Nyunala Wanaa Nua o Yaula Naalaŋ Niŋnda
Mi Deeve dimi o Sam 61:8 niŋ maa o cho Mɛlɛka saŋgala le “teleŋ o teleŋ.” Baa dimioo o wa ni maa fɛɛŋ bɛɛ o vi niŋ te?
Sako. Kɛ nyɛ o dimi wo cho tonya.
Ŋ yaasiaŋndɔ nyɛ o dimi o bolle Baabuileŋ ndeŋ niŋ, a o bolii Baabui cheleŋ niŋndo. Mbo dimi aa: I cho num saŋgala “o chondoŋ niŋ le teleŋ o teleŋ, nduyɛ mi wa nyɛ ya I chuel num buŋgɛi yo tosaa lepaa o lepaa.” “Oo Masanɔɔ Mɛlɛka, Mɛlɛka nuu, I cho num saŋgala a kɔl nuu kpou. Le teleŋ o teleŋ, I wa niŋ waŋnda dimullo a mɛɛ ŋ cho o bɛndu yɛ.” “I cho num saŋgala lepaa o lepaa.”—Sam 61:8; 86:12; 145:1, 2.
Deeve ndoo yiyaŋ nuaa maa fɛɛŋ bɛɛ o vi niŋ te le. Ndoo sina maa kani masindɛ, mi Chɛhowa dimi maa le mɛɛ waŋnda chieeya kpou tosa hakioo yɛ, a nɔ le piɔmndo sɔlaa. Nduyɛ, mi Deeve bɛɛ dimi maa wana hakioo o wa ni. (Chɛ. 3:3, 17-19; Sam 51:4, 5) Ndoo sina vɛlɛ maa, mi puaa Mɛlɛka ndoo hini kɔl a nda wa bɛɛ sɔla piɔmndo. Mɛɛ Ebilaham, Aase, a Chekɔpu cho nuaa yɛ. Nduyɛ mi Deeve sina maa, teleŋ cho fuuluu mi ndu bɛɛ yoomu ndɔɔ mɛɛlu. (Sam 37:25; 39:4) Kɛ nyɛ o dimi o Sam 61:8 niŋndo chɔm yeemɛi ndoo nɔ le Mɛlɛka saŋgalaa lefafɛɛŋ ndo. Koŋ cho ni, haaa a yoomu ndɔɔ mɛɛlulaŋ.—2 Saam. 7:12.
Sɔɔŋ Deeve poonyiaa woŋ ŋtiŋ chɔm a mɛɛ yoomu ndɔɔ wa o paandoo niŋ yɛ okɔɔ. Miŋ che hei o diomnda cho o Sam bolle 18, 51, a 52 bolleŋ ndaŋ. O Sam bolle 23 niŋ, mi Deeve dimi a Chɛhowa okɔɔ maa o cho ko mɛɛ wana mandaa lasaa yɔŋgu nuaa saa nduaa nɛi chɔmaa, mbo bii nda nyɛkɛndɛi, vɛlɛ mbo manda nda yɛ. Nduyɛ Deeve bɛɛ wana mandaa lasaa waa lende o wa ni. Hei tosa ni mbo nɔ yeemɛi le Mɛlɛka piɛiyo “le fɛɛŋ a fɛɛŋ.”—Sam 23:6.
Kɛsiŋ vɛlɛ o kɔl maa, nyina Chɛhowaa tosa ni mi Deeve poonyiaa diomndaŋ ndaŋ. Sɔɔŋ o poonyiaa woŋ wa vɛlɛ a huuluŋ wa hunɔɔ peelɔŋ o chilaŋ niŋndoŋ okɔɔ. Le tamaseliiyo, o Sam bolle 110 niŋ, mi Deeve suaa a teleŋ Masanɔ ndɔɔ cho ichali ‘o fondaŋ lebiɔɔ o ba kɛndɛ Mɛlɛkaa choo’ o choo choo niŋ, mbo sɔla kpaaya bɛndoo wo. Kpaayaa le yɛɛ tosaa? Le mbo tɛɛmbuu yaamɔɔwaa Mɛlɛkaa, nduyɛ mbo ‘kilul waŋnda o chieeŋndo niŋ yamɛi le nda nyɛpalaa tusioo choo.’ O pulale Deeve leŋ choo Masa koŋ fula ni. Ndu cho yɛ Mɛsayanɔ ni. O tosa niŋ masaleŋ o choo choo niŋ, nduyɛ mbo wa ‘wana soliaa lasalaa le fɛɛŋ a fɛɛŋ.’ (Sam 110:1-6) Mi Chiisu chɔm maa, a ndu okɔɔ huului dimiŋ o Sam bolle 110 niŋndo wa ni. Nduyɛ, i wa peelɔŋ o chilaŋ niŋ.—Maa. 22:41-45.
A tonya, mi Chɛhowa dimul Deeve le mbo poonyiaa a teleŋ o wa yoomu wo okɔɔ, vɛlɛ a teleŋ o cho hunɔɔ miiŋgu yoomu mbo saŋgala Chɛhowa a nyaale lefafɛɛŋ ndo. Hei mala naa le chɔɔ kpendekele maa Sam 37:10, 11, 29 soo a sɔɔŋ yɔŋnuŋ o Isɔluɛi niŋndoŋ okɔɔ. Bolii Baabuiye hei mala naa vɛlɛ le sinaa sɔɔŋ cho hunɔɔ yɔŋnɔŋ o lɛŋndeŋ choo o chilaŋ niŋndo. A teleŋ koŋ Mɛlɛka peelu niŋ mɛɛla ndɔlaŋ kpou ni.—Tofa pɛl 8 wo o buŋgɛi hei niŋ, “A Cho Hunɔɔ Wa a Ya Latulu o Kpele Hɛnɛkiɔɔ Niŋ,” o Bandu Mɛŋgɛlaa hoo niŋ.
Sam 61:8 a bolii Baabui cheleŋ chɔm maa, Deeve ndoo yeema mbo saŋgala Chɛhowa o Isɔluɛi niŋ sindɛ haaa a yoomu ndɔɔ mɛɛlulaŋ. Nduyɛ, i chɔm vɛlɛ nyɛ Deeve cho tosa o chilaŋ niŋndo, te Mɛlɛka miŋgi ndu pɛ yoomu.