မးသဲ
၃ လၢခံ ပှၤဘျၢတၢ်စီၤယိၤဟၣ် ဟဲစံၣ်တဲၤတဲလီၤတၢ်လၢ ကီၢ်ယူဒၤ အပှၢ်မုၢ်ကနၢအပူၤ ၂ ဒီးအဝဲတဲဝဲလၢ “ပီၢ်ယၢ်လီၤက့ၤသုသးတက့ၢ်. မူခိၣ်အဘီအမုၢ်န့ၣ် ဟဲဘူးထီၣ်လံ.” ၃ ဘၣ်ဃးဒီး စီၤယိၤဟၣ်အဂ့ၢ်န့ၣ် ဝံယၡါယၤ တဲဆိပာ်ဝဲဒ်အံၤ “လၢပှၢ်မုၢ်ကနၢန့ၣ် ပှၤတဂၤအကလုၢ် သီၣ်ထီၣ်ဝဲလၢ ‘ကတဲာ်ကတီၤန့ၢ် ယဟိဝၤယွၤ အကျဲ ဒီးမၤလိၤထီၣ်န့ၢ် အကျဲတက့ၢ်.’” ၄ စီၤယိၤဟၣ်န့ၣ် သိးဝဲ ကီၤလၤအူးအဆူၣ် ဒီးစၢထီၣ်အယီၢ်ဒ့ဒီး ယီၢ်တကိးလၢ ဘၣ်တၢ်တ့အီၤလၢ ဆၣ်ဖိကီၢ်ဖိ အဘ့ၣ်လီၤ. အတၢ်အီၣ်တၢ်အီန့ၣ် မ့ၢ်ဝဲဒွဲၣ် ဒီးကနဲမံၤအစီလီၤ. ၅ ပှၤယရူၤၡလ့ၣ်ဖိ ဒီးပှၤယူဒၤဖိဒီကီၢ်ညါ ဒီးကယဲၢ် ပှၤအိၣ်လၢ တၢ်လီၢ်လၢအဘူးဒီး ယၢ်ဒ့ၣ်ကျိန့ၣ် လဲၤဝဲဆူအအိၣ်လီၤ. ၆ ဒီးစီၤယိၤဟၣ်ဒိးဘျၢ* အဝဲသ့ၣ်လၢ ထံကျိယၢ်ဒ့ၣ်အပူၤ ဒီးအဝဲသ့ၣ်အၢၣ်လီၤ အတၢ်ဒဲးဘးပျီပျီလီၤ.
၇ ဖဲအဝဲထံၣ်ဘၣ်လၢ ပှၤဖၤရံၤၡဲ ဒီးပှၤစးဒူၤကဲအါဂၤ ဟဲလၢ တၢ်ဒိးဘျၢထံအလီၢ်အခါ အဝဲတဲဘၣ် အဝဲသ့ၣ်လၢ “ဂုၢ်အၢအဖိအလံၤသ့ၣ်ဧၢ, မ့ၢ်မတၤဟ့ၣ်ပလီၢ်သု ဒ်သိး သုကဃ့ၢ်ပူၤဖျဲးထီၣ်ကွံာ် သုသးလၢ ကစၢ်ယွၤ အတၢ်သးဒိၣ်ထီၣ်လၢ အကဟဲန့ၣ်လဲၣ်. ၈ အဃိ မၤတၢ်လၢ အပာ်ဖျါထီၣ်လၢ သုပီၢ်ယၢ်လီၤက့ၤသုသး* န့ၣ်တက့ၢ်. ၉ တဘၣ်ဆိကမိၣ်ဒိၣ်လီၤ သုသးလၢ ‘စီၤအၤဘြၤဟၣ် မ့ၢ်ပပၢ်’ န့ၣ်တဂ့ၤ. ယကတဲဘၣ်သုလၢ ကစၢ်ယွၤ မၤကဲထီၣ် လၢၢ်တဖၣ်လၢ စီၤအၤဘြၤဟၣ် အဖိတဖၣ်သ့ဝဲလီၤ. ၁၀ ကွါအိၣ်ပာ်လီၤအသးလၢ သ့ၣ်ခီၣ်ထံးလံ. အဃိ ကယဲၢ်သ့ၣ်လၢ အတသၣ်ထီၣ်အသၣ် လၢအဂ့ၤဘၣ်န့ၣ် ကဘၣ် တၢ်ကူာ်ကွံာ်အီၤဒီး ထၢနုာ်အီၤလၢ မ့ၣ်အူအပူၤလီၤ. ၁၁ ယၤန့ၣ် ယဒိးဘျၢသုလၢထံ မ့ၢ်လၢ သုပီၢ်ယၢ်လီၤက့ၤ သုသးအဃိလီၤ. မ့မ့ၢ်ပှၤလၢ အကဟဲလၢ ယလီၢ်ခံတဂၤန့ၣ် ဒိၣ်န့ၢ်ယၤလီၤ. ထဲယကဘ့ၣ်လီၤကွံာ် အခီၣ်ဖံးဒၣ်လဲာ် ယတကြၢးဘၣ်. အဝဲဒၣ် ကဒိးဘျၢသုလၢ သးစီဆှံ ဒီးလၢမ့ၣ်အူလီၤ. ၁၂ အနီၣ်တရီာ်ဘုန့ၣ် အိၣ်လၢအစုပူၤလံ. အဝဲကမၤကဆှီထီၣ်ကွံာ် အကြဲၢ်ပူၤပျီပျီ ဒီးကပာ်ဖှိၣ်အဘု* လၢဘုဖီပူၤလီၤ. မ့မ့ၢ်ဘုဘ့ၣ်န့ၣ် အဝဲကဒွဲၣ်အူကွံာ်ဝဲလၢ မ့ၣ်အူလၢ အလီၤပံာ်တသ့ဘၣ်အပူၤန့ၣ်လီၤ.
၁၃ ဒီးယ့ၣ်ၡူး အိၣ်လၢကၤလံၤလါ ဒီးလဲၤဝဲဆူ စီၤယိၤဟၣ်အအိၣ်လၢ ယၢ်ဒ့ၣ်ကျိ ဒ်သိး အကဒိးဘျၢထံအဂီၢ်လီၤ. ၁၄ ဘၣ်ဆၣ်စီၤယိၤဟၣ် ဂုာ်ကျဲးစၢးတြီအီၤ ဒီးတဲအီၤလၢ “ဘၣ်မနုၤအဃိ နဟဲလၢ ယအိၣ်လဲၣ်. နီၢ်ကီၢ်န့ၣ် ယကဘၣ်ဒိးဘျၢထံလၢ နစုပူၤလီၤ.” ၁၅ ယ့ၣ်ၡူး စံးဆၢက့ၤအီၤလၢ “တဘၣ်တြီယၤတဂ့ၤ, ပမ့ၢ်မၤဒ်အံၤမး မ့ၢ်ဝဲပမၤလၢထီၣ်ပှဲၤထီၣ် ကစၢ်ယွၤ အတၢ်ဘၣ်သးခဲလၢာ်လီၤ.” လၢတၢ်န့ၣ်အဃိ စီၤယိၤဟၣ် တတြီအီၤလၢၤဘၣ်. ၁၆ ယ့ၣ်ၡူး ဒိးဘျၢထံဝံၤဒီး ဖဲအဝဲဟဲထီၣ်လၢ ထံကျါတဘျီဃီန့ၣ် မူခိၣ်အိးထီၣ်အသး ဒီးအဝဲထံၣ်ဝဲ ကစၢ်ယွၤအသးစီဆှံ ဟဲလီၤလၢအလိၤ ဒ်ထိၣ်လွံၢ် ဟဲလီၤဝဲအသိးလီၤ. ၁၇ ဒီးတၢ်ကလုၢ် သီၣ်ထီၣ်လၢ မူခိၣ် ဒီးတဲဝဲလၢ “အဝဲအံၤ မ့ၢ်ယဖိခွါလၢ ယအဲၣ် ဒီးယဘၣ်သူၣ်ဘၣ်သးအီၤလီၤ.”