Mi Chɛhowa Pɛɛku Naa, Nduyɛ Mbo Duau Naa Salala Naŋ Ve Kɔl Te Laŋ

A teleŋ Chɔu Chieeŋ Diiŋ Ndɔɔ wanaa velu ya wa faŋaŋ Ɛsitooniaa ni, ma kua Chamani. O Chamani niŋ nda velu ya ni. Mɛɛ nda velu ya, ma kandu bɛɛndiaŋndo le ma kuɛŋnuŋ Kanada. Mɛɛ naŋ fuuluu loŋ, miŋ kɔ chal o fondaŋ nda veelu aa Ɔtawa o Kanada niŋndo, o chiɛi sɔɔwa wa wo niŋ. Wanaa bala fonduaa naŋ wa ni. Kɛ mi naŋ sɔla pelta sɔɔlaŋ le nyɛdiaa idiiyo.

Paale pilɛ, mi Seiyaa Chɛhowaa veelul kala nuu diomndaŋ o Sɔɔŋ Chɔɔmaŋndoŋ 21:​3, 4 niŋ. Mi bolle Baabuileŋ ndeŋ le pilaŋ ndu kɔllo tau, okoŋ mbo kandu chaŋndo. Mi yeemɛi kala nuu nda finya nuu ndaa nɔ le tonyaa ve hindu nda o kɔl. Le hei, haupa ma tosa hiouwɔɔ lachioo, nduyɛ ma suliŋ le yiŋɔɔ sɔlaa.

Wanaa velu ya wa ndaa chiee Iŋkilisiiye tau le. Kɛ ndaa nɔ sɛmbɔɔ tau le Chɛhowa piɛiyo. Mi finya nuu ndoo tosa wallo o fondaŋ ndaa teeŋgiaa chiliŋndoŋ ndo. O Sudubuli Ɔntalioo niŋ fondaŋndo hoo wa ni. Mi che bɛɛ ichɔl finya nuu ndoo tosa wallo ni, kɛ o Ndaama kɛ kɛ choo, mi ndoo kuɛ a ya vɛlɛ a yema ni pɔmbɔɔ Siliviaa o wali pollo niŋ. Nduyɛ o lɔɔ o lɔɔ bɛŋgu, mi naŋ tosa pɛɛku Bandu Mɛŋgɛlaa o yuŋgu naa niŋ. Mi finya nuu nda kala nuu mala ya le mi nɔ kaalaa le Mɛlɛka. Mi keŋ nyindu ya le mi yɔŋgu yoomu nuu o Chɛhowa lo. Nduyɛ a wɔsi 1956, mi sɔla yiŋɔɔ. A teleŋ koŋ, I wa wɔsilaŋ tɔ. Mi kaala nda nɔ le Chɛhowa wo dɛɛniaa ya teleŋ o teleŋ, le mi hiou lachi a Chɛhowa piɛiyo.

Mɛɛ ya chii sukuuwo, mi kandu kɔllo faŋaa o pɔmpɔmbɔ o Chɛhowa piɛiyo choo. Yaa yiyaŋ maa, te I kandu pɛ kɔɔfaleŋ, I tiu niŋ ba mi sɔla nyɛsɔlaa tau le yeemɛi yaa nɔ le kelaa o chieeŋndo niŋnde peeloo le. Mi sɔla wallo o fondaŋ alaadioo. Wali nuu wa le nyɛchaa waŋnda luaa wo handɔɔ, okoŋ mi waŋnda tuei ni. Yaa kaala bɔɔ wali koŋ. Le mɛɛ ya wa wallo ichɔllɛ, teleŋnda bɔɔbɔɔ mi yaa bendu bɔŋaŋndaŋ. Nduyɛ, a wanaa ndaa kaala Mɛlɛka le wa yaa chua teleŋndo tau ni. Kɛ mi kɔl iyama nuu nyindu ya le mi tosa siŋgaŋndaŋ.

Mi kua Ɔsiawa o Ɔntalioo niŋ. Loŋ ya chiikaŋ a Lioo Nɔma, yema ndɔ pɔmbɔɔ Lɛsili, vɛlɛ a kɔɔfaa cheleŋnda ni. Mi nda kpou chɔm yeemɛi o ya niŋ. Mɛɛ ya che mɛɛ nda wa a kɔl kɛndɛ yɛ, mi keŋ tosa mi chɔɔlu yiyaŋ a nyɛ kpeekpei yaa nɔ mi tosa o yoomu nuu niŋndo okɔɔ. Ma dɛɛniaa ya le mi kandu kɔɔfaleŋ. Le hei, mi kandu kɔɔfaleŋ tosaa a Tapioo 1966. I wa a kɔl kɛndɛ tau, nduyɛ I wa yoomoo tueiyɔɔ yeela. A koŋ kpou, siŋgaŋnda ya ve kɔl te laŋ la wa ya komal o chilaŋ niŋ.

TE CHƐHOWA KE NUM PƐ WALLO LE TOSAA, KINDIŊ MA TOSA NDU

Teleŋ ya wa kɔlaŋ o sukuuwo, mi yɔŋgu yauwo le kɔlaŋ o Bɛtɛɛl o Toloŋto niŋ Kanada. Okoŋ kɔɔli, I wa kɔɔfaleŋ tosaa ma veelu ya le kɔlaŋ wallo tosaa o Bɛtɛɛl le wɔsilaŋ la hiɔɔlu. Kɛ le mɛɛ yaa kaala Lɛsili tau yɛ, mi yiyaŋ maa te I chɛl pɛ veelu koŋ, pesiŋ bɛɛ I ve lɛ ndu chɔ le. Mɛɛ ya piɛi o Chɛhowa lo a ndi okɔɔ, mi kɛɛsiaa le mi kuɛ o Bɛtɛɛl. Kɛ I wa a kɔl tambɛiyo le Lɛsili choŋgɔŋndo.

Mɛɛ ya kuɛ o Bɛtɛɛl, o fondaŋ nda tuaa nyɛlaŋ ndo yaa tosa wallo ni. Okoŋ kɔɔli, ma ke ya wallo le mi wa wana poonyiaa. O teleŋnda laŋ niŋ, nda yulu Lɛsili suei ni, le mbo wa kɔɔfanɔ teŋgeŋndo o Katinioo niŋ, Kuebɛki. Teleŋnda bɔɔbɔɔ, mi yaa yiyaŋ a nyɛ o wa tosaa wo okɔɔ. Nduyɛ, mi yaa kiisaŋ te kɛɛsiaa kɛndɔɔ ya tosa ni. Kɛ mi nyɛ ya ve kɔl kposoŋ te wo yɔŋnuŋ vɛlɛ. Ma veelu Lioo yemaa Lɛsili o Bɛtɛɛl. Naa ndu naŋ lɔl o lumuiyo niŋ ni. Mi keŋ tosa miŋ miiŋgu vɛlɛ o chaŋyɛi niŋ naa Lɛsili. Mɛɛ ya chii wɔsila hiɔɔlula nda veelu ya o Bɛtɛɛltaŋ a Doŋdoŋndo 27, 1971, miŋ chal o nɔɔ niŋ naa ndu.

Ma yɔŋ naa o kunda dimi Filaŋsiiye wo niŋ Kuebɛki. Mɛɛ wɔsilaŋ latiŋ la hiou okoŋ kɔɔli, mi kɔndɔfillo bii ya mɛɛ nda dimul la le mi kandu buɛile ibuŋgaleŋ tosaa. A teleŋ koŋ, I wa wɔsilaŋ 28. Mi yiyaŋ maa I cho o bɔɔ le, vɛlɛ maa I suliŋ le wali koŋ tosa le. Kɛ diomnda cho Chɛluimaya 1:​7, 8 niŋndaŋ la dɛɛniaa ya tau ni. O faŋaŋ okoŋ kɔɔli, mɔmbillo del niŋ a Lɛsili teleŋnda bɔɔbɔɔ, nduyɛ mi i wa ikala ndu o ba le mbo lɔl. Lelaŋ miŋ yiyaŋ maa, i cho wa ikala naa o ba le buɛile ibuŋgaleŋ tosaa. A koŋ kpou, mi Lɛsili nyuna ya aa, “Te Chɛhowa dimul naa pɛ le nyɛ tosa, baa ŋ nɔ miŋ kindiŋ le ndu tosaa le?” Miŋ chɛl wali nda ke naa koŋ ndo. Nduyɛ miŋ tosa ndu le wɔsilaŋ 17. Ŋ wa bɔɔ a kɔl kɛndɛ le wali koŋ tosaa.

I wa kpɔndi kpɔndi. Le hei, yaa chue teleŋndo tau a Lɛsili latulu le. Yaa nɔ mi pɛɛku suɛi cheleŋ vɛlɛ. Paale pilɛ, mi waŋndo kɔ lɔɔ bambɛi wa o dio naa ve, o Koondoo choo idiiyo. Mɛɛ ya kumbi dioo, wana o wana ve loŋ te. Kɛ mi cha kambɛiyo a kolaa lechoo. Nyɛdiaa la yɛ yɛlaŋ, muɛiyaŋ, a taalalaŋ la wa o kambɛi koŋ niŋ. Nduyɛ yauwo wa leniŋ a poonyiaa lechoo aa, “Kɔ a laa num o fondaŋ kɛndɛ kɛndɔɔ mi la kɔ pisul.” Paaleŋ le wa fulaa nyɛkɛndɛi. Kɛ mi tɛɛsial Lɛsili maa, I nɔ sɔɔŋ tau le bɛɛndiaa. Lelaŋ, I tiu niŋ ba mi kuɛ le. Mbo bii ya bila, kɛ mbo yii tiŋ hɔlla. Mɛɛ ya kɔ chal o tibii yaa pɛɛku wo ikɛi, mi kɔl ni iyamaa kandu ya paaliaŋndo. Mi yiyaŋ a nyɛ Ɛfisiaŋnda 5:​25, 28 dimi wo okɔɔ, nduyɛ mi cha maa bolle Baabuile leŋ Chɛhowa wa soliŋndo kpeku ni le ya loonɔŋndo maa, I nɔ mi buulaŋ a yeemaŋ laa nuu okɔɔ. Mɛɛ ya piɛi a ndi okɔɔ, mi dimul Lɛsili aa, “Ŋ kɔ.” Mbo naŋ kɔl tau. Miŋ luɛi o mɔmbillo niŋ, miŋ kua o fondaŋ kɛndɛ kɛndɔɔ o pioo daŋgala. Okoŋ, miŋ pɛŋgɛla kola ndaa chuu naa wo, nduyɛ miŋ tuɛi teleŋ naŋ wa koŋ diompilɛ wo yeela tau. Mi sɔla vɛlɛ teleŋndo le sɔɔŋ nuŋ bɛɛndiaa.

Tanda naŋ kua puaapiliaa yilɔɔ wo wa tau. Mi naŋ kuɛ chɔŋ Bilitisi Kolombiaa, kɔ Niu Faŋlaŋ. Kɛ ŋ wa a kɔl kɛndɛ tau. Mi yeemɛi yaa nɔ o ichuaambɔya le kelaa ve peeluŋ. Yaa nɔ yeemɛi le kɔlaŋ o sukuuwo Kiliaadi. Kɛ yaa nɔ iyeema kposoŋ le kɔlaŋ misiɔnalueileŋ tosaa o lɛŋnde cheleŋ niŋ te. Kanifuule, yaa yiyaŋ maa wanaa teŋgeŋnda misiɔnalueiya cho ni. Nduyɛ maa, I suliŋ le mi wa misiɔnalueinɔ le. O faŋaŋ okoŋ kɔɔli, I wa siooŋnde maa naapum a cho ya yɔŋ Afilika, naa naalaŋ a chɔulaŋ la wa wa. I wa a kɔl kɛndɛ tau o lɛŋnde naŋ wa leŋ niŋ.

Ŋ VE BƐƐ KƆL TE, MA YƆŊ NAA ƐSITOONIAA, A BALITISI

A wɔsi 1992, mi Seiyaa Chɛhowaa kandu vɛlɛ yooŋgu kɛndɔɔ dimioo, o lɛŋii wa paandu Soviɛt Yuniɔŋ ba bɛŋgu ve niŋ. Le hei, ma dimul naa le miŋ kuɛ Ɛsitooniaa, miŋ wa misiɔnalueiya. Ŋ ve hei kɔl kposoŋ te. Kɛ miŋ piɛi a ndi okɔɔ. Miŋ nyunaŋ vɛlɛ aa, ‘Te Chɛhowa dimul naa pɛ le nyɛ tosa, baa ŋ nɔ miŋ kindiŋ le ndu tosa le?’ Miŋ chɛl wali nda ke naa wo. Nduyɛ miŋ dimi aa, ‘O cho Afilika le nda yɔŋ naa le.’

Mɛɛ naŋ kuɛ Ɛsitooniaa, haupa miŋ kandu suɛi maŋgalɛi Ɛsitooniaŋnde pɛɛkoo. Mɛɛ naŋ chii paŋgoŋ ŋtiŋ o lɛŋnde leŋ niŋ, ma dimul naa le miŋ kandu buɛile ibuŋgaleŋ tosaa. Mi naŋ kuɛ kundalaŋ 46 yilɔɔ, vɛlɛ a kundala pɔmbɔla wa Ɛsitooniaa, Lativiaa, a Litooniaa laŋ lapum. Kundala pɔmbɔla wa Kalinikilaadi o Lɔɔsiaa niŋndaŋ bɛɛ, mi naŋ kuɛ laŋ yilɔɔ. Keŋ sim ni maa, naŋ nɔ miŋ pɛɛku Lativiaaŋnde, Litooniaŋnde, a Lɔɔsiaŋnde. I wa ikala naa o ba le sɔɔŋ maŋgalaŋ muŋ pɛɛkoo. A koŋ kpou, mi chaaŋaa naa naŋ kɔl a kindi kindiŋ naŋ wa wo, nduyɛ ma mala naa. A wɔsi 1999, ma kila lɛuve o Ɛsitooniaa niŋ. Okoŋ ma yulu ya, Tɔmasi Ɛduu, Lɛmbɛti Leili, a Tɔmi Kauku, le miŋ wa lɛuve chilaŋ.

Le hei, miŋ sina Seiyaa Chɛhowaa bɔɔbɔɔ ndaa miiŋgu Sabiliaa wa. Mi che bɛɛ ma faŋa puaapiliaa haa yuŋgula ndalaŋ ikɛi, ma kɔ dɔu nda o chiɛila manyumndaŋ niŋ, vɛlɛ ma bii nda biyɔɔ wɔɔŋndo, kɛ a doonuŋ tumbe le. Ma hiau lachi a waa a kɔl kɛndɛ, vɛlɛ a sɛmbɔɔ nɔɔ le yooŋgu kɛndɔɔ dimioo. Mi hei mala naa le chɔɔ maa, ŋ tiuba miŋ wa a kɔl kɛndɛ, vɛlɛ miŋ biunuŋ sɔɔŋ kindilaŋ komal naa woŋ.

Naa wɔɔŋ pum wa kilaŋndo Lɛsili o ŋdial, kɛ ŋ ve o sina choo le. Nduyɛ mɛɛ wɔsioŋ muŋ hiau fau, lende koni naa koŋ ndoo kua a ndu saaŋgiaa ni. Le hei, miŋ kɛɛsiaa le miŋ mal wali naa, okoŋ miŋ miiŋguŋ Kanada. Mɛɛ nda veelu naa Patasiŋ Niu Yɔk, o Amɛlika niŋ le Sukuu Wanaa Chua Chilaŋ o Lɛuve wo a Laandaa Ndaa, kiisaŋndo wa naa te ŋ tiu niŋ pɛ ba miŋ kuɛ. Kɛ mɛɛ naŋ piɛi a ndi okɔɔ, miŋ chɛl le kɔlaŋ. Mi Chɛhowa duau kɛɛsiaa koŋ sala. Mɛɛ naŋ kuɛ o sukuu koŋ, mi Lɛsili sɔla danda suu ndoo yeema wo. Le hei, miŋ tiuba le miŋ hiou lachi a walta laa keŋnuŋ naalaŋ tosaa.

Ŋ VE VƐLƐ KƆL TE, MA YƆŊ NAA O FONDAŊ CHELEŊ

Ichɔl pilɛ o wɔsi 2008 ve niŋ, ŋ wa Ɛsitooniaa, mi wana pilɛ o fondaŋnda leboltaŋ veelu ya, okoŋ mbo nyuna ya te ŋ tiu pɛ ba miŋ kuɛ Koŋgo. Mi kɔndɔfillo bii ya tau. Mbo dimulla maa, naŋ yiyaŋ lechoo okoŋ miŋ mulul nda diimandɔɔ. O tasela ndɔ, I dimul Lɛsili a ndi okɔɔ le kanifuule, yaa sina maa te I dimul ndu pɛ, o ve lɔl ichɔl koŋ te. Yapila lɔl lahɔl ichɔl koŋ ni kanifuule, I wa piɛileŋ o Chɛhowa lo a buulaŋnda nilaŋ okɔɔ, le kɔlaŋ Afilika.

Diimandɔɔ, mi dimul Lɛsili. Okoŋ, mi naa ŋiɔɔŋ kpou dimi aa: “Chɛhowa cho naa dimullo ni le miŋ kuɛ Afilika. Vɛɛ naŋ looku yɛ sina maa ŋ tui niŋ wali ndɔɔ yeela o Afilika niŋ te? Mɛɛ miŋ tofa.” Le hei, mi che bɛɛ naŋ chii niŋ wɔsilaŋ 16 o Ɛsitooniaa niŋ, kɛ miŋ kua Koŋgo Kiŋsiasa. Lɛuve o Koŋgo niŋ ndii nɔ fondaŋnda kɛndɛ kɛndɛlaŋ vɛlɛ a kpele kɛndɛ kɛndɔɔ. Nyɛ tase Lɛsili kɛsi o lumui naa niŋndo, wa yau pilɛ naŋ chɛŋ Kanada wo ni. O yau koŋ choo, diomndaŋ ndaŋ la wa la poonyiaa aa, “Wa a kɔl kɛndɛ ba o ba ŋ wa pɛ.” Mɛɛ naŋ chiikaŋ a puaapiliaa, miŋ kandu pɛɛkula Baabuilaŋ tosaa, vɛlɛ miŋ cha nyaale wana sɔla le misiɔnalueileŋ tosaa o Afilika niŋndo, mi keŋ tosa miŋ chɔɔlu wa a kɔl kɛndɛ. Mɛɛ teleŋ tiŋ hiou, miŋ sɔla dikeŋnaŋndo le kɔlaŋ yilɔɔ o lɛŋnde 13 niŋ Afilika. Mi keŋ mala naa le miŋ chiikaŋ a wanaa teŋgeŋ teŋgeŋnda. Mi siooŋii yaa nɔ o tasela ndɔ ve fula ya o kɔl. Ŋ mel bɔɔ Chɛhowa balikaa le mɛɛ o vem naa o Afilika niŋ yɛ.

O Koŋgo niŋ, mi ndaa ke naa nyɛdiaala bɔɔbɔɔ. Mi yiyaŋ maa, ŋ tiuba miŋ de nyɛdiaala laŋ lapum te. Kɛ mɛɛ naŋ che puaapiliaa naa nyɛdiaala laŋ tueiyɔɔ yeela, miŋ kindiŋ le laŋ dioo. Nduyɛ ŋ wa a kɔl kɛndɛ le laŋ dioo.

Mi naŋ kuɛ Koŋgo ba paaleŋ le chaŋndo, le puaapiliaa kɔltaŋ dɛɛniaa, a nda nyɛm nda hauba woŋ kioo. A teleŋ koŋ, mi puaa layekpandiaa ndaa kɔ del sɔndɔkɔltaŋ choo, okoŋ ma yɔŋul waŋ laanduaa, vɛlɛ a chuaambuaa. Puaapiliaa bɔɔbɔɔ ndaa nɔ nyɛsɔlaa bɔɔ le. Kɛ mi tiindaŋ kala kala ndaa nɔ maa waŋnda cho miiŋgu yoomu wo, kaala ndaa nɔ le Chɛhowa wo, vɛlɛ a lo lechoo nda wa chɔmndo o Chɛhowa lo wo pilaŋ naa kɔllo tau. Mi tamaseliila ndalaŋ la mala naa, le miŋ chɔɔlu yiyaŋ a sabu naŋ cho Chɛhowa piɛiyo wo okɔɔ, vɛlɛ miŋ kindi tiindaŋ naa poŋ. Puaapiliaa bɔɔbɔɔ wa saŋgaa tau kanifuule, mi chiɛila ndalaŋ a chiɔɔŋ ndaŋ hialuŋ nda. Mi keŋ loonuŋ ya a mɛɛ nyɛm kiɔɔŋ keleŋa naa hiɔlɔŋ yɛ, vɛlɛ a mɛɛ chaŋyɛi naŋ nɔ a Chɛhowa ve cho nyɛ sɔvɛ bɛndu yɛ okɔɔ. A bahawɛi kala kala wa nda koŋ choo wo kpou, ndoo kendu ko mi puaapiliaa haa ndaa ŋɔɔchiaŋ. Mi tamasi ndaa dɛɛniaa naa, le miŋ nɔ kɔl simulaa le bahawɛila komal naalaŋ, a bahawɛi kɛndiaa biuwɔŋndo.

MA YƆŊ NAA VƐLƐ EESIAA

Mi nyɛ cheleŋ naŋ ve kɔl te wo komal naa vɛlɛ. Ma yɔŋ naa o lɛuve Hɔŋ Kɔŋ. Pesiŋ bɛɛ naŋ yiyaŋ maa ŋ cho lakɔ ichali Eesiaa le. Kɛ miŋ chua teleŋndo le yiyaŋndo a mɛɛ Chɛhowa bii naa niŋ malaa o walta o ke naa laŋ niŋ yɛ. Le hei, miŋ chɛl le kɔlaŋ. A wɔsi 2013, a mɛmiaŋ naa o lahɔl, miŋ choŋguŋ chaaŋaa naa kɛndɛ kɛndiaa loŋ, okoŋ miŋ mal Afilika. Nduyɛ naŋ sina nyɛ wa naa lachi wo le.

Siŋgaŋ bɛndoo pila wa hoo ni kanifuule, Hɔŋ Kɔŋ cho o piaa cha a waŋnda, fulaa o fondaŋnda bɔɔbɔɔ o chieeŋndo choo. I wa ikala naa o ba le Chanisiiye pɛɛkoo. Kɛ mi puaapiliaa demul naa, nduyɛ miŋ tuɛi nyɛdiaala yɛ yɛlaŋ o lɛŋnde leŋ niŋ yeela tau. Wallo wa hiouwɔɔ lachi kpeekpei a tosaŋndo o lɛuve. Kɛ i wa ikala le lɛŋndeŋ a chiɛilaŋ piondɔɔ. Le hei, mi Dialii Kuumbaŋ Choo Ve kɛɛsiaa maa, puaapiliaa pisi chiɛila bɔɔbɔɔ o lɛuve. Teleŋ biŋgi okoŋ kɔɔli, a wɔsi 2015, ma dimul naa le miŋ kuɛ Kooliaa Batouwo. Mɛɛ naŋ hiŋ naŋ, miŋ sɔla vɛlɛ simul cheleŋ le suɛi maŋgalɛi pɛɛkoo. Kɛ mi puaapiliaa naa dɛɛniaa naa kɔllo tau. Teleŋnda bɔɔbɔɔ, mi ndaa dimul naa aa, la cho chaa, la cho hiouwɔɔ lachioo tosaa.

SƆƆŊ NAŊ PƐƐKU O WALI CHƐHOWAA TOSAA NIŊNDOŊ

I ve bɛɛŋ bɛɛŋ le chaŋyaŋ sɛnɛiyoŋ sɔlaa le. Kɛ ŋ saaluŋ maa, waa wana tasoo le acheleŋnda kɛndɛi tosallo, mala ma keleŋa nda sina. Ŋ che niŋ maa puaapiliaa naa velaŋ o sɔɔŋ bɔɔbɔɔ niŋ. Teŋgeŋndo nyɛɛmbɔ koni cho naa tɛɛŋ ni. Nduyɛ ŋ che niŋ vɛlɛ maa, Chɛhowa toosiaa naa le miŋ chɔmnaŋ kɔltaŋ, vɛlɛ miŋ nɔ kaalaa le chaaŋaa naa.—2 Kɔliŋ. 6:​11.

Ŋ pɛɛku niŋ le waŋnda chɔɔ mɛɛ Chɛhowa cha nda yɛ. Nduyɛ ŋ che niŋ mɛɛ i cho suɛi sɔvɛ, le chɔɔ mɛɛ Chɛhowa kaala naa, vɛlɛ mbo wa naa nɛi chɔmaa kioo yɛ. Teleŋ o teleŋ naŋ tambu pɛ kɔl, ɔɔ miŋ kiisaŋ te puaapiliaa a ndepiliaa kaala naa pɛ, miŋ miŋgi vɛlɛ diomndaŋ veelu o yaula chaaŋaa naa yɔŋ naa laŋ niŋ. Ŋ che niŋ kpendekele mɛɛ Chɛhowa muli piɛile naaleŋ, mbo luei naa yoomuaŋ, vɛlɛ mbo dɛɛniaa naa kɔltaŋ yɛ.

O wɔsila hiou laŋ niŋ, Lɛsili a ya pɛɛku niŋ mɛɛ i cho suɛi sɔvɛ, le teleŋndo chuaa latulu yɛ, mɛɛ mɛɛ naŋ wa kpɔndi kpɔndi. Nduyɛ ŋ che niŋ vɛlɛ mɛɛ i cho suɛi sɔvɛ le mamamndo vellaa velle yɛ, te ŋ tosa pɛ biondɔŋndaŋ o suɛi maŋgalɛi naŋ wa pɛɛkoo ve niŋ. Ichɔl o ichɔl, miŋ yiyaŋ a nyɛ naŋ tuei yeela wo okɔɔ, okoŋ miŋ mel Chɛhowa balikaa le ndi.

O kpeekpei niŋ, pesiŋ bɛɛ yaa yiyaŋ maa I tiuba mi wa misiɔnalueinɔɔ, ɔɔ mi kɔ wa achal o lɛŋnde cheleŋ niŋ te. Kɛ I pɛɛku niŋ le sinaa maa, a mala Chɛhowaa, ŋ tiuba miŋ tosa nyɛ o nyɛ. Teleŋnda bɔɔbɔɔ, mi yiyaŋ a diomnda wana ndoo suaa le Mɛlɛka wo Chɛluimaya dimilaŋ. Mbo dimi aa: “Mɛlɛka Yaawɛɛ, a tosal la kaŋgalaa nduyɛ ma hui ya.” (Chɛlui. 20:​7) A tonya, mi Chɛhowa tosal naa sɔɔŋ bɔɔbɔɔ naŋ ve kɔl te woŋ. Mbo duau naa pɛŋ salala naŋ ve kɔl te laŋ. Mbo tosa vɛlɛ mi yeemɛi nii peeluŋ le kelaa o lɛŋii yɛ yɛi niŋ. I luɛi niŋ o dɛndɛ choo niŋ le kɔlaŋ o lɛŋii bɔɔbɔɔ niŋ le lɛuwoŋ yilɔɔ. Nduyɛ teleŋ ya wa o pɔmbɔ wo, pesiŋ bɛɛ yaa yiyaŋ maa I cho lakɔ o lɛŋii keŋ niŋ te. O walta naŋ tosa o Chɛhowa piɛiyo niŋndaŋ kpou, I mel bɔɔ Lɛsili balikaa le mɛɛ o wa ya tooloo yɛ.

Teleŋnda bɔɔbɔɔ, miŋ loonuŋ naapila a wana naŋ cho wallo tosaa le ndu wo okɔɔ, vɛlɛ a le sabu naŋ cho ndu tosaa wo. Salala naŋ cho hunɔɔ tueiyɔɔ yeela o chilaŋ niŋndaŋ, nyɛɛmbɔ koni cho hoo ni. Kanifuule a teleŋ koŋ, Chɛhowa cho “tosa mi wana o wana hini kɔl.”—Sam 145:​16.