မးသဲ
၄ ဝံၤဒီးသးစီဆှံ ဆှၢထီၣ်ယ့ၣ်ၡူးလၢ ပှၢ်မုၢ်ကနၢ ဒီးမုၣ်ကီၤလံၢ် လ့ပစီအီၤဖဲန့ၣ်လီၤ. ၂ ယ့ၣ်ၡူးဒုၣ်တၢ်အီၣ် အနံၤ ၄၀ ဒီးအနၤ ၄၀ ဝံၤအလီၢ်ခံ အဝဲအဲၣ်ဒိးအီၣ်တၢ်လီၤ. ၃ ဒီးမုၣ်ကီၤလံၢ် ဟဲလၢအအိၣ် ဒီးတဲအီၤလၢ “နမ့မ့ၢ် ကစၢ်ယွၤအဖိခွါန့ၣ် မၢလၢၢ်တဖၣ်အံၤ ကဲထီၣ်ကိၣ်တက့ၢ်.” ၄ ဘၣ်ဆၣ် ယ့ၣ်ၡူး စံးဆၢက့ၤအီၤလၢ “တၢ်ကွဲးအသးအိၣ်ဝဲလၢ ‘ပှၤဟီၣ်ခိၣ်ဖိ တမူဝဲထဲလၢ ကိၣ်အဃိဘၣ်. မ့မ့ၢ်မူဝဲလၢကယဲၢ် တၢ်ကတိၤလၢ အဟဲထီၣ်လၢ ယဟိဝၤယွၤ’* အထးခိၣ်န့ၣ်လီၤ.”
၅ ဝံၤဒီးမုၣ်ကီၤလံၢ် လဲၤကိးအီၤဆူ ဝ့ၢ်စီဆှံအပူၤ ဒီးပာ်ထီၣ်အီၤလၢ တၢ်လုၢ်ဟံၣ်အခိၣ်စိၣ်* ၆ ဒီးတဲအီၤလၢ “နမ့မ့ၢ် ကစၢ်ယွၤအဖိခွါန့ၣ် ဖုလီၤတက့ၢ်. တၢ်ကွဲးအသးအိၣ်ဝဲလၢ ‘အဝဲကမၤလိာ် အမူခိၣ်ကလူးတဖၣ်လၢ ကဟဲမၤစၢၤနၤ’ ဒီး ‘အဝဲသ့ၣ် ကစိာ်နၤလၢအစု ဒ်သိး နခီၣ်သုတဘၣ်ထံးဒီး လၢၢ်တဂ့ၤအဂီၢ်လီၤ.’” ၇ ယ့ၣ်ၡူး စံးဆၢက့ၤအီၤလၢ “တၢ်ကွဲးအသး ပာ်ဖျါထီၣ်ကဒီးဝဲလၢ ‘နတဘၣ်မၤကွၢ် နကစၢ်ယဟိဝၤယွၤ* တဂ့ၤ.’”
၈ ဒီးမုၣ်ကီၤလံၢ် လဲၤကိးအီၤဆူ ကစၢၢ်ဖးထီတဖျၢၣ်အလိၤ ဒီးဒုးနဲၣ်အီၤလၢ ဘီမုၢ်ခဲလၢာ်လၢ အအိၣ်လၢ ဟီၣ်ခိၣ်ချၢ ဒီးအလၤအကပီၤခဲလၢာ်လီၤ. ၉ ဒီးအဝဲတဲယ့ၣ်ၡူးလၢ “နမ့ၢ်ထိၣ်လီၤပှီၤနသး ဒီးဘါထီၣ်ယၤ ထဲတဘျီန့ၣ် ယကဟ့ၣ်လီၤနၤ တၢ်သ့ၣ်တဖၣ်အံၤ ခဲလၢာ်လီၤ.” ၁၀ ဒီးယ့ၣ်ၡူး တဲဘၣ်အီၤလၢ “မုၣ်ကီၤလံၢ်ဧၢ,* ဟးထီၣ်ကွံာ်တက့ၢ်. တၢ်ကွဲးအသးအိၣ်ဝဲလၢ ‘နကဘၣ် ဘူၣ်ထီၣ်ဘါထီၣ် နကစၢ်ယဟိဝၤယွၤ ဒီးနကဘၣ်မၤထဲ အဝဲဒၣ်အတၢ်လီၤ.’” ၁၁ ဝံၤဒီးမုၣ်ကီၤလံၢ် ဟးထီၣ်ကွံာ်ဝဲလၢ အအိၣ်လီၤ. ဒီးမူခိၣ်ကလူးတဖၣ် ဟဲလၢအအိၣ် ဒီးမၤစၢၤအီၤလီၤ.
၁၂ ဖဲယ့ၣ်ၡူး နၢ်ဟူလၢ ပှၤဖီၣ်စီၤယိၤဟၣ်အခါ အဝဲလဲၤဆူ ကၤလံၤလါလီၤ. ၁၃ တကးဒံးဘၣ် အဝဲဟးထီၣ်လၢ ဝ့ၢ်နစၤရ့းဒီးလဲၤအိၣ်ဝဲလၢ ဝ့ၢ်ကပ့းရနီၣ် လၢအအိၣ်ဘူးဒီး ပီၣ်လဲၣ်နံၤလၢ စဘူလိၣ် ဒီးနးသၤလံ အဟီၣ်ကဝီၤအပူၤ ၁၄ ဒ်သိးကမၤလၢပှဲၤ ဝံယၡါယၤ အတၢ်ကတိၤလၢအမ့ၢ် ၁၅ “ပှၤစဘူလိၣ် ဒီးပှၤနးသၤလံဖိလၢ အအိၣ်ဘူးဒီး ကျဲလၢအလဲၤဆူပီၣ်လဲၣ် ဒီးလၢယၢ်ဒ့ၣ် အမုၢ်နုာ်တခီ ဒီးပှၤကလုာ်လၢ အအိၣ်လၢ ကၤလံၤလါ အဟီၣ်ကဝီၤအပူၤသ့ၣ်ဧၢ, ၁၆ ပှၤလၢအဆ့ၣ်နီၤလၢ တၢ်ခံးကျါန့ၣ် ထံၣ်ဘၣ်ဝဲ တၢ်ကပီၤဖးဒိၣ်လံ ဒီးပှၤလၢအဆ့ၣ်နီၤလၢ တၢ်သံအကဒုဖီလာ်န့ၣ် တၢ်ကပီၤထီၣ်လၢ အဝဲသ့ၣ်အဂီၢ်လံ.” ၁၇ စးထီၣ်ဖဲန့ၣ် အဆၢကတီၢ် ယ့ၣ်ၡူးစံၣ်တဲၤတဲလီၤတၢ် ဒီးတဲဝဲလၢ “ပီၢ်ယၢ်လီၤက့ၤသုသးတက့ၢ်. မူခိၣ်အဘီအမုၢ်န့ၣ် ဟဲဘူးထီၣ်လံ.”
၁၈ ဖဲယ့ၣ်ၡူးဟးလၢ ကၤလံၤလါ အပီၣ်လဲၣ်နံၤအခါ အဝဲထံၣ် ပှၤဒီပုၢ်ဝဲၢ်ခွါခံဂၤလီၤ. အဝဲသ့ၣ် အမံၤမ့ၢ် စီၤၡံမိၣ်လၢ ဘၣ်တၢ်ကိးအီၤလၢ စီၤပ့းတရူး ဒီးအဒီပုၢ်ဝဲၢ်ခွါ စီၤအၣ်ဒရ့းလီၤ. အဝဲသ့ၣ် မ့ၢ်ပှၤမၤညၣ်ဖိအဃိ ကွံာ်လီၤစၤလၢ ပီၣ်လဲၣ်ပူၤလီၤ. ၁၉ ဒီးယ့ၣ်ၡူးတဲ အဝဲသ့ၣ်လၢ “ပိာ်ယခံတက့ၢ်. ဒ်သုဖီၣ်န့ၢ်ညၣ်အသိး သုကဘၣ်ဃု ပှၤကညီဒ်လဲၣ်န့ၣ် ယကသိၣ်လိသုလီၤ.” ၂၀ အဝဲသ့ၣ် ပာ်တ့ၢ်ကွံာ်အစၤ တဘျီဃီ ဒီးပိာ်ထီၣ်အခံလီၤ. ၂၁ အဝဲလဲၤကဒီးဆူညါ ဒီးထံၣ်ဝဲ စီၤစ့းဘ့းဒဲ ဒီးအဖိခွါခံဂၤလၢ အမံၤမ့ၢ် စီၤယၤကိာ် ဒီးစီၤယိၤဟၣ်န့ၣ် အိၣ်လၢချံပူၤ ဒီးဆးထီၣ်ဝဲအစၤလီၤ. ဒီးယ့ၣ်ၡူး ကိးအဝဲသ့ၣ်လၢ ကပိာ်အခံလီၤ. ၂၂ အဝဲသ့ၣ်ပာ်တ့ၢ်ကွံာ် အပၢ်ဒီးအချံ ဒီးပိာ်ထီၣ်ဝဲ ယ့ၣ်ၡူးအခံ တဘျီဃီလီၤ.
၂၃ ယ့ၣ်ၡူးဟးဝဲလၢ ကၤလံၤလါဒီတဘ့ၣ်ညါ ဒီးသိၣ်လိတၢ်လၢ ဘူၣ်ဘျီၣ်တဖၣ်ပူၤ ဒီးစံၣ်တဲၤတဲလီၤ ဘီမုၢ်တၢ်သးခုကစီၣ် ဒီးမၤဘျါဝဲ ပှၤဆူးပှၤဆါ အကလုာ်ကလုာ်လီၤ. ၂၄ ယ့ၣ်ၡူးအဂ့ၢ် ဟူထီၣ်ဝဲလၢ စူၤရံဒီကီၢ်ညါလီၤ. ဒီးပှၤဟဲကိး ကယဲၢ်ပှၤလၢ အအိၣ်ဒီးတၢ်ဆါ အကလုာ်ကလုာ် ဒီးပှၤလၢ အတူၢ်ဘၣ် တၢ်ဆါနးမးတဖၣ်, ပှၤလၢတၢ်ဝံတၢ်နါ အိၣ်လၢအလိၤ, ပှၤလၢ ဘၣ်ထိးပျုၢ်တၢ်ဆါ ဒီးပှၤလၢ အစုလီၤဘျ့ခီၣ်လီၤဘျ့တဖၣ် ဆူယ့ၣ်ၡူးအအိၣ်လီၤ. ဒီးအဝဲမၤဘျါက့ၤ အဝဲသ့ၣ်လီၤ. ၂၅ အဃိ ပှၤဂီၢ်မုၢ်တဖၣ်လၢ ကၤလံၤလါ, ဒ့းကၤပလံၣ်, ယရူၤၡလ့ၣ်, ယူဒၤ ဒီးယၢ်ဒ့ၣ် ဝၢ်ဘးခီတဖၣ်န့ၣ် ပိာ်ထီၣ်အခံလီၤ.