မးသဲ
၂၁ ဖဲအဝဲသ့ၣ် လဲၤဘူးကတုၤလၢ ယရူၤၡလ့ၣ် ဒီးလဲၤတုၤဝဲဖဲ ဘ့ၤသဖၤက့ လၢကစၢၢ်သ့ၣ်စၤယံးအခါ ယ့ၣ်ၡူးမၢ အပျဲၢ်အဘီၣ်ခံဂၤ ၂ ဒီးတဲအဝဲသ့ၣ်လၢ “လဲၤနုာ်လီၤလၢသဝီလၢ သုကွၢ်စိအီၤဖျါတဖျၢၣ် ဒီးတဘျီဃီန့ၣ် သုကထံၣ် ကသ့ၣ်ယီၤအမိၢ်လၢ အဘၣ်တၢ်စၢဃာ်အီၤ ဒီးအဖိ ကအိၣ်ဒီးအီၤလီၤ. ဃဲၣ်လီၤအဝဲသ့ၣ် ဒီးဟဲက့ၤမူၤအီၤဆူ ယအိၣ်တက့ၢ်. ၃ ဒီးပှၤမ့ၢ်တဲသု တၢ်တမံၤမံၤန့ၣ် သုဘၣ်တဲ အဝဲသ့ၣ်လၢ ‘ကစၢ်လိၣ်ဘၣ် အဝဲသ့ၣ်လီၤ.’ ဒီးအကဟ့ၣ်လီၤဝဲ တဘျီဃီလီၤ.”
၄ တၢ်မၤအသးအံၤ မၤလၢထီၣ်ပှဲၤထီၣ်ဝဲ ဝံအတၢ်စံးပာ် လၢအမ့ၢ် ၅ “တဲဘၣ်စံယိၣ် အဖိမုၣ်လၢ ‘ကွၢ်မီၤ, နစီၤပၤ ဟဲဆူနအိၣ်လံ. အသးစူၤ ဒီးဒိးထီၣ်ဝဲ ကသ့ၣ်ယီၤ လၢအမ့ၢ်ဝဲ ကသ့ၣ်ယီၤဖိန့ၣ်လီၤ.’”
၆ အဃိ အပျဲၢ်အဘီၣ်တဖၣ် လဲၤမၤဝဲဒ် ယ့ၣ်ၡူး မၢအဝဲသ့ၣ်အသိးလီၤ. ၇ အဝဲသ့ၣ် ဟဲက့ၤမူၤ ကသ့ၣ်ယီၤအမိၢ် ဒီးအဖိ ဒီးဒါလီၤဝဲ အတၢ်ကူတၢ်ကၤလၢ အဝဲသ့ၣ်အလိၤ ဒီးယ့ၣ်ၡူးဆ့ၣ်နီၤဝဲလၢ အလိၤန့ၣ်လီၤ. ၈ ဒီးပှၤဂီၢ်မုၢ်အါတက့ၢ်န့ၣ် ဒါလီၤအကူအကၤ လၢကျဲပူၤ ဒီးတနီၤန့ၣ် ကျီလီၤဝဲသ့ၣ်ဒ့ ဒီးပာ်လီၤဝဲလၢ ကျဲပူၤလီၤ. ၉ တကးဒံးဘၣ် ပှၤဂီၢ်မုၢ်လၢ အဟးလၢအမဲာ်ညါ ဒီးလၢအလီၢ်ခံန့ၣ် ကိးပသူထီၣ်ဝဲလၢ “ပဃ့ကညးနၤလၢ မၤပူၤဖျဲး စီၤဒၤဝံးအဖိခွါတက့ၢ်. ဒီးပှၤလၢအဟဲလၢ ယဟိဝၤယွၤ အမံၤတဂၤန့ၣ် မ်အဘၣ်ဆိၣ်ဂ့ၤတက့ၢ်. ပှၤလၢ အအိၣ်လၢ တၢ်ထီၣ်ထီတဂၤဧၢ, ပဃ့ကညးနၤလၢ မၤပူၤဖျဲးအီၤတက့ၢ်.”
၁၀ ဖဲယ့ၣ်ၡူး နုာ်လီၤလၢ ယရူၤၡလ့ၣ်အခါ တၢ်တၢထီၣ်တၢလီၤ အိၣ်ထီၣ်ဝဲလၢ ဝ့ၢ်ဒီတဖျၢၣ်အပူၤ ဒီးပှၤသံကွၢ်ဝဲလၢ “အဝဲ မ့ၢ်မတၤတဂၤလဲၣ်.” ၁၁ ပှၤဂီၢ်မုၢ်သ့ၣ်တဖၣ် တဲဝဲလၢ “အဝဲမ့ၢ်ဝဲ ဝံယ့ၣ်ၡူးလၢ အဟဲလၢ ဝ့ၢ်နစၤရ့း လၢကီၢ်ကၤလံၤလါ အပူၤန့ၣ်လီၤ.”
၁၂ ယ့ၣ်ၡူး လဲၤနုာ်လီၤလၢ တၢ်လုၢ်ဟံၣ်အပူၤ ဒီးနီဟးထီၣ်ကွံာ်ဝဲ ကယဲၢ်ပှၤပှ့ၤတၢ်ဆါတၢ်လၢ တၢ်လုၢ်ဟံၣ်အပူၤလီၤ. ဒီးအဝဲ မၤလီၤတကျၢၢ်ဝဲ ပှၤခီလဲစ့သ့ၣ်တဖၣ် အစီၢ်နီၤခိၣ် ဒီးပှၤဆါ ထိၣ်လွံၢ်တဖၣ် အလီၢ်ဆ့ၣ်နီၤလီၤ. ၁၃ ယ့ၣ်ၡူးတဲ အဝဲသ့ၣ်လၢ “တၢ်ကွဲးအသးအိၣ်ဝဲလၢ ‘ယဟံၣ်န့ၣ် ကဘၣ် တၢ်ကိးအီၤလၢ တၢ်ဃ့ဘါထုကဖၣ်အဟံၣ်’ ဘၣ်ဆၣ် သုမၤကဲထီၣ်အီၤလၢ တၢ်ဟုၣ်တၢ်ဘျၣ် အလ့ပူၤလီၤ.” ၁၄ ဒီးပှၤမဲာ်တထံၣ်တၢ် ဒီးပှၤခီၣ်ဟးဂီၤတဖၣ် လဲၤလၢ ယ့ၣ်ၡူးအအိၣ် လၢတၢ်လုၢ်ဟံၣ်ပူၤ ဒီးအဝဲမၤဘျါက့ၤ အဝဲသ့ၣ်လီၤ.
၁၅ ပှၤလုၢ်တၢ်ဒိၣ်အခိၣ်တဖၣ် ဒီးပှၤကွဲးလံာ်တဖၣ် ထံၣ်ယ့ၣ်ၡူး မၤတၢ်လီၤလးတဖၣ် ဒီးဖိသၣ်ပိာ်ခွါတဖၣ် ကိးပသူထီၣ်လၢ တၢ်လုၢ်ဟံၣ်ပူၤလၢ “ပဃ့ကညးနၤလၢ မၤပူၤဖျဲး စီၤဒၤဝံးအဖိခွါတက့ၢ်.” ဖဲန့ၣ်အခါ အဝဲသ့ၣ် အသးဒိၣ်ထီၣ်တၢ်လီၤ. ၁၆ အဝဲသ့ၣ်တဲဘၣ် ယ့ၣ်ၡူးလၢ “ဖိသၣ်သ့ၣ်တဖၣ် တဲတၢ်မနုၤလဲၣ်န့ၣ် မ့ၢ်နနၢ်ဟူဧါ.” ယ့ၣ်ၡူးစံးဆၢက့ၤ အဝဲသ့ၣ်လၢ “မ့ၢ်, ယနၢ်ဟူ. ဒီး ‘တၢ်စံးထီၣ်ပတြၢၤ ကဟဲထီၣ်လၢ ဖိသၣ် ဒီးဖိသၣ်အီနုၢ်တဖၣ် အထးခိၣ်’ န့ၣ် မ့ၢ်သုတဖးဘၣ် နီတဘျီဘၣ်ဧါ.” ၁၇ ဒီးယ့ၣ်ၡူး ဟးထီၣ်ကွံာ်လၢ ဝ့ၢ်ပူၤ ဒီးလဲၤဝဲဆူ ဘ့ၤသနံသဝီ ဒီးအိၣ်ဝဲဖဲန့ၣ် တနၤလီၤ.
၁၈ လၢဂီၤခီအဆၢကတီၢ် ဖဲအဝဲက့ၤလၢ ဝ့ၢ်ယရူၤၡလ့ၣ်အခါ လၢကျဲန့ၣ် အဝဲအဲၣ်ဒိးအီၣ်တၢ်လီၤ. ၁၉ ဒီးဖဲအဝဲ ထံၣ်စိဃီၤဝဲ ချၢၣ်ဒၢတထူၣ် လၢကျဲကပၤအခါ အဝဲလဲၤဝဲဆူ အခီၣ်ထံး ဒီးတထံၣ် အသၣ်နီတဖျၢၣ်ဘၣ်, အိၣ်ဝဲထဲအလၣ်လီၤ. ဖဲန့ၣ်အခါ အဝဲတဲ ချၢၣ်ဒၢတထူၣ်အံၤလၢ “မ်နသုတသၣ်ထီၣ် နီတဘျီလၢၤတဂ့ၤ.” ဒီးချၢၣ်ဒၢတထူၣ်အံၤ ဃ့ထီဝဲတဘျီဃီလီၤ. ၂၀ ဖဲအပျဲၢ်အဘီၣ်တဖၣ် ထံၣ်ဝဲအခါ အဝဲသ့ၣ် ကမၢကမၣ် ဒီးတဲဝဲလၢ “ချၢၣ်ဒၢတထူၣ်အံၤ ဃ့ထီဝဲ တဘျီဃီသ့ဒ်လဲၣ်.” ၂၁ ယ့ၣ်ၡူးစံးဆၢက့ၤ အဝဲသ့ၣ်လၢ “ယကတဲဘၣ်သု တီတီလၢ သုတၢ်နာ်မ့ၢ်အိၣ် ဒီးသုသး မ့ၢ်တဒ့ဒီဘၣ်န့ၣ် သုမၤဃ့ထီချၢၣ်ဒၢ ဒ်ယမၤအသိးသ့ဝဲ တကးဒံးဘၣ် သုမ့ၢ်တဲ ကစၢၢ်တဖျၢၣ်အံၤလၢ ‘သုးနသး ဒီးကွံာ်လီၤနသးလၢ ပီၣ်လဲၣ်ပူၤ’ န့ၣ် ကကဲထီၣ်ဝဲဒ်န့ၣ်လီၤ. ၂၂ သုမ့ၢ်အိၣ်ဒီးတၢ်နာ်န့ၣ် ကယဲၢ်တၢ်လၢ သုဃ့အီၤလၢ တၢ်ထုကဖၣ်အပူၤန့ၣ် သုကဒိးန့ၢ်ဘၣ်လီၤ.”
၂၃ လၢခံယ့ၣ်ၡူးလဲၤနုာ်လီၤလၢ တၢ်လုၢ်ဟံၣ်ပူၤ ဒီးဖဲအဝဲသိၣ်လိတၢ်အခါ ပှၤလုၢ်တၢ်ဒိၣ်အခိၣ်တဖၣ် ဒီးပှၤဂီၢ်မုၢ် အပှၤသူၣ်က့သးပှၢ်တဖၣ် ဟဲဆူအအိၣ် ဒီးတဲအီၤလၢ “နမၤတၢ်သ့ၣ်တဖၣ်အံၤ လၢမတၤတဂၤ အစိကမီၤလဲၣ်. ဒီးမတၤတဂၤ ဟ့ၣ်နၤ တၢ်စိတၢ်ကမီၤအံၤလဲၣ်.” ၂၄ ယ့ၣ်ၡူး တဲဆၢက့ၤ အဝဲသ့ၣ်လၢ “ယၤစ့ၢ်ကီး ယကသံကွၢ်သုတၢ်တမံၤ. သုမ့ၢ်စံးဆၢယၤန့ၣ် ယၤစ့ၢ်ကီး ယမၤတၢ်သ့ၣ်တဖၣ်အံၤ လၢမတၤတဂၤ အစိအကမီၤလဲၣ်န့ၣ် ယကတဲဘၣ်သုလီၤ. ၂၅ မတၤတဂၤ မၢလီၤစီၤယိၤဟၣ်လၢ ကဒိးဘျၢပှၤဂၤ လၢထံလဲၣ်. ကစၢ်ယွၤလၢ အအိၣ်လၢမူခိၣ်န့ၣ်ဧါ မ့တမ့ၢ် ပှၤဟီၣ်ခိၣ်ဖိဧါ.” ဒီးအဝဲသ့ၣ်တဖၣ် တဲလိာ်အသး ကဒဲကဒဲလၢ “ပမ့ၢ်တဲလၢ ‘ယွၤလၢအအိၣ်လၢ မူခိၣ်န့ၣ်’ အကတဲပှၤလၢ ‘မ့မ့ၢ်ဒ်န့ၣ်န့ၣ် ဘၣ်မနုၤအဃိ သုတနာ်အီၤဘၣ်လဲၣ်.’ ၂၆ ဘၣ်ဆၣ် ပမ့ၢ်တဲလၢ ‘ပှၤဟီၣ်ခိၣ်ဖိန့ၣ်’ ပပျံၤပှၤဂီၢ်မုၢ်မ့ၢ်လၢ အဝဲသ့ၣ်ခဲလၢာ် နာ်ဝဲလၢ စီၤယိၤဟၣ်န့ၣ်မ့ၢ်ဝဲ ဝံတဂၤအဃိလီၤ.” ၂၇ အဃိ အဝဲသ့ၣ်စံးဆၢ ယ့ၣ်ၡူးလၢ “ပတသ့ၣ်ညါဘၣ်.” ယ့ၣ်ၡူးတဲဆၢက့ၤ အဝဲသ့ၣ်လၢ “ယၤစ့ၢ်ကီး ယမၤတၢ်သ့ၣ်တဖၣ်အံၤ လၢမတၤတဂၤ အစိအကမီၤလဲၣ်န့ၣ် ယတတဲသုဘၣ်.
၂၈ “မ့ၢ်သုဆိကမိၣ်ဒ်လဲၣ်. ပှၤတဂၤ အဖိအိၣ် ခံဂၤလီၤ. အလဲၤဝဲလၢ အဖိလၢအဒိၣ်တဂၤအအိၣ် ဒီးတဲအီၤလၢ ‘ဖိဧၢ, တနံၤညါအံၤ လဲၤမၤတၢ်လၢ စပံးကျီး အပူၤတက့ၢ်.’ ၂၉ အဝဲတဲဆၢက့ၤအီၤလၢ ‘ယတလဲၤဘၣ်.’ ဘၣ်ဆၣ် လၢခံန့ၣ် အသးတမုာ်ဘၣ်အဃိ လဲၤဝဲလီၤ. ၃၀ အဝဲလဲၤကဒီးဆူ အဖိလၢ အဆံးတဂၤအအိၣ် ဒီးတဲအီၤဒ်န့ၣ်အသိး စ့ၢ်ကီးလီၤ. ဒီးအဝဲတဲဆၢက့ၤ အပၢ်လၢ ‘ယကလဲၤ’ ဘၣ်ဆၣ်အဝဲတလဲၤဝဲဘၣ်. ၃၁ မ့မ့ၢ်ဒ်န့ၣ်န့ၣ် အဝဲသ့ၣ်ခံဂၤအံၤ မၤတၢ်ဘၣ်အပၢ်အသး ဖဲလဲၣ်တဂၤလဲၣ်.” ဒီးပှၤသ့ၣ်တဖၣ် တဲဝဲလၢ “အဒိၣ်တဂၤလီၤ.” ဒီးယ့ၣ်ၡူး တဲအဝဲသ့ၣ်လၢ “ယကတဲဘၣ်သု တီတီလၢ ပှၤထၢတၢ်ခိတၢ်သွဲ ဒီးပှၤဃဲသဲမုၣ်တဖၣ် ကလဲၤနုာ်လီၤဆူ ကစၢ်ယွၤအဘီမုၢ်အပူၤ လၢသုမဲာ်ညါလီၤ. ၃၂ စီၤယိၤဟၣ် ဟဲလၢသုအိၣ် လၢတၢ်တီတၢ်လိၤအကျဲ ဒီးသုတနာ်အီၤဘၣ်. မ့မ့ၢ် ပှၤထၢတၢ်ခိတၢ်သွဲ ဒီးပှၤဃဲသဲမုၣ်တဖၣ် နာ်အီၤလီၤ. ဖဲသုထံၣ်ဘၣ် ဒ်န့ၣ်အခါဒၣ်လဲာ် သုတပီၢ်ယၢ်လီၤက့ၤသုသး ဒီးသုတနာ်အီၤဘၣ်.
၃၃ “ကနၣ်တၢ်ကတိၤဒိလၢ အဂၤတခါတက့ၢ်. ပှၤအိၣ်ဝဲတဂၤ အဝဲအိၣ်ဒီး အဟီၣ်ခိၣ်အလီၢ် တကဝီၤ ဒီးသူၣ်လီၤဝဲ စပံးတကျီး ဒီးကရၢဃာ်ဝဲလီၤ. ဒီးလၢကရၢၢ်အပူၤန့ၣ် တ့ထီၣ်စ့ၢ်ကီး တၢ်လီၢ်တခါ ဒ်သိး ကစံၢ်စပံးသၣ်အဂီၢ် ဒီးသူၣ်ထီၣ်ဝဲ တၢးတဖျၢၣ် ဒီးငါလီၤဝဲလၢ ပှၤမၤတၢ်ဖိတဖၣ်အအိၣ် ဝံၤဒီး အဝဲလဲၤဝဲလၢ ထံဂၤကီၢ်ဂၤလီၤ. ၃၄ ဖဲတၤသူတၤသၣ် အဆၢကတီၢ် ဘၣ်ဝဲအခါ မၢလီၤဝဲအကုၢ်တဖၣ် ဒ်သိး ကလဲၤဟံးန့ၢ် တၤသူတၤသၣ် လၢပှၤမၤတၢ်ဖိတဖၣ် အအိၣ်လီၤ. ၃၅ ဘၣ်ဆၣ် ပှၤမၤတၢ်ဖိတဖၣ်န့ၣ် ဖီၣ်န့ၢ်ဝဲ အကုၢ်တဖၣ် ဒီးတီၢ်ဝဲတဂၤ, မၤသံဝဲတဂၤ ဒီးကွံာ်သံဝဲ လၢလၢၢ်တဂၤလီၤ. ၃၆ ဒီးဆှၢလီၤကဒီးဝဲ အကုၢ်လၢအဂၤတဖၣ် အါန့ၢ်ဒံး အဆိကတၢၢ်တဒူၣ်လီၤ. ဘၣ်ဆၣ် ပှၤသ့ၣ်တဖၣ်အံၤန့ၣ် မၤအဝဲသ့ၣ်ဒ်န့ၣ် စ့ၢ်ကီးလီၤ. ၃၇ လၢခံကတၢၢ် အဝဲဆှၢလီၤအဖိခွါလၢ အဝဲသ့ၣ်အအိၣ် ဒီးတဲဝဲလၢ ‘အဝဲသ့ၣ် ကပာ်ကဲ ယဖိခွါလီၤ.’ ၃၈ ဖဲပှၤမၤတၢ်ဖိတဖၣ် ထံၣ်ဝဲ ဖိခွါအံၤအခါ တဲလိာ်အသး ကဒဲကဒဲလၢ ‘အဝဲမ့ၢ် ပှၤလၢ အကန့ၢ်သါဘၣ်တၢ် တဂၤလီၤ. ဟဲ, ပကလဲၤမၤသံအီၤ ဒီးမ်ပဟံးန့ၢ် အတၢ်န့ၢ်သါတက့ၢ်.’ ၃၉ အဝဲသ့ၣ် ဖီၣ်န့ၢ်အီၤ, ထုးထီၣ်ကွံာ်အီၤလၢ စပံးကျီးအချၢ ဒီးမၤသံအီၤလီၤ. ၄၀ အဃိ ဖဲစပံးကျီးအကစၢ်တဂၤ ဟဲအခါ ကမၤဝဲ ပှၤမၤတၢ်ဖိတဖၣ်န့ၣ်ဒ်လဲၣ်.” ၄၁ အဝဲသ့ၣ် တဲဘၣ်အီၤလၢ “မ့ၢ်လၢ ပှၤသ့ၣ်တဖၣ်အံၤ အၢဝဲသီဝဲအဃိ အဝဲကမၤသံ အဝဲသ့ၣ် ကိးဂၤဒဲးလီၤ. ဒီးကငါလီၤ အစပံးအလီၢ်လၢ ပှၤမၤတၢ်ဖိအဂၤတဖၣ် အစုပူၤ လၢအကဟ့ၣ်အီၤ တၤသူတၤသၣ် ဖဲအဆၢကတီၢ်ဘၣ်န့ၣ်လီၤ.”
၄၂ ယ့ၣ်ၡူးတဲဘၣ် အဝဲသ့ၣ်လၢ “မ့ၢ်သုတဖးဘၣ် တၢ်ကွဲးအသးအံၤ နီတဘျီဘၣ်ဧါ. ‘လၢၢ်တဖျၢၣ်လၢ ပှၤသူၣ်ဟံၣ်ဖိ တၢၤကွံာ်ဝဲန့ၣ် ကဲထီၣ်ဝဲလၢၢ်လၢ အရ့ဒိၣ်ကတၢၢ်တဖျၢၣ်လီၤ.* လၢၢ်အံၤဟဲလၢ ယဟိဝၤယွၤ အအိၣ်အဃိ လီၤကမၢကမၣ်ဒိၣ်မးလီၤ.’ ၄၃ အဃိ ယကတဲဘၣ်သုလၢ ကစၢ်ယွၤ အဘီအမုၢ်န့ၣ် ကဘၣ် တၢ်ဟံးထီၣ်ကွံာ်အီၤ လၢသုအိၣ် ဒီးတၢ်ကဟ့ၣ်လီၤအီၤဆူ ပှၤတကလုာ်လၢ အသၣ်ထီၣ် အတၤသၣ်န့ၣ်လီၤ. ၄၄ ဒီးပှၤလၢ အလီၤတဲာ်လၢ လၢၢ်အံၤအလိၤန့ၣ် ကဘၣ်ဒိဘၣ်ထံးဝဲ နးမးလီၤ. ဒီးပှၤလၢလၢၢ်အံၤ လီၤတဲာ်လၢအလိၤန့ၣ် ကသဘှံးဝဲလီၤ.”
၄၅ ဖဲပှၤလုၢ်တၢ်ဒိၣ်အခိၣ်တဖၣ် ဒီးပှၤဖၤရံၤၡဲတဖၣ် နၢ်ဟူဘၣ်ဝဲ အတၢ်ကတိၤဒိတဖၣ်အခါ အဝဲသ့ၣ် သ့ၣ်ညါဝဲလၢ ယ့ၣ်ၡူးတဲတၢ် ဘၣ်ဃးဒီး အဝဲသ့ၣ်လီၤ. ၄၆ အဝဲသ့ၣ် အဲၣ်ဒိးဖီၣ်န့ၢ်အီၤ ဘၣ်ဆၣ် အဝဲသ့ၣ်ပျံၤဝဲပှၤဂီၢ်မုၢ် မ့ၢ်လၢ ပှၤဂီၢ်မုၢ်တဖၣ် နာ်ဝဲလၢယ့ၣ်ၡူး မ့ၢ်ဝံတဂၤအဃိလီၤ.