ရိမ့ၤ
၁ ယၤ, စီၤပီလူး လၢအမ့ၢ် ယ့ၣ်ၡူးခရံာ်အကုၢ် လၢဘၣ်တၢ်ကိးန့ၢ်အီၤ ဒ်သိး ကကဲထီၣ် တၢ်မၢဖိတဂၤ ဒီးဘၣ်တၢ် ပာ်လီၤဆီဃာ်အီၤလၢ ယွၤအတၢ်သးခုကစီၣ် အဂီၢ်လီၤ. ၂ တၢ်သးခုကစီၣ်အံၤ ဘၣ်တၢ်အၢၣ်လီၤပာ်စၢၤအီၤ လၢတၢ်ကွဲးအသးစီဆှံအပူၤ ခီဖျိလၢအဝံတဖၣ် ယံာ်တ့ၢ်လံ. ၃ တၢ်ကစီၣ်အံၤ တဲဝဲဘၣ်ဃးဒီး အဖိခွါလၢ အအိၣ်ဖျဲၣ်ထီၣ်ဒ် ပှၤဟီၣ်ခိၣ်ဖိအသိးလၢ အဟဲလီၤစၢၤလၢ စီၤဒၤဝံး အစၢၤအသွဲၣ်လီၤ. ၄ ခီဖျိယွၤသူသးစီဆှံ တၢ်စိတၢ်ကမီၤ ဒ်သိး ကမၤသမူထီၣ်က့ၤအီၤလၢ တၢ်သံအဃိ တၢ်ပာ်ဖျါထီၣ်အီၤ လၢအမ့ၢ် ကစၢ်ယွၤအဖိခွါလီၤ. အဝဲအံၤ မ့ၢ်ပကစၢ် ယ့ၣ်ၡူးခရံာ်လီၤ. ၅ ခီဖျိလၢ အီၤအဃိ ပ* ဒိးန့ၢ်ဘၣ် တၢ်သးကညီၤ ဒိၣ်ဒိၣ်မုၢ်မုၢ် ဒီးပကဲထီၣ်တၢ်မၢဖိ ဒ်သိး ပှၤကလုာ်တဖၣ် ကပာ်ဖျါထီၣ် တၢ်ဒိကနၣ်လၢ အဟဲခီဖျိတၢ်နာ် ဒီးကမၤလၤကပီၤ အမံၤအဂီၢ်လီၤ. ၆ ဒီးပှၤကလုာ်တဖၣ်အံၤလၢ အဘၣ်တၢ်ကိးန့ၢ်အီၤ ဒ်သိးကကဲထီၣ် ယ့ၣ်ၡူးခရံာ်အတၢ်န့ၣ် သုဝဲစ့ၢ်ကီး သုပၣ်ဃုာ်လၢ အဝဲသ့ၣ် အကျါလီၤ. ၇ ဆူပှၤလၢ ကစၢ်ယွၤအဲၣ်ဝဲ ဒီးကိးဃီၤဝဲဒ်သိး ကကဲထီၣ်ပှၤစီဆှံ လၢအအိၣ်လၢ ဝ့ၢ်ရိမ့ၤအပူၤ ခဲလၢာ်သ့ၣ်ဧၢ,
မ်သုဒိးန့ၢ်ဘၣ် တၢ်သးကညီၤ ဒိၣ်ဒိၣ်မုၢ်မုၢ် ဒီးတၢ်ဃူတၢ်ဖိးလၢ အဟဲလၢ ပပၢ်ကစၢ်ယွၤ ဒီးကစၢ်ယ့ၣ်ၡူးခရံာ် အအိၣ်န့ၣ်တက့ၢ်.
၈ အဆိကတၢၢ် ဘၣ်ဃးဒီး သုဝဲခဲလၢာ်န့ၣ် ယစံးဘျုး ယကစၢ်ယွၤ ခီဖျိလၢ ယ့ၣ်ၡူးခရံာ်, မ့ၢ်လၢ သုတၢ်စူၢ်တၢ်နာ်အဂ့ၢ်န့ၣ် ဟူထီၣ်သါလီၤဝဲလၢ ဟီၣ်ခိၣ်ဒီဘ့ၣ် အဃိလီၤ. ၉ ယမၤကစၢ်ယွၤ အတၢ်မၤလၢ ယသးဒီဖျၢၣ်ညါ ခီဖျိ တၢ်စံၣ်တဲၤတဲလီၤ တၢ်သးခုကစီၣ်လၢအ ဘၣ်ဃးဒီး အဖိခွါန့ၣ်လီၤ. ဒီးယသ့ၣ်နီၣ်သုလၢ တၢ်ထုကဖၣ်အပူၤ ထီဘိန့ၣ် ယွၤမ့ၢ် ယပှၤအုၣ်အသးလီၤ. ၁၀ ဒီးယဃ့ကညး ကစၢ်ယွၤဒ်သိး မ့ၢ်သ့ဒီး မ့ၢ်ဘၣ်အသးန့ၣ် ခဲအံၤတဘျီ ယလဲၤလၢ သုအိၣ်ကန့ၢ်လီၤ. ၁၁ ဒီးယအဲၣ်ဒိးထံၣ်သုဒိၣ်မး, မ့ၢ်ဒ်သိး ယကဟ့ၣ်နီၤလီၤသု နီၢ်သးအတၢ်ဟ့ၣ်တခါ လၢအကဒုးဆူၣ်ထီၣ် သုဂံၢ်သုဘါ ၁၂ မ့တမ့ၢ် ဒ်သိးယၤဒီးသု ကဟ့ၣ်ဂံၢ်ဟ့ၣ်ဘါလိာ်သးယၢ်ခီယၢ်ခီ ခီဖျိလၢ ပတၢ်နာ်န့ၣ်လီၤ.
၁၃ ဒီပုၢ်ဝဲၢ်သ့ၣ်ဧၢ, ယအဲၣ်ဒိးလၢ သုကသ့ၣ်ညါလၢ ယတိာ်ပာ်လၢ ယကလဲၤဆူ သုအိၣ်အါဘျီ ဒ်သိး ယတၢ်စံၣ်တဲၤတဲလီၤတၢ်မၤ ကသၣ်ထီၣ် ဖဲန့ၣ်အဂီၢ် ဒ်ယမၤပာ်စၢၤလၢ ပှၤကလုာ်တဖၣ် အကျါအသိးလီၤ. ဘၣ်ဆၣ် တၢ်တြီယၤတုၤခဲအံၤလီၤ. ၁၄ ပှၤကြံးဖိမ့ၢ်ဂ့ၤ, ပှၤထံဂၤကီၢ်ဂၤမ့ၢ်ဂ့ၤ, ပှၤကူၣ်တၢ်သ့မ့ၢ်ဂ့ၤ, ပှၤလၢ အတၢ်ကူၣ်ဘၣ်ကူၣ်သ့ တအိၣ်ဘၣ်တဖၣ်မ့ၢ်ဂ့ၤ, ယကမၢ်ထီၣ်ဒီး အဝဲသ့ၣ်ခဲလၢာ်လီၤ. ၁၅ အဃိ ယသးဆူၣ်လၢ ယကစံၣ်တဲၤတဲလီၤစ့ၢ်ကီး တၢ်သးခုကစီၣ်လၢသုအိၣ် လၢဝ့ၢ်ရိမ့ၤအပူၤလီၤ. ၁၆ ယၤန့ၣ် ယတမဲာ်ဆှးလၢ တၢ်သးခုကစီၣ် အဃိဘၣ်. တၢ်သးခုကစီၣ်န့ၣ် မ့ၢ်ဝဲကစၢ်ယွၤ အစိအကမီၤလၢ ကအုၣ်က့ၤခီၣ်က့ၤ ပှၤကိးဂၤဒဲးလၢ အအိၣ်ဒီးတၢ်နာ်, အဆိကတၢၢ်န့ၣ် ပှၤယူဒၤဖိ ဒီးလၢခံန့ၣ် ပှၤကြံးဖိလီၤ. ၁၇ လၢတၢ်သးခုကစီၣ်အဃိ ကစၢ်ယွၤ အတၢ်တီတၢ်လိၤန့ၣ် ဘၣ်တၢ် ပာ်ဖျါထီၣ်အီၤဆူ ပှၤလၢအအိၣ်ဒီး တၢ်နာ်တဖၣ်လီၤ. အဃိ အဝဲသ့ၣ်အတၢ်နာ် ဂၢၢ်ထီၣ်ကျၢၤထီၣ်ဝဲဒ် တၢ်ကွဲးအသးအိၣ်ဝဲလၢ “ပှၤတီပှၤလိၤန့ၣ် ကမူဝဲလၢ အတၢ်နာ်အဃိလီၤ.”
၁၈ ကစၢ်ယွၤအတၢ်သးဒိၣ် လၢအထီဒါ တၢ်အၢတၢ်သီ ဒီးတၢ်တတီတလိၤလၢ ပှၤဟီၣ်ခိၣ်ဖိမၤဝဲ ကိးမံၤဒဲးန့ၣ် ဘၣ်တၢ် ပာ်ဖျါထီၣ်အီၤလၢ မူခိၣ်လီၤ. အဝဲသ့ၣ်တြီတၢ်မ့ၢ်တၢ်တီ လၢကျဲလၢ အတတီတလိၤဘၣ်လီၤ. ၁၉ ဘၣ်ဃးဒီး ကစၢ်ယွၤအဂ့ၢ်လၢ ပှၤကညီ သ့ၣ်ညါနၢ်ပၢၢ်ဝဲ သ့တဖၣ်န့ၣ် အိၣ်ဖျါလၢ အဝဲသ့ၣ် အမဲာ်ညါပျီပျီ မ့ၢ်လၢ ကစၢ်ယွၤ ပာ်ဖျါထီၣ်န့ၢ် အဝဲသ့ၣ်အဃိလီၤ. ၂၀ စးထီၣ်လၢ ကစၢ်ယွၤတ့လီၤ ဟီၣ်ခိၣ်လံၤလံၤန့ၣ် အတၢ်ဂ့ၤတၢ်ဝါလၢ ပထံၣ်အီၤ တသ့ဘၣ်တဖၣ်အံၤ အိၣ်ဖျါထီၣ်ဝဲ ပျီပျီလီၤ. ဒီးခီဖျိလၢ တၢ်လၢ အတ့လီၤဝဲတဖၣ်အဃိ ပနၢ်ပၢၢ်လၢ အဝဲမ့ၢ်ပှၤဒ်လဲၣ် တဂၤလဲၣ်, ဒီးအတၢ်စိတၢ်ကမီၤ အထူအယိာ်အဂ့ၢ် ဒီးအပာ်ဖျါထီၣ်စ့ၢ်ကီးလၢ အဝဲမ့ၢ် ကစၢ်ယွၤနီၢ်ကီၢ်လီၤ. လၢတၢ်န့ၣ်အဃိ အဝဲသ့ၣ် တဲပူၤဖျဲးအသး တသ့ဘၣ်. ၂၁ အဝဲသ့ၣ်န့ၣ် သ့ၣ်ညါကစၢ်ယွၤ ဘၣ်ဆၣ် တမၤလၤကပီၤအီၤ ဒ်ယွၤအသိးဘၣ် ဒီးတစံးဘျုးအီၤဘၣ်. အဝဲသ့ၣ် အတၢ်ကူၣ်တၢ်ဖးန့ၣ် မ့ၢ်တၢ်ကလီကလီ ဒီးအသးလၢ အတဖးဘၣ်န့ၣ် ခံးလီၤကွံာ်ဝဲလီၤ. ၂၂ အဝဲသ့ၣ် တဲလီၤအသးလၢ အမ့ၢ်ပှၤကူၣ်တၢ်သ့ သနာ်က့ အဝဲသ့ၣ်ကဲထီၣ် ပှၤဟးဂီၤဖိလီၤ. ၂၃ ဒီးလၢကမၤလၤကပီၤ ကစၢ်ယွၤလၢ အသံတသ့ဘၣ် တဂၤအလီၢ် မၤလၤကပီၤဝဲ ပှၤဟီၣ်ခိၣ်ဖိလၢ အသံသ့တဖၣ်အဂီၤ ဒီးထိၣ်တဖၣ် ဒီးဆၣ်ဖိကီၢ်ဖိလၢ အအိၣ်ဒီး အခီၣ်လွံၢ်ခီ ဒီးတၢ်လၢအစွါတဖၣ် အဂီၤလီၤ.
၂၄ အဃိ ကစၢ်ယွၤဟ့ၣ် အဝဲသ့ၣ်အခွဲးလၢ ကမၤဝဲဒ် အတၢ်သူၣ်လီသးကွံလၢ အတကဆှီဘၣ်တဖၣ် လၢအမၤဟးဂီၤ အဝဲသ့ၣ်အနီၢ်ခိ အသူးသ့ၣ်လၤကပီၤလီၤ. ၂၅ တၢ်မ့ၢ်တၢ်တီလၢ အဘၣ်ဃးဒီး ကစၢ်ယွၤန့ၣ် အဝဲသ့ၣ်ခီလဲဝဲဒီး တၢ်လံၣ်တၢ်လီလီၤ. ဒီးလၢအဝဲသ့ၣ် ကဘူၣ်ထီၣ်ဘါထီၣ် တၢ်ဘၣ်တ့ကစၢ်လၢ အကြၢးဒီး တၢ်စံးထီၣ်ပတြၢၤ လီၤစိၤလီၤထီတဂၤ ဒီးမၤအတၢ်အလီၢ် အဝဲသ့ၣ် ဘူၣ်ထီၣ်ဘါထီၣ် တၢ်ဘၣ်တ့တဖၣ် ဒီးမၤအတၢ်လီၤ. အၤမ့ၣ်. ၂၆ အဃိ ကစၢ်ယွၤ ဟ့ၣ်အခွဲးလၢ အဝဲသ့ၣ် အတၢ်သးကတၢလၢ အလီၤမဲာ်ဆှး ကဒိၣ်စိလၢ အဝဲသ့ၣ်အဖီခိၣ်လီၤ. ဒီးပိာ်မုၣ်လၢ အဝဲသ့ၣ်အကျါန့ၣ် တအိၣ်မူဝဲဒ် ပိာ်မုၣ်အန့ဆၢၣ် အိၣ်ဝဲအသိးလၢၤဘၣ်. ၂၇ ဒ်န့ၣ်အသိး ပိာ်ခွါတဖၣ်စ့ၢ်ကီး တမံဃုာ်အိၣ်ဃုာ်ဒီးပိာ်မုၣ် ဒ်န့ဆၢၣ်အိၣ်ဝဲ အသိးလၢၤဘၣ်. လၢတၢ်န့ၣ်အလီၢ် ပိာ်ခွါကဒဲကဒဲ သးကတၢထီၣ်လိာ်သး ဒ်မ့ၣ်အူအီၣ်တၢ်အသိး ဒီးမၤဝဲ လုၢ်လၢ်လၢ အလီၤသးဘၣ်အၢ တဖၣ်လီၤ. ဘၣ်ဆၣ် တၢ်စံၣ်ညီၣ်လၢ အဝဲသ့ၣ် ကြၢးဒိးန့ၢ်ဘၣ်ဝဲလၢ အတၢ်ကမၣ်အံၤအဃိန့ၣ် အဝဲသ့ၣ် ကဒိးန့ၢ်ဘၣ်ဝဲ လၢလၢပှဲၤပှဲၤလီၤ.
၂၈ အဝဲသ့ၣ် ဆိကမိၣ်လၢ တၢ်အၢၣ်လီၤတူၢ်လိာ် ကစၢ်ယွၤန့ၣ် တမ့ၢ်တၢ်လၢ အရ့ဒိၣ်ဘၣ်အဃိ ကစၢ်ယွၤ ပျဲအဝဲသ့ၣ်လၢ ကဆဲးဆိကမိၣ်တၢ်လၢ အဘျုးတအိၣ်ဘၣ်တဖၣ် ဒီးကမၤတၢ်လၢ အတကြၢးမၤဝဲဘၣ် တဖၣ်န့ၣ်လီၤ. ၂၉ ဒီးအဝဲသ့ၣ် လၢပှဲၤဝဲဒီး တၢ်တတီတလိၤ, တၢ်အၢတၢ်သီ, တၢ်သးကွံ ဒီးတၢ်ကမၣ်တဖၣ် လၢကျဲ အကလုာ်ကလုာ်န့ၣ်လီၤ. အဝဲသ့ၣ်လၢပှဲၤဝဲဒီး တၢ်သူၣ်က့ၣ်သးကါ, တၢ်မၤသံပှၤကညီ, တၢ်အ့ၣ်လိာ်ဆိးက့, တၢ်လီတၢ်ဝ့ၤ ဒီးတၢ်သးအိၣ် မၤအၢမၤသီပှၤဂၤန့ၣ်လီၤ. အဝဲသ့ၣ်မ့ၢ်ပှၤလၢ အဟးတဲခူသူၣ်အီၣ်ပှၤဂ့ၢ်, ၃၀ တဲဟးဂီၤပှၤဂ့ၢ်, သးဟ့ကစၢ်ယွၤ, တပာ်ကဲတၢ်ဘၣ်, ပာ်ကဖၢလၢအသး, ပတြၢၤလီၤအသး, ကူၣ်ထီၣ်တၢ်အၢ ဒီးတဒိကနၣ် အမိၢ်အပၢ်အကလုၢ်ဘၣ်, ၃၁ အတၢ်နၢ်ပၢၢ်တအိၣ်ဘၣ်, တမၤလၢပှဲၤ အတၢ်အၢၣ်လီၤတဖၣ်ဘၣ်, ဒီးတအဲၣ်ပှၤကညီဘၣ် ဒီးတသးကညီၤ ပှၤဂၤတဖၣ်ဘၣ်. ၃၂ အဝဲသ့ၣ် သ့ၣ်ညါ လီၤတံၢ်လီၤဆဲးလၢ ကစၢ်ယွၤ အတၢ်သိၣ်တၢ်သီ လၢအတီအလိၤ တဲဝဲလၢ ပှၤလၢအဆဲးမၤ တၢ်သ့ၣ်တဖၣ်အံၤန့ၣ် ကြၢးသံဝဲလီၤ. ဘၣ်ဆၣ် တမ့ၢ်ထဲလၢ အဝဲသ့ၣ်ဆဲးမၤ တၢ်သ့ၣ်တဖၣ်အံၤဘၣ်, အဝဲသ့ၣ် ဘၣ်သူၣ်ဘၣ်သး စ့ၢ်ကီးဝဲ ပှၤလၢအဆဲးမၤ တၢ်သ့ၣ်တဖၣ်အံၤန့ၣ်လီၤ.