၂ တံၤမသ့း

၃ ဘၣ်ဆၣ် သ့ၣ်ညါတၢ်ဂ့ၢ် အဝဲအံၤတက့ၢ်. လၢမုၢ်နံၤခံကတၢၢ်တဖၣ်အပူၤန့ၣ် တၢ်ဆၢကတီၢ်လီၤဆီလၢ အကီအခဲသပှၢ်ကတၢၢ်န့ၣ် ကဘၣ်ဝဲ ၂ မ့ၢ်လၢ ပှၤဟီၣ်ခိၣ်ဖိ ကအဲၣ်လီၤထဲအသး, ကအဲၣ်ကျိၣ်အဲၣ်စ့, ကပတြၢၤလီၤအသး, ကပာ်ထီၣ်ထီအသး, ကကတိၤထီဒါ ယွၤဒီးပှၤဂၤ, တဒိကနၣ်အမိၢ်အပၢ် အကလုၢ်ဘၣ်, တသ့ၣ်ညါ တၢ်စံးဘျုးစံးဖှိၣ်ဘၣ်, တတီဘၣ်, ၃ တအဲၣ်ပှၤကညီဘၣ်, ကမ့ၢ်ပှၤလၢအခိၣ်ကိၤ, ကတဲဟးဂီၤပှၤဂ့ၢ်, တအိၣ်ဒီး တၢ်ပၢၤသူၣ်ပၢၤသးဘၣ်, ကမ့ၢ်ပှၤလၢ အစုဆူၣ်ခီၣ်တကး, တအဲၣ်တၢ်လၢအဂ့ၤဘၣ်, ၄ ကမ့ၢ်ပှၤလၢ အဟ့ၣ်လီၤကွံာ်ပှၤဂၤ, ပှၤလၢအမၤဖဲအသး, ပှၤလၢ အပာ်ကဖၢလၢအသး ဒီးလၢကအဲၣ် ကစၢ်ယွၤအလီၢ် ကအဲၣ်ဝဲ တၢ်မုာ်တၢ်ပၠီၣ်လီၤ. ၅ ဒီးဖျါလၢအဝဲသ့ၣ် အဲၣ်ထူအဲၣ်ယွၤ ဘၣ်ဆၣ် တတူၢ်လိာ် အစိအကမီၤလၢ အတၢ်အိၣ်မူအပူၤဘၣ်. အဃိ ဟးဆှဲးပှၤဒ်န့ၣ်တဖၣ်တက့ၢ်. ၆ လၢအဝဲသ့ၣ်အကျါန့ၣ် ပိာ်ခွါလၢ အလီန့ၢ်တၢ်တဖၣ် ကဟဲပၢၢ်ထီၣ်ဝဲလီၤ. ဒီးလၢတၢ်ကူၣ်သ့အပူၤန့ၣ် အဝဲသ့ၣ် ကလဲၤနုာ်လီၤလၢ ပိာ်မုၣ်လၢ အဂံၢ်စၢ်ဘါစၢ် လၢအအိၣ်ဒီး တၢ်ဒဲးဘးအါတဖၣ်အဟံၣ်ပူၤဒီး ကွဲန့ၢ်လွဲန့ၢ်ဝဲ ပိာ်မုၣ်တဖၣ်အံၤလီၤ. ပိာ်မုၣ်တဖၣ်အံၤ ပိာ်ထွဲဝဲ တၢ်သူၣ်လီသးကွံ အကလုာ်ကလုာ်အခံ ၇ ဒီးအဝဲသ့ၣ်န့ၣ် မၤလိတၢ်ထီဘိ ဘၣ်ဆၣ် တသ့ၣ်ညါထီၣ် တၢ်မ့ၢ်တၢ်တီ လီၤတံၢ်လီၤဆဲးဘၣ်.

၈ ဒ်စီၤယၣ်နံၤ ဒီးစီၤယၣ်ဘြံၤ ထီဒါစီၤမိၤၡ့အသိးန့ၣ် ပှၤတဖၣ်အံၤ ဆဲးထီဒါတၢ်မ့ၢ်တၢ်တီ ဒ်န့ၣ်အသိးစ့ၢ်ကီးလီၤ. ပှၤဒ်အံၤတဖၣ် အတၢ်ဆိကမိၣ်န့ၣ် ဘၣ်အၢဘၣ်သီ လၢာ်လၢာ်ဆ့ဆ့ ဒီးယွၤတဘၣ်သူၣ်ဘၣ်သး အဝဲသ့ၣ်လၢ ခရံာ်ဖိတၢ်စူၢ်တၢ်နာ်အပူၤဘၣ်. ၉ ဒ်လဲၣ်ဂ့ၤဒ်လဲၣ်ဂ့ၤ ဒ်တၢ်ကဲထီၣ်အသးဒီး စီၤယၣ်နံၤ ဒီးစီၤယၣ်ဘြံၤအသိး ပှၤတဖၣ်အံၤစ့ၢ်ကီး အတၢ်မၤနါစိၤ ကအိၣ်ဖျါလၢ ပှၤခဲလၢာ်အမဲာ်ညါပျီပျီ အဃိ အဝဲသ့ၣ်အတၢ်န့ၣ် တကဲထီၣ်လိၣ်ထီၣ်လၢၤဘၣ်. ၁၀ ဘၣ်ဆၣ် မ့မ့ၢ်နၤန့ၣ် နမၤထွဲ ယတၢ်သိၣ်လိတဖၣ်ဂ့ၤဂ့ၤ ဒီးနကွၢ်လိမၤဒိး ယတၢ်အိၣ်မူ, ယတၢ်တိာ်ပာ်, ယတၢ်စူၢ်တၢ်နာ်, ယတၢ်ဝံသးစူၤ, ယတၢ်အဲၣ် ဒီးယတၢ်တူၢ်န့ၢ်ခီၣ်ကဲတဖၣ်လီၤ. ၁၁ တၢ်မၤအၢမၤနး ဒီးတၢ်နးတၢ်ဖှီၣ်လၢ ယတူၢ်ဘၣ်အီၤလၢ ဝ့ၢ်အၣ်တံၤအီာ်, ဝ့ၢ်အံၤကနံၤ ဒီးလၢဝ့ၢ်လူစတြၤအပူၤန့ၣ် နသ့ၣ်ညါလီၤ. ယလဲၤခီဖျိ တၢ်မၤအၢမၤနးတဖၣ်အံၤ န့ၢ်ဝဲ ဒီးကစၢ်မၤပူၤဖျဲးယၤလၢ တၢ်သ့ၣ်တဖၣ်အံၤ ခဲလၢာ်အပူၤလီၤ. ၁၂ နီၢ်ကီၢ်န့ၣ် ပှၤလၢအအဲၣ်ဒိး တီဒီးကစၢ်ယွၤ ဒ်ယ့ၣ်ၡူးခရံာ်အပျဲၢ်အသိးန့ၣ် ကဘၣ်တၢ်မၤနးမၤဖှီၣ်စ့ၢ်ကီး အဝဲသ့ၣ်ကိးဂၤဒဲးလီၤ. ၁၃ ဘၣ်ဆၣ် ပှၤအၢပှၤသီ ဒီးပှၤပာ်မၤအသးတဖၣ်န့ၣ် ကဒံးယံာ်ဒံးအၢထီၣ်ဝဲလီၤ. အဝဲသ့ၣ် ကဆှၢကမၣ်ပှၤဂၤ ဒီးပှၤဂၤကဆှၢကမၣ် အဝဲသ့ၣ်လီၤ.

၁၄ မ့မ့ၢ်နၤန့ၣ် တၢ်လၢပှၤသိၣ်လိနၤ ဒီးဒုးနာ်န့ၢ်နၤတဖၣ်န့ၣ် ဆဲးမၤထွဲအီၤတက့ၢ်, မ့ၢ်လၢ ပှၤလၢအသိၣ်လိနၤ တၢ်ဂ့ၢ်တဖၣ်အံၤ မ့ၢ်ပှၤဒ်လဲၣ်န့ၣ် နသ့ၣ်ညါလီၤ. ၁၅ ဒီးစးထီၣ်လၢ နမ့ၢ်ဖိသၣ်အီနုၢ်လံၤလံၤန့ၣ် နသ့ၣ်ညါ တၢ်ကွဲးအသး စီဆှံတဖၣ်လီၤ. တၢ်သ့ၣ်တဖၣ်အံၤ ကဒုးကူၣ်သ့ကူၣ်ဘၣ်နၤ ဒ်သိးနကန့ၢ်ဘၣ် တၢ်အုၣ်က့ၤခီၣ်က့ၤ ခီဖျိလၢ တၢ်နာ်ယ့ၣ်ၡူးခရံာ်အဃိန့ၣ်လီၤ. ၁၆ တၢ်ကွဲးအသးခဲလၢာ်န့ၣ် ဘၣ်တၢ်ကွဲးအီၤ ခီဖျိလၢ ကစၢ်ယွၤအသးစီဆှံ အတၢ်ဟံးစုနဲၣ်ကျဲဒီး ကဲဘျုးလၢ တၢ်သိၣ်လိနဲၣ်လိတၢ်အဂီၢ်, လၢတၢ်သိၣ်ဃီၣ်တၢ်အဂီၢ်, လၢဃၣ်လိၤတၢ်အဂီၢ် ဒီးလၢသိၣ်က့ၤသီက့ၤတၢ်လၢ တၢ်တီတၢ်လိၤအပူၤအဂီၢ်, ၁၇ ဒ်သိး ကစၢ်ယွၤ အခ့အပှၤတဂၤ ကတုၤထီၣ်ထီၣ်ဘး လၢလၢပှဲၤပှဲၤ ဒီးကအိၣ်ကတဲာ်ကတီၤအသး လၢလၢပှဲၤပှဲၤ လၢတၢ်မၤလၢအဂ့ၤ ကိးမံၤဒဲးအဂီၢ်လီၤ.