၁ ပ့းတရူး
၄ ခရံာ်တူၢ်ဘၣ်တၢ်လၢ နီၢ်ခိအဃိ သုဝဲစ့ၢ်ကီး သုကဘၣ် ကတဲာ်ကတီၤထီၣ်သုသး ဃုာ်ဒီးတၢ်ပာ်သူၣ်ပာ်သး တမံၤဃီဒ်သိးဒီးအီၤ, မ့ၢ်လၢ ပှၤလၢအတူၢ်ဘၣ်တၢ်လၢ နီၢ်ခိန့ၣ် ပတုာ်မၤဝဲ တၢ်ဒဲးဘး, ၂ ဒ်သိးအတၢ်အိၣ်မူလၢ အအိၣ်တ့ၢ်ဒံးလၢ နီၢ်ခိအံၤ အဝဲကအိၣ်မူလၢ ကစၢ်ယွၤ အတၢ်ဘၣ်သးအဂီၢ် ဒီးတမ့ၢ်လၢ ပှၤဟီၣ်ခိၣ်ဖိ အတၢ်သူၣ်လီသးကွံအဂီၢ်လၢၤဘၣ်. ၃ ဒီးတၢ်ဆၢကတီၢ်လၢ သုသူအီၤလၢအပူၤကွံာ် ဒ်သိးသုကမၤ ဒ်ပှၤကလုာ်တဖၣ်အသိးအဂီၢ်န့ၣ် ဘၣ်လံလၢသုဂီၢ်လံ. ဖဲန့ၣ်အဆၢကတီၢ် သုတၢ်အိၣ်မူပှဲၤဒီး တၢ်မၤကမၣ်တၢ်လၢ တအိၣ်ဒီးတၢ်မဲာ်ဆှး,* တၢ်သူၣ်လီသးကွံလၢ တၢ်ပၢၤသူၣ်ပၢၤသးတအိၣ်ဘၣ်, တၢ်အီသံးအါတလၢ, မူးပွဲလၢ အလီၤရၢၢ်လီၤစၢၢ်, တၢ်အီပြၢလိာ်သးလၢသံး ဒီးတၢ်ဘါထီၣ်တၢ်ဂီၤတၢ်ဖှီၣ်လၢ အပၣ်ဃုာ်ဒီးတၢ်လၢ အလီၤသးဘၣ်အၢတဖၣ်န့ၣ်လီၤ. ၄ မ့ၢ်လၢ သုတဆဲးလဲၤတၢ်လၢ တၢ်အိၣ်မူလုၢ်လၢ် သကဲာ်ပဝးလၢ အဘၣ်အၢဘၣ်သီ ဒ်အဝဲသ့ၣ်အသိးလၢၤဘၣ်အဃိ အဝဲသ့ၣ် ကမၢကမၣ် ဒီးတဲအၢတဲသီသုလီၤ. ၅ ဘၣ်ဆၣ်အဝဲသ့ၣ် ကဘၣ်ဟ့ၣ်တၢ်စံးဆၢဆူ ပှၤလၢအအိၣ်ကတဲာ်ကတီၤအသးလၢ ကစံၣ်ညီၣ်ပှၤမူတဖၣ် ဒီးပှၤသံတဖၣ်န့ၣ် အအိၣ်လီၤ. ၆ လၢတၢ်န့ၣ်အဃိ တၢ်သးခုကစီၣ် ဘၣ်တၢ်စံၣ်တဲၤတဲလီၤစ့ၢ်ကီးအီၤလၢ ပှၤသံအအိၣ်, ဒ်သိးအဝဲသ့ၣ် မ့ၢ်ဘၣ်တၢ်စံၣ်ညီၣ် လၢအတၢ်အိၣ်ဖျါလၢခိ ဒ်ပှၤဟီၣ်ခိၣ်ဖိ အတၢ်ထံၣ်အသိး သနာ်က့ အဝဲသ့ၣ်ကအိၣ်မူ လီၤပလိာ်လိာ်အသးဒီး သးစီဆှံ ဒ်ကစၢ်ယွၤအတၢ်ထံၣ် အသိးအဂီၢ်လီၤ.
၇ တၢ်ခဲလၢာ် အကတၢၢ်န့ၣ် ဘူးထီၣ်လံအဃိ ကဲထီၣ်ပှၤလၢ အဆိကမိၣ်ထံတၢ် သ့ဂ့ၤဂ့ၤ ဒီးအိၣ်ကတဲာ်ကတီၤသုသး* ထီဘိလၢ သုကဃ့ဘါထုကဖၣ်တၢ် အဂီၢ်တက့ၢ်. ၈ ဒီးလၢတၢ်ခဲလၢာ် အဖီခိၣ်န့ၣ် သုကဘၣ် အဲၣ်လိာ်ကွံလိာ်သုသးဒိၣ်မး မ့ၢ်လၢ တၢ်အဲၣ်တၢ်ကွံန့ၣ် ကျၢၢ်ဘၢတၢ်ဒဲးဘး အါမးအဃိလီၤ. ၉ သးအိၣ် တူၢ်လိာ်ခီၣ်ဆၢလိာ်သး တဂၤဒီးတဂၤ ဒီးတဘၣ် ကဒူးကဒ့ၣ်လိာ်သးတဂ့ၤ. ၁၀ ပဝဲသ့ၣ်တဖၣ် ပဒိးန့ၢ်ဘၣ်တၢ်ဟ့ၣ် တဂၤတမံၤအဃိ ဒ်ပှၤပၢၤတၢ်ဖိလၢအဂ့ၤ လၢအဒိးန့ၢ်ဘၣ် ကစၢ်ယွၤ အတၢ်သးကညီၤဒိၣ်ဒိၣ်မုၢ်မုၢ်လၢ အဘၣ်တၢ်ပာ်ဖျါထီၣ်အီၤလၢ ကျဲအကလုာ်ကလုာ်အသိး သူတၢ်ဟ့ၣ်အံၤ ဒ်သိးကမၤစၢၤလိာ်သး တဂၤဒီးတဂၤအဂီၢ်တက့ၢ်. ၁၁ ပှၤတဂၤဂၤမ့ၢ်တဲတၢ်န့ၣ် မ်အတဲတၢ်ကစီၣ်လၢ အဟဲလၢ ကစၢ်ယွၤအအိၣ်န့ၣ်တက့ၢ်. ပှၤတဂၤဂၤ မ့ၢ်မၤစၢၤပှၤဂၤန့ၣ် မ်အသန့ၤအသးလၢ တၢ်ဂံၢ်တၢ်ဘါလၢ ကစၢ်ယွၤဟ့ၣ်လီၤဝဲန့ၣ်တက့ၢ်. မ့ၢ်မၤဝဲဒ်န့ၣ်န့ၣ် ကစၢ်ယွၤကဘၣ် တၢ်မၤလၤကပီၤအီၤလၢ တၢ်ခဲလၢာ်အပူၤ ခီဖျိယ့ၣ်ၡူးခရံာ်လီၤ. တၢ်လၤတၢ်ကပီၤ ဒီးတၢ်ဂံၢ်တၢ်ဘါန့ၣ် မ့ၢ်ကစၢ်ယွၤအတၢ် အစိၤစိၤအဃၣ်ဃၣ် လီၤထူလီၤယိာ်လီၤ. အၤမ့ၣ်.
၁၂ ဒီပုၢ်ဝဲၢ်သးဘိသ့ၣ်ဧၢ, တဘၣ်ကမၢကမၣ်လၢ တၢ်မၤကွၢ်လၢ အလီၤဂာ်ဒ် မ့ၣ်အူအသိးလၢ သုထံၣ်ဘၣ်တဖၣ်အံၤ အဃိတဂ့ၤ. တၢ်လၢ အကဲထီၣ်သးဒီးသုတဖၣ်အံၤန့ၣ် တမ့ၢ်တၢ်လီၤဆီဘၣ်. ၁၃ လၢတၢ်န့ၣ်အလီၢ် သုတူၢ်ဃုာ် ခရံာ်အတၢ်နးတၢ်ဖှီၣ်တဖၣ် တုၤလၢ အပတီၢ်ထဲလဲၣ်န့ၣ် ဆဲးသးခုလၢ တၢ်ဂ့ၢ်အဝဲန့ၣ် အဃိတက့ၢ်. သုမ့ၢ်မၤဒ်န့ၣ်န့ၣ် ဖဲခရံာ်အလၤကပီၤ ဘၣ်တၢ်လီၣ်ဖျါထီၣ်အီၤအခါ သုကသးခုဒိၣ်မးလီၤ. ၁၄ သုမ့ၢ်ဘၣ် တၢ်ဒုၣ်ဒွဲၣ်စံးအၢသုလၢ ခရံာ်အမံၤအဃိန့ၣ် သုကသးခု, မ့ၢ်လၢ ကစၢ်ယွၤအသးစီဆှံလၢ အအိၣ်ဒီးအလၤကပီၤန့ၣ် အိၣ်လၢသုလိၤအဃိလီၤ.
၁၅ ဘၣ်ဆၣ် သုဝဲတဂၤဂ့ၤ တဂၤဂ့ၤ သုမ့ၢ်ဘၣ်တူၢ်တၢ်န့ၣ် တဘၣ်မ့ၢ်လၢ သုကဲပှၤမၤသံတၢ်, ပှၤဟုၣ်တၢ်, ပှၤမၤကမၣ်တၢ် မ့တမ့ၢ် ပှၤလၢ အဟးမၤဘၣ်ထွဲလိာ်သးဒီး ပှၤဂၤ အတၢ်ဂ့ၢ်တၢ်ကျိၤအဃိတဂ့ၤ. ၁၆ ဘၣ်ဆၣ် ပှၤတဂၤဂၤ မ့ၢ်တူၢ်ဘၣ်တၢ် ဒ်ခရံာ်ဖိတဂၤအသိးန့ၣ် မ်အသုတမဲာ်ဆှးတဂ့ၤ. လၢတၢ်န့ၣ်အလီၢ် မ်အဆဲးမၤလၤကပီၤကစၢ်ယွၤ ခီဖျိလၢအအိၣ်မူဒ် ခရံာ်ဖိအသိးတက့ၢ်. ၁၇ ဆၢကတီၢ်ခဲအံၤ မ့ၢ်တၢ်ဆၢကတီၢ်လၢ အဘၣ်တၢ်ပာ်ပနီၣ်အီၤလၢ တၢ်ကစံၣ်ညီၣ်တၢ်အဂီၢ်ဒီး တၢ်ကစးထီၣ်ဆိအီၤလၢ ကစၢ်ယွၤအဟံၣ်လီၤ. တၢ်စံၣ်ညီၣ်အံၤ မ့ၢ်စးထီၣ် ဆိလၢပကျါန့ၣ် မ့မ့ၢ်ပှၤလၢ အတဒိကနၣ် ကစၢ်ယွၤ အတၢ်သးခုကစီၣ်ဘၣ်န့ၣ် တၢ်ကမၤအသးဒီးအဝဲသ့ၣ်ဒ်လဲၣ်. ၁၈ တၢ်ကွဲးအသးတဲဝဲလၢ “မ့ၢ်ကီဝဲလၢ ပှၤတီပှၤလိၤ ကတုၤလၢ တၢ်အုၣ်က့ၤခီၣ်က့ၤအဂီၢ်န့ၣ် ပှၤလၢအတယူးတယီၣ်ယွၤ ဒီးပှၤတၢ်ဒဲးဘးဖိန့ၣ် တၢ်ကမၤအသးဒီး အဝဲသ့ၣ်ဒ်လဲၣ်.” ၁၉ မ့မ့ၢ်ဒ်န့ၣ်န့ၣ် ပှၤလၢအတူၢ်ဘၣ်တၢ် ခီဖျိလၢ အမၤတၢ်ဘၣ် ကစၢ်ယွၤအသးအဃိန့ၣ် မ်အဆဲးအးလီၤအသးလၢ တၢ်ဘၣ်တ့ကစၢ်လၢ အတီတဂၤန့ၣ်အအိၣ် ဒီးဆဲးမၤတၢ်ဂ့ၤတက့ၢ်.