မးသဲ
၁၃ ဖဲတၢ်တနံၤန့ၣ် ယ့ၣ်ၡူး ဟးထီၣ်လၢ ဟံၣ်အဝဲန့ၣ် ဒီးလဲၤဆ့ၣ်နီၤဝဲလၢ ပီၣ်လဲၣ်နံၤလီၤ. ၂ ဒီးပှၤဂီၢ်မုၢ်ဖးဒိၣ်ဟဲဆူ ယ့ၣ်ၡူးအအိၣ်လီၤ. အဃိ အဝဲလဲၤထီၣ်လၢ ကဘီပူၤ ဒီးဆ့ၣ်နီၤဝဲလီၤ. မ့မ့ၢ် ပှၤဂီၢ်မုၢ်ခဲလၢာ်န့ၣ် ဆၢထၢၣ်ဝဲလၢ ပီၣ်လဲၣ်နံၤလီၤ. ၃ ဒီးယ့ၣ်ၡူးတဲဘၣ် အဝဲသ့ၣ်လၢ တၢ်ကတိၤဒိအါမံၤလီၤ. ဒီးတဲဝဲလၢ “ပှၤဖှံတၢ်ချံတဂၤ လဲၤဖှံတၢ်လီၤ. ၄ ဖဲအဝဲဖှံတၢ်အခါ တၢ်ချံတနီၤန့ၣ် လီၤဘၣ်လၢ ကျဲကပၤ ဒီးထိၣ်တဖၣ် ဟဲအီၣ်ကွံာ်ဝဲလီၤ. ၅ တၢ်ချံအဂၤတနီၤန့ၣ် လီၤဘၣ်လၢ လၢၢ်အဖီခိၣ် လၢဟီၣ်ခိၣ်တအိၣ် အါအါဘၣ်န့ၣ်လီၤ. ဒီးမ့ၢ်လၢ ဟီၣ်ခိၣ်ညၣ် ဘူဝဲအဃိ တၢ်ချံတဖၣ်မဲထီၣ်ဝဲ တဘျီဃီလီၤ. ၆ ဘၣ်ဆၣ် တုၤမုၢ်ဟဲထီၣ် ဒီးဆဲးလီၤဘၣ်ဝဲ တၢ်မုၢ်တၢ်ဘိတဖၣ်အံၤအခါ အဝဲသ့ၣ်ဃ့ထီဝဲ မ့ၢ်လၢ အဂံၢ်တအိၣ်ဘၣ် အဃိလီၤ. ၇ ဒီးတၢ်ချံအဂၤတနီၤန့ၣ် လီၤဘၣ်လၢ တၤဆှုၣ်တၤမဲအကျါအဃိ တၤဆှုၣ်တၤမဲတဖၣ် မဲထီၣ်ဒီး ခဲဘၢအီၤလီၤ. ၈ မ့မ့ၢ် တၢ်ချံအဂၤတနီၤနီၤန့ၣ် လီၤဘၣ်လၢ ဟီၣ်ခိၣ်ညၣ်လၢ အဂ့ၤအဖီခိၣ်အဃိ သၣ်ထီၣ်ဝဲလီၤ. တနီၤန့ၣ် သၣ်ထီၣ်ဝဲ အါန့ၢ်အလီၢ်အစး ၁၀၀ ဒီးတနီၤန့ၣ် ၆၀ ဒီးအဂၤတနီၤန့ၣ် ၃၀ လီၤ. ၉ ပှၤလၢ အိၣ်ဒီးအနၢ်န့ၣ် မ်အဒိကနၣ်တၢ်တက့ၢ်.”
၁၀ အဃိ ယ့ၣ်ၡူးအပျဲၢ်အဘီၣ်တဖၣ် ဟဲဆူအအိၣ် ဒီးတဲအီၤလၢ “ဖဲနတဲတၢ်ဒီး အဝဲသ့ၣ်အခါ ဘၣ်မနုၤအဃိ နသူတၢ်ကတိၤဒိလဲၣ်.” ၁၁ ဒီးယ့ၣ်ၡူးတဲဆၢက့ၤ အဝဲသ့ၣ်လၢ “သုဝဲသ့ၣ်အံၤ တၢ်ဟ့ၣ်လီၤသုအခွဲးလၢ သုကနၢ်ပၢၢ် တၢ်ခူသူၣ်စီဆှံတဖၣ် လၢအဘၣ်ဃးဒီး မူခိၣ်အဘီအမုၢ် ဘၣ်ဆၣ် မ့မ့ၢ်အဝဲသ့ၣ်န့ၣ် တၢ်တဟ့ၣ်အီၤအခွဲးဘၣ်. ၁၂ ပှၤလၢ အတၢ်အိၣ်န့ၣ် တၢ်ကဟ့ၣ်လီၤအါထီၣ်ဒံးအီၤ ဒီးအတၢ်ကအိၣ် အါအါဂီၢ်ဂီၢ်လီၤ. ဘၣ်ဆၣ် ပှၤလၢ အတၢ်တအိၣ်ဘၣ်န့ၣ် တၢ်လၢ အိၣ်ဒီးအီၤတဖၣ်ဒၣ်လဲာ် တၢ်ကဟံးထီၣ်ကွံာ်အီၤလီၤ. ၁၃ ဒီးအဝဲသ့ၣ်န့ၣ် ကွၢ်တၢ်ဘၣ်ဆၣ် တထံၣ်ဝဲဘၣ်, နၢ်ဟူဝဲဘၣ်ဆၣ် တဒိကနၣ်ဝဲဘၣ် ဒီးအဝဲသ့ၣ် တနၢ်ပၢၢ်ဝဲ အခီပညီစ့ၢ်ကီးဘၣ်. အဃိ ဖဲယတဲတၢ်ဒီး အဝဲသ့ၣ်အခါ ယသူ တၢ်ကတိၤဒိလီၤ. ၁၄ ဝံယၡါယၤ တဲဆိပာ်ဝဲ ဘၣ်ဃးဒီး အဝဲသ့ၣ်န့ၣ် ဟဲလၢထီၣ်ပှဲၤထီၣ်ဝဲလံ. ဝံယၡါယၤ တဲဆိပာ်ဝဲလၢ ‘သုကနၢ်ဟူတၢ် ဘၣ်ဆၣ် လ့ၤတက့ၤ သုတနၢ်ပၢၢ် အခီပညီဘၣ်. ဒီးသုကကွၢ်တၢ် ဘၣ်ဆၣ် လ့ၤတက့ၤ သုတထံၣ်အီၤဘၣ်. ၁၅ ပှၤတဖၣ်အံၤ အသးန့ၣ် ကိၤဝဲဒိၣ်မးလီၤ. အဝဲသ့ၣ်နၢ်ဟူတၢ် ဘၣ်ဆၣ် တဒိကနၣ်ဝဲဘၣ် ဒီးအဝဲသ့ၣ် ဘံၣ်ဃာ်အမဲာ်ဒ်သိး အသု တထံၣ်တၢ်တဂ့ၤ, တူတံာ်အနၢ်ဒ်သိး အသု တနၢ်ဟူတၢ်တဂ့ၤ ဒီးအသု တနၢ်ပၢၢ်တၢ်တဂ့ၤအဂီၢ်လီၤ. ဒီးအဝဲသ့ၣ် တဃၣ်ကဒါက့ၤ အသးဘၣ်အဃိ ယမၤဘျါက့ၤ အဝဲသ့ၣ်တသ့ဘၣ်.’
၁၆ “မ့ၢ်လၢ သုမဲာ်န့ၣ်ထံၣ်တၢ် ဒီးသုနၢ်န့ၣ် နၢ်ဟူတၢ်သ့ၣ်တဖၣ်အံၤအဃိ သုကသးခုဝဲလီၤ. ၁၇ ယကတဲဘၣ်သု တီတီလၢ ဝံဒီးပှၤတီပှၤလိၤအါဂၤ ဆၢထံၣ်ဝဲတၢ်လၢ သုထံၣ်ဘၣ်တဖၣ် ဘၣ်ဆၣ် တထံၣ်ဝဲဘၣ်. ဒီးအဝဲသ့ၣ် ဆၢနၢ်ဟူဝဲ တၢ်လၢသုနၢ်ဟူဘၣ်တဖၣ် ဘၣ်ဆၣ် တနၢ်ဟူဝဲဘၣ်.
၁၈ “ခဲအံၤဒိကနၣ် တၢ်ကတိၤဒိတခါလၢ အဘၣ်ဃးဒီး ပှၤဖှံတၢ်ချံတဂၤအဂ့ၢ် န့ၣ်တက့ၢ်. ၁၉ ပှၤလၢ အနၢ်ဟူဘၣ် ဘီမုၢ်အဂ့ၢ် ဘၣ်ဆၣ် မ့ၢ်တနၢ်ပၢၢ်ဝဲဘၣ်န့ၣ် မုၣ်ကီၤလံၢ်* ဟဲဒီးဟံးထီၣ်ကွံာ်ဝဲ တၢ်ချံလၢ ဘၣ်တၢ်ဖှံလီၤအီၤလၢ အသးပူၤန့ၣ်လီၤ. အဝဲအံၤမ့ၢ်ဝဲ တၢ်ချံလၢ အလီၤဘၣ်လၢ ကျဲကပၤန့ၣ်လီၤ. ၂၀ ဒီးတၢ်ချံလၢ အလီၤဘၣ်လၢ လၢၢ်အဖီခိၣ်န့ၣ် မ့ၢ်ဝဲပှၤလၢ အနၢ်ဟူဘၣ် ကစၢ်ယွၤ အကလုၢ်ကထါ ဒီးတူၢ်လိာ်ဝဲလၢ တၢ်သးခုအပူၤ တဘျီဃီလီၤ. ၂၁ အဂံၢ်တစဲၤလီၤလၢ အသးပူၤဘၣ်ဆၣ် အဝဲတူၢ်လိာ်ဝဲ တစိၢ်တလီၢ်လီၤ. ဖဲတၢ်ကီတၢ်ခဲ ဒီးတၢ်မၤအၢမၤနး ဟဲဘၣ်အီၤခီဖျိလၢ ကစၢ်ယွၤ အကလုၢ်ကထါအဃိအခါ လီၤဃံၢ်ဝဲတဘျီဃီလီၤ. ၂၂ မ့မ့ၢ်တၢ်ချံလၢ အဘၣ်တၢ်ဖှံလီၤအီၤလၢ တၤဆှုၣ်တၤမဲအကျါတဖၣ်န့ၣ် မ့ၢ်ဝဲပှၤလၢအနၢ်ဟူဘၣ် ကစၢ်ယွၤ အကလုၢ်ကထါ ဘၣ်ဆၣ် စိၤခဲအံၤ အတၢ်ကိၢ်တၢ်ဂီၤတဖၣ် ဒီးတၢ်ထူးတၢ်တီၤ အတၢ်လီတၢ်ဝ့ၤ ခဲဘၢကွံာ် ကစၢ်ယွၤ အကလုၢ်ကထါအဃိ တသၣ်ထီၣ်ဝဲဘၣ်. ၂၃ မ့မ့ၢ် တၢ်ချံလၢ အလီၤဘၣ်လၢ ဟီၣ်ခိၣ်ညၣ်လၢ အဂ့ၤအဖီခိၣ်န့ၣ် မ့ၢ်ဝဲပှၤလၢ အနၢ်ဟူဘၣ် ကစၢ်ယွၤ အကလုၢ်ကထါ ဒီးနၢ်ပၢၢ်ဝဲအခီပညီန့ၣ်လီၤ. အဝဲသ့ၣ်တဖၣ်န့ၣ် သၣ်ထီၣ်ဝဲလီၤ. တနီၤန့ၣ် သၣ်ထီၣ်ဝဲ အါန့ၢ်အလီၢ်အစး ၁၀၀ ဒီးတနီၤန့ၣ် ၆၀ ဒီးအဂၤတနီၤန့ၣ် ၃၀ လီၤ.”
၂၄ ယ့ၣ်ၡူး တဲဘၣ်အဝဲသ့ၣ် တၢ်ကတိၤဒိလၢအဂၤတခါလၢ “ယွၤအဘီအမုၢ်န့ၣ် လီၤဂာ်ဒီးပှၤတဂၤလၢ အဖှံလီၤ တၢ်ချံအဂ့ၤလၢ အစံာ်ပျီပူၤန့ၣ်လီၤ. ၂၅ ဖဲပှၤမံဝဲ အဆၢကတီၢ်န့ၣ် အဒုၣ်အဒါတဂၤ ဟဲဒီးဖှံလီၤဝဲနီၣ်* အချံတဖၣ်လၢဘု* အကျါဒီး ဟးထီၣ်ကွံာ်ဝဲလီၤ. ၂၆ ဖဲဘုအံၤဟဲမဲထီၣ်ဒီး သၣ်ထီၣ်ဝဲအခါ နီၣ်တဖၣ် ဟဲမဲထီၣ်ဃုာ်ဝဲစ့ၢ်ကီးလီၤ. ၂၇ အဃိ ကုၢ်တဖၣ် ဟဲတဲဘၣ် ဟံၣ်အကစၢ်လၢ ‘သရၣ်ဧၢ, နဖှံလီၤတၢ်ချံအဂ့ၤလၢ နစံာ်ပျီအပူၤ တမ့ၢ်ဘၣ်ဧါ. ဘၣ်မနုၤအဃိ နီၣ်တဖၣ် ဟဲမဲထီၣ်ဝဲလဲၣ်.’ ၂၈ ဒီးအဝဲတဲဆၢက့ၤ အကုၢ်တဖၣ်လၢ ‘ဒုၣ်ဒါတဂၤ ဟဲမၤဝဲဒ်အံၤအဃိလီၤ.’ ဒီးအကုၢ်တဖၣ်န့ၣ် တဲဆၢက့ၤအီၤလၢ ‘နအဲၣ်ဒိးလၢ ပကလဲၤ ထဲးထီၣ်ကွံာ်အီၤဧါ.’ ၂၉ အဝဲတဲဆၢက့ၤဝဲလၢ ‘မၤတဂ့ၤ, ယဘၣ်ယိၣ်လၢ သုမ့ၢ်ထဲးထီၣ်ကွံာ် နီၣ်သ့ၣ်တဖၣ်န့ၣ် သုကထဲးထီၣ်ဘၣ်ဖုး ဒီးဘုလီၤ. ၃၀ ပျဲအဝဲသ့ၣ် ဒိၣ်ထီၣ်ဃုာ်တုၤလၢ တၢ်ကူးဘု အဆၢကတီၢ်တက့ၢ်. ဖဲတၢ်ကူးဘု အဆၢကတီၢ်န့ၣ် ယကတဲဘၣ် ပှၤကူးဘုဖိတဖၣ်လၢ ထဲးထီၣ်ဆိ နီၣ်သ့ၣ်တဖၣ် ဒီးစၢကဒိၣ်ထီၣ်အီၤ တကဒိၣ်ဘၣ်တကဒိၣ် ဒ်သိးကဒွဲၣ်အူကွံာ်အီၤ အဂီၢ်တက့ၢ်. ဝံၤဒီး မ့မ့ၢ် ဘုသ့ၣ်တဖၣ်န့ၣ် ပာ်ဖှိၣ်အီၤလၢ ယဘုဖီအပူၤတက့ၢ်.’”
၃၁ ယ့ၣ်ၡူး တဲဘၣ်အဝဲသ့ၣ် တၢ်ကတိၤဒိလၢ အဂၤတခါ ဒီးတဲဝဲလၢ “မူခိၣ်အဘီအမုၢ်န့ၣ် လီၤဂာ်ဒီး သဘၣ်အချံ* လၢပှၤတဂၤဟံးန့ၢ်ဝဲ ဒီးသူၣ်လီၤဝဲလၢ အစံာ်ပျီပူၤန့ၣ်လီၤ. ၃၂ လၢတၢ်ချံခဲလၢာ်အကျါန့ၣ် အဝဲမ့ၢ်တၢ်ချံလၢ အဆံးကတၢၢ် ဘၣ်ဆၣ် ဖဲအမဲထီၣ်အခါ ဒိၣ်န့ၢ်ဒံး တၢ်ဒိးတၢ်လၣ် အထူၣ်အဂၤတဖၣ် ဒီးကဲထီၣ်ဝဲသ့ၣ်တထူၣ် ဒီးထိၣ်လၢ တၢ်ဖးဖီတဖၣ် ဟဲဒီးအိၣ်ဝဲလၢ အဒ့တဖၣ်အလိၤလီၤ.”
၃၃ ယ့ၣ်ၡူး တဲဘၣ်အဝဲသ့ၣ် တၢ်ကတိၤဒိ လၢအဂၤတခါ ဒီးတဲဝဲလၢ “မူခိၣ်အဘီအမုၢ်န့ၣ် လီၤဂာ်ဒီး ကိၣ်မံၣ်လၢ ပိာ်မုၣ်တဂၤ ဃါဃုာ်ဝဲဒီးကိၣ်အကမူၣ် သၢတလိးတုၤလီၤလၢ အပွးထီၣ်ဝဲခဲလၢာ်န့ၣ်လီၤ.”
၃၄ ဖဲယ့ၣ်ၡူးတဲဘၣ် ပှၤဂီၢ်မုၢ်လၢ တၢ်ဂ့ၢ်သ့ၣ်တဖၣ်အံၤ ခဲလၢာ်အခါ အဝဲသူ တၢ်ကတိၤဒိတဖၣ်လီၤ. မ့ၢ်လီၤ, တၢ်ကတိၤဒိ မ့ၢ်တပၣ်ဘၣ်န့ၣ် အဝဲတတဲတၢ်ဒီး အဝဲသ့ၣ်ဘၣ်. ၃၅ အဃိ တၢ်မၤအသးတဖၣ်အံၤ မၤလၢထီၣ်ပှဲၤထီၣ် ဝံအတၢ်စံးပာ်လၢအ တဲဝဲလၢ “ယကအိးထီၣ် ယထးခိၣ်လၢ တၢ်ကတိၤဒိတဖၣ်လီၤ. တၢ်လၢ အအိၣ်ခူသူၣ်အသးလၢ အခီၣ်ထံးလံၤလံၤန့ၣ်* ယကတဲဖျါထီၣ်အီၤလီၤ.”
၃၆ ယ့ၣ်ၡူးပျဲက့ၤ ပှၤဂီၢ်မုၢ်သ့ၣ်တဖၣ် ဝံၤအလီၢ်ခံ အဝဲက့ၤနုာ်လီၤဝဲလၢ ဟံၣ်ပူၤလီၤ. ဒီးအပျဲၢ်အဘီၣ်တဖၣ် ဟဲတဲအီၤလၢ “တၢ်ကတိၤဒိလၢအမ့ၢ် နီၣ်တဖၣ်လၢ စံာ်ပျီပူၤန့ၣ် တဲနၢ်ပၢၢ်ပှၤ အခီပညီတက့ၢ်.” ၃၇ ယ့ၣ်ၡူးတဲဆၢက့ၤအဝဲသ့ၣ်လၢ “ပှၤလၢအဖှံလီၤတၢ်ချံ လၢအဂ့ၤတဂၤန့ၣ် မ့ၢ်ဝဲပှၤကညီဖိခွါအံၤလီၤ. ၃၈ စံာ်ပျီပူၤန့ၣ် မ့ၢ်ဝဲဟီၣ်ခိၣ် ဒီးတၢ်ချံအဂ့ၤန့ၣ်မ့ၢ်ဝဲ ဘီမုၢ်အဖိခွါတဖၣ် ဒီးနီၣ်န့ၣ်မ့ၢ်ဝဲ မုၣ်ကီၤလံၢ်* အဖိခွါတဖၣ်လီၤ. ၃၉ ဒီးဒုၣ်ဒါလၢ အလဲၤဖှံလီၤတၢ်တဂၤန့ၣ် မ့ၢ်ဝဲမုၣ်ကီၤလံၢ်လီၤ. ဒီးတၢ်ကူးဘု အဆၢကတီၢ်န့ၣ် မ့ၢ်ဝဲတၢ်အစိၤလၢ အလီၢ်ခံကတၢၢ်န့ၣ်လီၤ. မ့မ့ၢ် ပှၤကူးတၢ်တဖၣ်န့ၣ် မ့ၢ်ဝဲမူခိၣ်ကလူးတဖၣ်လီၤ. ၄၀ ဒ်နီၣ်တဖၣ် ကဘၣ် တၢ်စၢကဒိၣ်ထီၣ်အီၤ တကဒိၣ်ဘၣ်တကဒိၣ် လၢတၢ်ကဒွဲၣ်အူကွံာ်အီၤ လၢမ့ၣ်အူအဂီၢ်အသိး တၢ်အစိၤလၢ အလီၢ်ခံကတၢၢ်န့ၣ် တၢ်ကမၤအသး ဒ်န့ၣ်စ့ၢ်ကီးလီၤ. ၄၁ ပှၤကညီဖိခွါအံၤ ကဆှၢလီၤ အမူခိၣ်ကလူးတဖၣ် ဒီးအဝဲသ့ၣ် ကထုးထီၣ်ကွံာ် ကယဲၢ်တၢ်အိၣ်လၢ အဘီအမုၢ်အပူၤ လၢအကဲထီၣ် တၢ်လီၤဃံၢ်အလီၢ် ဒီးပှၤလၢအမၤ တၢ်အၢတၢ်သီတဖၣ်န့ၣ်လီၤ. ၄၂ ဒီးမူခိၣ်ကလူးသ့ၣ်တဖၣ် ကတၢၤလီၤကွံာ် အဝဲသ့ၣ်လၢ ဖၣ်ကပူၤ လၢမ့ၣ်အူကဲၤဝဲန့ၣ်လီၤ. ဖဲန့ၣ်န့ၣ် အဝဲသ့ၣ် ကဟီၣ်ကယၢၤ ဒီးကအ့ၣ်တဃံးအမဲလီၤ. ၄၃ ဖဲန့ၣ်အခါ ပှၤတီပှၤလိၤတဖၣ် ကကပီၤထီၣ် ကပြုၢ်ကပြီၤဒ်မုၢ်အသိး လၢအဝဲသ့ၣ် အပၢ်အဘီအမုၢ်အပူၤလီၤ. ပှၤလၢ အိၣ်ဒီးအနၢ်န့ၣ် မ်အဒိကနၣ်တၢ်တက့ၢ်.
၄၄ “မူခိၣ်အဘီအမုၢ်န့ၣ် လီၤဂာ်ဒီး တၢ်လုၢ်ဒိၣ်ပှ့ၤဒိၣ်တခါလၢ ဘၣ်တၢ်ပာ်ခူသူၣ်အီၤလၢ စံာ်ပျီပူၤန့ၣ်လီၤ. ဒီးပှၤလၢ အထံၣ်န့ၢ်ဝဲတဂၤန့ၣ် ပာ်ခူသူၣ်အီၤ ဒီးခီဖျိလၢ အသးခုဝဲအဃိ အဝဲ လဲၤဆါလီၤကွံာ်ဝဲ တၢ်လၢအိၣ်ဒီးအီၤခဲလၢာ် ဒီးပှ့ၤဝဲ စံာ်ပျီအံၤလီၤ.
၄၅ “တကးဒံးဘၣ် မူခိၣ်အဘီအမုၢ်န့ၣ် လီၤဂာ်ဒီး ပှၤပှ့ၤတၢ်ဆါတၢ်တဂၤလၢ အဟးဃုဝဲ ပလဲလၢ အလုၢ်ဒိၣ်ပှ့ၤဒိၣ်တဖၣ်န့ၣ်လီၤ. ၄၆ ဖဲအထံၣ်ဝဲ ပလဲလၢ အလုၢ်ဒိၣ်ပှ့ၤဒိၣ် တဖျၢၣ်အခါ အဝဲက့ၤဆါလီၤကွံာ်ဝဲ တၢ်လၢအိၣ်ဒီးအီၤခဲလၢာ် ဒီးပှ့ၤဝဲ ပလဲအံၤလီၤ.
၄၇ “တကးဒံးဘၣ် မူခိၣ်အဘီအမုၢ်န့ၣ် လီၤဂာ်ဒီး စၤတဘ့ၣ်လၢ ဘၣ်တၢ်ကွံာ်လီၤအီၤလၢ ပီၣ်လဲၣ်အပူၤ ဒီးဖီၣ်န့ၢ်ဝဲ ညၣ်အကလုာ်ကလုာ်န့ၣ်လီၤ. ၄၈ တုၤစၤအံၤ ပှဲၤဝဲအခါ ပှၤတွံၢ်ထီၣ်က့ၤအီၤလၢ ပီၣ်လဲၣ်ကၢၢ်နံၤလီၤ. အဝဲသ့ၣ်ဆ့ၣ်နီၤ ဒီးထၢဖှိၣ်ဝဲ ညၣ်အဂ့ၤတဖၣ် လၢကုပူၤလီၤ. မ့မ့ၢ်ညၣ်လၢ အအုၣ်တဖၣ်န့ၣ် အဝဲသ့ၣ် တၢၤကွံာ်ဝဲလီၤ. ၄၉ တၢ်အစိၤလၢ အလီၢ်ခံကတၢၢ်န့ၣ် ကမၤအသးဒ်န့ၣ်လီၤ. မူခိၣ်ကလူးတဖၣ် ကလဲၤနီၤဖးဝဲ ပှၤအၢလၢပှၤဂ့ၤအကျါလီၤ. ၅၀ ဒီးကကွံာ်လီၤ အဝဲသ့ၣ်လၢ ဖၣ်ကပူၤ လၢမ့ၣ်အူကဲၤဝဲန့ၣ်လီၤ. ဖဲန့ၣ်န့ၣ် အဝဲသ့ၣ် ကဟီၣ်ကယၢၤ ဒီးကအ့ၣ်တဃံးအမဲလီၤ.
၅၁ “တၢ်ဂ့ၢ်သ့ၣ်တဖၣ်အံၤန့ၣ် မ့ၢ်သုနၢ်ပၢၢ်အီၤခဲလၢာ်လံဧါ.” အဝဲသ့ၣ်စံးဆၢ ယ့ၣ်ၡူးလၢ “မ့ၢ်, နၢ်ပၢၢ်လံ.” ၅၂ ဒီးယ့ၣ်ၡူး တဲအဝဲသ့ၣ်လၢ “အဃိ ကယဲၢ်သရၣ်လၢ ဘၣ်တၢ်သိၣ်လိအီၤလၢ မူခိၣ်အဘီအမုၢ်အဂ့ၢ်န့ၣ် လီၤဂာ်ဒီး ဟံၣ်ကစၢ်တဂၤလၢ အထုးထီၣ်ဝဲ တၢ်အသီဒီး တၢ်အလီၢ်လံၤလၢ အတၢ်ပာ်ဖှိၣ် တၢ်လုၢ်ဒိၣ်ပှ့ၤဒိၣ်အလီၢ်န့ၣ်လီၤ.”
၅၃ ဖဲယ့ၣ်ၡူးတဲဝဲ တၢ်ကတိၤဒိတဖၣ်အံၤ ဝံၤအလီၢ်ခံ အဝဲဟးထီၣ်ကွံာ်ဝဲ ဖဲန့ၣ်လီၤ. ၅၄ ဖဲအဟဲက့ၤတုၤလၢ အနီၢ်ကစၢ် အဟီၣ်ကဝီၤအခါ အဝဲလဲၤသိၣ်လိတၢ်လၢ ဘူၣ်ဘျီၣ်ပူၤလီၤ. ဒီးပှၤဖဲန့ၣ်တဖၣ် ကမၢကမၣ်ဝဲအဃိ တဲဝဲလၢ “ပှၤတဂၤအံၤ ဒိးန့ၢ်ဘၣ် တၢ်ကူၣ်သ့ ဒီးအတၢ်စိတၢ်ကမီၤ လၢကမၤ တၢ်လီၤလးတဖၣ်အံၤ အဂီၢ်ဖဲလဲၣ်. ၅၅ ပှၤတဂၤအံၤ မ့ၢ်ပှၤစုသ့တဂၤအဖိခွါ တမ့ၢ်ဘၣ်ဧါ. အမိၢ်အမံၤမ့ၢ် နီၢ်မၤရံ ဒီးအပုၢ်တဖၣ်န့ၣ်မ့ၢ်ဝဲ စီၤယၤကိာ်, စီၤယိၤသး, စီၤၡံမိၣ် ဒီးစီၤယူဒၤ တမ့ၢ်ဘၣ်ဧါ. ၅၆ ဒီးအဒီပုၢ်ဝဲၢ်မုၣ်ခဲလၢာ် အိၣ်ဒီးပှၤဖဲအံၤ တမ့ၢ်ဘၣ်ဧါ. မ့မ့ၢ်ဒ်န့ၣ်န့ၣ် အဝဲလဲၤမၤန့ၢ် တၢ်သ့ၣ်တဖၣ်အံၤဖဲလဲၣ်.” ၅၇ အဃိ အဝဲကဲထီၣ် တၢ်လီၤဃံၢ်အလီၢ်လၢ အဝဲသ့ၣ်အဂီၢ်လီၤ. ဘၣ်ဆၣ် ယ့ၣ်ၡူးတဲဘၣ် အဝဲသ့ၣ်လၢ “တၢ်လၢဝံန့ၣ် ဘၣ်တၢ်ပာ်ဒိၣ်အီၤလၢ တၢ်လီၢ်ကိးပူၤဒဲးလီၤ. မ့မ့ၢ်လၢ အနီၢ်ကစၢ် အဟီၣ်ကဝီၤအပူၤ ဒီးအနီၢ်ကစၢ် အဟံၣ်န့ၣ် ပှၤတပာ်ဒိၣ်အီၤဘၣ်.” ၅၈ မ့ၢ်လၢအဝဲသ့ၣ် အတၢ်နာ်တအိၣ်ဘၣ်အဃိ ဖဲတၢ်လီၢ်အဝဲန့ၣ် ယ့ၣ်ၡူးတမၤတၢ်လီၤလး အါအါဘၣ်.