၂ တံၤမသ့း

၄ ဖဲယ့ၣ်ၡူးခရံာ် ပာ်ဖျါထီၣ်အသးအခါ ဒီးဖဲအအိၣ်ဘၣ်လၢ အဘီမုၢ်အပူၤအခါ အဝဲကစံၣ်ညီၣ်ပှၤမူ ဒီးပှၤသံတဖၣ်လီၤ. ယမၤလိာ်နၤလၢ အဝဲဒီးကစၢ်ယွၤအမဲာ်ညါ သပှၢ်ကတၢၢ်လၢ ၂ စံၣ်တဲၤတဲလီၤ ယွၤအကလုၢ်ကထါတက့ၢ်. ဖဲတၢ်ဆၢကတီၢ်ကီမ့ၢ်ဂ့ၤ, ညီမ့ၢ်ဂ့ၤ, မၤအီၤလၢ တၢ်သးဆူၣ်အပူၤတက့ၢ်. သိၣ်ဃီၣ်တၢ်, သိၣ်က့ၤသီက့ၤတၢ် ဒီးဟ့ၣ်သဆၣ်ထီၣ်တၢ် ဃုာ်ဒီး တၢ်ဝံသးစူၤလၢအအါ ဒီးတၢ်သိၣ်လိအကျိၤအကျဲ အကလုာ်ကလုာ်တက့ၢ်. ၃ တၢ်ဆၢကတီၢ်ကဟဲဝဲ ဖဲအဝဲသ့ၣ်ဒိကနၣ် တၢ်သိၣ်လိလၢအဂ့ၤအဘၣ် တကဲလၢၤဘၣ် ဒီးဒ်အဝဲသ့ၣ် အတၢ်သူၣ်လီသးကွံ အိၣ်ဝဲအသိးန့ၣ် ကပာ်ဖှိၣ်ထီၣ် သရၣ်တဖၣ်လၢ အဝဲသ့ၣ် အနီၢ်ကစၢ်အဂီၢ် လၢအကတဲတၢ်လၢ အဘၣ်အဝဲသ့ၣ် အနၢ်န့ၣ်လီၤ. ၄ အဝဲသ့ၣ် ကဃၣ်ကွံာ်အသး ဒီးတဒိကနၣ် တၢ်မ့ၢ်တၢ်တီလၢၤဘၣ်. မ့မ့ၢ် ကဒိကနၣ်ဝဲ ပူလၢအကမၣ်တဖၣ်လီၤ. ၅ မ့မ့ၢ်နၤန့ၣ် အိၣ်ဆၢပံၢ်ကလာ်လၢ တၢ်အိၣ်သး ခဲလၢာ်အပူၤတက့ၢ်. တူၢ်တၢ်ကီတၢ်ခဲ, မၤပှၤစံၣ်တဲၤတဲလီၤ တၢ်သးခုကစီၣ်ဖိ အတၢ်မၤဒီး မၤလၢပှဲၤ နတၢ်စံၣ်တဲၤတဲလီၤတၢ်မၤ လၢကျဲကိးဘိဒဲးတက့ၢ်.

၆ တၢ်လူလီၤယၤ ဒ်စပံးထံလၢ တၢ်လုၢ်တၢ်ပာ်အဂီၢ်အသိးလံ ဒီးတၢ်ဆၢကတီၢ်လၢ ယကထူၣ်ဖျဲးထီၣ်န့ၣ် ဘူးထီၣ်လံ. ၇ တၢ်ဒုးလၢအဂ့ၤန့ၣ် ယဒုးအီၤဝံၤလံ, ယဃ့ၢ်တၢ်လၢ တၢ်ဃ့ၢ်ပြၢအပူၤ တုၤလၢအကတၢၢ်လံ ဒီးယပၢၤဃာ်စ့ၢ်ကီး တၢ်နာ်လီၤ. ၈ စးထီၣ်လၢ ဆၢကတီၢ်ခဲအံၤန့ၣ် တၢ်တီတၢ်လိၤ အခိၣ်သလုး အိၣ်ပာ်လီၤအသးလၢယဂီၢ်လီၤ. ကစၢ်လၢအမ့ၢ် စံၣ်ညီၣ်ကွီၢ်လၢ အတီအလိၤတဂၤန့ၣ် ကဟ့ၣ်ယၤ ခိၣ်သလုးအံၤ ဒ်ခိၣ်ဖးအသိး ဖဲမုၢ်နံၤအဝဲန့ၣ်လီၤ. ဘၣ်ဆၣ် တမ့ၢ်ထဲ ယၤတဂၤဘၣ်, ကဟ့ၣ်စ့ၢ်ကီး ပှၤခဲလၢာ်လၢ အအဲၣ်ဒိးလၢ အဝဲကပာ်ဖျါထီၣ်အသးလီၤ.

၉ ဂုာ်ကျဲးစၢးလၢ အဂ့ၤကတၢၢ် ဒ်သိး နကဟဲလၢယအိၣ်ချ့ချ့တက့ၢ်. ၁၀ စီၤဒ့မၤန့ၣ် မ့ၢ်လၢအဝဲအဲၣ်တၢ်လၢ စိၤခဲအံၤတဖၣ်အဃိ အဝဲပာ်တ့ၢ်ကွံာ်ယၤ ဒီးလဲၤဝဲလၢ ဝ့ၢ်သ့းစၤလနံလံ. မ့မ့ၢ် စီၤကြံစကံၣ် န့ၣ်လဲၤဝဲလၢကလၤတံ ဒီးစီၤတံတူးန့ၣ်လၢ ဒၤလမါတံၤလီၤ. ၁၁ ပှၤလၢအအိၣ်ဒီးယၤန့ၣ် အိၣ်ထဲ စီၤလူၤကၣ်တဂၤလီၤ. စီၤမၢ်ကူး ကဲတၢ်မၤစၢၤလၢယဂီၢ်လၢ တၢ်စံၣ်တဲၤတဲလီၤတၢ်မၤအပူၤအဃိ ဟဲကိးဃုာ်ဒီးအီၤတက့ၢ်. ၁၂ မ့မ့ၢ် စီၤတူဃံၤကူးန့ၣ် ယဆှၢလီၤအီၤဆူ ဝ့ၢ်အ့းဖ့းစူးလီၤ. ၁၃ ဖဲနဟဲအခါ ဟဲစိာ်ယဆ့ကၤကလၢၤလၢ ယပာ်တ့ၢ်ဒီး စီၤကၢ်ပူး ဖဲဝ့ၢ်တြိၤအါန့ၣ်တက့ၢ်. ဒီးဟဲစိာ်ဃုာ်ဒီး လံာ်အထူတဖၣ် လီၤဆီဒၣ်တၢ် လံာ်တၢ်ဖံးတဖၣ်တက့ၢ်.

၁၄ ပှၤပိာ်တိၢ်ဘီဖိ စီၤအလ့းစၣ်ဒြူးန့ၣ် မၤအၢမၤနးယၤဒိၣ်မးလီၤ. ယဟိဝၤယွၤ ကဟ့ၣ်ကၣ်က့ၤအီၤ ဒ်တၢ်လၢ အမၤဝဲတဖၣ်အသိးန့ၣ်လီၤ. ၁၅ ဒီးမ့ၢ်လၢ အဝဲထီဒါ ပတၢ်ကတိၤတဖၣ် ဆူၣ်မးအဃိ နၤစ့ၢ်ကီး နကြၢးပလီၢ်နသးလၢအီၤလီၤ.

၁၆ ဖဲယတဲဆၢက့ၤတၢ် လၢကဒီသဒၢလီၤယသးအဂီၢ် အဆိကတၢၢ်တဘျီန့ၣ် ပှၤတဟဲအိၣ်ဃူယၤ နီတဂၤဘၣ်. အဝဲသ့ၣ်ပာ်တ့ၢ်ယၤ ကိးဂၤဒဲးလီၤ. မ်ကစၢ်ယွၤ သုတဟံးန့ၢ် အဝဲသ့ၣ်အရ့တဂ့ၤ. ၁၇ ဘၣ်ဆၣ် ကစၢ်ဆၢထၢၣ်အိၣ်ဘူးဒီးယၤ ဒီးထၢနုာ် တၢ်စိတၢ်ကမီၤလၢယပူၤ ဒ်သိးယကစံၣ်တဲၤတဲလီၤတၢ် လၢတၢ်လီၢ်ဝးဝး* ဒီးဒ်သိး ပှၤကလုာ်ခဲလၢာ် ကနၢ်ဟူဘၣ်ဝဲအဂီၢ်လီၤ. တကးဒံးဘၣ် တၢ်မၤပူၤဖျဲးထီၣ်ကွံာ်ယၤလၢ ခ့ယုၢ်အကိာ်ပူၤလီၤ. ၁၈ ကစၢ် ကမၤပူၤဖျဲးယၤလၢ တၢ်မၤအအၢအသီ ခဲလၢာ်အပူၤ ဒီးအုၣ်က့ၤခီၣ်က့ၤယၤ ဒီးဆှၢယၤဆူ မူခိၣ်အဘီအမုၢ်အပူၤလီၤ. မ်တၢ်လၤကပီၤ အိၣ်ဒီးအီၤ အစိၤစိၤဃၣ်ဃၣ် လီၤထူလီၤယိာ်တက့ၢ်. အၤမ့ၣ်.

၁၉ ဆၢဂ့ၤဆၢဝါန့ၢ်ယၤ နီၢ်ပြံစကံးလၤ ဒီးစီၤအကူလၤ ဒီးစီၤအီးနံၤစံဖရူး အဟံၣ်ဖိဃီဖိတက့ၢ်.

၂၀ စီၤအ့ရၤစတူး အိၣ်တ့ၢ်လၢ ဝ့ၢ်ကရံၣ်သူးအပူၤ, မ့မ့ၢ် စီၤတြီဖံမူးန့ၣ် အဆိးက့အဃိ ယပာ်တ့ၢ်အီၤလၢ ဝ့ၢ်မံလ့ၤတူးအပူၤလီၤ. ၂၁ ဂုာ်ကျဲးစၢး လၢအဂ့ၤကတၢၢ် ဒ်သိး နကဟဲတုၤလၢ တၢ်ဂိၢ်ခါ တချုးဘၣ်ဒံးဘၣ်န့ၣ်တက့ၢ်.

စီၤအူၤဘူလူး, စီၤပူဒံၣ်, စီၤလံနူး, နီၢ်ကျီၢ်ဒံ ဒီးဒီပုၢ်ဝဲၢ်ခွါခဲလၢာ် ဆၢဂ့ၤဆၢဝါနၤလီၤ.

၂၂ မ်ကစၢ်ဆိၣ်ဂ့ၤ တၢ်ပာ်သူၣ်ပာ်သးလၢ နပာ်ဖျါထီၣ်အီၤန့ၣ်တက့ၢ်. ဒီးမ်သုဒိးန့ၢ်ဘၣ် အတၢ်သးကညီၤ ဒိၣ်ဒိၣ်မုၢ်မုၢ်တက့ၢ်.