လီၣ်ဖျါ

၁၀ ဒီးယထံၣ် မူခိၣ်ကလူးလၢ အဂံၢ်ဆူၣ်ဘါဆူၣ် အဂၤတဂၤ ဟဲလီၤလၢမူခိၣ်လီၤ. အဝဲဘိၣ်ဘံအသးလၢ တၢ်အၢၣ်တလိၣ် ဒီးတၢၢ်ကွဲၤအိၣ်လၢ အခိၣ်သၣ်ဃံအလိၤ ဒီးအမဲာ်သၣ်န့ၣ် မၤအသးဒ်မုၢ်အသိး ဒီးအခီၣ်မၤအသးဒ် မ့ၣ်အူအထူၣ်အသိးလီၤ. ၂ ဒီးလၢအစုပူၤန့ၣ် လံာ်ထူဆံးဆံးဖိလၢ အအိးထီၣ်ပာ်စၢၤအသး အိၣ်ဝဲတဘ့ၣ်လီၤ. ဒီးအဝဲပာ် အခီၣ်ထွဲတခီလၢ ပီၣ်လဲၣ်အလိၤ ဒီးအခီၣ်စ့ၣ်တခီလၢ ဟီၣ်ခိၣ်အလိၤလီၤ. ၃ ဒီးအဝဲကိးပသူထီၣ်လၢ အကလုၢ်ဖးဒိၣ် ဒ်ခ့ယုၢ်ကညီၤတၢ် သီၣ်ဝဲအသိးန့ၣ်လီၤ. ဖဲအဝဲကိးပသူထီၣ်အခါ ယနၢ်ဟူ လီသီၣ်နွံထံၣ် အကလုၢ်တဖၣ် တဲထီၣ်တၢ်လီၤ.

၄ ဒီးဖဲလီသီၣ်နွံထံၣ် တဲတၢ်အခါ ယဘူးကကွဲးလီၤတၢ် ဘၣ်ဆၣ် ယနၢ်ဟူ တၢ်ကလုၢ်သီၣ်ထီၣ်လၢ မူခိၣ်တဲဝဲလၢ “စဲပနီၣ်ဃာ်တၢ်လၢ လီသီၣ်နွံထံၣ် တဲဝဲတဖၣ် ဒီးတဘၣ်ကွဲးလီၤအီၤတဂ့ၤ.” ၅ မူခိၣ်ကလူးတဂၤလၢ ယထံၣ် အဆၢထၢၣ်လၢပီၣ်လဲၣ် ဒီးလၢဟီၣ်ခိၣ်အလိၤန့ၣ် ယူာ်ထီၣ် အစုထွဲတခီ ဆူမူခိၣ်လီၤ. ၆ ဒီးအဝဲအၢၣ်လီၤတၢ်လၢ ပှၤတဂၤလၢအမူဝဲ အစိၤစိၤအဃၣ်ဃၣ် လီၤထူလီၤယိာ်လၢ အတ့လီၤမူခိၣ်, ဟီၣ်ခိၣ်, ပီၣ်လဲၣ် ဒီးတၢ်အိၣ်လၢအပူၤခဲလၢာ်န့ၣ် အမဲာ်ညါလၢ “တၢ်တထုးယံာ် တၢ်ဆၢကတီၢ်လၢၤဘၣ်. ၇ ဘၣ်ဆၣ် ဖဲမုၢ်နံၤတဖၣ်လၢ မူခိၣ်ကလူးနွံဂၤတဂၤ ဘူးကအူထီၣ်ဝဲ အကွဲၤအခါ တၢ်ခူသူၣ်စီဆှံလၢ ကစၢ်ယွၤ ဘိးဘၣ်သ့ၣ်ညါ အကုၢ်လၢအမ့ၢ်ဝံတဖၣ် ဒ်တၢ်သးခုကစီၣ်အသိးန့ၣ် ဘၣ်တၢ်မၤ လၢထီၣ်ပှဲၤထီၣ်အီၤ သပှၢ်တၢၢ်လီၤ.”

၈ ဒီးယနၢ်ဟူ တၢ်ကလုၢ်သီၣ်လၢ မူခိၣ်န့ၣ် တဲကဒီးယၤလၢ “လဲၤဟံးန့ၢ် လံာ်ထူတဘ့ၣ်လၢ အအိးထီၣ် ပာ်စၢၤအသးလၢ မူခိၣ်ကလူးလၢ အဆၢထၢၣ်လၢ ပီၣ်လဲၣ်ဒီး ဟီၣ်ခိၣ်အလိၤတဂၤန့ၣ် အစုပူၤတက့ၢ်.” ၉ ယလဲၤလၢ မူခိၣ်ကလူးတဂၤန့ၣ်အအိၣ် ဒီးမၢအဟ့ၣ်လီၤယၤ လံာ်ထူဆံးဆံးဖိ တဘ့ၣ်အံၤလီၤ. အဝဲတဲယၤလၢ “ဟံးန့ၢ်ဒီးအီၣ်ကွံာ်အီၤတက့ၢ်. ဒီးအကမၤခၣ်ထီၣ်နဟၢဖၢ ဘၣ်ဆၣ် ဖဲအအိၣ်လၢ နကိာ်ပူၤအခါန့ၣ် ကဆၢဝဲဒ်ကနဲစီအသိးလီၤ.” ၁၀ ယဟံးန့ၢ် လံာ်ထူဆံးဆံးဖိ တဘ့ၣ်အံၤလၢ မူခိၣ်ကလူးတဂၤန့ၣ် အစုပူၤ ဒီးယအီၣ်အီၤလီၤ. လၢယကိာ်ပူၤန့ၣ် ဆၢဝဲဒ် ကနဲစီအသိး ဘၣ်ဆၣ် ဖဲယအီၣ်အီၤဝံၤအခါ လၢယဟၢဖၢအပူၤန့ၣ် ခၣ်ဝဲလီၤ. ၁၁ ဒီးအဝဲသ့ၣ် တဲဘၣ်ယၤလၢ “နကဘၣ်တဲကဒီး ဝံအတၢ်စံးပာ် ဘၣ်ဃးဒီးပှၤအဒူၣ်တဖၣ်, ပှၤကလုာ်တဖၣ်, ပှၤတဲတၢ်အကျိာ်တဖၣ် ဒီးစီၤပၤအါဂၤအဂ့ၢ်လီၤ.”