၁ တံၤမသ့း
၃ တၢ်ကတိၤတထံၣ်အံၤ မ့ၢ်တၢ်လၢ ပှၤနာ်န့ၢ်အီၤသ့လီၤ. ပိာ်ခွါတဂၤဂၤ မ့ၢ်ဂုာ်ကျဲးစၢး ဒ်သိးကကဲထီၣ် ပှၤကွၢ်ထွဲတၢ်တဂၤန့ၣ် မ့ၢ်အလီကီ တၢ်မၤလၢအဂ့ၤတမံၤလီၤ. ၂ အဃိ ပှၤကွၢ်ထွဲတၢ်တဂၤန့ၣ် ကြၢးမ့ၢ်ပှၤလၢ တၢ်ပာ်ဒ့ၣ်ပာ်ကမၣ်အီၤ အလီၢ်တအိၣ်ဘၣ်, ဝၤလၢ အမါအိၣ်ထဲတဂၤ, ပှၤလၢ အပၢၤအတၢ်အိၣ်မူ ကိးသနၢၣ်ဒဲး, ပှၤလၢ အဆိကမိၣ်ထံတၢ် သ့ဂ့ၤဂ့ၤ, ပှၤလၢအရဲၣ်လီၤကျဲၤလီၤတၢ် သ့ဂ့ၤဂ့ၤ, ပှၤလၢအသးအိၣ်တူၢ်လိာ် ပှၤတမှံၤ, ပှၤလၢအတုၤထီၣ်ထီၣ်ဘးလၢ ကသိၣ်လိတၢ်အဂီၢ်, ၃ တမ့ၢ်ပှၤလၢ အအီမူၤသံးဘၣ်, တမ့ၢ်ပှၤလၢ အမၤဆူၣ်မၤစိးတၢ်ဘၣ်, တမ့ၢ်ပှၤလၢ အခိၣ်ကိၤဘၣ်, တမ့ၢ်ပှၤလၢ အအဲၣ်ဒိးဒုးအိၣ်ထီၣ် တၢ်အ့ၣ်လိာ်ဆိးက့ဘၣ်, တမ့ၢ်ပှၤလၢ အအဲၣ်စ့ဘၣ်. ၄ ကဘၣ်မ့ၢ်ပှၤလၢ အတီခိၣ်ရိၤမဲတၢ်လၢ အနီၢ်ကစၢ် အဟံၣ်ဖိဃီဖိ အဖီခိၣ်ဂ့ၤဂ့ၤဘၣ်ဘၣ် ဒီးအဖိတဖၣ် ကဘၣ်မ့ၢ်ပှၤလၢ အအိၣ်ဒီးတၢ်ဒိကနၣ် ဒီးတၢ်ယူးယီၣ်ပာ်ကဲလီၤ. ၅ (ပှၤလၢအတီခိၣ်ရိၤမဲ အနီၢ်ကစၢ် အဟံၣ်ဖိဃီဖိ မ့ၢ်တဘၣ်ဘၣ်န့ၣ် အဝဲကွၢ်ထွဲကစၢ်ယွၤ အတၢ်အိၣ်ဖှိၣ် ကသ့ဒ်လဲၣ်.) ၆ ဒီးဒ်သိးအသု တပာ်ထီၣ်ထီအသး ဒီးဒိးန့ၢ်ဘၣ် တၢ်စံၣ်ညီၣ်တမံၤဃီလၢ မုၣ်ကီၤလံၢ် ဒိးန့ၢ်ဘၣ်ဝဲတဂ့ၤအဂီၢ် အတဘၣ်မ့ၢ် ပှၤလၢ အကဲထီၣ် ပှၤစူၢ်က့ၤနာ်က့ၤတၢ် သီသီတဂၤဘၣ်. ၇ တကးဒံးဘၣ် ဒ်သိး အသုတဘၣ် တၢ်ဒုၣ်ဒွဲၣ်အီၤ ဒီးအသုတလီၤလၢ မုၣ်ကီၤလံၢ် အပျံၤသကွီၤအပူၤတဂ့ၤအဂီၢ် အဝဲကဘၣ်အိၣ်ဒီး မံၤဂ့ၤသၣ်ဂ့ၤလၢ ပှၤတၢ်ချၢတဖၣ် အမဲာ်ညါစ့ၢ်ကီးလီၤ.
၈ ဒ်န့ၣ်အသိး တၢ်အိၣ်ဖှိၣ်အပှၤမၤစၢၤတၢ်တဖၣ်န့ၣ် ကြၢးမ့ၢ်ပှၤလၢ အလီၤပာ်ကဲ, တမ့ၢ်ပှၤလၢ အပျ့ၤအိၣ်ခံဘ့ၣ်ဘၣ်, တမ့ၢ်ပှၤလၢ အအီစပံးထံအါအါဘၣ်, တမ့ၢ်ပှၤလၢ အသးကွံတၢ်လၢ ကမၤန့ၢ်တၢ်လၢ အနီၢ်ကစၢ်အဂီၢ်ဘၣ်. ၉ ဒီးကဘၣ်ဟံးဃာ် တၢ်ခူသူၣ်စီဆှံ လၢအဘၣ်ဃးဒီး တၢ်စူၢ်တၢ်နာ်,* ဒီးအိၣ်ဒီး သးလၢအသ့ၣ်ညါဒၣ်တၢ် လၢအကဆှီလီၤ.
၁၀ တကးဒံးဘၣ် ပှၤတဖၣ်အံၤ မ်အဘၣ်တၢ်မၤကွၢ်ဆိအီၤ ဒ်သိးကသ့ၣ်ညါလၢ မ့ၢ်အဝဲသ့ၣ် တုၤထီၣ်ထီၣ်ဘးလံဧါ န့ၣ်တက့ၢ်. ဒီးတၢ်ပာ်ဒ့ၣ်ပာ်ကမၣ် အဝဲသ့ၣ် အလီၢ်မ့ၢ်တအိၣ်ဘၣ်န့ၣ် မ်အဝဲသ့ၣ်ကဲထီၣ် ပှၤမၤစၢၤတၢ်တဖၣ်တက့ၢ်.
၁၁ ပိာ်မုၣ်စ့ၢ်ကီး ကြၢးမ့ၢ်ပှၤလၢ အလီၤပာ်ကဲ, တဘၣ်တဲဟးဂီၤပှၤဂ့ၢ်ဘၣ်, ပှၤလၢ အပၢၤအတၢ်အိၣ်မူ ကိးသနၢၣ်ဒဲး ဒီးပှၤလၢ အသးတီလၢ တၢ်ကိးမံၤဒဲးအပူၤလီၤ.
၁၂ တၢ်အိၣ်ဖှိၣ် အပှၤမၤစၢၤတၢ်တဖၣ်န့ၣ် ကြၢးမ့ၢ်ဝၤလၢ အမါအိၣ်ထဲတဂၤ, ပှၤလၢ အတီခိၣ်ရိၤမဲတၢ်လၢ အဖိတဖၣ် ဒီးအနီၢ်ကစၢ် အဟံၣ်ဖိဃီဖိအဖီခိၣ် ဂ့ၤဂ့ၤဘၣ်ဘၣ်န့ၣ်လီၤ. ၁၃ ပိာ်ခွါလၢအမၤစၢၤတၢ် ဂ့ၤဂ့ၤဘၣ်ဘၣ်န့ၣ် ကဒိးန့ၢ်ဘၣ်မံၤဂ့ၤသၣ်ဂ့ၤ ဒီးဘၣ်ဃးဒီး တၢ်စူၢ်တၢ်နာ်လၢ အဘၣ်ထွဲဒီး ယ့ၣ်ၡူးခရံာ်န့ၣ် အဝဲသ့ၣ် တဲဝဲဒူဒူ ဘူၣ်ဝဲလီၤ.
၁၄ ယမုၢ်လၢ်လၢ တယံာ်လၢၤဘၣ်န့ၣ် ယကလဲၤလၢနအိၣ်လီၤ. ဘၣ်ဆၣ် ယကွဲးန့ၢ်နၤလၢ တၢ်တဖၣ်အံၤ ၁၅ ဒ်သိး ယလဲၤမ့ၢ်တတုၤ လၢအဆိအချ့ဘၣ် သနာ်က့ နကသ့ၣ်ညါလၢ နကြၢးအိၣ်မူဒ် ကစၢ်ယွၤ အဒူၣ်ဖိထၢဖိတဂၤ ဒ်လဲၣ်အဂ့ၢ်န့ၣ်လီၤ. ကစၢ်ယွၤ အဒူၣ်ဖိထၢဖိအံၤ မ့ၢ်ဝဲ ကစၢ်ယွၤလၢအမူဝဲတဂၤ အတၢ်အိၣ်ဖှိၣ် လၢအမ့ၢ် တၢ်မ့ၢ်တၢ်တီ အထူၣ်ဒီးအဂံၢ်ခီၣ်ထံးလီၤ. ၁၆ တၢ်ခူသူၣ်စီဆှံလၢ အဘၣ်ဃးဒီး တၢ်သးတီဒီးကစၢ်ယွၤန့ၣ် မ့ၢ်ဝဲတၢ်ဂ့ၢ်လၢ အရ့ဒိၣ်တခါလီၤ. တၢ်ခူသူၣ်အံၤ မ့ၢ်ဝဲ ‘ယ့ၣ်ၡူးန့ၣ် ကဲထီၣ်ပှၤဟီၣ်ခိၣ်ဖိတဂၤ, ဒီးဖဲအဝဲ ကဲထီၣ်က့ၤ ပှၤနီၢ်သးဖိအခါ အဝဲ ဘၣ်တၢ်ပာ်တီပာ်လိၤအီၤ ဒီးအဝဲ လီၣ်ဖျါထီၣ်အသးလၢ မူခိၣ်ကလူးတဖၣ် အမဲာ်ညါ, ပှၤစံၣ်တဲၤတဲလီၤအဂ့ၢ်လၢ ပှၤကလုာ်တဖၣ်အကျါ, ပှၤအိၣ်လၢ ဟီၣ်ခိၣ်ချၢနာ်အီၤ ဒီးတၢ်ဟံးထီၣ်က့ၤအီၤလၢ မူခိၣ် လၢတၢ်လၤကပီၤအပူၤလီၤ.’