၁ ပ့းတရူး

၅ ခီဖျိလၢ ယမ့ၢ်စ့ၢ်ကီး တၢ်အိၣ်ဖှိၣ်သးပှၢ် ဒီးပှၤလၢအထံၣ်တ့ၢ် တၢ်လၢ ခရံာ်တူၢ်ဘၣ်ဝဲတဖၣ် ဒီးပှၤလၢအကန့ၢ်ဃုာ် တၢ်လၤကပီၤလၢ တၢ်ကလီၣ်ဖျါထီၣ်အီၤအဃိ ယဃ့ကညး တၢ်အိၣ်ဖှိၣ်သးပှၢ်တဖၣ် လၢသုကျါလၢ ၂ ဒ်ပှၤကွၢ်သိအသိး အံးထွဲကွၢ်ထွဲ ကစၢ်ယွၤအသိလၢ အအိၣ်လၢ သုတၢ်ကွၢ်ထွဲ အဖီလာ်တက့ၢ်. ဒ်ပှၤကွၢ်ထွဲတၢ်တဖၣ်အသိး မၤသုမူဒါလၢ တၢ်သူၣ်အိၣ်သးအိၣ်လၢ ကစၢ်ယွၤအမဲာ်ညါ ဒီးတမ့ၢ်လၢ တၢ်မၢဆူၣ်အဃိဘၣ်န့ၣ်တက့ၢ်. ဒီးတဘၣ်မၤအီၤလၢ တၢ်သးကွံလၢ သုကမၤန့ၢ်တၢ်လၢ သုနီၢ်ကစၢ်အဂီၢ်အဃိဘၣ်, မ့မ့ၢ် မၤအီၤလၢ တၢ်သူၣ်ဆူၣ်သးဆူၣ်အပူၤတက့ၢ်. ၃ ဒီးတဘၣ်ပာ်သုသး ဒ်ကစၢ်အသိး လၢပှၤလၢအမ့ၢ် ကစၢ်ယွၤ အတၢ်န့ၢ်သါအံၤ အဖီခိၣ်တဂ့ၤ. လၢတၢ်န့ၣ်အလီၢ် ကဲထီၣ်တၢ်ဒိတၢ်တဲာ်လၢ သိတဖုန့ၣ်အဂီၢ်တက့ၢ်. ၄ ဖဲပှၤကွၢ်သိအခိၣ် ပာ်ဖျါထီၣ်အသးအခါ သုကဒိးန့ၢ်ဘၣ် တၢ်လၤကပီၤအခိၣ်သလုးလၢ အဟးဂီၤတသ့ဘၣ်န့ၣ်လီၤ.

၅ ဒ်န့ၣ်အသိး သုဝဲလၢအမ့ၢ် ပိာ်ခွါလၢ အသးစၢ်တဖၣ်န့ၣ် ဒိးပၢသုသးလၢ ပိာ်ခွါလၢ အသးပှၢ်တဖၣ်အဖီလာ်တက့ၢ်. ဘၣ်ဆၣ် သုဝဲခဲလၢာ် ရ့လိာ်သးတဂၤဒီးတဂၤလၢ တၢ်ဆီၣ်လီၤသးအပူၤတက့ၢ်. ကစၢ်ယွၤန့ၣ် ထီဒါဝဲ ပှၤလၢအပာ်ထီၣ်ထီအသး, မ့မ့ၢ်ပှၤလၢ အဆီၣ်လီၤအသးန့ၣ် အဝဲပာ်ဖျါထီၣ် တၢ်သးကညီၤ ဒိၣ်ဒိၣ်မုၢ်မုၢ်လၢ အဝဲသ့ၣ်အဖီခိၣ်လီၤ.

၆ လၢတၢ်န့ၣ်အဃိဆီၣ်လီၤသုသးလၢ ကစၢ်ယွၤလၢ အစိကမီၤဒိၣ်တဂၤန့ၣ် အစုဖီလာ်တက့ၢ်. သုမ့ၢ်မၤဒ်န့ၣ်ဒီး တၢ်ဆၢကတီၢ်မ့ၢ်ဘၣ်န့ၣ် အဝဲ ကပာ်ထီၣ်ထီ သုလီၤ. ၇ ဒီးမ့ၢ်လၢ အသးအိၣ်သုအဃိ ပာ်ထီၣ် သုတၢ်ဘၣ်ယိၣ်ဘၣ်ဘှီခဲလၢာ်လၢ အဝဲဒၣ်အအိၣ်တက့ၢ်. ၈ အိၣ်ဆၢပံၢ်ကလာ် ဒီးစီၣ်မဲာ်စီၣ်နါတက့ၢ်. သုဒုၣ်သုဒါ မုၣ်ကီၤလံၢ် ဟးဝ့ၤဝီၤ ဒ်ခ့ယုၢ်လၢအကညီၤတၢ် ရုၢ်ရုၢ်အသိး ဒီးဃုပှၤတဂၤဂၤလၢ အကယူၢ်လီၤကွံာ်ဝဲလီၤ. ၉ ဘၣ်ဆၣ် ထီဒါအီၤ ဒီးအိၣ်ဆၢထၢၣ် ဂၢၢ်ဂၢၢ်ကျၢၤကျၢၤလၢ တၢ်နာ်အပူၤတက့ၢ်. ဒ်သုသ့ၣ်ညါအသိး သုဒီပုၢ်ဝဲၢ်ခဲလၢာ်လၢ ဟီၣ်ခိၣ်ဒီဘ့ၣ်န့ၣ် တူၢ်ဘၣ်တၢ်နးတၢ်ဖှီၣ် ဒ်အံၤတဖၣ်စ့ၢ်ကီးလီၤ. ၁၀ ဘၣ်ဆၣ် သုတူၢ်တၢ်တစိၢ်တလီၢ် မ့ၢ်ဝံၤအလီၢ်ခံ တၢ်သးကညီၤ ဒိၣ်ဒိၣ်မုၢ်မုၢ်ခဲလၢာ် အကစၢ်လၢ အကိးန့ၢ်သု ဒ်သိးသုကအိၣ်လၢ ယ့ၣ်ၡူးခရံာ်အပူၤ ဒီးဒိးန့ၢ်ဘၣ်တၢ်လၤကပီၤ အထူအယိာ်အဂီၢ်န့ၣ် အနီၢ်ကစၢ်ဒၣ်ဝဲ ကဟ့ၣ်သုတၢ်သိၣ်လိ တုၤလၢအလၢအပှဲၤတစုလီၤ. အဝဲကမၤဂၢၢ်မၤကျၢၤသု, အဝဲကဒုးဆူၣ်ထီၣ်သု ဒီးအဝဲကဒုးဆၢထၢၣ်သု ဂၢၢ်ဂၢၢ်ကျၢၤကျၢၤလီၤ. ၁၁ တၢ်ဂံၢ်တၢ်ဘါ မ့ၢ်အတၢ် လီၤထူလီၤယိာ်လီၤ. အၤမ့ၣ်.

၁၂ ယကွဲးန့ၢ်သု လံာ်ပရၢ ဖုၣ်ဖုၣ်ဖိတဘ့ၣ်အံၤ ဒ်သိးကဟ့ၣ်ဂံၢ်ဟ့ၣ်ဘါသု ဒီးအုၣ်ယသးလၢ တၢ်သူၣ်ဆူၣ်သးဆူၣ်အပူၤ ဘၣ်ဃးဒီး ကစၢ်ယွၤ အတၢ်သးကညီၤဒိၣ်ဒိၣ်မုၢ်မုၢ်န့ၣ် မ့ၢ်တၢ်လၢအမ့ၢ်အတီန့ၣ်လီၤ. ယကွဲးလံာ်အံၤ ခီဖျိစီၤစံၤလဝ့နုၤ လၢယပာ်အီၤဒ် ဒီပုၢ်ဝဲၢ်လၢ အသးတီတဂၤလီၤ. ဆၢထၢၣ်ဂၢၢ်ဂၢၢ်ကျၢၤကျၢၤလၢ ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ် အပူၤတက့ၢ်. ၁၃ ပိာ်မုၣ်လၢ အအိၣ်လၢ ဝ့ၢ်ဘၤဘူၤလိၣ်အပူၤ လၢအဘၣ်တၢ်ဃုထၢအီၤ ဒ်သုအသိး ဒီးယဖိခွါစီၤမၢ်ကူးစ့ၢ်ကီး ဆၢဂ့ၤဆၢဝါသုလီၤ. ၁၄ ဆၢဂ့ၤဆၢဝါလိာ်သး တဂၤဒီးတဂၤလၢ တၢ်အဲၣ်တၢ်ကွံအပူၤတက့ၢ်.*

သုဝဲခဲလၢာ်လၢ အအိၣ်လၢခရံာ်အပူၤန့ၣ် မ်သုအိၣ်ဒီး တၢ်ဃူတၢ်ဖိးတက့ၢ်.