အိၣ်ဒီးတၢ်သူၣ်ဆူၣ်သးဆူၣ်လၢ ကမၤစၢၤပှၤဂၤ

ယ့ၣ်ၡူးမၤဝဲဒ်လဲၣ်

တၢ်ဂီၤမူ– ယ့ၣ်ၡူးသိၣ်လိ စီၤနံၤကဒ့မူး

၁. ကွၢ် တၢ်ဂီၤမူ ဒီး ဖး ယိၤဟၣ် ၃:၁, ၂. ဝံၤဒီးတဲသကိး တၢ်သံကွၢ်လၢလာ်တဖၣ်အံၤ–

1. က. ဘၣ်မနုၤအဃိ စီၤနံၤကဒ့မူး လဲၤလၢယ့ၣ်ၡူးအအိၣ်လၢ မုၢ်နၤခီလဲၣ်.—ကွၢ်စ့ၢ်ကီး ယိၤဟၣ် ၁၂:၄၂, ၄၃.

2. ခ. ယ့ၣ်ၡူးထံၣ်လိာ်သးဒီး စီၤနံၤကဒ့မူး လၢမုၢ်နၤခီအဃိ ယ့ၣ်ၡူးပာ်ဖျါထီၣ်လၢ အသးဆူၣ်လၢ အကဒုးကဲထီၣ်ပှၤဂၤလၢ အပျဲၢ်အဘီၣ်ဒ်လဲၣ်.

ပမၤလိန့ၢ်တၢ်လၢ ယ့ၣ်ၡူးအအိၣ်ဒ်လဲၣ်

၂. ပပာ်ဖျါထီၣ်တၢ်အဲၣ်ပှၤဂၤ ခီဖျိ ပမၤစၢၤပှၤဂၤလၢ တၢ်သးဆူၣ် ဒ်သိး အဝဲသ့ၣ် ကကဲထီၣ် ယ့ၣ်ၡူးအပျဲၢ်အဘီၣ်အဂီၢ်.

ကွၢ်လိမၤဒိးယ့ၣ်ၡူး

၃. ဃုထၢတၢ်ဆၢကတီၢ် ဒီးတၢ်လီၢ်လၢအညီလၢ နပှၤမၤလိလံာ်စီဆှံဖိ ကမၤလိလံာ်စီဆှံအဂီၢ်. ဘၣ်သ့ၣ်သ့ၣ် နပှၤမၤလိလံာ်စီဆှံဖိ ကအဲၣ်ဒိးဃုထၢဝဲ တၢ်ဆၢကတီၢ် ဒီးမုၢ်နံၤမုၢ်သီလၢ ကမၤလိလံာ်စီဆှံဒီးနၤ ကချုးအဂီၢ်. နကဘၣ်ဆိကမိၣ်န့ၢ်တၢ်လၢ အဝဲသ့ၣ်အဂီၢ်. အဒိ မ့ၢ်အဝဲသ့ၣ် မၤလိလံာ်စီဆှံဒီးနၤ ကညီဒိၣ်လၢ တၢ်မၤလီၢ်ဧါ, လၢအဟံၣ်ဧါ မ့တမ့ၢ် လၢတၢ်လီၢ်တတီၤတီၤဧါ. မ့ၢ်သ့န့ၣ် ဆီတလဲ နတၢ်ရဲၣ်တၢ်ကျဲၤ ဒ်သိး နမၤစၢၤအီၤ ကသ့အဂီၢ်.

၄. မၤလိတၢ်ဒီးအီၤ ကိးနွံဒဲး. နလဲၤလၢ ပှၤမၤလိလံာ်စီဆှံဖိအအိၣ် မ့ၢ်တချုးဘၣ်န့ၣ် ဆိကမိၣ်ထံ တၢ်ဂ့ၢ်တဖၣ်အံၤ–

1. က. နမၤလိလံာ်စီဆှံဒီးအီၤ လၢမုၢ်နံၤအဂၤတနံၤနံၤသ့ဧါ.

2. ခ. နမၤလိလံာ်စီဆှံဒီးအီၤလၢ လီတဲစိ မ့တမ့ၢ် လၢအ့ၤထၢၤနဲၣ်အပူၤသ့ဧါ.

3. ဂ. နဃ့တၢ်မၤစၢၤလၢ ဒီပုၢ်ဝဲၢ်မုၣ်ခွါတဂၤဂၤ လၢကလဲၤမၤလိန့ၢ်နၤ လံာ်စီဆှံလၢနလီၢ်သ့ဧါ.

၅. ဃ့ထုကဖၣ်လၢ နကအိၣ်ဒီး တၢ်ထံၣ်လၢအဂ့ၤ. နပှၤမၤလိလံာ်စီဆှံဖိန့ၣ် အမၤလိလံာ်စီဆှံ မ့ၢ်တချုးကိးနွံဒဲးဘၣ် ဒီးကမၤထွဲတၢ်လၢ အမၤလိဘၣ်ဝဲတဖၣ် မ့ၢ်ကီလၢအဂီၢ်ဘၣ်ဆၣ် တဘၣ်သးဟးဂီၤတဂ့ၤ. ဃ့ယဟိဝၤယွၤလၢ အကမၤစၢၤနၤဒ်သိး နကအိၣ်ဒီးတၢ်သးဆူၣ် လၢနကဆဲးမၤလိ နပှၤမၤလိလံာ်စီဆှံဖိအဂီၢ်. (ဖံလံး ၂:၁၃) နပှၤမၤလိလံာ်စီဆှံဖိန့ၣ် အတၢ်ဂ့ၤတၢ်ဝါ ကအိၣ်အါမံၤ အဃိ ဃ့ယဟိဝၤယွၤလၢ နကအိၣ်ဒီးတၢ်ထံၣ်အဂ့ၤလၢ နပှၤမၤလိလံာ်စီဆှံဖိအဖီခိၣ်.