မးသဲ
၆ “ပလီၢ်သုသးလၢ သုသုတမၤ တၢ်တီတၢ်လိၤလၢ ပှၤဂၤအမဲာ်ညါ ဒ်သိး ပှၤကထံၣ်သုအဂီၢ်တဂ့ၤ. သုမ့ၢ်မၤဒ်န့ၣ်န့ၣ် သုတဒိးန့ၢ်ဘၣ် တၢ်ဆိၣ်ဂ့ၤလၢ သုပၢ်အိၣ်လၢမူခိၣ် အအိၣ်ဘၣ်. ၂ ဖဲနဟ့ၣ်မၤစၢၤ ပှၤဖှီၣ်ဖိတဖၣ်အခါ တဘၣ်အူထီၣ်ကွဲၤ ဒ်ပှၤပာ်မၤအသးတဖၣ် မၤဝဲအသိးတဂ့ၤ. အဝဲသ့ၣ် မၤဝဲလၢဘူၣ်ဘျီၣ်ပူၤ ဒီးလၢကျဲပူၤ ဒ်သိး ပှၤကမၤလၤကပီၤအီၤအဂီၢ်လီၤ. ယကတဲဘၣ်သုတီတီလၢ အဝဲသ့ၣ်တဖၣ်န့ၣ် ဒိးန့ၢ်ဘၣ်ခိၣ်ဖး လၢလၢပှဲၤပှဲၤလံ. ၃ မ့မ့ၢ်နၤန့ၣ် ဖဲနဟ့ၣ်မၤစၢၤ ပှၤဖှီၣ်ဖိတဖၣ်အခါ တၢ်လၢနစုထွဲမၤဝဲန့ၣ် တဘၣ်ဒုးသ့ၣ်ညါ နစုစ့ၣ်တဂ့ၤ. ၄ နမ့ၢ်မၤဒ်န့ၣ်န့ၣ် ဖဲနဟ့ၣ်မၤစၢၤ ပှၤဖှီၣ်ဖိတဖၣ်အခါ ကကဲထီၣ်တၢ်ခူသူၣ်လီၤ. ဒီးနပၢ်အိၣ်လၢမူခိၣ် လၢအထံၣ်ဝဲ တၢ်ခူသူၣ်တဂၤန့ၣ် ကဟ့ၣ်ဆၢက့ၤနၤလီၤ.
၅ “တကးဒံးဘၣ် ဖဲသုဘါထုကဖၣ်တၢ်အခါ တဘၣ်မၤဒ်သိးဒီး ပှၤပာ်မၤအသးတဖၣ်တဂ့ၤ. အဝဲသ့ၣ်တဖၣ်န့ၣ် ဆၢထၢၣ်ဘါထုကဖၣ်တၢ်လၢ ဘူၣ်ဘျီၣ်ပူၤ ဒီးလၢကျဲမုၢ်ဖးဒ့အခိၣ်ထိး ဒ်သိး ပှၤကထံၣ်အီၤအဂီၢ်လီၤ. ယကတဲဘၣ်သုတီတီလၢ အဝဲသ့ၣ် ဒိးန့ၢ်ဘၣ်ခိၣ်ဖး လၢလၢပှဲၤပှဲၤလံ. ၆ မ့မ့ၢ်နၤန့ၣ် ဖဲနကဃ့ဘါထုကဖၣ်တၢ်အခါ လဲၤနုာ်လီၤလၢနဒၢးပူၤ ဒီးကးတံာ်ဃာ်နတြဲၤ ဒီးဃ့ဘါထုကဖၣ်တၢ်လၢ နပၢ်လၢအအိၣ်လၢ တၢ်ခူသူၣ်တဂၤန့ၣ် အအိၣ်တက့ၢ်. နမ့ၢ်မၤဒ်န့ၣ်န့ၣ် နပၢ်လၢ အထံၣ်တၢ်လၢ တၢ်ခူသူၣ်တဂၤန့ၣ် ကဟ့ၣ်ဆၢက့ၤနၤလီၤ. ၇ ဖဲသုဃ့ဘါထုကဖၣ်တၢ်အခါ တဘၣ်တဲဝံၤတဲက့ၤ တၢ်ကတိၤ အလီၢ်လီၢ်တဖၣ် ဒ်ပှၤကလုာ်အဂၤတဖၣ် မၤဝဲအသိးန့ၣ်တဂ့ၤ. အဝဲသ့ၣ် ဆိကမိၣ်ဝဲလၢ အမ့ၢ်တဲတၢ်အါအါဒ်န့ၣ်န့ၣ် ကစၢ်ယွၤ ကဒိကနၣ် အတၢ်ထုကဖၣ်လီၤ. ၈ အဃိ တဘၣ်လီၤဂာ်ဒီး အဝဲသ့ၣ်တဂ့ၤ. တချုးလၢ သုဃ့တၢ်ဒံးဘၣ်န့ၣ် သုပၢ်အိၣ်လၢမူခိၣ်န့ၣ် သ့ၣ်ညါပာ်စၢၤဝဲ တၢ်လၢ သုလိၣ်ဘၣ်တဖၣ်လီၤ.
၉ “သုဘၣ်ဃ့ ဘါထုကဖၣ်တၢ် ဒ်အံၤလီၤ.
“‘အိၣ်လၢမူခိၣ်ပပၢ်ဧၢ, မ်နမံၤ ဘၣ်တၢ်ပာ်စီဆှံအီၤတက့ၢ်. ၁၀ နဘီနမုၢ်န့ၣ် မ်အဟဲတက့ၢ်. ဒ်လၢမူခိၣ်အသိးန့ၣ် မ်တၢ်မၤအသးလၢ ဟီၣ်ခိၣ်ချၢစ့ၢ်ကီး ဖဲဒၣ်နသးတက့ၢ်. ၁၁ ဟ့ၣ်လီၤပှၤတၢ်အီၣ်* လၢတနံၤအဂီၢ် တနံၤအဂီၢ်တက့ၢ်. ၁၂ ဒီးပျၢ်ကွံာ်ပကမၢ် ဒ်ပပျၢ်ကွံာ်ပှၤဂၤ အကမၢ် အသိးန့ၣ်တက့ၢ်. ၁၃ ဒီးတဘၣ်ပျဲပလဲၤနုာ်လီၤဆူ တၢ်လ့ပစီအပူၤတဂ့ၤ. မ့မ့ၢ် မၤပူၤဖျဲးပှၤလၢ မုၣ်ကီၤလံၢ်* အစုပူၤတက့ၢ်.’
၁၄ “သုမ့ၢ်ပျၢ် ပှၤဂၤအတၢ်ကမၣ်န့ၣ် သုပၢ်အိၣ်လၢမူခိၣ် ကပျၢ်ကွံာ် သုတၢ်ကမၣ်စ့ၢ်ကီးလီၤ. ၁၅ ဘၣ်ဆၣ် သုမ့ၢ်တပျၢ်ကွံာ် ပှၤဂၤအတၢ်ကမၣ်ဘၣ်န့ၣ် သုပၢ်အိၣ်လၢမူခိၣ် တပျၢ်ကွံာ် သုတၢ်ကမၣ်စ့ၢ်ကီးဘၣ်.
၁၆ “သုမ့ၢ်ဒုၣ်တၢ်အီၣ်န့ၣ် တဘၣ်ဖျါသးအုး ဒ်ပှၤလၢ အပာ်မၤအသးတဖၣ် မၤဝဲအသိးလၢၤတဂ့ၤ. ဒ်သိး ပှၤဂၤကသ့ၣ်ညါလၢ အဒုၣ်တၢ်အီၣ်အဂီၢ် အဝဲသ့ၣ် တမၤကဆှဲကဆှီ အမဲာ်ဘၣ်. ယကတဲဘၣ်သုတီတီလၢ အဝဲသ့ၣ်တဖၣ်န့ၣ် ဒိးန့ၢ်ဘၣ်ခိၣ်ဖး လၢလၢပှဲၤပှဲၤလံ. ၁၇ မ့မ့ၢ်နၤန့ၣ် ဖဲနဒုၣ်တၢ်အီၣ်အခါ ဖှူနခိၣ်လၢသိ ဒီးပျၢ်နမဲာ်တက့ၢ်. ၁၈ နမ့ၢ်မၤဒ်န့ၣ်န့ၣ် ပှၤဂၤတသ့ၣ်ညါဝဲလၢ နဒုၣ်တၢ်အီၣ်ဘၣ်. ဘၣ်ဆၣ် ထဲနပၢ်အိၣ်လၢမူခိၣ်တဂၤဧိၤန့ၣ် ထံၣ်ဝဲလီၤ. ဒီးနပၢ်လၢ အထံၣ်တၢ်လၢ တၢ်ခူသူၣ်တဂၤန့ၣ် ကဟ့ၣ်ဆၢက့ၤနၤလီၤ.
၁၉ “သုတဘၣ်ပာ်ဖှိၣ် တၢ်လုၢ်ဒိၣ်ပှ့ၤဒိၣ်လၢ ဟီၣ်ခိၣ်ချၢအံၤ လၢၤတဂ့ၤ, မ့ၢ်လၢတၢ်ဃၢ် ဒီးတၢ်ထီၣ်အ့ၣ် မၤဟးဂီၤကွံာ်သ့ဝဲ အဃိလီၤ. တကးဒံးဘၣ် တၢ်ဟုၣ်တၢ်ဘျၣ်တဖၣ် ဟဲနုာ်ဒီး ဟုၣ်ဝဲသ့စ့ၢ်ကီးလီၤ. ၂၀ အဃိ ပာ်ဖှိၣ်သု တၢ်လုၢ်ဒိၣ်ပှ့ၤဒိၣ်လၢမူခိၣ် ဖဲတၢ်ဃၢ်မ့ၢ်ဂ့ၤ တၢ်ထီၣ်အ့ၣ်မ့ၢ်ဂ့ၤ မၤဟးဂီၤဝဲ တသ့ဘၣ်န့ၣ်တက့ၢ်. တကးဒံးဘၣ် ဖဲန့ၣ်န့ၣ် တၢ်ဟုၣ်တၢ်ဘျၣ်တဖၣ်စ့ၢ်ကီး လဲၤဟုၣ်ဝဲ တသ့ဘၣ်. ၂၁ ဖဲနတၢ်လုၢ်ဒိၣ်ပှ့ၤဒိၣ် အိၣ်ဝဲအလီၢ်န့ၣ် နသးကအိၣ်ဝဲ ဖဲန့ၣ်စ့ၢ်ကီးလီၤ.
၂၂ “နီၢ်ခိအမ့ၣ်အူဒၢန့ၣ် မ့ၢ်ဝဲမဲာ်ချံလီၤ. နမဲာ်ချံ မ့ၢ်ကွၢ်တၢ်ထံထံန့ၣ်* နနီၢ်ခိဒီတဂၤ ကကပီၤဝဲလီၤ.* ၂၃ ဘၣ်ဆၣ် နမဲာ်ချံ မ့ၢ်ကွၢ်တၢ်လၢ တၢ်သးက့ၣ်အပူၤန့ၣ်* နနီၢ်ခိဒီဂၤညါ ကခံးဝဲလီၤ. ဒီးတၢ်ကပီၤလၢ အအိၣ်လၢနပူၤ မ့ၢ်ခံးဝဲန့ၣ် နနီၢ်ခိ ကခံးဝဲထဲလဲၣ်.
၂၄ “ကစၢ်ခံဂၤအတၢ်မၤန့ၣ် ပှၤမၤတသ့နီတဂၤဘၣ်, မ့ၢ်လၢ အကသးဟ့ဝဲတဂၤ ဒီးကအဲၣ်ဝဲ တဂၤအဃိလီၤ. မ့တမ့ၢ် ကဆီၣ်ထွဲဝဲတဂၤ ဒီးကသးဆါဝဲတဂၤလီၤ. သုကဲကစၢ်ယွၤအကုၢ် ဒီးတၢ်ထူးတၢ်တီၤအကုၢ် တဘျီဃီတသ့ဘၣ်.
၂၅ “ဘၣ်ဃးဒီးတၢ်ဂ့ၢ်အံၤန့ၣ် ယကတဲဘၣ်သုလၢ သုကအီၣ်ဘၣ်ဒ်လဲၣ် သုကအီဘၣ်ဒ်လဲၣ်န့ၣ် ဘၣ်ယိၣ်တၢ်လၢ သုသးသမူအဂီၢ် လၢၤတဂ့ၤ ဒီးလၢသုနီၢ်ခိအဂီၢ် သုကကူကကၤဘၣ် ဒ်လဲၣ်ဒ်လဲၣ်န့ၣ် ဘၣ်ယိၣ်တၢ်လၢၤတဂ့ၤ. သးသမူန့ၣ် အလုၢ်အပှ့ၤဒိၣ်န့ၢ်ဒံး တၢ်အီၣ်တၢ်အီ ဒီးတၢ်ကူတၢ်ကၤတဖၣ် တမ့ၢ်ဘၣ်ဧါ. ၂၆ ကွၢ်ထံထိၣ်တဖၣ်လၢ တၢ်ဖးဖီန့ၣ်တက့ၢ်. အဝဲသ့ၣ်တဖှံတၢ်ချံ ဒီးတကူးတၢ် ဒီးတထၢဖှိၣ်တၢ်လၢ ဘုဖီပူၤဘၣ်. ဘၣ်ဆၣ် သုပၢ်အိၣ်လၢ မူခိၣ်န့ၣ် ဒုးအီၣ်ဒုးအီ အဝဲသ့ၣ်လီၤ. မ့မ့ၢ် သုဝဲသ့ၣ်အံၤ သုလုၢ်ဒိၣ်ပှ့ၤဒိၣ်န့ၢ်ဒံး ထိၣ်တဖၣ်အံၤ တမ့ၢ်ဘၣ်ဧါ. ၂၇ မ့ၢ်ပှၤလၢ သုကျါတဂၤဂၤ အဘၣ်ယိၣ်တၢ်အဃိ မၤထီထီၣ် အသးသမူ ထဲတစဲးဖိသ့ဧါ. ၂၈ ဘၣ်မနုၤအဃိ သုဘၣ်ယိၣ်တၢ်လၢ သုကကူကကၤတၢ် အဂီၢ်လဲၣ်. ဟံးန့ၢ်တၢ်မၤလိလၢ ဖီဒ့ၣ်ညါလၢ တၢ်ပျီပူၤန့ၣ်တက့ၢ်. အဝဲသ့ၣ် တမၤတၢ်ဘၣ် ဒီးတထါတၢ် စ့ၢ်ကီးဘၣ် ဘၣ်ဆၣ် အဝဲသ့ၣ် မဲထီၣ်ဝဲဒ်လဲၣ်ဒ်လဲၣ်န့ၣ် ဆိကမိၣ်ကွၢ်တက့ၢ်. ၂၉ ယကတဲဘၣ်သုလၢ စီၤၡလိၤမိၤန့ၣ် အိၣ်ဒီးအလၤအကပီၤ လီၤဘီလီၤမုၢ် သနာ်က့ အကူတၢ်ကၤတၢ်န့ၣ် တဖျါဂ့ၤထဲသိးဒီး ဖီဒ့ၣ်ညါတဖိးဘၣ်. ၃၀ ပှၤလၢ အတၢ်နာ်စှၤသ့ၣ်ဧၢ, တၢ်မုၢ်တၢ်ဘိလၢ အမဲထီၣ်လၢ တၢ်ပျီပူၤတနံၤအံၤ ဒီးခဲမုၢ်ဆ့ၣ် ကဘၣ် တၢ်တၢၤလီၤကွံာ်အီၤလၢ မ့ၣ်အူအပူၤန့ၣ် ကစၢ်ယွၤ မ့ၢ်ဒုးကူဒုးကၤ အဝဲသ့ၣ် ထဲထဲအံၤညါဒီး မ့မ့ၢ်သုဝဲသ့ၣ်န့ၣ် ဒ်သိး သုကကူကကၤဘၣ်အဂီၢ် ကစၢ်ယွၤ ကသးအိၣ်သု အါန့ၢ်အန့ၣ် တမ့ၢ်ဘၣ်ဧါ. ၃၁ အဃိ တဘၣ်ဘၣ်ယိၣ်တၢ်ဒီး တဲလၢ ‘မ့ၢ်ယကအီၣ်ဘၣ်ဒ်လဲၣ်’ ‘မ့ၢ်ယကအီဘၣ်ဒ်လဲၣ်’ မ့တမ့ၢ် ‘မ့ၢ်ယကကူကကၤဘၣ်ဒ်လဲၣ်’ နီတဘျီတဂ့ၤ. ၃၂ တၢ်သ့ၣ်တဖၣ်အံၤ ခဲလၢာ်န့ၣ် ပှၤကလုာ်တဖၣ် ဂုာ်ကျဲးစၢးဝဲဆူၣ်ဆူၣ် ဒ်သိးကဒိးန့ၢ်ဘၣ်ဝဲ အဂီၢ်လီၤ. ဘၣ်ဆၣ် သုပၢ်အိၣ်လၢ မူခိၣ်န့ၣ် သ့ၣ်ညါဝဲလၢ သုလိၣ်ဘၣ် တၢ်သ့ၣ်တဖၣ်အံၤလီၤ.
၃၃ “အဃိ ဃုဆိယွၤအဘီအမုၢ် ဒီးအတၢ်တီတၢ်လိၤ ထီဘိတက့ၢ်. ဒီးတၢ်ကဟ့ၣ်လီၤသုလၢ တၢ်သ့ၣ်တဖၣ်အံၤလီၤ. ၃၄ ဘၣ်ယိၣ်တၢ်လၢ ခဲဂီၤအဂီၢ်နီတဘျီတဂ့ၤ, မ့ၢ်လၢခဲဂီၤန့ၣ် အတၢ်ဘၣ်ယိၣ်ဘၣ်ဘှီ ကအိၣ်ဝဲအဃိလီၤ. ဒီးတနံၤအံၤ အတၢ်ဘၣ်ယိၣ်ဘၣ်ဘှီန့ၣ် အါလံဝဲလံ.