မးသဲ
၇ “ဒ်သိး သုတဘၣ် တၢ်စံၣ်ညီၣ်တဂ့ၤအဂီၢ် တဘၣ်စံၣ်ညီၣ် ပှၤဂၤလၢၤတဂ့ၤ. ၂ ဒ်သုစံၣ်ညီၣ်ပှၤဂၤအသိးန့ၣ် သုကဘၣ် တၢ်စံၣ်ညီၣ်က့ၤသု ဒ်န့ၣ်အသိး စ့ၢ်ကီးလီၤ. ဒီးဒ်နရ့ပှၤဂၤအသိး အဝဲသ့ၣ် ကက့ၤရ့ဒီးနၤ ဒ်န့ၣ်အသိး စ့ၢ်ကီးလီၤ. ၃ မ့မ့ၢ်ဒ်န့ၣ်န့ၣ် ဘၣ်မနုၤအဃိ နကွၢ်လီၢ်ဘိလၢ နဒီပုၢ်ဝဲၢ်ခွါ အမဲာ်ချံပူၤလဲၣ်. သ့ၣ်တဘိအိၣ်လၢ နမဲာ်ချံပူၤန့ၣ် မ့ၢ်နတသ့ၣ်ညါဘၣ်ဧါ. ၄ ဒီးသ့ၣ်တဘိ မ့ၢ်အိၣ်လၢ နမဲာ်ချံပူၤန့ၣ် နကတဲ နဒီပုၢ်ဝဲၢ်ခွါလၢ ‘ဟ့ၣ်ယၤအခွဲးလၢ ယကထုးထီၣ်ကွံာ် လီၢ်ဘိလၢအအိၣ်လၢ နမဲာ်ချံပူၤန့ၣ်’ ကသ့ဒ်လဲၣ်. ၅ ပှၤပာ်မၤအသးသ့ၣ်ဧၢ, ထုးထီၣ်ဆိကွံာ် သ့ၣ်တဘိလၢ နမဲာ်ချံပူၤတက့ၢ်. နမ့ၢ်မၤဒ်န့ၣ်န့ၣ် နကဘၣ်ထုးထီၣ်ကွံာ် လီၢ်ဘိလၢအအိၣ်လၢ နဒီပုၢ်ဝဲၢ်ခွါအမဲာ်ချံပူၤ ဒ်လဲၣ်ဒ်လဲၣ်န့ၣ် နကထံၣ်အီၤဂ့ၤဂ့ၤလီၤ.
၆ “တဘၣ်ဟ့ၣ်လီၤ တၢ်လၢအစီဆှံ လၢထွံၣ်တဖၣ် အအိၣ်တဂ့ၤ. ဒီးနပလဲတဖၣ်န့ၣ် တဘၣ်တၢၤလီၤလၢ ထိးတဖၣ် အမဲာ်ညါတဂ့ၤ, မ့ၢ်လၢ အဝဲသ့ၣ် ကယီၢ်တံၢ်ဝဲ ဒီးကဃၣ်အသးလၢသုအိၣ် ဒီးကအ့ၣ်သုလီၤ.
၇ “ဆဲးဃ့တၢ်တက့ၢ် ဒီးတၢ်ကဟ့ၣ်လီၤသုလီၤ. ဆဲးဃုတၢ်တက့ၢ် ဒီးသုကထံၣ်န့ၢ်တၢ်လီၤ. ဆဲးဒိတကျိာ်တၢ်တက့ၢ် ဒီးတၢ်ကအိးထီၣ်န့ၢ်သုလီၤ. ၈ ပှၤကိးဂၤဒဲးလၢ အဃ့တၢ်န့ၣ် ကဒိးန့ၢ်ဘၣ်ဝဲ, ပှၤကိးဂၤဒဲးလၢ အဃုတၢ်န့ၣ် ကထံၣ်န့ၢ်ဝဲ ဒီးပှၤကိးဂၤဒဲးလၢ အဒိတကျိာ်တၢ်န့ၣ် တၢ်ကအိးထီၣ်န့ၢ်အီၤလီၤ. ၉ ပှၤလၢသုကျါ လၢအဖိခွါ မ့ၢ်ဃ့အီၣ်အီၤကိၣ် ဒီးကဟ့ၣ်လီၤဝဲ လၢလၢၢ်န့ၣ် အိၣ်တဂၤဂၤဧါ. ၁၀ မ့တမ့ၢ် အဖိခွါမ့ၢ်ဃ့အီၤလၢ ညၣ်တဘ့ၣ်န့ၣ် မ့ၢ်အဝဲ ကဟ့ၣ်လီၤဝဲလၢ ဂုၢ်တဘိဧါ. ၁၁ သုဝဲလၢအမ့ၢ် ပှၤအၢပှၤသီတဖၣ် မ့ၢ်သးအိၣ်ဟ့ၣ်သုဖိ တၢ်ဟ့ၣ်လၢအဂ့ၤန့ၣ် သုပၢ်အိၣ်လၢမူခိၣ် ကဟ့ၣ်ဝဲပှၤလၢ အဃ့တၢ်လၢအီၤတဖၣ် အါန့ၢ်အန့ၣ် တမ့ၢ်ဘၣ်ဧါ.
၁၂ “အဃိ ကယဲၢ်တၢ်လၢ သုအဲၣ်ဒိးလၢ ပှၤဂၤကမၤသုန့ၣ် မၤအဝဲသ့ၣ်ဒ်န့ၣ်အသိး စ့ၢ်ကီးတက့ၢ်. အဝဲအံၤ မ့ၢ်တၢ်လၢ စီၤမိၤၡ့ အတၢ်သိၣ်တၢ်သီ ဒီးဝံအတၢ်စံးပာ်တဖၣ် သိၣ်လိဝဲလီၤ.
၁၃ “လဲၤနုာ်လီၤလၢ တြဲၤလၢအအံၣ်တက့ၢ်. တြဲၤလၢအလဲၢ်ဒီး ကျဲလၢအလဲၢ်န့ၣ် ဆှၢပှၤဆူတၢ်ဟးဂီၤ ဘၣ်ဆၣ် ပှၤလဲၤနုာ်ဝဲအါမးလီၤ. ၁၄ မ့မ့ၢ် တြဲၤလၢအအံၣ် ဒီးကျဲလၢ အအံၣ်န့ၣ် ဆှၢပှၤဆူတၢ်မူ ဘၣ်ဆၣ် ပှၤထံၣ်န့ၢ်ဝဲ ထဲစှၤဂၤလီၤ.
၁၅ “ပလီၢ်သုသးလၢ ဝံအဘျၣ်တဖၣ်တက့ၢ်. အဝဲသ့ၣ် ကဟဲဆူသုအိၣ် ဒီးသိးဝဲ သိအဘ့ၣ် ဘၣ်ဆၣ် လၢအပူၤန့ၣ် မ့ၢ်ဝဲထွံၣ်မံၤလၢ အအဲၣ်ဒိး အီၣ်တၢ်န့ၣ်လီၤ. ၁၆ သုကသ့ၣ်ညါ အဝဲသ့ၣ် ခီဖျိလၢ အတၢ်မၤတဖၣ်လီၤ.* မ့ၢ်ပှၤလဲၤဒဲး စပံးသၣ်လၢ သ့ၣ်လၢအိၣ်ဒီးအဆှုၣ် အလိၤဧါ မ့တမ့ၢ် မ့ၢ်ပှၤလဲၤဒဲး ချၢၣ်ဒၢသၣ်လၢ နီၣ်တၤဆှုၣ်အလိၤ စ့ၢ်ကီးဧါ. ၁၇ ဒ်န့ၣ်အသိး သ့ၣ်လၢအဂ့ၤကိးထူၣ်ဒဲးန့ၣ် ကသၣ်ထီၣ် အသၣ်လၢအဂ့ၤလီၤ. မ့မ့ၢ် သ့ၣ်လၢအတဂ့ၤကိးထူၣ်ဒဲးန့ၣ် ကသၣ်ထီၣ်အသၣ်လၢ အတဂ့ၤတဖၣ်လီၤ. ၁၈ သ့ၣ်လၢအဂ့ၤတထူၣ်န့ၣ် တသၣ်ထီၣ်အသၣ်လၢ အတဂ့ၤန့ၣ်ဘၣ်. ဒ်န့ၣ်အသိး သ့ၣ်လၢ အတဂ့ၤဘၣ်တထူၣ်န့ၣ် တသၣ်ထီၣ်အသၣ်လၢ အဂ့ၤစ့ၢ်ကီးဘၣ်. ၁၉ သ့ၣ်ကိးထူၣ်ဒဲးလၢ အတသၣ်ထီၣ် အသၣ်လၢ အဂ့ၤဘၣ်န့ၣ် ကဘၣ်တၢ်ကူာ်လီၤကွံာ်အီၤ ဒီးကွံာ်လီၤအီၤလၢ မ့ၣ်အူပူၤလီၤ. ၂၀ အဃိ ဝံလၢအဘျၣ်တဖၣ်န့ၣ် သုကသ့ၣ်ညါ အဝဲသ့ၣ် ခီဖျိလၢ အတၢ်မၤတဖၣ်လီၤ.*
၂၁ “ပှၤလၢအကိးယၤလၢ ‘ကစၢ်ဧၢ ကစၢ်ဧၢ’ န့ၣ် တလဲၤနုာ်လီၤဘၣ်လၢ မူခိၣ်အဘီအမုၢ်အပူၤ ကိးဂၤဒဲးဘၣ်. ကလဲၤနုာ်ဘၣ်ထဲ ပှၤလၢ အမၤယပၢ်အိၣ်လၢမူခိၣ် အတၢ်ဘၣ်သးန့ၣ်လီၤ. ၂၂ ဖဲမုၢ်နံၤအဝဲန့ၣ် ပှၤအါဂၤ ကတဲယၤ ‘ကစၢ်ဧၢ ကစၢ်ဧၢ’ ပတဲတၢ်ဒ် ဝံအသိးလၢနမံၤ, ပနီဟးထီၣ်ကွံာ် တၢ်ဝံတၢ်နါလၢနမံၤ ဒီးပမၤတၢ်လီၤလးအါမး လၢနမံၤတမ့ၢ်ဘၣ်ဧါ. ၂၃ ဖဲန့ၣ်အခါ ယကတဲဘၣ် အဝဲသ့ၣ်လၢ ‘ယတသ့ၣ်ညါသု နီတဘျီဘၣ်. သုဝဲလၢအမၤ တၢ်အၢတၢ်သီသ့ၣ်ဧၢ ဟးယံၤဒီးယၤတက့ၢ်.’
၂၄ “မ့မ့ၢ် ကယဲၢ်ပှၤလၢ အနၢ်ဟူယတၢ်ကတိၤ ဒီးမၤထွဲဝဲတဖၣ်န့ၣ် အဝဲသ့ၣ် ကလီၤဂာ်ဒီး ပှၤကူၣ်တၢ်သ့လၢ အသူၣ်ထီၣ်ဟံၣ်လၢ လၢၢ်ခိၣ်န့ၣ်လီၤ. ၂၅ ဖဲတၢ်ဟဲစူၤ, ထံဒိၣ်ထီၣ် ဒီးကလံၤဟဲအူဘၣ် ဟံၣ်အခါ ဟံၣ်န့ၣ်တလီၤပှီၢ်ဘၣ်, မ့ၢ်လၢဟံၣ်အံၤ သူၣ်ထီၣ်အသးလၢ လၢၢ်ခိၣ်အဃိလီၤ. ၂၆ မ့မ့ၢ် ကယဲၢ်ပှၤလၢ အနၢ်ဟူယတၢ်ကတိၤ ဒီးတမၤထွဲဝဲဘၣ်တဖၣ်န့ၣ် လီၤဂာ်ဒ်သိးဒီး ပှၤဟးဂီၤဖိလၢ အသူၣ်ထီၣ်အဟံၣ်လၢ မဲးခိၣ်န့ၣ်လီၤ. ၂၇ ဖဲတၢ်ဟဲစူၤ, ထံဒိၣ်ထီၣ် ဒီးကလံၤဟဲအူဘၣ်ဟံၣ် ဆူၣ်ဆူၣ်အခါ ဟံၣ်အံၤလီၤပှီၢ်ဝဲဒီး ဟးဂီၤကွံာ်ဝဲ ခဲလၢာ်လီၤ.”
၂၈ ဖဲယ့ၣ်ၡူး တဲတၢ်ဝံၤအခါ ပှၤဂီၢ်မုၢ်တဖၣ် ကမၢကမၣ်ဝဲ ခီဖျိလၢ အတၢ်သိၣ်လိနဲၣ်လိတဖၣ် အဃိလီၤ. ၂၉ ဒီးယ့ၣ်ၡူးသိၣ်လိတၢ် ဒ်ပှၤလၢအိၣ်ဒီး တၢ်စိတၢ်ကမီၤတဂၤအသိး ဒီးတမ့ၢ်ဒ် ပှၤကွဲးလံာ်တဖၣ်အသိးဘၣ်.