မၤတၢ်
၁ စီၤသီးဖံၤလူးဧၢ, လၢလံာ်အဆိကတၢၢ် တဘ့ၣ်အပူၤန့ၣ် ယကွဲးဖျါထီၣ် တၢ်ခဲလၢာ်လၢ ယ့ၣ်ၡူးမၤဝဲ ဒီးသိၣ်လိဝဲ စးထီၣ်လၢအခီၣ်ထံး ၂ တုၤလီၤလၢမုၢ်နံၤ ဖဲအဝဲ ဟံးစုနဲၣ်ကျဲဝဲ အတၢ်မၢဖိလၢ အဃုထၢထီၣ်ဝဲတဖၣ် ခီဖျိလၢ သးစီဆှံဝံၤအလီၢ်ခံ ဘၣ်တၢ်ဟံးထီၣ်အီၤန့ၣ်လီၤ. ၃ ယ့ၣ်ၡူးတူၢ်တၢ်နးတၢ်ဖှီၣ် ဝံၤအလီၢ်ခံ လၢအဝဲသ့ၣ် အမဲာ်ညါန့ၣ် အဝဲပာ်ဖျါထီၣ်လၢ အမူဝဲခီဖျိလၢ တၢ်အုၣ်အသးအါမံၤလီၤ. လၢအသီ ၄၀ အတီၢ်ပူၤန့ၣ် အဝဲသ့ၣ် ထံၣ်ဘၣ်အီၤဒီး အဝဲတဲဝဲဘၣ်ဃးဒီး ကစၢ်ယွၤအဘီ အမုၢ်အဂ့ၢ်လီၤ. ၄ ဖဲအဝဲအိၣ်ဖှိၣ်ဒီး အဝဲသ့ၣ်အခါ အဝဲမၤလိာ်အဝဲသ့ၣ်လၢ “တဘၣ်ဟးထီၣ်လၢ ယရူၤၡလ့ၣ်အပူၤတဂ့ၤ. မ့မ့ၢ် ဆဲးအိၣ်ခိးတၢ်လၢ ပၢ်အၢၣ်လီၤတ့ၢ်ဝဲ ဒ်သုနၢ်ဟူဘၣ်လၢ ယအိၣ်အသိးတက့ၢ်. ၅ စီၤယိၤဟၣ်န့ၣ် ဒိးဘျၢတၢ်လၢထံ ဘၣ်ဆၣ် လၢစှၤနံၤစှၤသီအတီၢ်ပူၤန့ၣ် သုဝဲသ့ၣ်အံၤ သုကဘၣ် တၢ်ဒိးဘျၢသုလၢ သးစီဆှံလီၤ.”
၆ အဃိ ဖဲအဝဲသ့ၣ်အိၣ်ဖှိၣ်ဝဲ အဆၢကတီၢ် အဝဲသ့ၣ် သံကွၢ်ယ့ၣ်ၡူးလၢ “ကစၢ်ဧၢ, ဆၢကတီၢ်ခဲအံၤ မ့ၢ်နကသူၣ်ထီၣ်က့ၤ ဘီမုၢ်လၢ အံၣ်စရ့လးအပူၤဧါ.” ၇ အဝဲတဲဘၣ် အဝဲသ့ၣ်လၢ “တၢ်ဆၢကတီၢ်ဒီး မုၢ်နံၤမုၢ်သီတဖၣ်န့ၣ် ထဲပၢ်တဂၤ အိၣ်ဒီးတၢ်ခွဲးတၢ်ယာ်လၢ ကပာ်ပနီၣ်ဝဲ ဒီးတလိၣ်လၢ သုကသ့ၣ်ညါဘၣ်. ၈ ဘၣ်ဆၣ် ဖဲသးစီဆှံဟဲလီၤလၢ သုလိၤအခါ သုကဒိးန့ၢ်ဘၣ် တၢ်စိတၢ်ကမီၤ ဒီးသုကကဲထီၣ် ယပှၤအုၣ်အသးတဖၣ်လၢ ယရူၤၡလ့ၣ်အပူၤ, လၢကီၢ်ယူဒၤ ဒီကီၢ်ညါ ဒီးၡၤမရံအပူၤ ဒီးပၢၢ်တုၤလၢ ဟီၣ်ခိၣ် အကတၢၢ်လီၤ.” ၉ အဝဲတဲ တၢ်ဂ့ၢ်တဖၣ်အံၤ ဝံၤဒီး ဖဲအဝဲသ့ၣ် ကွၢ်အီၤအခါ အဝဲဘၣ် တၢ်ဟံးထီၣ်အီၤ ဒီးတၢ်အၢၣ်တလိၣ် မၤဘၢအီၤအဃိ အဝဲသ့ၣ် တထံၣ်အီၤလၢၤဘၣ်. ၁၀ ဖဲယ့ၣ်ၡူး က့ၤထီၣ်ဝဲအဖၢမုၢ် အဝဲသ့ၣ် ကွၢ်ထီၣ်လၢမူခိၣ် ဒီးသတူၢ်ကလာ်န့ၣ် ပှၤခံဂၤလၢ အသိးဆ့ကၤဝါ ဆၢထၢၣ်ဝဲလၢ အဝဲသ့ၣ်အကပၤ ၁၁ ဒီးတဲဝဲလၢ “ပှၤကၤလံၤလါဖိ သ့ၣ်ဧၢ, ဘၣ်မနုၤအဃိ သုအိၣ်ဆၢထၢၣ်ဒ်အံၤ ဒီးကွၢ်ထီၣ်တၢ်ဆူ မူခိၣ်န့ၣ်လဲၣ်. ယ့ၣ်ၡူးလၢ အဘၣ်တၢ်ဟံးထီၣ်အီၤ လၢသုအိၣ် ဆူမူခိၣ်တဂၤအံၤ ကဟဲက့ၤဒ်သုထံၣ် အဝဲက့ၤထီၣ်လၢ မူခိၣ်အသိးန့ၣ်လီၤ.”
၁၂ ဒီးအဝဲသ့ၣ်အိၣ်လၢ ကစၢၢ်တဖျၢၣ်အလိၤလၢ ပှၤကိးဝဲအမံၤလၢ ကစၢၢ်သ့ၣ်စၤယံးလီၤ. အဝဲသ့ၣ် က့ၤဝဲလၢ ယရူၤၡလ့ၣ်လၢ အအိၣ်တယံၤဘၣ် ဒီးတၢ်ဒ့ၣ်စၢၤအိၣ်ဝဲထဲ မံးလာ်တဝာ်န့ၣ်လီၤ.* ၁၃ ဖဲအဝဲသ့ၣ် က့ၤတုၤအခါ အဝဲသ့ၣ် လဲၤထီၣ်ဝဲလၢ ဒၢးတဖျၢၣ်လၢ ဟံၣ်ဖီခိၣ်တတီၤ ဖဲအဝဲသ့ၣ် အအိၣ်တမှံၤဝဲန့ၣ်လီၤ. ဖဲန့ၣ်အိၣ်ဝဲဒီး စီၤပ့းတရူး, စီၤယိၤဟၣ်, စီၤယၤကိာ်, စီၤအၣ်ဒရ့း, စီၤဖံလံးပူး, စီၤသိၤမါ, စီၤဘၢ်သလီးမဲ, စီၤမးသဲ, စီၤအၤလဖဲ အဖိခွါစီၤယၤကိာ်, စီၤၡံမိၣ် လၢအမ့ၢ် ပှၤလၢအသးဆူၣ်တဂၤ ဒီးစီၤယၤကိာ် အဖိခွါ စီၤယူဒၤန့ၣ်လီၤ. ၁၄ ပှၤတဖၣ်အံၤခဲလၢာ် ဒီးပိာ်မုၣ်တနီၤ ဒီးယ့ၣ်ၡူးအမိၢ် နီၢ်မၤရံ ဒီးယ့ၣ်ၡူး အဒီပုၢ်ဝဲၢ်ခွါတဖၣ် ဆဲးဃ့ဘါထုကဖၣ်တၢ် တလီၢ်လီၢ်လၢ တၢ်သးတဖျၢၣ်ဃီ အပူၤလီၤ.
၁၅ ဖဲမုၢ်နံၤတဖၣ်န့ၣ် အတီၢ်ပူၤ စီၤပ့းတရူး ဆၢထၢၣ်လၢ ဒီပုၢ်ဝဲၢ်တဖၣ် အခၢၣ်သး (ပှၤခဲလၢာ်အနီၣ်ဂံၢ် ကအိၣ်ဝဲ ၁၂၀) ဒီးတဲဝဲလၢ ၁၆ “ဒီပုၢ်ဝဲၢ်ခွါသ့ၣ်ဧၢ, တၢ်ကွဲးအသးလၢ စီၤဒၤဝံး တဲဆိပာ်စၢၤဝဲ ခီဖျိ သးစီဆှံန့ၣ် ဘၣ်လၢထီၣ်ပှဲၤထီၣ်ဝဲလီၤ. အဝဲတဲတၢ် ဘၣ်ဃးဒီး စီၤယူဒၤလၢ အလဲၤဆှၢပှၤလၢ အလဲၤဖီၣ်ယ့ၣ်ၡူးန့ၣ်လီၤ. ၁၇ အဝဲဘၣ် တၢ်ဂံၢ်အီၤလၢပကျါ ဒီးအဝဲပၣ်ဃုာ်လၢ တၢ်စံၣ်တဲၤတဲလီၤ တၢ်မၤအံၤအပူၤ ဒ်သိးဒီးပှၤလီၤ. ၁၈ (ပှၤတဂၤအံၤ ပှ့ၤဝဲဟီၣ်ခိၣ် တကဝီၤလၢ တၢ်တတီတလိၤ အဘူးအလဲဒီး လီၤတဲာ်ဆှိခိၣ်, အဟၢဖၢသ့ၣ်ဖး ဒီးအပှံာ်လီၤလဲာ် ခဲလၢာ်လီၤ. ၁၉ ပှၤအိၣ်လၢ ယရူၤၡလ့ၣ်ခဲလၢာ် သ့ၣ်ညါထီၣ်ဝဲ တၢ်ဂ့ၢ်အံၤအဃိ ဟီၣ်ခိၣ်တကဝီၤအံၤ ဘၣ်တၢ်ကိးအီၤလၢ အဝဲသ့ၣ်အကျိာ်လၢ အၤက့းလဒၤမါ, အခီပညီမ့ၢ်ဝဲ “တၢ်သွံၣ်အဟီၣ်ကဝီၤ” လီၤ.) ၂၀ လၢလံာ် ထါစံးထီၣ်ပတြၢၤအပူၤန့ၣ် ကွဲးဝဲလၢ ‘အဝဲ အတၢ်အိၣ်တၢ်ဆိးအလီၢ်န့ၣ် မ်အအိၣ်သယုၢ်တက့ၢ်. ဒီးမ်ပှၤသုတအိၣ်လၢ အပူၤနီတဂၤတဂ့ၤ.’ ဒီး ‘အမူဒါလၢ အမ့ၢ်ပှၤကွၢ်ထွဲတၢ်န့ၣ် မ်ပှၤအဂၤတဂၤ ဟံးန့ၢ်က့ၤအီၤတက့ၢ်.’ ၂၁ အဃိ ပှၤလၢအဘၣ် တၢ်ဃုထၢထီၣ်အီၤတဂၤ ကဘၣ်မ့ၢ်ပှၤလၢ အလဲၤဃုာ်တၢ်ဒီးပှၤ ဒီတကတီၢ် ဖဲကစၢ်ယ့ၣ်ၡူးမၤဝဲ အတၢ်မၤ* လၢပကျါ ၂၂ စးထီၣ်လၢ စီၤယိၤဟၣ် ဒိးဘျၢအီၤထံ တုၤလီၤလၢ မုၢ်နံၤလၢ တၢ်ဟံးထီၣ်အီၤလၢ ပအိၣ်လီၤ. ပှၤတဂၤအံၤ ကဘၣ်အုၣ်အသး ဃုာ်ဒီးပှၤ လၢယ့ၣ်ၡူး ဂဲၤဆၢထၢၣ်သမူထီၣ်က့ၤ အဂ့ၢ်လီၤ.”
၂၃ အဃိ အဝဲသ့ၣ်ပာ်ဖျါထီၣ်ဝဲ ပှၤခံဂၤလီၤ. တဂၤန့ၣ်မ့ၢ်ဝဲ စီၤယိၤသးလၢ အဘၣ်တၢ်ကိးအီၤလၢ စီၤဘၢ်စဘါ ဒီးဘၣ်တၢ် ကိးစ့ၢ်ကီးအီၤလၢ စီၤယူစတူးလီၤ. ဒီးအဝဲတဂၤန့ၣ် မ့ၢ်ဝဲ စီၤမးသံလီၤ. ၂၄ ဒီးအဝဲသ့ၣ် ဃ့ဘါထုကဖၣ်တၢ်လၢ “ပကစၢ် ယဟိဝၤယွၤ လၢအသ့ၣ်ညါပှၤခဲလၢာ် အသးဧၢ, လၢပှၤခံဂၤအံၤအကျါ ဒုးနဲၣ်ပှၤ ပှၤလၢနဃုထၢအီၤတဂၤ ၂၅ ဒ်သိး အကဟံးထီၣ် တၢ်စံၣ်တဲၤတဲလီၤ တၢ်မၤအံၤ ဃုာ်ဒီး တၢ်မၢဖိအလီၢ်လၢ စီၤယူဒၤ ပာ်တ့ၢ်ဝဲဒ်သိး အကလဲၤတၢ်လၢ အနီၢ်ကစၢ်အကျဲ န့ၣ်တက့ၢ်.” ၂၆ ဒီးအဝဲသ့ၣ်ဖးတၢ် ဒီးတၢ်ဖးန့ၣ် လီၤဘၣ်လၢ စီၤမးသံအအိၣ်အဃိ တၢ်ဂံၢ်ဃုာ်အီၤဒီး တၢ်မၢဖိ ၁၁ ဂၤန့ၣ်လီၤ.