ယိၤဟၣ်

၃ ပှၤဖၤရံၤၡဲတဂၤ လၢအမံၤမ့ၢ် စီၤနံၤကဒ့မူးန့ၣ် မ့ၢ်ဝဲပှၤယူဒၤဖိအခိၣ် တဂၤလီၤ. ၂ ပှၤတဂၤအံၤ ဟဲလၢ ယ့ၣ်ၡူးအအိၣ် လၢမုၢ်နၤခီ ဒီးတဲအီၤလၢ “သရၣ်ဧၢ, ပှၤလၢ ကစၢ်ယွၤ တအိၣ်ဒီးအီၤဘၣ်န့ၣ် မၤတၢ်ပနီၣ်လီၤလး လၢနမၤသ့ၣ်တဖၣ်အံၤ တသ့နီတဂၤဘၣ်. အဃိ ပသ့ၣ်ညါလၢ နမ့ၢ်သရၣ်လၢ အဟဲလၢ ကစၢ်ယွၤအအိၣ်လီၤ.” ၃ ယ့ၣ်ၡူး စံးဆၢက့ၤအီၤလၢ “ယကတဲဘၣ်နၤ တီတီလၢ ပှၤမ့ၢ်တအိၣ်ဖျဲၣ်ထီၣ်ကဒီး တစုဘၣ်န့ၣ် အထံၣ်ဘၣ် ကစၢ်ယွၤ အဘီအမုၢ်တသ့ဘၣ်.” ၄ စီၤနံၤကဒ့မူး တဲအီၤလၢ “ပှၤလၢ အသးပှၢ်တဂၤ အိၣ်ဖျဲၣ်ထီၣ်ကဒီး ကသ့ဒ်လဲၣ်. အဝဲ က့ၤနုာ်လီၤလၢ အမိၢ်ဒၢလီၢ်အပူၤ ခံဘျီတဘျီ ဒီးအိၣ်ဖျဲၣ်ထီၣ်ကဒီး ကသ့ဧါ.” ၅ ယ့ၣ်ၡူး စံးဆၢဝဲလၢ “ယကတဲဘၣ်နၤ တီတီလၢ ပှၤမ့ၢ် တအိၣ်ဖျဲၣ်ထီၣ်လၢ ထံဒီးသးစီဆှံ ဘၣ်န့ၣ် အဝဲနုာ်လီၤလၢ ကစၢ်ယွၤ အဘီအမုၢ်အပူၤ တသ့ဘၣ်. ၆ တၢ်လၢ အအိၣ်ဖျဲၣ်ထီၣ်လၢ ပှၤဟီၣ်ခိၣ်ဖိန့ၣ် မ့ၢ်ဒၣ် ပှၤဟီၣ်ခိၣ်ဖိလီၤ. ဒီးတၢ်လၢ အအိၣ်ဖျဲၣ်ထီၣ်လၢ သးစီဆှံန့ၣ် မ့ၢ်ယွၤအဖိ တဖၣ်လီၤ. ၇ ခီဖျိလၢ ယတဲနၤလၢ သုကဘၣ် အိၣ်ဖျဲၣ်ထီၣ်ကဒီး တစုအဃိ တဘၣ်ကမၢကမၣ်တဂ့ၤ. ၈ ကလံၤန့ၣ် အူဝဲတၢ်လီၢ်ဖဲ အအဲၣ်ဒိးအူဝဲလီၤ. ဒီးနနၢ်ဟူ အကလုၢ်သီၣ် ဘၣ်ဆၣ် အဟဲဖဲလဲၣ်ဒီး ကလဲၤဖဲလဲၣ်န့ၣ် နတသ့ၣ်ညါဘၣ်. ပှၤကိးဂၤဒဲးလၢ အအိၣ်ဖျဲၣ်ထီၣ်လၢ သးစီဆှံန့ၣ် ကမၤအသးဒ်န့ၣ်လီၤ.”

၉ စီၤနံၤကဒ့မူး စံးဆၢက့ၤအီၤလၢ “တၢ်သ့ၣ်တဖၣ်အံၤ ကဲထီၣ်အသး ကသ့ဒ်လဲၣ်.” ၁၀ ယ့ၣ်ၡူး တဲဆၢက့ၤဝဲလၢ “နမ့ၢ် ပှၤအံၣ်စရ့လးဖိအသရၣ် ဘၣ်ဆၣ် နတသ့ၣ်ညါ တၢ်သ့ၣ်တဖၣ်အံၤ ဘၣ်ဧါ.” ၁၁ ယကတဲနၤ တီတီလၢ တၢ်လၢပသ့ၣ်ညါန့ၣ် ပတဲအီၤ ဒီးဘၣ်ဃးတၢ်လၢ ပထံၣ်န့ၣ် ပအုၣ်ပသးလီၤ. ဘၣ်ဆၣ် သုဝဲသ့ၣ်အံၤ သုတတူၢ်လိာ် ပတၢ်အုၣ်သးဘၣ်. ၁၂ ယမ့ၢ်တဲသု တၢ်လၢအဘၣ်ဃးဒီး ဟီၣ်ခိၣ်သနာ်က့ သုတနာ်ဘၣ်. အဃိ ယမ့ၢ်တဲသု တၢ်လၢ အဘၣ်ဃးဒီးမူခိၣ်န့ၣ် သုကနာ်အီၤဒ်လဲၣ်. ၁၃ တကးဒံးဘၣ် ပှၤတလဲၤထီၣ်ဘၣ်ဆူ မူခိၣ်နီတဂၤဘၣ်, ထဲဒၣ် ပှၤလၢအဟဲလီၤလၢမူခိၣ် လၢအမ့ၢ် ပှၤကညီဖိခွါန့ၣ်လီၤ. ၁၄ ဒီးဒ်စီၤမိၤၡ့ ယူာ်ထီၣ်ဝဲဂုၢ်လၢ ပှၢ်မုၢ်ကနၢအသိးန့ၣ် ပှၤကညီဖိခွါအံၤ ကဘၣ် တၢ်ယူာ်ထီၣ်အီၤ ၁၅ ဒ်သိး ပှၤကိးဂၤဒဲးလၢ အစူၢ်က့ၤနာ်က့ၤအီၤန့ၣ် ကဒိးန့ၢ်ဘၣ် တၢ်မူအထူအယိာ်လီၤ.

၁၆ “ကစၢ်ယွၤအဲၣ် ပှၤဟီၣ်ခိၣ်ဖိ* တုၤဒၣ်လဲာ် အဟ့ၣ်လီၤကွံာ်ဝဲ အဖိခွါနီၢ်နီၢ် ထဲတဂၤဧိၤ ဒ်သိး ပှၤကိးဂၤဒဲးလၢ အစူၢ်က့ၤနာ်က့ၤအီၤန့ၣ် အသုတတုၤလၢ တၢ်ဟးဂီၤတဂ့ၤ ဒီးကန့ၢ်ဘၣ် တၢ်မူအထူအယိာ် အဂီၢ်လီၤ. ၁၇ ကစၢ်ယွၤ တဆှၢလီၤအဖိခွါ လၢဟီၣ်ခိၣ် ဒ်သိးကစံၣ်ညီၣ် ပှၤဟီၣ်ခိၣ်ဖိ အဂီၢ်ဘၣ်. ဘၣ်ဆၣ် မ့ၢ်ဒ်သိး ပှၤဟီၣ်ခိၣ်ဖိ ကန့ၢ်တၢ်အုၣ်က့ၤခီၣ်က့ၤ ခီဖျိလၢအီၤ အဂီၢ်လီၤ. ၁၈ ပှၤလၢ အစူၢ်က့ၤနာ်က့ၤအီၤန့ၣ် တဘၣ် တၢ်စံၣ်ညီၣ်ဘၣ်. မ့မ့ၢ် ပှၤလၢ အတစူၢ်က့ၤနာ်က့ၤ တၢ်ဘၣ်န့ၣ် ဘၣ်တၢ်စံၣ်ညီၣ်လံအီၤလံ, မ့ၢ်လၢ အဝဲ တစူၢ်က့ၤနာ်က့ၤဝဲ ကစၢ်ယွၤ အဖိခွါနီၢ်နီၢ်ထဲတဂၤဧိၤ အမံၤဘၣ် အဃိလီၤ. ၁၉ တၢ်ကပီၤ ဟဲလီၤလၢဟီၣ်ခိၣ် ဘၣ်ဆၣ် လၢပှၤဟီၣ်ခိၣ်ဖိ ကအဲၣ်တၢ်ကပီၤအလီၢ်န့ၣ် အဲၣ်ဝဲတၢ်ခံး ဒီးတၢ်လၢ အဝဲသ့ၣ် မၤဝဲတဖၣ်န့ၣ် အၢဝဲသီဝဲအဃိ အဝဲသ့ၣ် ဘၣ်တၢ်စံၣ်ညီၣ်လီၤ. ၂၀ ပှၤလၢအမၤ တၢ်အၢတၢ်သီ တလီၢ်လီၢ်န့ၣ် သးဟ့ဝဲတၢ်ကပီၤ ဒီးဒ်သိး အတၢ်မၤသုတဘၣ် တၢ်သိၣ်ဃီၣ်တဂ့ၤအဂီၢ် တဟဲလၢ တၢ်ကပီၤအအိၣ်ဘၣ်. ၂၁ ဘၣ်ဆၣ် ပှၤလၢအမၤ တၢ်တီတၢ်လိၤန့ၣ် ဟဲဝဲလၢ တၢ်ကပီၤအအိၣ် ဒ်သိး တၢ်ကပာ်ဖျါထီၣ်လၢ အတၢ်မၤန့ၣ် မ့ၢ်တၢ်လၢအဘၣ် ကစၢ်ယွၤအသးအဂီၢ်လီၤ.”

၂၂ တၢ်န့ၣ်ဝံၤ အလီၢ်ခံ ယ့ၣ်ၡူးဒီး အပျဲၢ်အဘီၣ်တဖၣ် လဲၤဝဲဆူ သဝီလၢအအိၣ်လၢ ကီၢ်ယူဒၤအပူၤန့ၣ်လီၤ. အဝဲအိၣ်ဒီး အဝဲသ့ၣ်တတီၤဖိ ဒီးဒိးဘျၢတၢ်လီၤ.* ၂၃ ဘၣ်ဆၣ် စီၤယိၤဟၣ်စ့ၢ်ကီး ဒိးဘျၢတၢ်ဖဲ အဲၤနိၣ်လၢ အဘူးဒီးၡလ့ၣ် မ့ၢ်လၢထံအိၣ်ဝဲဖဲန့ၣ် အါမးအဃိလီၤ. ပှၤဟဲဒီး ဒိးဘျၢအသး ၂၄ မ့ၢ်လၢ စီၤယိၤဟၣ်န့ၣ် တဘၣ်တၢ်ဖၢနုာ်အီၤလၢ ဃိာ်ပူၤဒံးဘၣ်အဃိလီၤ.

၂၅ ဒီးစီၤယိၤဟၣ်အပျဲၢ်အဘီၣ်တဖၣ် တဲအါလိာ်သးဒီး ပှၤယူဒၤဖိတဂၤ ဘၣ်ဃး တၢ်မၤကဆှီထီၣ်က့ၤအဂ့ၢ်န့ၣ်လီၤ. ၂၆ အဃိ အဝဲသ့ၣ်ဟဲလၢ စီၤယိၤဟၣ်အအိၣ် ဒီးတဲအီၤလၢ “သရၣ်ဧၢ, ပှၤလၢ အအိၣ်ဒီးနၤလၢ ယၢ်ဒ့ၣ်အဝၢ်ဘးခီ လၢနအုၣ်နသးလၢအဂ့ၢ် တဂၤန့ၣ် အဝဲဒိးဘျၢတၢ် ဒီးပှၤခဲလၢာ် လဲၤလၢအအိၣ်လီၤ.” ၂၇ စီၤယိၤဟၣ် စံးဆၢက့ၤဝဲလၢ “ကစၢ်ယွၤ မ့ၢ်တဟ့ၣ်လီၤအီၤဘၣ်န့ၣ် ပှၤတဂၤဂ့ၤ တဂၤဂ့ၤ ဒိးန့ၢ်ဘၣ်တၢ် တသ့နီတမံၤဘၣ်. ၂၈ ဖဲယတဲလၢ ‘ယတမ့ၢ်ခရံာ်ဘၣ်, ဘၣ်ဆၣ် တၢ်ဆှၢလီၤယၤလၢ ပှၤတဂၤန့ၣ် အမဲာ်ညါ’ အခါ သုနီၢ်ကစၢ်ဒၣ်သုဝဲ မ့ၢ်ပှၤအုၣ်အသးလီၤ. ၂၉ ပှၤလၢအန့ၢ်ဘၣ် တလးမူးပိာ်မုၣ်န့ၣ် မ့ၢ်ဝဲတလးမူးပိာ်ခွါလီၤ. ဘၣ်ဆၣ် တလးမူးပိာ်ခွါ အတံၤသကိးန့ၣ် ဖဲအဂဲၤဆၢထၢၣ် ဒီးနၢ်ဟူအီၤအခါ သးခုဝဲဒိၣ်မး ခီဖျိလၢ တလးမူးပိာ်ခွါ အကလုၢ်အဃိလီၤ. အဃိ ယတၢ်သးခုန့ၣ် လၢထီၣ်ပှဲၤထီၣ်ဝဲလံ. ၃၀ အဝဲတဂၤန့ၣ် ကဘၣ် အါထီၣ်ဝဲကွ့ၢ်ကွ့ၢ် ဘၣ်ဆၣ် မ့မ့ၢ် ယၤန့ၣ် ကဘၣ် စှၤလီၤဝဲကွ့ၢ်ကွ့ၢ်လီၤ.”

၃၁ ပှၤလၢ အဟဲလၢထးခီန့ၣ် အိၣ်လၢပှၤကိးဂၤဒဲး အဖီခိၣ်လီၤ. မ့မ့ၢ် ပှၤလၢ အဟဲလၢဟီၣ်ခိၣ်န့ၣ် မ့ၢ်အဟဲလၢဟီၣ်ခိၣ် ဒီးတဲတၢ် ဘၣ်ဃးဒီးဟီၣ်ခိၣ်လီၤ. ပှၤလၢ အဟဲလၢမူခိၣ်န့ၣ် အိၣ်လၢ ပှၤကိးဂၤဒဲး အဖီခိၣ်လီၤ. ၃၂ အဝဲအုၣ်အသးဘၣ်ဃးဒီး တၢ်လၢအထံၣ်ဘၣ်ဝဲ ဒီးနၢ်ဟူဘၣ်ဝဲ ဘၣ်ဆၣ် ပှၤတတူၢ်လိာ် အတၢ်အုၣ်အသး နီတဂၤဘၣ်. ၃၃ မ့မ့ၢ် ပှၤလၢအတူၢ်လိာ် အတၢ်အုၣ်အသးန့ၣ် ပာ်ဂၢၢ်ပာ်ကျၢၤဝဲလၢ ယွၤန့ၣ်အကလုၢ်တီဝဲလီၤ. ၃၄ ပှၤလၢ ယွၤမၢလီၤဝဲတဂၤန့ၣ် တဲယွၤအကလုၢ်ကထါ မ့ၢ်လၢယွၤဟ့ၣ်လီၤအီၤ သးစီဆှံလၢလၢပှဲၤပှဲၤ အဃိလီၤ. ၃၅ ပၢ်န့ၣ်အဲၣ်ဖိခွါ ဒီးဟ့ၣ်လီၤဝဲ တၢ်ခဲလၢာ်လၢ အစုပူၤလီၤ. ၃၆ ပှၤလၢ အစူၢ်က့ၤနာ်က့ၤဖိခွါန့ၣ် ကန့ၢ်ဘၣ် တၢ်မူအထူအယိာ်လီၤ. မ့မ့ၢ် ပှၤလၢအတဒိကနၣ် ဖိခွါဘၣ်န့ၣ် တထံၣ်ဘၣ် တၢ်မူဘၣ် ဒီးကစၢ်ယွၤ အတၢ်သးဒိၣ်ထီၣ် ကဆဲးအိၣ်လၢအလိၤလီၤ.