လူၤကၣ်

၃ ဖဲကဲစၢ်တံၤဘ့းရံ ပၢတၢ် ၁၅ နံၣ်တနံၣ်အတီၢ်ပူၤန့ၣ် စီၤပီၣ်တံၤပံၤလး မ့ၢ်ဝဲ ကီၢ်ယူဒၤ အပဒိၣ်ဖးဒိၣ်လီၤ. ဒီးစီၤဟ့ၤရိာ်ပၢဝဲ ကၤလံၤလါ မ့မ့ၢ်အဒီပုၢ်ဝဲၢ်ခွါ စီၤဖံလံးပူးန့ၣ် ပၢဝဲကီၢ်ယတူၢ် ဒီးကီၢ်တြဃိၤန့တံၤ ဒီးစီၤလူၤစၤနံန့ၣ် ပၢဝဲအဘ့ၤလ့ၣ်, ၂ ဘၣ်ဖဲ ပှၤလုၢ်တၢ်ဒိၣ်အခိၣ် စီၤအၣ်နၣ် ဒီးစီၤကၤယါဖၤ အမုၢ်နံၤတဖၣ်အတီၢ်ပူၤ ကစၢ်ယွၤဟ့ၣ်လီၤ တၢ်ကစီၣ်ဆူ စီၤစဃၤရံ အဖိခွါ စီၤယိၤဟၣ်အအိၣ်လၢ ပှၢ်မုၢ်ကနၢလီၤ.

၃ အဃိ စီၤယိၤဟၣ် လဲၤဝဲလၢ တၢ်လီၢ်လၢ အအိၣ်လၢ ယၢ်ဒ့ၣ်ကျိ အဃၢၤဝးဝး ဒီးစံၣ်တဲၤတဲလီၤဝဲ တၢ်ဒိးဘျၢထံအဂ့ၢ် လၢအမ့ၢ် တၢ်ပနီၣ်တခါလၢ ဘၣ်ဃးဒီး တၢ်ပီၢ်ယၢ်လီၤက့ၤသး လၢတၢ်ပျၢ်တၢ်ဒဲးဘး အဂီၢ်န့ၣ်လီၤ. ၄ ဒ်ဝံယၡါယၤ ကွဲးဝဲအသိး “လၢပှၢ်မုၢ်ကနၢန့ၣ် ပှၤတဂၤအကလုၢ် သီၣ်ထီၣ်ဝဲလၢ ‘ကတဲာ်ကတီၤန့ၢ် ယဟိဝၤယွၤအကျဲ ဒီးမၤလိၤထီၣ်န့ၢ် အကျဲတက့ၢ်. ၅ တၢ်တြီၤခဲလၢာ် ကဘၣ်တၢ်မၤပှဲၤအီၤ, ကစၢၢ်ဒီး တၢ်လူၢ်ခဲလၢာ် ကဘၣ်တၢ်မၤပၢၤအီၤ, ကျဲလၢအက့ၣ်တဖၣ်န့ၣ် ကဘၣ်တၢ်မၤလိၤထီၣ်အီၤ, ကျဲလၢအတဘျ့ဘၣ်န့ၣ် ကဘၣ်တၢ်မၤဘျ့ထီၣ်အီၤ ၆ ဒီးတၢ်ညၣ်ခဲလၢာ်* ကထံၣ်ဘၣ်ဝဲ ကစၢ်ယွၤ အတၢ်အုၣ်က့ၤခီၣ်က့ၤလီၤ.’”

၇ လၢတၢ်န့ၣ်အဃိ ဖဲပှၤဂီၢ်မုၢ်တဖၣ် ဟဲဝဲဒ်သိး ကဒိးဘျၢထံလၢ စီၤယိၤဟၣ် အစုပူၤအခါ အဝဲတဲဘၣ် အဝဲသ့ၣ်လၢ “ဂုၢ်အၢအဖိအလံၤသ့ၣ်ဧၢ, မ့ၢ်မတၤဟ့ၣ်ပလီၢ်သု ဒ်သိး သုကဃ့ၢ်ပူၤဖျဲးထီၣ်ကွံာ် သုသးလၢ ကစၢ်ယွၤ အတၢ်သးဒိၣ်ထီၣ်လၢ အကဟဲန့ၣ်လဲၣ်. ၈ မ့မ့ၢ်ဒ်န့ၣ်န့ၣ် မၤတၢ်လၢ အပာ်ဖျါထီၣ်လၢ သုပီၢ်ယၢ်လီၤက့ၤသုသးတက့ၢ်.* တဘၣ်တဲလီၤသုသးလၢ ‘စီၤအၤဘြၤဟၣ် မ့ၢ်ပပၢ်’ န့ၣ်တဂ့ၤ. ယကတဲဘၣ်သုလၢ ကစၢ်ယွၤ မၤကဲထီၣ်လၢၢ်တဖၣ်လၢ စီၤအၤဘြၤဟၣ် အဖိတဖၣ်သ့ဝဲလီၤ. ၉ ဒီးကွါအိၣ်ပာ်လီၤအသးလၢ သ့ၣ်ခီၣ်ထံးလံ. အဃိ ကယဲၢ်သ့ၣ်လၢ အတသၣ်ထီၣ်အသၣ် လၢအဂ့ၤဘၣ်န့ၣ် ကဘၣ် တၢ်ကူာ်ကွံာ်အီၤဒီး ထၢနုာ်အီၤလၢ မ့ၣ်အူအပူၤလီၤ.”

၁၀ ဒီးပှၤဂီၢ်မုၢ်တဖၣ် သံကွၢ်အီၤလၢ “မ့မ့ၢ်ဒ်န့ၣ်န့ၣ်ပကြၢးမၤတၢ်မနုၤလဲၣ်.” ၁၁ အဝဲစံးဆၢက့ၤ အဝဲသ့ၣ်လၢ “ပှၤလၢအဆ့ကၤ အိၣ်ခံဘ့ၣ်န့ၣ်* မ်အဟ့ၣ်နီၤလီၤ ပှၤလၢအဆ့ကၤ တအိၣ်ဘၣ် တဘ့ၣ်တက့ၢ်. ဒီးပှၤလၢ အတၢ်အီၣ်တၢ်အီအိၣ်န့ၣ် မ်အဟ့ၣ်နီၤလီၤပှၤလၢ အတၢ်အီၣ်တၢ်အီ တအိၣ်ဘၣ်တဖၣ် စ့ၢ်ကီးတက့ၢ်.” ၁၂ ဒီးပှၤထၢ တၢ်ခိတၢ်သွဲတဖၣ်ဒၣ်လဲာ် ဟဲဒ်သိး ကဒိးဘျၢထံ ဒီးတဲအီၤလၢ “သရၣ်ဧၢ, ပကြၢးမၤ တၢ်မနုၤလဲၣ်.” ၁၃ အဝဲတဲဘၣ် အဝဲသ့ၣ်လၢ “တဘၣ်ဃ့တၢ်ခိတၢ်သွဲ အါန့ၢ်ဒံး တၢ်ပာ်ပနီၣ်အီၤ အသိးတဂ့ၤ.” ၁၄ တကးဒံးဘၣ် ပှၤသုးဖိတဖၣ် သံကွၢ်စ့ၢ်ကီးအီၤလၢ “ပကြၢးမၤ တၢ်မနုၤလဲၣ်.” အဝဲတဲဘၣ် အဝဲသ့ၣ်လၢ “တဘၣ်ဟံးန့ၢ်ဆူၣ် ပှၤစ့ နီတဂၤတဂ့ၤ ဒီးတဘၣ် ပာ်ဒ့ၣ်ပာ်ကမၣ် ပှၤလၢအတၢ်ကမၣ် တအိၣ်ဘၣ်န့ၣ်တဂ့ၤ. မ့မ့ၢ် သးမံဒီးတၢ်လၢ သုဒိးန့ၢ်ဘၣ်အီၤ တဖၣ်တက့ၢ်.”

၁၅ ဒီးပှၤခိးကွၢ်လၢ်ဝဲ ခရံာ်အဃိ လၢအဝဲသ့ၣ် အသးပူၤန့ၣ် ဆိကမိၣ်ထီၣ်ဝဲလၢ ဘၣ်သ့ၣ်သ့ၣ် စီၤယိၤဟၣ်န့ၣ်မ့ၢ်ဝဲ ခရံာ်လီၤ. ၁၆ အဃိစီၤယိၤဟၣ် တဲဆၢ အဝဲသ့ၣ်ခဲလၢာ်လၢ “ယၤန့ၣ် ယဒိးဘျၢသုလၢထံ ဘၣ်ဆၣ် ပှၤတဂၤလၢ အဒိၣ်န့ၢ်ယၤန့ၣ် ကဟဲဝဲလီၤ. ထဲလၢ ယကဃဲၣ်လီၤကွံာ် အခီၣ်ဖံး အပျံၤဒၣ်လဲာ် ယတကြၢးဘၣ်. အဝဲဒၣ် ကဒိးဘျၢသုလၢ သးစီဆှံ ဒီးလၢမ့ၣ်အူလီၤ. ၁၇ အနီၣ်တရီာ်ဘုန့ၣ် အိၣ်လၢအစုပူၤ ဒ်သိး ကမၤကဆှီထီၣ်ကွံာ် အကြဲၢ်ပူၤပျီပျီ ဒီးကပာ်ဖှိၣ်အဘု* လၢဘုဖီပူၤလီၤ. မ့မ့ၢ်ဘုဘ့ၣ်န့ၣ် အဝဲကဒွဲၣ်အူထီၣ်ကွံာ်ဝဲလၢ မ့ၣ်အူလၢ အလီၤပံာ်တသ့ဘၣ် အပူၤန့ၣ်လီၤ.”

၁၈ စီၤယိၤဟၣ် ဟ့ၣ်ဂံၢ်ဟ့ၣ်ဘါ အဝဲသ့ၣ်အါမး ဒီးဆဲးစံၣ်တဲၤတဲလီၤစ့ၢ်ကီး ပှၤဂီၢ်မုၢ်လၢ တၢ်သးခုကစီၣ်တဖၣ်လီၤ. ၁၉ မ့မ့ၢ် ပဒိၣ်စီၤဟ့ၤရိာ်န့ၣ် စီၤယိၤဟၣ် သိၣ်ဃီၣ်အီၤ ခီဖျိလၢ အဝဲဟံးန့ၢ် အဒီပုၢ်ဝဲၢ်ခွါအမါ နီၢ်ဟ့ၤရိၤဒံ ဒီးကယဲၢ် တၢ်အၢတၢ်သီလၢ အမၤတ့ၢ်ဝဲတဖၣ် အဃိလီၤ. ၂၀ တကးဒံးဘၣ် အဝဲမၤအါထီၣ် အတၢ်ကမၣ် ခီဖျိအထၢနုာ်ဝဲ စီၤယိၤဟၣ်လၢဃိာ်ပူၤန့ၣ်လီၤ.

၂၁ ဖဲပှၤခဲလၢာ်ဟဲဒိးဘျၢထံအခါ ယ့ၣ်ၡူးစ့ၢ်ကီး ဟဲဒိးဘျၢအသးလီၤ. ဒီးဖဲအဝဲ ဃ့ဘါထုကဖၣ်တၢ်အခါ မူခိၣ် အိးထီၣ်အသး ၂၂ ဒီးသးစီဆှံ ဟဲလီၤလၢအလိၤ ဒ်ထိၣ်လွံၢ်အသိး ဒီးတၢ်ကလုၢ်သီၣ်ထီၣ် လၢမူခိၣ်လၢ “နမ့ၢ်ယဖိခွါလၢယအဲၣ် ဒီးယဘၣ်သူၣ်ဘၣ်သးနၤလီၤ.”