŋ sɔla miŋgioo, mbo dimi aa: “Mi yiyaŋ maa I puɛɛnuŋ sɔɔŋ yaa tosa paandu o Mɛlɛka piɛiyo niŋndoŋ.” Le mɛɛ apum nɔ yiyaŋ waa nuaa yɛ, mi keŋ tosa a dou lɛ sɛmbɛ tau le ma tosa o nda tiuba o wali Chɛhowaa niŋndo le.

Yiyaŋndɔ a tamaseliiyo hoo. Mi wana hueiye tɛɛmbuu chiɛi ndɔɔ wo tambu kɔl nduyɛ mbo vi ŋdial, te o yiyaŋ pɛ a mɛɛ kpɛ teleŋndo vɛlɛ a wallo yeemaŋ le ndu miŋgioo taŋgullo yɛ. O nɛi pilɛ koŋ choo, te chaŋyɛi numnde a Chɛhowa tambu pɛ, naapum ma yiyaŋ maa, wallo pila yeemaŋ ni le ma miiŋgu o chaŋyɛi kɛndɛi niŋ a ndu. Kɛ nyɛ cho o mala numndo.

Chɛhowa dimi aa: “La huŋ, mi ŋ huŋ dimiŋ diom pilɔɔ.” (Aisaya 1:18) A tosa niŋ wallo kalaŋ le waa o “diom pilɔɔ” niŋ a Chɛhowa. Nduyɛ o kaala num le mɛɛ ŋ dɔu sɛmbɔɔ le keŋ tosaa yɛ. Yiyaŋndɔ a hei okɔɔ. A ke ndu nyɛ o soliŋ kpeku le Setana mulul lo wo.—Pulɔ. 27:11.

Mɛɛ ŋ sɔla miŋgioo, ma sɔɔŋguu Chɛhowa ikɛi, nduyɛ o mɛi lediom maa, ndu bɛɛ cho num sɔɔŋguu ikɛi. (Chemi. 4:8) A koŋ kpou, mi che bɛɛ acheleŋnda sina maa a sɔla miŋgioo o kundaa niŋ, kɛ a nɔ ma tosa nyɛ cheleŋ. Ndu cho ni, a nɔ ma kindi kaala numndo le Finya num a chaaŋ num, Chɛhowa. Vɛɛ ŋ tosa yɛ hei?

KƐSI KPELEŊNDA Ŋ TIUBA MA KOMAL TAŊ

Kindiŋ le kpeleŋnda ŋ tiuba le komallo laŋ kɛsioo. Nduyɛ loonuŋ maa, a nɔ ma hiou lachi a sɔɔŋ iMɛlɛkayaŋ tosaa maa paandu. Sɔɔŋ muŋ ŋpum cho ni, yooŋgu kɛndɔɔ dimioo teleŋ o teleŋ, kɔlaŋ o bɔŋaŋndaŋ, a teleŋndo chuaa latulu a chaaŋaa num aa laalaŋnda. Tofawɔ kpeleŋnda ŋ tiuba ma kɛsi laŋ.

Soo o Chɛhowa lo teleŋ o teleŋ. Finya num bii bila maa, te a hiou pɛ lachi a tɔɔyaŋndo biinɔŋndo le haki ŋ tosa wo, keŋ tosa ndi ikala le ma piɛi o ndu lo. (Luomaŋ. 8:26) Lelaŋ, a nɔ ma “lambaŋ piɛileŋ” o ndu lo. Wa ndu dimullo mɛɛ kpɛ ŋ yeema waa o chaŋyɛi niŋ a ndu yɛ. (Luomaŋ. 12:12) Mi Aŋndelee dimi aa: “Mi yaa bii yapila tɔɔyaŋ, nduyɛ mi siɔmbulaŋ laa wa ya tau. Kɛ teleŋ o teleŋ yaa piɛi pɛ o Chɛhowa lo, mi yaa sinaŋ nyɛkɛndɛi. Nduyɛ mi yaa sinaŋ maa I cho a kɔl nyulu.” Te a sina nyɛ ŋ piɛi Chɛhowa le ndu wo le, mɛɛ tofa piɛile Masaa Deeve ndoo piɛi leŋ mɛɛ o mal yɔŋ ndɔ wɔɔŋndo. Le cho o Sam 51 a 65 niŋ.

Pɛɛku Baabuiyo teleŋ o teleŋ. Hei cho num mala ma nɔ laalaŋ kala kalaa, nduyɛ mi kaala numndo le Chɛhowa kendu poŋ. (Sam 19:7-11) Mi puaapilɛnɔ pilɛ diolaŋ Felipe dimi aa: “Le mɛɛ yaa nɔ kɛɛsiaa le pɛɛkɔŋ ipilayaa tosa le yɛ, ya vi ŋdial ni, okoŋ mi tɛɛmbuu Chɛhowa kɔl. I yeema mi miŋgi vɛlɛ biondɔŋ koŋ tosa le. Le hei, I kɛɛsiaŋ niŋ o kɔl le pɛɛkɔŋ ipilayaa tosaa teleŋ o teleŋ.” Num bɛɛ a nɔla ma tosa nyɛ pilɛ koŋ. Te a yeema pɛ malaa le sinaa sɔɔŋ lebolluŋ ŋ nɔ ma pɛɛku woŋ, a nyuna chaaŋ num kendu o Mɛlɛka piɛiyo niŋndo le mbo mala num.

Miiŋgu o chaŋyɛi kɛndɛi niŋ a puaapiliaa vɛlɛ a ndepiliaa numnda. Mi waŋnda apum a sɔla miŋgioo wa yiyaŋ maa, puaapiliaa a ndepiliaa ndaa niŋ lɛ kɔl a nda le. Mi Lalisa dimi aa: “Siɔmbulaŋ la wa ya bɔɔ. Le hei, le teleŋ vilɛi yaa nɔ yiyaŋndo maa I tɛɛmbuu bɔɔ puaapiliaa a ndepiliaa niaa kɔltaŋ.” Nɔ tiindaŋndo maa bɛnduaa a puaapiliaa vɛlɛ a ndepiliaa numnda kpou yeema num malaa ma miiŋgu o chaŋyɛi kɛndɛi niŋ a Chɛhowa. (Tofa kɔfoo hoo, “Yɛɛ Bɛnduaa Kundaa Nɔ yɛ Ma Tosa?”) A cho a kɔl kɛndɛ le mɛɛ ŋ miiŋgu Chɛhowa o ibuŋ yɛ. Nduyɛ a yeema num ma wa a kɔl kɛndɛ.—Pulɔ. 17:17.

Yɛɛ ŋ nɔ yɛ ma tosa le ma sɔɔŋguu puaapiliaa a ndepiliaa numnda ikɛi kpɛɛluŋ? Wa sɔɔŋ nda cho tosaa woŋ tosaa. Wa kɔlaŋ o bɔŋaŋndaŋ teleŋ o teleŋ a o wali pollo niŋ. Vɛɛ hei cho yɛ num mala? Mi Felix dimi aa: “Puaapiliaa a ndepiliaa wa ya niŋ chumndo kpeekpei le mi miiŋgu Chɛhowa o ibuŋ. Ndaa che ya bɔɔ wana sɔvɛ. Nduyɛ mɛɛ ya miiŋgu, mi nda kpou mala ya le mi sinaŋ maa I miiŋgu yuŋgu nuu tɛɛŋ, vɛlɛ maa Chɛhowa mal la haki fasɛi. Nduyɛ ma mala ya le mi hiou lachi a Chɛhowa piɛiyo.”—Tofa kɔfoo hoo, “Yɛɛ Ŋ Nɔ yɛ Ma Tosa?”

WU ŊDIAL TE

Setana cho wa hiouwɔɔ lachi a tosaa mi simultaŋ la komal num le num dialloŋ diyɔɔ, okoŋ a hiu lɛ lachi a kindiŋndo le miiŋgoo o chaŋyɛi kɛndɛi niŋ a Chɛhowa le. (Luku 4:13) Lelaŋ, hiou lachi a laalaŋ numndo kindioo poŋ.

Mi Chɛhowa mɛi lediom a buɛiyaa nduaa okɔɔ aa: “Saa lo wa, I cho nda nuuwa, a laasiaŋ nda, mi miŋgi nda, a cho a yɔŋulɛiya, mi yiu yiu nda pauve, nduyɛ a nɔ dialuŋ kala le wa, mi mala nda.” (Isi. 34:16) Chɛhowa mala niŋ buɛiyaa nduaa a bɔɔbɔɔ a ndaa sɔla solioo o kundaa niŋ kɛ ma miiŋgu wa, le ma miiŋgu vɛlɛ o chaŋyɛi kɛndɛi niŋ a ndu. Nɔ tiindaŋndo maa, o nɔ yeemɛi le num malaa ma hiou lachi a chaŋyɛi ŋ nɔ a ndu ve kindioo poŋ.

Yɛɛ Bɛnduaa Kundaa Nɔ yɛ Ma Tosa?

Bɛnduaa kundaa nɔ nyɛ sɔvɛ sɔviɔɔ le tosaa. Ndu cho ni, wanaa dimiaa yooŋgu kɛndiaa malaa le ma wa o chaŋyɛi kɛndɛi niŋ a Chɛhowa. Tofawɔ nyɛ nda nɔ ma tosa le wanaa ndaa sɔla solioo o kundaa niŋ, kɛ ma miiŋgu wa.

Ke nda tiindaŋndo. Mi kiilanɔɔ Pɔɔl sina maa naapum, te waŋndo mal pɛ yɔŋndɔ wɔɔŋndo nduyɛ mbo miiŋgu o kundaa niŋ, mbo ‘tambu kɔllo, nduyɛ mbo vi ŋdial.’ (2 Kɔliŋ. 2:7) Naapum mi siɔmbulaŋ la wa ndu ɔɔ mbo wa ndupila tɔɔyaŋndo biinɔŋndo le haki o tosa wo. Le hei mi Pɔɔl yɔŋgu silaa aa: “La mal ndu haki fasɛi, nduyɛ mi la dɛɛniaa ndu.” Wanaa ndaa sɔla solioo o kundaa niŋ ma miiŋgu wa nɔ ma nɔ laalaŋndo maa Chɛhowa kaala nda, nduyɛ chaaŋaa ndaa laalaŋnda bɛɛ. Lelaŋ, te ŋ wa pɛ hiouwɔɔ lachi a nda chandɔɔ vɛlɛ a nda mala nda yeema wo kioo, keŋ mala nda a hiu lachi a kɔllo tambei le.

Piɛi a nda latulu. “Nyɔɔlu wana sakpoo nyɔɔlu Mɛlɛka o piɛileŋ niŋndo nɔ kpaayaa.” (Chemi. 5:16) Mi Lalisa naŋ soo a ndu okɔɔ o buŋgɛi hei niŋndo dimi aa: “Mi dimul bɛnduaa a kiisaŋnda wa ya o kɔltaŋ vɛlɛ a siooŋii wa ya ve. Nduyɛ ma piɛi le ya. Mi keŋ ke ya tiindaŋndo maa bɛnduaa ndaa dounuŋ tumbe a ya le. Ndaa yeema ya malaa le mi miiŋgu o chaŋyɛi kɛndɛi niŋ a Chɛhowa.” Mi puaapilɛnɔ pilɛ diolaŋ Tio dimi aa: “Mi piɛile bɛnduaa piɛi a ya leŋ le ke ya tiindaŋndo maa Chɛhowa kaala ya, nduyɛ maa o kɛndɔɔ o nuuviaa ya o ŋdial ni. O cho sɔɔŋ wɔɔŋ ya tosa woŋ te.”

Bii nda ichaŋya. Mi wanaa ndaa sɔla solioo o kundaa niŋ kɛ ma miiŋgu wa yeema chaŋyaŋ o kundaa niŋ. Mi bɛndu kunda pilɛ diolaŋ Chɔstiŋ dimi aa: “Chua teleŋndo le kɔlaŋ o wali pollo niŋ a nda latulu. Nduyɛ i hiou kpou ve, wa nda kɔlaŋ yilɔɔ o la nda lo bɛɛ. I cho bɔɔ isɔvɛ le mi la wa o chaŋyɛi niŋ.” Mi bɛndu kunda cheleŋ dimi aa: “Te acheleŋnda o kundaa niŋ che pɛ bɛnduaa kundaa chaŋyɛi tosaa a wanaa ndaa sɔla solioo o kundaa niŋ kɛ ma miiŋgu wa, mi keŋ tosa mi nda bɛɛ tosa nyɛ pilɛ koŋ kpe.”

Mala nda le ma pɛɛku. Kilisiɔŋnɔ kendu o Mɛlɛka piɛiyo niŋndo nɔla mbo mala wana ndoo sɔla solioo o kundaa niŋ kɛ mbo miiŋgu wo le mbo nɔ kɛɛsiaa le pɛɛkoo. Mi bɛndu kunda pilɛ diolaŋ Dako dimi aa: “I kaala bɔɔ wanaa ndaa sɔla solioo o kundaa niŋ kɛ ma miiŋgu wa sɔɔŋ ya pɛɛku woŋ chɔmndo. Nduyɛ mi chɔm nda vɛlɛ mɛɛ kpɛ ya tuɛi Baabuiyo pɛɛkoo yeela yɛ. Lepum mi tosa kɛɛsiaa le miŋ pɛɛku buŋgaŋ kɔl dɛɛniaŋ diompilɛ.” Mi bɛndu kunda cheleŋ diolaŋ Klatɔŋ dimi aa: “Mi dɛɛniaa nda le ma nuuviaa bundɔŋ o Baabuiyo niŋ, ŋ velaŋ a bahawɛi ndaa woŋ.”

La kɔ nda yilɔɔ kɔl dɛɛniaa. Wanaa ndaa sɔla solioo o kundaa niŋ kɛ ma miiŋgu wa yiyaŋ maa wanaa kilul waŋnda yamaŋ nda bɛnduaa cho ni. Le hei, la nɔ mi la mala nda ma che nya maa wanaa mandaa lasaa nya cho ni. (Chɛlui. 23:4) La wa chɔ chɔ le nda nilaŋ yaŋɔɔ vɛlɛ a le nda chandɔɔ. Nduyɛ la wa nda veeloo teleŋ o teleŋ. Mi bɛndu kunda pilɛ diolaŋ Makɔs chɔm nyɛ nda tosa wo te a kuɛ pɛ wanaa waa nuaa yilɔɔ kɔl dɛɛniaa. Mbo dimi aa: “Miŋ veelul nda diomndaŋ o bolle Baabuile ke nda kɔl dɛɛniaa leŋ niŋ, okoŋ miŋ chandu nda. Nduyɛ miŋ dimul nda maa, ŋ naŋ bɔɔ kɔl le mɛɛ nda miiŋgu Chɛhowa o ibuŋ yɛ. Te ŋ chii dɔɔ pɛ suukaŋndo a nda, ŋ kɛɛsiaa vɛlɛ paale cheleŋ le nda kɔlaŋ yilɔɔ.”

a Diolaŋ lapum la siŋgaŋ.