၁ ကရံၣ်သူး

၁၀ ဒီပုၢ်ဝဲၢ်သ့ၣ်ဧၢ, ယအဲၣ်ဒိးလၢ သုကသ့ၣ်ညါလၢ ပမိၢ်ပၢ်ဖံဖု လၢပျၢၤတဖၣ်ခဲလၢာ်န့ၣ် အိၣ်ဝဲလၢ တၢ်အၢၣ်အဖီလာ် ဒီးလဲၤခီဂာ်ဝဲ ပီၣ်လဲၣ် ၂ ဒီးအဝဲသ့ၣ်ခဲလၢာ် ဒိးဘျၢအသးလၢ စီၤမိၤၡ့အပူၤ ခီဖျိတၢ်အၢၣ် ဒီးပီၣ်လဲၣ်န့ၣ်လီၤ. ၃ ဒီးအဝဲသ့ၣ်ခဲလၢာ် အီၣ်ဝဲနီၢ်သးတၢ်အီၣ်တမံၤဃီ ၄ ဒီးအဝဲသ့ၣ် ခဲလၢာ်အီဝဲ နီၢ်သးအထံ တမံၤဃီစ့ၢ်ကီးလီၤ. အဝဲသ့ၣ်အီထံလၢ နီၢ်သးအလၢၢ်တဖျၢၣ်လၢ အပိာ်အဝဲသ့ၣ် အခံန့ၣ်လီၤ. ဒီးလၢၢ်တဖျၢၣ်အံၤန့ၣ် အခီပညီမ့ၢ်ဝဲခရံာ်လီၤ. ၅ ဘၣ်ဆၣ် အဝဲသ့ၣ် အါတက့ၢ်န့ၣ် ကစၢ်ယွၤ တဘၣ်သူၣ် ဘၣ်သးဝဲဘၣ်အဃိ ဘၣ်သံဝဲလၢ ပှၢ်မုၢ်ကနၢအပူၤလီၤ.

၆ တၢ်မၤအသးသ့ၣ်တဖၣ်အံၤ ကဲထီၣ်တၢ်အဒိလၢ အဟ့ၣ်ပလီၢ်ပှၤ ဒ်သိး ပသုတသးကွံတၢ်အၢ ဒ်အဝဲသ့ၣ် သးကွံဝဲအသိး တဂ့ၤအဂီၢ်လီၤ. ၇ တၢ်ကွဲးအသးအိၣ်ဝဲလၢ “ပှၤသ့ၣ်တဖၣ်န့ၣ် ဆ့ၣ်နီၤအီၣ်တၢ်အီတၢ် ဒီးဂဲၤဆၢထၢၣ် မၤသူၣ်ဖှံသးညီအသးလီၤ.” အဃိ မ်ပသုတကဲထီၣ်ပှၤလၢ အဘါတၢ်ဂီၤတၢ်ဖှီၣ် ဒ်အဝဲသ့ၣ်တနီၤ မၤဝဲအသိးန့ၣ်တဂ့ၤ. ၈ ဒီးမ်ပသုတမၤ ကမၣ်မုၣ်ကမၣ်ခွါတဂ့ၤ. အဝဲသ့ၣ်တနီၤ မၤကမၣ်မုၣ်ကမၣ်ခွါအဃိ* လၢတနံၤဃီအတီၢ်ပူၤန့ၣ် အဝဲသ့ၣ်သံဝဲအဂၤ ၂၃,၀၀၀ ညါလီၤ. ၉ ဒီးမ်ပသုတမၤကွၢ် ယဟိဝၤယွၤတဂ့ၤ. အဝဲသ့ၣ်တနီၤန့ၣ် မၤကွၢ်အီၤအဃိ ဂုၢ်တဖၣ်အ့ၣ်သံ အဝဲသ့ၣ်လီၤ. ၁၀ တဘၣ်ကဲထီၣ်ပှၤလၢ အကဒူးကဒ့ၣ်တၢ်တဂ့ၤ. အဝဲသ့ၣ်တနီၤ ကဒူးကဒ့ၣ်တၢ်အဃိ ပှၤလၢ အမၤဟးဂီၤတၢ်တဂၤ* မၤသံကွံာ်အဝဲသ့ၣ်လီၤ. ၁၁ တၢ်လၢအမၤအသးဒီး အဝဲသ့ၣ်တဖၣ်န့ၣ် ကဲထီၣ်တၢ်အဒိ ဒီးတၢ်ဂ့ၢ်သ့ၣ်တဖၣ်အံၤ ဘၣ်တၢ် ကွဲးနီၣ်ကွဲးဃါအီၤဒ်သိး ကကဲထီၣ် တၢ်ဟ့ၣ်ပလီၢ်လၢ ပဝဲလၢအအိၣ်မူလၢ တၢ်အစိၤကတၢၢ်အဂီၢ်လီၤ.

၁၂ အဃိ ပှၤလၢ အဆိကမိၣ်လီၤအသးလၢ အအိၣ်ဆၢထၢၣ် ကျၢၤကျၢၤလံန့ၣ် မ်အပလီၢ်အသး ဒ်သိးအသု တလီၤဃံၢ်တဂ့ၤ အဂီၢ်တက့ၢ်. ၁၃ တၢ်မၤကွၢ်* လၢအဟဲဘၣ်သုန့ၣ် မ့ၢ်တၢ်မၤကွၢ်တဖၣ်လၢ အဟဲဘၣ်ပှၤကိးဂၤဒဲးစ့ၢ်ကီးလီၤ. ဘၣ်ဆၣ် ကစၢ်ယွၤန့ၣ် မ့ၢ်ပှၤလၢအကလုၢ်တီ ဒီးအဝဲတဟ့ၣ်အခွဲးလၢ သုကဘၣ်တၢ်မၤကွၢ်သု တုၤလၢ သုတူၢ်တကဲလၢၤဘၣ်န့ၣ်ဘၣ်. မ့မ့ၢ် ဖဲသုဘၣ်တၢ်မၤကွၢ်အခါ အဝဲကအိးဟိထီၣ်ကျဲ ဒ်သိးသုတူၢ်တၢ်ခီၣ်တၢ် ကကဲအဂီၢ်လီၤ.

၁၄ အဃိ ယပှၤသးဘိသ့ၣ်ဧၢ, ဟးဆှဲး* တၢ်ဘါတၢ်ဂီၤတၢ်ဖှီၣ်တက့ၢ်. ၁၅ သုဝဲသ့ၣ်အံၤ သုမ့ၢ်ပှၤလၢ အပဲာ်ထံနီၤဖးတၢ်သ့အဃိ တၢ်လၢယတဲသ့ၣ်တဖၣ် ဘၣ်ဧါ တဘၣ်ဧါန့ၣ် ဆၢတဲာ်တၢ် လၢသုနီၢ်ကစၢ်တက့ၢ်. ၁၆ တၢ်ဆိၣ်ဂ့ၤအခွးလၢ ပဆိၣ်ဂ့ၤအီၤန့ၣ် အခီပညီမ့ၢ်ဝဲ တၢ်အဘျုးလၢ ပန့ၢ်ဃုာ်အီၤ ခီဖျိလၢ ခရံာ်အသွံၣ်အဃိ တမ့ၢ်ဘၣ်ဧါ. ကိၣ်လၢ ပဘိးကၢ်အီၤန့ၣ် အခီပညီမ့ၢ်ဝဲ တၢ်အဘျုးလၢ ပန့ၢ်ဃုာ်အီၤ ခီဖျိလၢ ခရံာ်အနီၢ်ခိအဃိ တမ့ၢ်ဘၣ်ဧါ. ၁၇ ကိၣ်အိၣ်ဝဲတလိၣ်လီၤ. ပမ့မ့ၢ်ပှၤအါဂၤ သနာ်က့ မ့ၢ်လၢပအီၣ် ကိၣ်တလိၣ်ဃီအဃိ ပမ့ၢ်နီၢ်ခိတဂၤဃီလီၤ.

၁၈ ဆိကမိၣ်ထံ ပှၤအံၣ်စရ့လးဖိအဂ့ၢ်တက့ၢ်. ခီဖျိလၢ အဝဲသ့ၣ်အီၣ်တၢ်လုၢ်တၢ်ပာ်လၢ ဘၣ်တၢ်လုၢ်ထီၣ်အီၤလၢ တၢ်လုၢ်လီၢ်အဖီခိၣ်အဃိ လီၤဂာ်လၢ အဝဲသ့ၣ် အီၣ်ဃုာ်တၢ်ဒီး ကစၢ်ယွၤ, တမ့ၢ်ဘၣ်ဧါ. ၁၉ ခီဖျိလၢ ယတဲဒ်န့ၣ်အဃိ မ့ၢ်ယအဲၣ်ဒိးတဲလၢ တၢ်ဂီၤတၢ်ဖှီၣ်ဒီး တၢ်လုၢ်လၢပှၤလုၢ်ထီၣ်အီၤလၢ တၢ်ဂီၤတၢ်ဖှီၣ် အမဲာ်ညါန့ၣ် မ့ၢ်တၢ်လၢအရ့ဒိၣ်ဧါ. ၂၀ တမ့ၢ်ဘၣ်. ဘၣ်ဆၣ် ယအဲၣ်ဒိးတဲလၢ တၢ်လၢပှၤကလုာ်တဖၣ် လုၢ်ထီၣ်တၢ်န့ၣ် အဝဲသ့ၣ် တလုၢ်ထီၣ်တၢ်လၢ ကစၢ်ယွၤအအိၣ်ဘၣ်. အဝဲသ့ၣ်လုၢ်ထီၣ်တၢ်လၢ တၢ်ဝံတၢ်နါတဖၣ် အအိၣ်လီၤ. ဒီးယတအဲၣ်ဒိးလၢ သုကမၤဃုာ် တၢ်ဝံတၢ်နါ နီတစဲးဘၣ်. ၂၁ သုမ့ၢ်အီ ယဟိဝၤယွၤအခွးန့ၣ် သုအီ တၢ်ဝံတၢ်နါအခွးတသ့ဘၣ် ဒီးသုမ့ၢ်အီၣ်တၢ်လၢ “ယဟိဝၤယွၤ အစီၢ်နီၤခိၣ်” န့ၣ် သုအီၣ်တၢ်လၢ တၢ်ဝံတၢ်နါတဖၣ် အစီၢ်နီၤခိၣ် တသ့ဘၣ်. ၂၂ မ့တမ့ၢ်ဘၣ်န့ၣ် ‘မ့ၢ်ပထိၣ်ဟူးထိၣ်ဂဲၤထီၣ် ယဟိဝၤယွၤ အတၢ်သူၣ်က့ၣ်သးကါဧါ.’* မ့ၢ်ပဂံၢ်ပဘါ ဆူၣ်န့ၢ်ဒံးအီၤဧါ.

၂၃ တၢ်ဟ့ၣ်ပှၤအခွဲးလၢ ပကမၤတၢ်ခဲလၢာ်အဂီၢ်, ဘၣ်ဆၣ် တၢ်ခဲလၢာ်တမ့ၢ်တၢ်လၢ အကဲဘျုးဘၣ်. တၢ်ဟ့ၣ်ပှၤအခွဲးလၢ ပကမၤတၢ်ခဲလၢာ်အဂီၢ်, ဘၣ်ဆၣ် တၢ်ခဲလၢာ်တကဲထီၣ် တၢ်ဟ့ၣ်ဂံၢ်ဟ့ၣ်ဘါဘၣ်. ၂၄ မ်ပသုတကွၢ်တၢ်လၢ ပနီၢ်ကစၢ်အဂီၢ်တဂ့ၤ. မ့မ့ၢ် ကွၢ်တၢ်လၢ ပှၤဂၤအဂီၢ်တက့ၢ်.

၂၅ အီၣ်တၢ်ဖံးတၢ်ညၣ်ခဲလၢာ် လၢပှၤဆါအီၤလၢ တၢ်ဆါတၢ်ပှ့ၤအလီၢ် န့ၣ်တက့ၢ်. ဒီးတဘၣ်သံကွၢ်တၢ် ခီဖျိလၢ နသးလၢ အသ့ၣ်ညါဒၣ်တၢ် အဃိန့ၣ်တဂ့ၤ. ၂၆ “ဟီၣ်ခိၣ် ဒီးတၢ်ခဲလၢာ်လၢ အအိၣ်လၢအပူၤန့ၣ် မ့ၢ်ယဟိဝၤယွၤ အတၢ်လီၤ.” ၂၇ ပှၤလၢ အတစူၢ်တနာ်တၢ်တဂၤ မ့ၢ်ကွဲ ဒုးအီၣ်နၤတၢ်ဒီး နမ့ၢ်အဲၣ်ဒိးလဲၤန့ၣ် အီၣ်တၢ်လၢ အဝဲပာ်လီၤန့ၢ်နၤ တမံၤဂ့ၤတမံၤဂ့ၤတက့ၢ်. ဒီးတဘၣ်သံကွၢ်တၢ် လၢနသးလၢ အသ့ၣ်ညါဒၣ်တၢ် အဃိတဂ့ၤ. ၂၈ ဘၣ်ဆၣ် ပှၤတဂၤမ့ၢ်တဲနၤလၢ “တၢ်တခါအံၤ ပှၤလုၢ်ထီၣ်အီၤလၢ တၢ်ဂီၤတၢ်ဖှီၣ်အအိၣ်” န့ၣ် မ့ၢ်လၢသးလၢ အသ့ၣ်ညါဒၣ်တၢ် ဒီးခီဖျိလၢ ပှၤတဂၤန့ၣ် တဲနၤဒ်အံၤအဃိ တဘၣ်အီၣ်အီၤတဂ့ၤ. ၂၉ ယတတဲဘၣ်ဃးဒီး သုနီၢ်ကစၢ်အသးလၢ အသ့ၣ်ညါဒၣ်တၢ်ဘၣ်. မ့မ့ၢ် ယတဲဘၣ်ဃးဒီး ပှၤတဂၤန့ၣ် အသးလၢအသ့ၣ်ညါဒၣ်တၢ်လီၤ. ယအိၣ်ဒီးတၢ်သဘျ့လၢ ယကမၤတၢ်လၢ ယအဲၣ်ဒိးမၤ ဘၣ်ဆၣ် ဒ်သိးပှၤအဂၤအသး လၢအသ့ၣ်ညါဒၣ်တၢ် သုတစံၣ်ညီၣ်ယၤတဂ့ၤအဂီၢ် ယတသူ ယတၢ်သဘျ့အံၤဘၣ်. ၃၀ ယစံးဘျုး ကစၢ်ယွၤလၢ တၢ်အီၣ်အံၤအဂီၢ် ဘၣ်ဆၣ် ပှၤအဂၤတဖၣ် မ့ၢ်ဒုၣ်ဒွဲၣ်စံးအၢယၤလၢ ယအီၣ်တၢ်အီၣ်အံၤအဃိန့ၣ် မ့ၢ်ယကြၢးအီၣ်အီၤဧါ.

၃၁ လၢတၢ်န့ၣ်အဃိ သုအီၣ်တၢ်မ့ၢ်ဂ့ၤ, သုအီတၢ်မ့ၢ်ဂ့ၤ, သုမၤတၢ်လၢအဂၤ တမံၤမံၤမ့ၢ်ဂ့ၤ, မၤတၢ်ခဲလၢာ် လၢကစၢ်ယွၤ အလၤကပီၤ အဂီၢ်တက့ၢ်. ၃၂ တဘၣ်ကဲထီၣ် တၢ်လီၤဃံၢ်အလီၢ်လၢ ပှၤယူဒၤဖိ, ပှၤကြံးဖိ ဒီးကစၢ်ယွၤ အတၢ်အိၣ်ဖှိၣ်အဂီၢ်တဂ့ၤ. ၃၃ ယတကွၢ်တၢ်ထဲလၢ ယနီၢ်ကစၢ်အဂီၢ်ဘၣ်, မ့ၢ်ဝဲလၢ ပှၤဂၤအဂီၢ်လီၤ. ဒီးလၢတၢ်ခဲလၢာ်အပူၤ ယဂုာ်ကျဲးစၢးမၤတၢ်လၢ အဘၣ်ပှၤခဲလၢာ်အသး ဒ်သိးအဝဲသ့ၣ် ကတုၤလၢ တၢ်အုၣ်က့ၤခီၣ်က့ၤအဂီၢ်လီၤ.