၁ ကရံၣ်သူး
၉ ဖဲယအဲၣ်ဒိးမၤန့ၣ် မ့ၢ်ယမၤတသ့ဘၣ်ဧါ. ယမ့ၢ်တၢ်မၢဖိတဂၤ တမ့ၢ်ဘၣ်ဧါ. ယထံၣ်ဘၣ် ပကစၢ်ယ့ၣ်ၡူး တမ့ၢ်ဘၣ်ဧါ. သုမ့ၢ် ယတၢ်ဖံးတၢ်မၤလၢ ယမၤအီၤလၢကစၢ်အပူၤ တမ့ၢ်ဘၣ်ဧါ. ၂ ယမ့တမ့ၢ် တၢ်မၢဖိလၢ ပှၤဂၤအဂီၢ်ဘၣ်သနာ်က့ ယမ့ၢ်တၢ်မၢဖိ လၢသုဂီၢ်သပှၢ်တၢၢ်လီၤ. ဒီးသုမ့ၢ်တၢ်ပနီၣ်လၢ အပာ်ဂၢၢ်ပာ်ကျၢၤဝဲလၢ ယမ့ၢ်တၢ်မၢဖိလၢ ကစၢ်အပူၤလီၤ.
၃ ပှၤလၢ အသမံသမိးယၤန့ၣ် ယကစံးဆၢက့ၤ အဝဲသ့ၣ်ဒ်အံၤလီၤ. ၄ ပအိၣ်ဒီး တၢ်ခွဲးတၢ်ယာ်လၢ ပကအီၣ်တၢ်ဒီးအီတၢ် တမ့ၢ်ဘၣ်ဧါ. ၅ ပအိၣ်ဒီး တၢ်ခွဲးတၢ်ယာ်လၢ ပကဟံးန့ၢ်ပမါလၢ အစူၢ်က့ၤနာ်က့ၤတၢ် တဂၤ ဒီးလဲၤသကိးဃုာ်တၢ်ဒီးအီၤ ဒ်တၢ်မၢဖိအဂၤတဖၣ်, ဒ်ကစၢ် အဒီပုၢ်ဝဲၢ်ခွါတဖၣ် ဒီးဒ်စီၤက့ၤဖး မၤဝဲအသိး, တမ့ၢ်ဘၣ်ဧါ. ၆ ဒီးပှၤလၢ အတၢ်ခွဲးတၢ်ယာ် တအိၣ်လၢ ကပာ်ပတုာ်တၢ်မၤလၢ ကလုၢ်အီၣ်သးသမူအဂီၢ်န့ၣ် အိၣ်ထဲယၤဒီး စီၤဘၢ်နါဘၤ ခံဂၤလီၤဧါ. ၇ ပှၤသုးဖိလၢ အကထုးထီၣ် အနီၢ်ကစၢ် အတၢ်လၢာ်ဘူၣ်လၢာ်စ့ၤ ဖဲအကဲသုး အဆၢကတီၢ်န့ၣ် အိၣ်တဂၤဂၤဧါ. ပှၤလၢအဒုးအိၣ်ထီၣ် စပံးအကျီး ဒီးတအီၣ် အတၤသၣ်ဘၣ်န့ၣ် အိၣ်တဂၤဂၤဧါ. ဒီးပှၤလၢအကွၢ်သိန့ၣ် မ့ၢ်အတအီဝဲ သိတဖုန့ၣ် အနုၢ်ထံဘၣ်ဧါ.
၈ မ့ၢ်ယတဲတၢ်သ့ၣ်တဖၣ်အံၤ ဒ်ပှၤဟီၣ်ခိၣ်ဖိ အတၢ်ထံၣ်အသိးဧါ. စီၤမိၤၡ့အတၢ်သိၣ်တၢ်သီ ပာ်ဖျါထီၣ်ဝဲ တၢ်ဂ့ၢ်တဖၣ်အံၤ တမ့ၢ်ဘၣ်ဧါ. ၉ လၢစီၤမိၤၡ့ အတၢ်သိၣ်တၢ်သီအပူၤန့ၣ် တၢ်ကွဲးအသး အိၣ်ဝဲလၢ “ဖဲကျီၢ်ဖါယီၢ်ဘုအခါ နတဘၣ်ဖျီၣ်ဃာ် အကိာ်ပူၤတဂ့ၤ.” မ့ၢ်ကစၢ်ယွၤ ဘၣ်ယိၣ်တၢ်လၢ ကျီၢ်ဖါတဖၣ်အဂီၢ်ဧါ. ၁၀ မ့တမ့ၢ် အဝဲတဲဝဲဒ်န့ၣ် လၢပဂီၢ်ဧါ. နီၢ်ကီၢ်န့ၣ် တၢ်ကွဲးအသးအံၤန့ၣ် မ့ၢ်ဝဲလၢ ပဂီၢ်လီၤ. အဃိ ပှၤလၢအထဲၣ်တၢ်မ့ၢ်ဂ့ၤ, ပှၤလၢအယီၢ်ဘုမ့ၢ်ဂ့ၤ, ဖဲအဖံးတၢ်မၤတၢ်အခါ အဝဲမ့ၢ်မုၢ်လၢ်ဝဲလၢ ကန့ၢ်ဘုန့ၣ် ကြၢးဝဲဘၣ်ဝဲလီၤ.
၁၁ ပမ့ၢ်ဖှံလီၤတၢ်လၢ နီၢ်သးတကပၤ လၢသုကျါ ဒီးပမ့ၢ်ဒိးန့ၢ်ဘၣ် တၢ်မၤစၢၤလၢ နီၢ်ခိတကပၤ လၢသုအိၣ်န့ၣ် မ့ၢ်အကမၣ်ဧါ. ၁၂ ပှၤအဂၤတဖၣ် မ့ၢ်အိၣ်ဒီးတၢ်ခွဲးတၢ်ယာ်လၢ အကန့ၢ်ဘၣ် တၢ်လၢသုအိၣ်န့ၣ် ပဝဲသ့ၣ်တဖၣ်အံၤ ပအိၣ်ဒီးတၢ်ခွဲးတၢ်ယာ် အါန့ၢ်အန့ၣ် တမ့ၢ်ဘၣ်ဧါ. ဘၣ်ဆၣ် ပတသူ ပတၢ်ခွဲးတၢ်ယာ် တခါအံၤဘၣ်. မ့မ့ၢ် ပတူၢ်တၢ်ခဲလၢာ် ဒ်သိးပသုတဒုးအိၣ်ထီၣ် တၢ်တြီမၤတံာ်တာ်လၢ တၢ်သးခုကစီၣ်လၢ အဘၣ်ဃးဒီးခရံာ်န့ၣ် လၢကျဲနီတဘိ တဂ့ၤအဂီၢ်လီၤ. ၁၃ ပှၤလၢအမၤတၢ်လၢ တၢ်လုၢ်ဟံၣ်ပူၤန့ၣ် ဒိးန့ၢ်ဘၣ်တၢ်အီၣ်လၢ တၢ်လုၢ်ဟံၣ်ပူၤ တမ့ၢ်ဘၣ်ဧါ. ဒီးပှၤလၢအမၤတၢ်လၢ တၢ်လုၢ်လီၢ်ထီဘိန့ၣ် ဒိးန့ၢ်ဘၣ်ဝဲ တၢ်လၢပှၤလုၢ်ထီၣ်ဝဲတနီၤ တမ့ၢ်ဘၣ်ဧါ. ၁၄ ဒ်န့ၣ်အသိးစ့ၢ်ကီး ကစၢ်ဟ့ၣ်လီၤအကလုၢ်လၢ ပှၤလၢအစံၣ်တဲၤတဲလီၤ တၢ်သးခုကစီၣ်န့ၣ် ကအီၣ်ဘၣ်အီဘၣ်တၢ်လၢ တၢ်သးခုအကစီၣ်အဃိလီၤ.
၁၅ ဘၣ်ဆၣ် ယတဃ့တၢ်မၤစၢၤ လၢသုအိၣ်နီတမံၤဘၣ်. နီၢ်ကီၢ်န့ၣ် ယကွဲးန့ၢ်သု လၢတၢ်ဂ့ၢ်တဖၣ်အံၤန့ၣ် တမ့ၢ်ဒ်သိး ယကဒိးန့ၢ်ဘၣ် တၢ်မၤစၢၤအဂီၢ်ဘၣ်. ယမ့ၢ်သံန့ၣ် ကဂ့ၤဒိၣ်န့ၢ်ဒံး ပှၤထုးကွံာ် ယတၢ်ခွဲးတၢ်ယာ်လၢ ယကပာ်ကဖၢလၢ ယသးအဂီၢ်လီၤ. ၁၆ ယမ့ၢ်စံၣ်တဲၤတဲလီၤ တၢ်သးခုကစီၣ် သနာ်က့ ယပာ်ကဖၢလၢယသး အလီၢ်တအိၣ်ဘၣ်, မ့ၢ်လၢ ယမူဒါအိၣ်လၢ ယကဘၣ်မၤဒ်န့ၣ် အဃိလီၤ. ယမ့ၢ်တစံၣ်တဲၤတဲလီၤ တၢ်သးခုကစီၣ်ဘၣ်န့ၣ် ယကဘၣ်အဖှီၣ်လီၤ. ၁၇ ယမ့ၢ်မၤအီၤလၢ တၢ်သးအိၣ်အပူၤန့ၣ် ယကန့ၢ်ဘၣ်ခိၣ်ဖးလီၤ. ဒီးယသးမ့ၢ်တအိၣ်ဘၣ် သနာ်က့ မ့ၢ်လၢကစၢ်ယွၤ အးလီၤယၤမူဒါအဃိ ယမၤအီၤဒံးလီၤ. ၁၈ မ့မ့ၢ်ဒ်န့ၣ်န့ၣ် ယခိၣ်ဖး မ့ၢ်တၢ်မနုၤလဲၣ်. ယခိၣ်ဖးမ့ၢ်ဝဲလၢ ယကစံၣ်တဲၤတဲလီၤ တၢ်သးခုကစီၣ် လၢပှၤ တလိၣ်ဟ့ၣ်ယၤအပှ့ၤဘၣ် ဒ်သိး ယသုတသူကမၣ် ယတၢ်ခွဲးတၢ်ယာ်လၢ အဘၣ်ဃးဒီး တၢ်သးခုကစီၣ်တဂ့ၤ အဂီၢ်လီၤ.
၁၉ ယအိၣ်ဒီးတၢ်သဘျ့ ဘၣ်ဆၣ် ယဒုးကဲထီၣ် ယနီၢ်ကစၢ်အသးလၢ ပှၤခဲလၢာ်အကုၢ်ဒ်သိး တသ့ဖဲအသ့ ယကမၤန့ၢ် ပှၤအါဂၤအဂီၢ်လီၤ. ၂၀ လၢပှၤယူဒၤဖိအဂီၢ်န့ၣ် ယကဲထီၣ်ဒ် ပှၤယူဒၤဖိ တဂၤအသိး, ဒ်သိးယကမၤန့ၢ် ပှၤယူဒၤဖိအဂီၢ်လီၤ. ယတအိၣ်လၢ တၢ်သိၣ်တၢ်သီ* အဖီလာ်ဘၣ်. ဘၣ်ဆၣ် လၢပှၤအိၣ်လၢ တၢ်သိၣ်တၢ်သီ အဖီလာ်တဖၣ်အဂီၢ်န့ၣ် ယကဲထီၣ်ဒ်ပှၤအိၣ်လၢ တၢ်သိၣ်တၢ်သီအဖီလာ် တဂၤအသိး, ဒ်သိးယကမၤန့ၢ် ပှၤအိၣ်လၢ တၢ်သိၣ်တၢ်သီ အဖီလာ်တဖၣ်အဂီၢ်လီၤ. ၂၁ ယလူၤပိာ်ထွဲ ကစၢ်ယွၤဒီးခရံာ် အတၢ်သိၣ်တၢ်သီ ဘၣ်ဆၣ် လၢပှၤလၢအတလူၤပိာ်ထွဲ တၢ်သိၣ်တၢ်သီ* အဂီၢ်န့ၣ် ယကဲထီၣ်ဒ်ပှၤလၢ အတလူၤပိာ်ထွဲ တၢ်သိၣ်တၢ်သီတဂၤအသိး, ဒ်သိးယကမၤန့ၢ် ပှၤလၢအတလူၤပိာ်ထွဲ တၢ်သိၣ်တၢ်သီတဖၣ် အဂီၢ်လီၤ. ၂၂ လၢပှၤလၢ အဂံၢ်စၢ်ဘါစၢ်တဖၣ် အဂီၢ်န့ၣ် ယကဲထီၣ်ပှၤလၢ အဂံၢ်စၢ်ဘါစၢ် ဒ်သိးယကန့ၢ်ဘၣ် ပှၤဂံၢ်စၢ်ဘါစၢ်တဖၣ် အဂီၢ်လီၤ. ယကဲထီၣ် တၢ်ခဲလၢာ်လၢ ပှၤအကလုာ်ကလုာ် တဖၣ်အဂီၢ် ဒီးယမၤလၢ အဂ့ၤကတၢၢ်ဒ်သိး ယမၤပူၤဖျဲး အဝဲသ့ၣ်တနီၤ ကန့ၢ်အဂီၢ်လီၤ. ၂၃ ယမၤတၢ်ခဲလၢာ်လၢ တၢ်သးခုကစီၣ်အဂီၢ် ဒ်သိး ယကစံၣ်တဲၤတဲလီၤ ပှၤဂၤအဂီၢ်လီၤ.
၂၄ ပှၤဃ့ၢ်ပြၢတၢ်ကိးဂၤဒဲးန့ၣ် ဃ့ၢ်ဝဲလၢ တၢ်ဃ့ၢ်ပြၢတမံၤဃီအပူၤ ဘၣ်ဆၣ် ပှၤကဒိးန့ၢ်ဘၣ် ခိၣ်ဖးထဲတဂၤန့ၣ် မ့ၢ်သုတသ့ၣ်ညါဘၣ်ဧါ. အဃိ ဃ့ၢ်ဒ်သိး သုကနၢၤအဂီၢ်တက့ၢ်. ၂၅ ပှၤလၢအနုာ်လီၤလၢ တၢ်ပြၢအပူၤကိးဂၤဒဲးန့ၣ် ဘၣ်ပၢၤအသးလၢ တၢ်ခဲလၢာ်အပူၤလီၤ. အဝဲသ့ၣ် မၤဝဲဒ်န့ၣ်န့ၣ် မ့ၢ်ဒ်သိးကဒိးန့ၢ်ဘၣ် ခိၣ်သလုးလၢ အဟးဂီၤသ့န့ၣ်လီၤ. မ့မ့ၢ်ပဝဲဒၣ်န့ၣ် ပမၤဒ်န့ၣ် ဒ်သိးပကဒိးန့ၢ်ဘၣ် ခိၣ်သလုးလၢအဟးဂီၤ တသ့ဘၣ်အဂီၢ်လီၤ. ၂၆ အဃိ ဖဲယဃ့ၢ်တၢ်အခါ ယတဃ့ၢ်ဒ်ပှၤလၢ အတၢ်ပညိၣ် တအိၣ်ဘၣ်အသိးဘၣ်. ဒီးဖဲယထိတၢ်အခါ ယတထိအီၤ ဒ်ပှၤလၢအထိကလံၤအသိးဘၣ်. ၂၇ လၢတၢ်န့ၣ်အလီၢ် ယဒိလီၤတီၢ်လီၤယနီၢ်ခိ* ဒီးဒုးကဲထီၣ်အီၤလၢကုၢ် ဒ်သိး ဖဲယစံၣ်တဲၤတဲလီၤ ပှၤဂၤမ့ၢ်ဝံၤဒီး ယနီၢ်ကစၢ်ဒၣ်ယဲ ယသုတကဲထီၣ်ပှၤလၢ ကစၢ်ယွၤ တဘၣ်သူၣ်ဘၣ်သးအီၤ လၢကျဲတဘိဘိတဂ့ၤ အဂီၢ်လီၤ.