Mi Siooŋnde Nɔɔ le Mɛlɛka Chuu Naa Tɔnɔlaŋ

1-2. Maa Lɔtu, simul kuɛɛ komallɛ Kilisiɔŋnda hau?

TE Ŋ che pɛ mɛɛ waŋnda cho hau balaŋ lueiyo o kaala nɔɔlɛilaŋ niŋ yɛ, miŋ tambu kɔl maa Lɔtu. Mbo “tambu kɔllo tau a kaala kɔl vesɛila wanaa dɛnɛ wɔɔŋnda wa tosaa laŋ.” Kanifuule ndoo sina maa, Finya naa o choo choo niŋ tul kaalaŋ ndaŋ leyɛ. (2 Pitɛ 2:​7, 8) Mi siooŋii Mɛlɛkɛi a kaala Lɔtu ndoo nɔ le Mɛlɛka wo nyindu ndu, le kaala nɔɔlɛila wanaa balu ndu wa wa tosaalaŋ fafaŋndo. Naa bɛɛ cho o chieeŋ waŋnda nɔ bɛɛleŋ nyɛɛmbɔ, ɔɔ nɔ lebɛɛ kposoŋ le sawala Chɛhowalaŋ te wo niŋ. A koŋ kpou, ŋ tiuba miŋ hiou lachi a waa a diandaa Mɛlɛka o hɔl, te ŋ kaala ndu pɛ vɛlɛ miŋ nɔ siooŋii bɛnda ve le ndu.—Pulɔ. 14:​2.

² Le naa malaa miŋ tosa hei, mi Chɛhowa ke naa kɔl dɛɛniaa, o yau Pulɔwaa wo niŋ. Kilisiɔŋnda kpou, puaa, waŋ laanduaa, feleŋguaa a bɛnduaa yuwɛiya tiuba ma sɔla tɔnɔɔ tau, o silala cho o yauwo hoo niŋndaŋ.

MI SIOOŊII NAŊ NƆ LE MƐLƐKA VE MANDA NAA

3. A mɛɛ Pulɔwaa 17:​3 dimi yɛ, ɔɔ saboo opilɛ o naŋ nɔ miŋ manda kɔl naa wo? (Tofa vɛlɛ fotueiyo.)

³ Sabu kpeekpei naŋ nɔ miŋ manda kɔl naa wo cho ni maa, mi Chɛhowa mɛɛndiaŋ kɔlta naalaŋ. Hei sim ni maa, o cho mɛɛ acheleŋnda cha naa yɛ le Chɛhowa cha naa le. O sina wanaa kpeekpeiyaa naŋ cho wa. (Nuawɔ Pulɔwaa 17:​3.) O cho naa kaala tau te ŋ hiou pɛ lachi a yiyaŋndo a silala ndɔlaŋ okɔɔ. (Chɔŋ 4:​14) Nduyɛ mi hei tosa ŋ yiyaŋ lɛ o sɔɔŋ nɔɔlɛiyoŋ choo le, vɛlɛ ŋ chɛl mi Setana a chieeŋ ndɔɔ pɔsɔŋiaa yiyaŋnda naalaŋ te. (1 Chɔŋ 5:​18, 19) Mɛɛ naŋ sɔɔŋguu Chɛhowa ikɛi fau, lende koni kaala naa a bɛɛle naŋ nɔ le ndu leŋ, le hiau lachi a hindɔɔ ni. Le mɛɛ naŋ yeema miŋ tɛɛmbuu Finya naa kɔllo le yɛ, ŋ nɔ miŋ tul dɛnɛwɔɔŋndo tosaa leyɛ. Ŋ nɔ pɛŋ miŋ yiyaŋ a ndi okɔɔ le. Te tɔɔndaŋndo komal naa pɛ le suɛi wɔɔŋnde tosaa, ŋ nɔ miŋ nyunaŋ aa, ‘Le yɛɛ mi tosa suɛi kpɛsɛkɛɛ, le wana ya kaala tau wo kɔllo tɛɛmbuu wo?’—1 Chɔŋ 4:​9, 10.

4. Vɛɛ siooŋnde nɔɔ le Chɛhowa mala yɛ ndepilɛnɔ pilɛ, le tɔɔndaŋndo fafaŋndo?

⁴ Mi tɔɔndaŋndo komal ndepilɛnɔ pilɛ o Koloesiaa niŋ diolaŋ Mata, le balaŋ lueiyo o kaa ihini nɔɔlɛiyo niŋ. Mbo dimi aa: “Mi chɔulaba kalaŋ, le kaala nɔɔlɛilaŋ fafaŋndo. Kɛ siooŋii ya nɔ le Chɛhowa ve mala yɛ tau ni.”b Vɛɛ siooŋnde nɔɔ le Mɛlɛka tosa yɛ keŋ? Mi Mata ndoo yiyaŋ a fulamakɔɔlila wɔɔŋnda o sɔla niŋ ndaŋ okɔɔ, te o luei pɛ balaŋ o kaala nɔɔlɛilaŋ niŋ. Naa bɛɛ nɔ miŋ tosa nyɛ pilɛ koŋ. Fulamakɔɔli wɔɔŋ wɔɔŋ naŋ sɔla wo cho ni maa, ŋ cho Chɛhowa kɔllo tɛɛmbuu, nduyɛ ŋ tiu niŋ ba miŋ piɛi ndu lefafɛɛŋ te.—Chɛ. 6:​5, 6.

5. Yɛɛ ŋ pɛɛku yɛ o suɛi yɔŋnaŋii Lioo ve niŋ?

⁵ Te ŋ nɔ pɛ siooŋnde le Chɛhowa, pesiŋ bɛɛ ŋ ve o chaŋyɛi niŋ a wanaa cho sɔɔŋ wɔɔŋndoŋ tosaa wa le. Hei kpeekpei puaapilɛnɔ pilɛ o Koŋgo niŋ diolaŋ Lioo pɛɛku ni. Mɛɛ o sɔla yiŋɔɔ, wɔsilaŋ la hiɔɔlu okoŋ kɔɔli, mbo kandu chaŋyaŋ wɔɔŋndoŋ holnɔŋndo. Ndoo yiyaŋ maa, o yɔŋ bɛɛ mbo nɔ chaŋyaŋ wɔɔŋndoŋ, te o wou balaŋ o sɔɔŋ wɔɔŋndoŋ tosaa niŋ te, mɛɛ o tosa haki a Chɛhowa le. O chue bɛɛ teleŋ vilɛi le, mbo kandu muɛiyaŋ kolɔɔ bɛndoo, nduyɛ mbo luei balaŋ o kaa ihini nɔɔlɛiyo niŋ. Okoŋ, mbo kandu yiyaŋndo a nyɛ wanaa velu ndu wa pɛɛku ndu wo, vɛlɛ a mɛɛ o wa a kɔl kɛndɛ yɛ, teleŋ o wa Chɛhowa piɛiyo wo. Yɛɛ wa yɛ fulamakɔɔlioo? Mbo kandu sɔɔŋ kɛndɔŋ tosaa. Nduyɛ sanaa a mala bɛnduaa kundaa, mbo miiŋgu Chɛhowa o ibuŋ. Suŋ suŋ niŋ, o cho Chɛhowa piɛiyo a kɔl kɛndɛ. O cho niŋ bɛndu kundaa vɛlɛ mbo wa kɔɔfanɔ teŋgeŋndo.

6. A waŋ laanduaa ŋiɔɔŋaa kuɛɛ okɔɔ naŋ cho yɛ niŋ hunɔɔ pɛɛku?

⁶ Ŋ yaasiaŋndɔ Pulɔwaa bolle 9, miŋ pɛɛku a waŋ laanduaa a ŋiɔɔŋ okɔɔ. Waŋ laanduaa haa opilɛ sim le taasioo, opilɔɔ sim le diɔmnde. (Tuuwɔ Luomaŋnda 5:​14; Kaleesiaŋnda 4:​24.) Te ŋ wa pɛ pɛɛkoo a waŋ laanduaa haa okɔɔ, kɛsiŋ o kɔl maa, chieeŋ Setanaa cho o piaa cha a kaa ihini nɔɔlɛiyo, vɛlɛ a fotueila tumfondolaŋ. (Ɛfi. 4:​19) Lelaŋ, i cho suɛi sɔvɛ le miŋ hiou lachi a siooŋnde nɔɔ le Mɛlɛka, nduyɛ miŋ mulul yɔŋ wɔɔŋndo kɔɔ. (Pulɔ. 16:​6) O kpeekpei niŋ, naa kpou, ŋ wa wana pɔnɔ ɔɔ wana lanɔɔ, ŋ tiuba miŋ sɔla tɔnɔɔ tau o bolle Baabuileŋ ndeŋ niŋ. Kanifuule le tɛɛsiaa maa, mi waŋ laanduaa ŋiɔɔŋnda haa o kɛ kɛ, veelu ‘wanaa nɔ sinapɛŋgu bɔɔ le wa,’ le ma kuɛ o ndalo. I wa ko maa dimullo nda wa nda ni aa, ‘La huŋ o naalo chiɛiniŋ, okoŋ miŋ de nyɛdiaa pɔmbɔ.’ (Pulɔ. 9:​1, 5, 6, 13, 16, 17) Kɛ, mi wanaa chɛl veelu waŋ laanduaa haa wa, sɔla fulamakɔɔlilaŋ yɛ yɛ.

FAFAŊ VEELU WANA LANƆ DIƆMNDO

7. A mɛɛ Pulɔwaa 9:​13-18 dimi yɛ, fulamakɔɔli kuɛɛ wanaa chɛl veelu wana lanɔ diɔmndo wo sɔla yɛ? (Tofa vɛlɛ fotueiyo.)

⁷ Ŋ tofaŋndɔ mɛɛ ‘wana lanɔ diɔmndo’ veelu waŋnda yɛ. (Nuawɔ Pulɔwaa 9:​13-18.) Mi wana lanɔɔ hoo sim o fondaŋ vilɛi bɛndoo, mbo dimul wanaa nɔ sinapɛŋgu bɔɔ le wa aa, “La huŋ luɛi o ya lo chiɛi niŋ,” mi la de nyɛdiaa pɔmbɔ. Yɛɛ wa yɛ fulamakɔɔlioo te waŋnda chɛl pɛ veeloo hoo? Baabuiyo dimi maa, ‘wanaa chɛl veelu chuaa hoo wa, piɔmndo nda sɔla ni.’ Naapum a loonuŋ a sila yau Pulɔwaa wo yɔŋgu o tasela ndɔ wo. Mbo sila naa maa, ŋ nɔ miŋ fafaŋ “waŋ laanduaa mɛi haa piaandaa ndaa, ma balu waŋ piaanduaa cheleŋnda kɔɔli” wa. Mi yau Pulɔwaa wo chɔɔlu dimi aa: “Wana o wana kuɛ o o pilɛ lo pɛ, a chi lɛ nɛiyo le miiŋgoo ma wa yoomu le.” (Pulɔ. 2:​11-19) Mi Pulɔwaa 5:​3-10 suaa vɛlɛ a “wana lanɔ tiamaa” okɔɔ. Nduyɛ maa wana o wana tol ndu kɔɔli pɛ, ‘piɔmndo o sɔla ni.’

8. Kɛɛsiaa kuɛɛ naŋ nɔ yɛ miŋ tosa?

⁸ Wanaa cho ‘wana lanɔ diɔmndo’ nilaŋ yaŋɔɔ wa, nɔ ma tosa kɛɛsiaa. Baa a chɛl niŋ pa veelu ndɔɔ, ɔɔ a cho ndu kɛɛ? Naa bɛɛ lepum, ŋ nɔ miŋ tosa kɛɛsiaa a hei okɔɔ. Le tamaseliiyo, te tɔɔndaŋndo komal naa pɛ le kaa ihini nɔɔlɛiyo tosaa, ɔɔ miŋ che fotuei tumfondoo o Intanɛtiiyo choo, kɛɛsiaa kuɛɛ naŋ nɔ yɛ miŋ tosa?

9-10. Ɔɔ sabulaŋ latiŋ la naŋ nɔ miŋ fafaŋ kaa ihini nɔɔlɛiyo wo?

⁹ Ŋ nɔ sabula kɛndɛlaŋ tau le kaa ihini nɔɔlɛiyo fafaŋndo. A mɛɛ yau Pulɔwaa wo tɛɛsiaa yɛ, mi ‘wana lanɔ diɔmndo’ dimi aa: “Mɛŋma levii yaŋ, naŋɔɔ pila ma naŋ kolɔɔ ni.” Mɛŋma kuɛɛ ma cho yɛ “mɛŋma levii yaŋ”? Baabuiyo tuu mɛŋma kɛndiaŋ, a mɛɛ pɔnɔɔ a lanɔɔ tuɛi chiɛiniŋndo yeela yɛ. (Pulɔ. 5:​15-18) Pɔnɔɔ a lanɔɔ tiuba ma tuei chiɛiniŋndo yeela o nɔ ndaa niŋ. Mɛŋndaŋ maŋ ma cho teŋgeŋ a “mɛŋma levii yaŋ.” Kanifuule, mɛŋma levii yaŋ ma sim naapum le chiɛiniŋndo tosaa a wana nya cho o nɔ niŋ te wo. O sɔɔsɔɔyɛi niŋ viinɔɔ kua viileŋ ni. O nɛi pilɛ koŋ choo, teleŋnda bɔɔbɔɔ, o sɔɔsɔɔyɛi niŋ waŋnda tosa kaa ihini nɔɔlɛiyo ni. Mi “mɛŋma levii yaŋ” ma yeelal waŋnda, te a yiyaŋ pɛ maa wana o wana sina niŋ a nyɛ nda cho tosaa wo okɔɔ le. Kɛ o kpeekpei niŋ, huinɔŋndo waŋnda haa wa ni kanifuule, mi Chɛhowa che nyɛ o nyɛ. A tonya, i wa bɔɔ suɛi kpundɛ bɛndu, te Chɛhowa tambu kɔl a naa pɛ. Lelaŋ, kaa ihini nɔɔlɛiyo nɔ mbo yeelal naa le. (1 Kɔliŋ. 6:​9, 10) Kɛ nyɛ cheleŋ cho o hei kɔɔli.

¹⁰ Mi kaa ihini nɔɔlɛiyo chuu naa vɛlɛ fulamakɔɔlila wɔɔŋnda cheleŋ. Mɛɛ siɔmbulaŋ, sinaŋndo maa ŋ cho wana fondo, a foli naŋ ve kɔl te wo cho nuaa yɛ. Nduyɛ, o tosa vɛlɛ mi yuŋgulaŋ la piɔuviaŋ. I cho kpendekele maa, i cho suɛi taasi le miŋ kɛɛ veelu wana lanɔ diɔmndo vɛlɛ a ‘nyɛdiaa’ ndɔɔ. Le handɔɔ lechoo, mi wanaa chɛl veelu wana lanɔɔ hoo wa tɛɛmbuu chaŋyɛi ndɛi a Chɛhowa, vɛlɛ ma sɔla naala ŋkɔŋjala tosa ma keleŋa piɔmndo sɔla laŋ. (Pulɔ. 7:​23, 26) Mi Pulɔwaa 9:​18 mɛɛlu dimi aa: ‘Wanaa luɛi o ndulo chiɛiniŋ nda kinɛi, piɔmndo nda sɔla ni.’ Mɛɛ le yɛɛ wanaa bɔɔbɔɔ chɛllɛ veelu chuaa hoo, ma kɔ sɔla kpundɛ waa nuaa?—Pulɔ. 9:​13-18.

11. Le yɛɛ fotueila tumfondolaŋ tofaa cho yɛ suɛi wɔɔŋ bɛndu?

¹¹ Yaŋɔɔle tɛtɛlɛ le tosa mi waŋnda chɛl veelu chuaa hoo wo cho fotueila tumfondolaŋ ni. Waŋnda apum yiyaŋ maa, fotueilaŋ ndaŋ la tosal wana nyɛ o nyɛ le. Kɛ o kpeekpei niŋ, mi fotueilaŋ ndaŋ tofaa chuu wana kpundɔɔ. Mi la tosa a nɔ lɛ lebɛɛ le numpila, a le acheleŋnda le. Nduyɛ, mi i wa ikala le kaa hoo malɔɔ. Mi waŋndo chua teleŋ vilɛi, le mbo fafaŋ yiyaŋndo o fotueila tumfondola o tofa laŋ choo. Nduyɛ mi i wa ikala ndu o ba, le mbo puɛɛŋ a laŋ okɔɔ. Le handɔɔ lechoo, fotueilaŋ ndaŋ la dii dialuŋ naŋ le yeemaŋ wɔɔŋndoŋ tosaa le. Kɛ yeemɛi la kpeeŋiaa naa ni. (Kolo. 3:​5; Chemi. 1:​14, 15) Mi wanaa bɔɔbɔɔ tofa fotueilaŋ ndaŋ nda, luei balaŋ o kaa ihini nɔɔlɛiyo ni.

12. Vɛɛ naŋ chɔm yɛ maa, ŋ cho fotueila kpeeŋiaa naa yeemɛi le hiniei tosaalaŋ fafaŋndo?

¹² Yɛɛ naa Kilisiɔŋnda nɔ yɛ miŋ tosa te ŋ che pɛ fotuei tumfondoo o nyɛ naa mapuuloo choo? Ŋ nɔ miŋ keleŋa ndu faŋa. Le naa malaa miŋ tosa hei, ŋ nɔ miŋ loonuŋ maa, nyɛ sɔvɛ bɛndu naŋ nɔ o yoomu naa niŋndo, cho chaŋyɛi naŋ cho tueiyɔɔ yeela a Chɛhowa ve ni. O kpeekpei niŋ, fotueilaŋ lapum, la ve maa fotueila tumfondo le. Kɛ naapum, mi la kpeeŋiaa waŋndo yeemɛi le hiniei tosaa. Le yɛɛ naŋ nɔ yɛ miŋ fafaŋ fotueila waa lende? Kanifuule, pesiŋ bɛɛ ŋ yeema miŋ yiyaŋ, a nyɛ tosa miŋ luei balaŋ o kaa suundɛiyo niŋndo le. (Maa. 5:​28, 29) Mi bɛndu kunda pilɛ o Tailaŋ niŋ diolaŋ Deeve dimi aa: “Mi nyunaŋ aa: ‘Mi che bɛɛ fotueilaŋ ndaŋ la cho fotueila tumfondo le, kɛ baa mi Chɛhowa naŋ pa kɔl te I lambaŋ ndaŋ pɛ tofaa?’ Mi yiyaŋndo o hei choo mala ya, mi tosa sɔɔŋ a taasi.”

13. Yɛɛ mala yɛ naa miŋ tosa sɔɔŋ a taasi?

¹³ Le miŋ tosa sɔɔŋ a taasi, mɛɛ miŋ nɔ siooŋii bɛnda ve le Chɛhowa. Baabuiyo dimi maa, te wana nɔ siooŋii Mɛlɛkɛi pɛ, mɛɛ ‘taasioo kandɔŋ ndɔɔ’ ɔɔ chiyii nduɛi cho keŋ ni. (Pulɔ. 9:​10) Ŋ tiuba miŋ saaluŋ sɔɔŋ sɔviɔŋ a hei okɔɔ, te ŋ tofa pɛ Pulɔwaa bolle 9 kandɔŋndo. O suɛi maŋgalɛi kpeekpei nda poonyiaa Baabuiyo wo niŋ, mi bolle Baabuileŋ ndeŋ le suaa a wana lanɔ cheleŋ okɔɔ, o sim le ‘taasi kpeekpeiyo’ wo.

CHƐL VEELU ‘WANA LANƆ TAASIOO’

14. Teŋgeŋ kuɛɛ cho yɛ veelu waŋ laanduaa Pulɔwaa 9:​1-6 soo a nda okɔɔ wa tɛɛŋ?

¹⁴ Nuawɔ Pulɔwaa 9:​1-6. O bolle Baabuileŋ ndeŋ niŋ, mi Chɛhowa wana nɔ taasioo kpou wo, Wana Naa Toosiaa, veelu naa o ndulo. (Pulɔ. 2:​6; Luomaŋ. 16:​27) Mi bolle Baabuileŋ ndeŋ le suaa vɛlɛ a chiɛi bɛndu nɔ suŋgbuaŋ ma ŋɔmmɛuwo okɔɔ. Hei chɔm maa wana ikɛndɔɔ Chɛhowa cho ni, vɛlɛ maa o yeema mi wana o wana dɔu taasi ndɔɔ o wali niŋ.

15. Yɛɛ Mɛlɛka dimullɛ naa le miŋ tosa?

¹⁵ Wana ikɛndɔɔ Chɛhowa cho ni. Mbo ke naa nyɛ o nyɛ naŋ hauba. Suliŋndo hoo wana lanɔ sim le ‘taasi kpeekpeiyo’ wo nɔ ni.c Baabuiyo chɔm maa, mi wana lanɔɔ hoo yau visioŋ, mbo toosiaa muɛiyaŋ, nduyɛ mbo bɛɛndiaa tibii ndɔɔ o ndulo chiɛiniŋ. (Pulɔ. 9:​2) Okoŋ kɔɔli, a mɛɛ sɔɔŋ 4 a 5 dimi yɛ: ‘Mi wana lanɔ sim hoo le taasioo wo, dimul wanaa nɔ sinapɛŋgu bɔɔ le wa aa: La huŋ mi la huŋ dio nyɛdiaa ya I bɛɛndiaa wo.’ Le yɛɛ naŋ nɔ yɛ miŋ kuɛ o chuaa hoo lo chiɛiniŋ, nduyɛ miŋ de nyɛdiaa o bɛɛndiaa wo? Kanifuule, Chɛhowa yeema mi chuauwaa nduaa nɔ taasioo, nduyɛ ma mandaŋ. Pesiŋ bɛɛ o yeema naa miŋ tosa biondɔŋ naŋ kial niŋ sueiyo le. Lelaŋ Baabuiyo dimi ni aa, “[Taasioo] cho ndu o ba o kɛsiaa le wanaa wa ndu o hɔl sakpo wa kioo.” (Pulɔ. 2:​7) Te ŋ nɔ pɛ siooŋii bɛnda ve le Chɛhowa, ŋ cho nɔ yeemɛi le ndu kɔllo nɛŋioo. I tosa vɛlɛ miŋ tuei silala ndɔla taasilaŋ, nduyɛ miŋ wa a kɔl kɛndɛ le laŋ dɔwɔɔ o wali niŋ.—Chemi. 1:​25.

16. Vɛɛ siooŋii Alɛŋ nɔ le Mɛlɛka ve mala yɛ ndu mbo tosa kɛɛsiaalaŋ a taasi, nduyɛ fulamakɔɔli kuɛɛ o sɔla yɛ?

¹⁶ Ŋ tofaŋndɔ mɛɛ siooŋii Alɛŋ nɔ le Mɛlɛka ve, mala ndu le kɛɛsiaalaŋ tosaa a taasi yɛ? Bɛndu kundaa puaapilɛnɔɔ hoo cho ni. Nduyɛ sukuuwa o pɛɛku ni. Mbo dimi aa, “Wanaa bɔɔbɔɔ ya tosa wallo wa yiyaŋ maa, vidueila tumfondolaŋ tofaa, cho nɛiyo opilɛ le ndapila pɛɛkɔŋndo ni.” Kɛ Alɛŋ ndoo sina maa keŋ cho tonya le. Mbo chɔɔlu dimi aa, “Le mɛɛ ya nɔ siooŋnde le Mɛlɛka yɛ, pesiŋ bɛɛ I tofa vidueila laŋ te. Nduyɛ mi tɛɛsial chaaŋaa niaa naŋ tosa wallo wa, le sabu ya tosa kɛɛsiaa koŋ ndo.” Sila taasi fula Chɛhowa o ba wo o wa koŋ dɔwɔɔ o wali niŋ ni. Ndu cho ni aa, “La tol nɛi sina pɛŋgoo kɔɔli.” (Pulɔ. 9:​6) Mi kɛɛsiaa Alɛŋ tosa koŋ ndo, pilaŋ chaaŋaa nduaa nda tosa wallo wa kɔllo tau. Le hei, apum cho suŋ suŋ Baabuiyo pɛɛkoo, vɛlɛ a cho kɔlaŋ o bɔŋaŋndaŋ.

17-18. Salala kuɛɛ wanaa chɛl veelu ‘wana lanɔ taasioo’ wa tuɛi yɛ yeela, nduyɛ yɛɛ nda cho yɛ lehɔl o nɛi le ndu? (Tofa vɛlɛ fotueiyo.)

¹⁷ Mi Chɛhowa chua tamaseliiyo a waŋ laanduaa ŋiɔɔŋnda haa okɔɔ, le naa malaa miŋ che mɛɛ naŋ tiuba miŋ tuei yoomoo yeela suŋ suŋ, a o chilaŋ niŋ yɛ. Mi wanaa chɛl veelu ‘wana lanɔ diɔmndo’ wa, handu kɔllo o nyɛ nda tuɛi yeela o sɔɔsɔɔyɛi niŋndo choo. Kɛ waŋnda haa sina mɛɛ kaala ndalaŋ la piiliaŋ niŋ nda o chilaŋ niŋ yɛ le. Fulamakɔɔli nda sɔla niŋndo cho ‘piɔmndo’ ni.—Pulɔ. 9:​13, 17, 18.

¹⁸ Wanaa cho veelu ‘wana lanɔ taasioo’ chɛlɔɔ wa, nɔ fulamakɔɔli cheleŋ. Waŋnda haa cho a kɔl kɛndɛ kanifuule, a nɔ nyɛ o nyɛ nda hauba le nda malaa ma wa o chaŋyɛi kpɛɛluŋnde niŋ a Chɛhowa. (Aisaya 65:​13) Sanaa a Aisaya wana ndoo suaa le Chɛhowa wo, mi Chɛhowa dimi aa: “La yaŋ ya nilaŋ nyɛ kɛndɛ kɛndɛ, mi la tuei nyɛdiaa kɛndɔɔ yeela. [La] cho nyɛdiaa kɛndɛ kɛndɔɔ tueiyɔɔ yeela.” (Aisaya 55:​1, 2) Ŋ cho pɛɛkoo le nyɛ Chɛhowa kaala wo kaalaa, a nyɛ o tul leyɛ wo yɛleŋ tullo. (Sam 97:​10) Nduyɛ miŋ wa a kɔl kɛndɛ le acheleŋnda veeloo, le ma huŋ sɔla tɔnɔɔ o ‘taasi kpeekpeiyo’ niŋ. I cho ko maa o ‘fondaŋ vilɛi bɛndu cho o chioo niŋ tema wo naŋ hel ni, miŋ wa waŋnda veeloo choo choo kpeleŋ aa, wana o wana nɔ sinapɛŋgu bɔɔ le, la huŋ.’ Wana o wana chɛl pɛ veeloo hoo, tɔnɔla o sɔla laŋ, la ve ko le suŋ suŋ te. La cho wa lefafɛɛŋ kanifuule, la cho tosa miŋ “tol nɛi sina pɛŋgoo kɔɔli,” nduyɛ miŋ huŋ wa achal le fafɛɛŋ.—Pulɔ. 9:​3, 4, 6.

19. A mɛɛ Ikilisiaatii 12:​13, 14 dimi yɛ, yɛɛ naŋ nɔ yɛ miŋ kɛɛsiaŋ o kɔl le tosaa? (Tofa vɛlɛ kɔfoo hoo, “Siooŋnde Nɔɔ le Mɛlɛka Chuu Naa Tɔnɔlaŋ Tau.”)

¹⁹ Nuawɔ Ikilisiaatii 12:​13, 14. Maa ŋ kɛɛsiaŋ o kɔl, le mi siooŋii naŋ nɔ le Mɛlɛka ve hiou lachi a kɔlta naalaŋ mandaa, miŋ wa a diandaa ndu o hɔl, nduyɛ miŋ nɔ chaŋyɛi kpɛɛluŋnde a ndu o palɛi mɛɛlɛi hei niŋ. Siooŋii bɛnda ve nɔɔ le Mɛlɛka cho naa nyindɔɔ le miŋ hiou lachi a waŋnda veeloo, le ma huŋ nuuviaa ‘taasi kpeekpeiyo,’ okoŋ ma sɔla tɔnɔɔ leniŋ.